Gürcüstanın müəmmalı gələcəyi
Ekspertlər iddia edirlər ki, ölkə çox həssas
hadisələrin astanasındadır
Qonşumuz, strateji
müttəfiqimiz hesab olunan Gürcüstanda siyasi
sabitlik yenidən pozulub. Baş nazirGeorgi Qaxariyanın sensasion istefa
qərarı tək ölkədə deyil, Gürcüstanda marağı olan dövlətlərin də diqqətinə səbəb
olub. Bu da yaxın vaxtlarda Gürcüstanda nəinki hakimiyyət, hakim partiyanın da
dəyişmək ehtimalını gücləndirib. Hər halda, eks-prezident Mixail Saakaşvili və
onun "Vahid Milli Hərəkat” Partiyası buna ümidlidir. Onlar 2012-ci ildən
yenidən hakimiyyətə dönməyə bu qədər yaxın olmayıblar. Qaxariya istefa qərarı
ilə onlarda belə bir ümid yaradıb. Hələ oktyabrda parlament seçkisindən sonra
ölkədə mümkün siyasi böhranın işartıları görünürdü. MilyarderBidzina İvanişvilinin təsis etdiyi siyasi partiya hakimiyyətini
gücləndirdi. Müxalifət qrupları isə etiraz olaraq, hətta parlamentdəki
yerlərini tutmaqdan belə imtina etdilər.
Siyasi qütbləşmə güclənə bilərmi?
Beləliklə, Georgi Qaxariyamüxalifətin "Vahid Milli Hərəkatı” Partiyasının sədriNika Melianın həbs olunması ilə bağlı məhkəmə qərarından sonra istefa verdi. Melia 2019-cu ilin yayında parlamentin qarşısında zorakı etirazların təşkilində suçlanır. Gürcüstanda səfərdə olan rusiyalı deputatın parlamentdə spikerin yerində əyləşməsi qəzəb doğurmuş, etirazlara səbəb olmuşdu. Sonradan hakim "Gürcü Arzusu” Partiyası müxalifətlə danışıqlar nəticəsində seçki sistemində islahatları razılaşdırdı. Oktyabrın 31-də yeni sistemlə keçirilən seçkilər nəticəsində yenə də "Gürcü Arzusu” 150 yerlik parlamentdə çoxluğu qazandı. Qaxariya istefasını açıqlayanda ölkədə siyasi qütbləşmə təhlükəsini vurğulayıb. "Gürcü Arzusu”ndan deputatNikoloz Samxaradzedeyib ki, Qaxariya istefa verməyib, həm də "Gürcü Arzusu”nu tərk edib. İstefadan sonra Daxili İşlər Nazirliyi Melianın həbsini təxirə saldığını bəyan etdi.
Ölkə demokratiya reytinqində geriləyib
Bir faktı da
qeyd edək ki, Mixail Saakaşvili 2003-cü ildə xalq etirazı nəticəsində
hakimiyyətə gələndən indiyədək Gürcüstan hələ də tam demokratik ölkə kimi
oturuşa bilməyib. "Freedom House” təşkilatı bu yaxınlardabildirib
ki,Gürcüstan son illər demokratiya reytinqində geriləyib və hazırda
"keçid, yaxud hibrid rejim” kateqoriyasına düşüb. Sabitsizlik, Qərb
tərəfdarlarının ölkəni Avropa İttifaqı və NATO-ya doğru aparması cəhdlərinə
zərbə vurub. Amma yenə də Qərbdə bəziləri Gürcüstanı Rusiyanın orbitindən
çıxmağa namizəd ölkə kimi görürlər. "Regionun başqa heç
bir yerində bu qədər adam Rusiya prezidenti Vladimir Putinin nifrət etdiyi Qərb
idarəçiliyini, qayda-qanunu, liberal düzəni arzulamır”,– müxalifətdən deputatSalome
Samadaşvili2019-cu
ildəyazırdı. İqtisad faktorlar da var: Gürcüstan bir sıra əsas ticarət
yollarının üstündə yerləşir. Siyasi sabitsizlik isə kənardan bu ölkəyə
investisiya həvəsini azaldıb. Gürcüstanlıların çoxu Putinin Kremlinə
hiddətləyanaşırlar. 2018-ci ildə keçirilmişsorğuya görə,
gürcüstanlıların 85 faizi Rusiyanı "siyasi təhdid” hesab edir. Hazırda ölkə
ərazisinin beşdə biri Rusiyanın və onun dəstəklədiyi separatçı qrupların
nəzarəti altındadır. Di gəl, Gürcüstan, şərabın, mineral suların, kənd
təsərrüfatı məhsullarının ixracında Rusiyadan asılıdır. Moskva bəzən keyfiyyəti
əsas gətirərək ixraca qadağa qoyur. İvanişvilinin Rusiyaya bağlılığı da
gürcüstanlıları düşündürən suallardandır. Müxalifət mütəmadi deyir ki, onun
biznes imperiyasının Rusiyaya bağlı kökləri bu adamı oradakı sənaye və
kəşfiyyat maraqlarından asılı edir. Qaxariya özü də İvanişvili tərəfindən
siyasətə cəlb olunanacan Moskvada biznesmen idi. İvanişvili isə Rusiyadan
hansısa göstərişə qulluq etmədiyini deyir.
