Bakı 15°C
Gənclər, sağlam olmaq üçün nələrə diqqət etməlisiniz? - Gənclərə məsləhət
Sağlam
orqanizmin təməli hələ uşaq ana bətnində olarkən qoyulur. Dünyaya gəldikdən
sonra isə valideynlər artıq uşağın sağlamlığına məsuliyyət daşıyırlar. Lakin
müəyyən yaşa çatdıqdan sonra – gənclik illərində artıq sağlamlıqları ilə bağlı
məsuliyyət öz üzərlərinə düşür. Qaynar həyat tərzi tələb edən bu dövrdə
işləyən, oxuyan gənclər sağlamlıqlarına bəzən o qədər də fikir vermirlər. Bəs
sağlam, güclü immunitetə sahib olmaq üçün gənclərimiz necə həyat tərzi
keçirməlidirlər, nələrə diqqət etməlidirlər?
Həkim-terapevt Məlahət Abbasova bildirdi ki, gənclik daha çox hərəkət demək olsa da, gənclərimiz bundan bir az
uzaq düşüblər: "Fiziki hərəkətdə olmaq hər kəs üçün önəmlidir, lakin
gənclərimiz çox hərəkətsiz həyat tərzi keçirirlər. Bunun səbəbi isə bu gün
bütün dünyada olduğu kimi, müasir texnologiyalardır. Həmin texnologiyalar bizim
işimizin sürətini artırsa da, hərəkət imkanlarımızı məhdudlaşdırır. Hazırda ölkəmizdə
çoxlu idman zalları fəaliyyət göstərir. Amma təəssüflər olsun ki, gənclər
həvəskar olaraq, idmana maraq göstərmirlər. Peşəkar idmanla məşğul olanlar
mütəmadi olaraq idman edirlər. Az sayda gənclərimiz var ki, sağlamlıqlarına
fikir verirlər. Sağlamlıq üçün hərəkət etməyin, idmanın önəmi böyükdür. Bunu
uşaqlıqdan aşılamaq lazımdır ki, gənclər də müəyyən yaşda artıq özləri vərdiş
olaraq, idman etsinlər. Məsələn, ibtidai siniflərdə bəzən müəllimlər idman
dərsi yerinə başqa fənləri keçirlər”.
M.Abbasova
deyir ki, sağlam olmaq üçün qida məsələsi də önəmlidir, lakin gənclərin çoxu bu
cəhətdən də məsuliyyətsiz davranırlar: "Gənclərimiz ən çox ayaqüstü yeməklərdən
istifadə edirlər. Amma mən həmişə ev yeməklərinə üstünlük verilməsini məsləhət
görürəm. Fikirləri o qədər kompüterdə cəmlənir ki, bəzən nə yediklərinə diqqət
etmirlər. Ona görə mütləqdir ki, iş yerlərində bir saat yemək üçün vaxt
ayırsınlar. Meyvə-tərəvəzi gündəlik qida rasionlarından əskik etməsinlər.
Havalar da getdikcə soyuduğu üçün isti yeməklər daha məqsədəuyğundur. Demirəm
ki, tamamilə "fast food”dan imtina etsinlər. Sadəcə olaraq, arada 10 gün, bir
ay fasilələrlə yesinlər. Hər gün o yeməkləri yemək mədə-bağırsaq sisteminə
ziddə zərbə vurur. Qəbzliyin yaranmasına, hormonal zəifliyə səbəb olur”.
Həkim
qeyd etdi ki, normal qidalanmamaq, hərəkətsiz həyat tərzi keçirmək gənclərin
immun sistemini aşağı salır, bu da orqanizmin xəstəliklərə qapı açması
deməkdir: "Gənclər enerjilidirlər, güclüdürlər, amma bunun qədrini bilmək
lazımdır. Müəyyən müddət sağlam qidalanmamaq, hərəkətsiz qalmaq, saatlarla
fasiləsiz kompüter qarşısında zaman keçirmək immun sistemini zəifləməyə doğru
gedir. Bədənin immun sisteminin zəifləməsi isə xəstəliklərə qarşı zəiflik
nümayiş etdirməsinə səbəb olur. Kompüterdən istifadəyə diqqət etsinlər, fasilə
verməyi unutmasınlar”.
M.Abbasova
onu də əlavə etdi ki, fəsil dəyişkənliyi zamanı geyim məsələsində də diqqətli
olsunlar: "İmmun sistemi güclü olan gənclər bəzən digərlərinə nisbətən fəsil
dəyişkənliyinə qarşı daha müqavimətli olurlar. Amma bütün hallarda, havanın
nəbzini tutub geyinmək daha yaxşıdır”.
Günel Azadə
