Gürcüstanda diskriminasiya ilə bağlı Avropa məhkəməsinə müraciət olunub

Gürcüstanın Acarıstan Muxtar Respublikasının Kobuleti şəhərində mədrəsəyə qarşı davam edən diskriminasiya ilə bağlı Avropa İnsan Haqları Məhkəməsinə müraciət olunub.
APA-nın Gürcüstan bürosunun məlumatına görə, məhkəməyə müraciət "Gürcü-müsəlman münasibətləri” təşkilatı və 7 müsəlman vətəndaşın adından İnsan Haqları üzrə Maarifləndirmə və Monitorinq Mərkəzi (EMC) və Avropa İnsan Haqları Mərkəzi (EHRAC) tərəfindən təqdim edilib. Müraciət artıq Avropa İnsan Haqları Məhkəməsində qeydiyyata alınıb.
Sənəddə qeyd olunub ki, 2014-cü ildən Kobuletidə yerli əhalinin etirazı və diskriminativ təqibinə görə mədrəsənin açılmasına icazə verilmir. Müraciət müəllifləri iddia edir ki, bununla din və təhsil azadlığı kobud formada pozulur.

Qeyd edək ki, 2014-cü ilin sentyabrında Kobuletidə müsəlman gənclərin təhsil alacağı mədrəsənin açılmasına etiraz edən şəxslər mədrəsənin yerləşəcəyi binanın qapısına donuz başı asıb. 2016-cı ildə insidentlə bağlı Batumi şəhər məhkəməsinin qəbul etdiyi qərara əsasən, təqsirli bilinən 3 şəxs vurduqları mənəvi ziyana görə simvolik olaraq 1 lari məbləğində cərimələnib. Məhkəmənin qərarı yerli müsəlman sakinlərin etirazına səbəb olub.
Acarıstan Muxtar Respublikası əhalisinin təqribən 30%-ni müsəlmanlar təşkil edir.