Ölkəni nə gözləyir?
Yeri gəlmişkən, müdafiə
naziri İrakli Qaribaşvilinin baş nazir vəzifəsinə namizədliyi irəli sürülüb.
Müvafiq qərar hakim "Gürcü Arzusu”nun iclasından sonra qəbul edilib. Xatırladaq
ki, İ. Qaribaşvili 20 noyabr 2013-cü ildən 23 dekabr 2015-ci ilədək Gürcüstanın
baş naziri olub. "Çox tezliklə qayda-qanunu bərpa edəcəyik, ölkədə konstitusion
çərçivədə zəruri olanları həyata keçirəcəyik” - deyə baş nazirliyə namizəd
bildirib. "İkinci dəfə ölkədə baş nazir olmaq böyük məsuliyyət, böyük şərəfdir.
Bizim ölkə çoxsaylı problemlərlə üz-üzədir - pandemiya, işsizlik, iqtisadi
çətinliklər, onların sürətli həlli gərəkdir”, - deyə əlavə edib. Gürcü
ekspertləri bildirir ki, Bidzina İvanişvilinin ikinci dəfə peyda olma ənənəsi
var. Əvvəl bunu özündə sınaqdan keçirdi, indi də Qaribaşvilidə həyata keçirir.
Lakin bununla heç nə dəyişməyəcək. Müxalifət nümayəndələri isə
Qaribaşvilinin altı ildən sonra yenidən
baş nazirliyə dönməsinin qəbuledilməz olduğunu bildirirlər. "Biz onun baş
nazirliyi dövrünü yaxşı xatırlayırıq, nə etdi o? Heç nə. Onlar yeni baş nazir
haqqında yox, ölkəni birdəfəlik və həmişəlik dəyişmək üçün növbədənkənar
seçkilər haqqında, inkişaf yoluna qayıtmaq haqqında düşünməlidirlər”, - deyə
gürcü müxalifətçilərindən biri bildirib.
39 yaşlı
Qaribaşvilinin Paris təhsili alması gürcüstanlılar, beynəlxalq ictimaiyyət üçün
hansısa dərəcədə təminat kimi səslənə bilər. Amma Aİ-nin Gürcüstandakı
səfiriKarl Hartzelxəbərdarlıq
edib ki, Meliaya qarşı cinayət təqibi"Gürcüstan və
demokratiyası üçün təhlükəli trayektoriyadır”. Vaşinqton da diplomatik suları durultmağa
çalışıb, amma onu da qeyd edib ki, Gürcüstanın on illərlə davam edən problemlərinə
sürətli çarə görünmür. "Meliaya qarşı hökmdən sonra yaranmış mövcud təhlükəli
vəziyyət seçki sistemi və ədliyyə sistemində on illərlə davam edən problemlərdən
qaynaqlanır. Vacib məsələlərin həlli dinc danışıqlardan keçir. Tərəfləri
sakitliyə və zorakılıqdan çəkinməyə çağırırıq”,– ABŞ-ın Tbilisidəki səfirliyinin bəyanatında
deyilir.Saakaşvili müxalifətə "birləşin” deyir
Prosesləri ciddi
şəkildə izləyən Gürcüstanın sabiq prezidenti Mixail Saakaşvilinin
bəyanatlarının ardı-arası kəsilmir. O, Gürcüstan müxalifətinə müraciət edərək, müxalif
qüvvələri birləşməyə çağırıb. Sabiq dövlət başçısı Qaxariyanın istefasını
müxalifətin böyük qələbəsi adlandırıb. Gürcü xalqının iradəsinin yerinə
yetirilməsi və növbədənkənar parlament seçkilərinin təyin olunması üçün
müxalifət partiyalarını daha böyük konsolidasiyaya dəvət edib. Keçmiş dövlət
başçısı qeyd edib ki, bu prosesə Gürcüstandakı diplomatik korpusun cəlb
olunması vacibdir. "Dayanmaq vaxtı deyil, biz işimizi sona çatdıraq” - deyən
Saakaşvilinin sözlərinə görə, Qaxariya İvanişvilinin qanlı güc nümayişində
məsuliyyəti üzərinə götürməmək üçün istefaya gedib: "Bu, həqiqətən müxalifətin
birliyinin, Nika Meliyanın və gürcü xalqının böyük qələbəsidir”. O, Gürcüstanda
artıq məhkəmənin mövcud olmadığını bildirib: "Bidzina İvanişvili bütün dövlət
institutlarını dağıdıb. İvanişvili bizim ölkəni, hər insanın vicdanını yox
edib. Gürcüstanda məhkəmə korpusu mövcud deyil. Bu, böyük qohum klanıdır. Bizim
Nika ilə fəaliyyət planımız qanunun və ədalətin keşiyində olmaqdır”.
"Gürcü Arzusu” parçalana bilərmi?
Gürcüstan
parlamentinin sədri Arçil Talakvadze özünün "Twitter” hesabında bildirib ki, parlament
yaxın günlərdə hökumətin yeni tərkibini təsdiqləyəcək. O qeyd edib ki, hakim
partiya vətəndaşların mənfəəti naminə hökumət siyasətinin davamlılığını təmin edəcək.
Qeyd edək ki, Gürcüstan qanunvericiliyinə əsasən, hakim partiya hökumətin
istefasından sonrakı 9 gün ərzində parlamentdən yeni baş nazir namizədinə, 2
həftə ərzində isə hökumətin tərkibinə etimad səsi almalıdır. Dərhal da, hakim
partiyada parçalanma yaşanacağı barədə xəbərlər dolaşmağa başlayıb. Parlamentin
sədri Arçil Talakvadze bildirib ki, ölkədə vəziyyətin nəzarətdən çıxmasına iman
verməyəcəklər: "Tam əmin etmək istəyirəm - siyasi komanda tamdır. Dövlət
orqanları öz funksiyasını yerinə yetirir. Sözsüz ki, heç bir problemə,
vəziyyətin gərginləməsinə yol vermərik. Parlament bunun təminatıdır”.
Gürcüstanı nə gözləyir?
Yeri gəlmişkən, Rusiya
mediası iddia edir ki, boz kardinal Bidzina İvanişvili rejimi indiki durumda tələyə
düşmüş durumdadır. Əsas iddia da budur ki, siyasi böhran ölkə ilə bağlı iki
əfsanəni dağıtmış oldu – daxili siyasətdə xüsusi humanizm və Moskva ilə
münasibətlərin normallaşmasında ciddi uğurların əldə olunmasını. Bu da
gələcəkdə hakimiyyətdə qalmağı çox çətin edir. Gürcü ekspert Arçil
Sixarulidzenin bununla bağlı fikirləri maraq doğurur. Onun qənaətincə, Qarabağ
müharibəsi, daha dəqiq desək, onun nəticələri Tbilisini qəfil yaxalamış oldu. "Bir
an hiss etdilər ki, Gürcüstan Cənubi Qafqazın şahmat lövhəsində az hiss olunur
və regionun gələcəyi onun iştirakı olmadan həll olunacaq. Bəlli olur ki,
tezliklə Çinin ən mühüm kommunikasiya layihələrindən biri olan "Bir dəhliz-bir
yol” Gürcüstan ərazisindən deyil, Ermənistan və işğaldan azad edilən Qarabağ
ərazisindən keçəcək. Rəsmi Bakı Yerevan-Moskva dəmir yolu xəttinin Azərbaycan
ərazisindən keçib getməsinin mümkünlüyünü də ifadə edib. Lakin Tbilisini ən çox
özündən çıxaran Rusiya XİN rəhbəri
Sergey Lavrovun ABŞ dövlət katibi Entoni Blinkenlə telefon danışığında Gürcüstanın
problemlərinin dilə gətirilməməsi olub”, - deyə bildirib. Tbilisidə hesab
edirdilər ki, Bayden administrasiyası dövründə, xüsusilə Rusiya istiqamətində
problemlərini beynəlxalq arenada genişləndirmək imkanları əldə edəcəklər.
Nikanor Meliya ətrafında yaşananlarla bağlı ekspert maraqlı fikir səsləndirir.
Bir çoxları baş naziri rusiyapərəst siyasətçi kimi qələmə verir və onun
uzaqlaşdırılmasını da məhz bununla izah edirlər. Lakin istefası ərəfəsində ABŞ
Nümayəndələr Palatasına "Gürcüstana dəstək aktı”nı müdafiə etdiyinə görə təşəkkür
edib. "Carnegie Moscow Center”in ekspertləri hesab edir ki, İvanişvili
hakimiyyəti tələyə düşüb və bunu neçə ildir ki, özü-özünə hazırlayıb. Gürcü analitiki Petre Mamradzenin ifadə
etdiyi kimi, Gürcüstanı çox maraqlı hadisələr gözləyir. Heç buna şübhə də
etmirik.
Azər NURİYEV