Gənc aktyorlarımızın Riqa fəthi
Bu gün teatrlarımızın nəzdində fəaliyyət göstərən studiyaların da uğurları
sərhədləri aşır. Bu studiyalar arasında isə uşaqlardan ibarət olan komandalar
daha çox uğur qazanır və beynəlxalq arenalarda ölkəmizi tanıdırlar. Bakı Uşaq
Teatrının nəzdində fəaliyyət göstərən "Günay” teatr-studiyası buna ən bariz nümunədir. 16-20 avqust tarixlərində Riqada
10-cu dəfə keçirilən "Amberstar-2019” beynəlxalq incəsənət
müsabiqəsində iştirak edən uşaq studiyası
festivaldan əli dolu qayıdıb. Festivala müxtəlif ölkələrdən gənc
istedadlar qatılıb.
Festivalda "Günay” studiyası Azərbaycanı layiqincə təmsil edib. Belə
ki, uşaqlarımız "Kitabi-Dədə-Qorqud” dastanı əsasında "Üç ocaq” tamaşasını
nümayiş etdirib. Festival-müsabiqənin qran-pri mükafatı Azərbaycana təqdim
olunub.
Festivaldan böyük uğurlar qayıdan "Günay” teatr-studiyasının bədii
rəhbəri, ssenarist və quruluşçu rejissoru Larisa Tarusova bizimlə söhbətində
səfər barədə təəssüratlarını bölüşdü. Bildirdi ki, o, festivalın idarə heyəti
tərəfindən münsif seçilib. Festivalın sonunda isə gənc istedadların
inkişafındakı fəaliyyətinə və beynəlxalq mədəni əlaqələrin möhkəmlənməsinə
göstərdiyi köməkliyə görə, beynəlxalq diplom-sertifikatla təltif olunub.
Gənclərimizin nümayiş etdirdiyi tamaşaya gəlincə isə müsahibimiz bildirdi
ki, onların çıxışı münsiflər heyətinin
və tamaşaçıların təkcə marağına deyil, hətta göz yaşlarına səbəb olub: "Beynəlxalq
festivallarda iştirak etmək böyük məsuliyyət
tələb edir. Biz bu festivaldakı çıxışımızın üzərində çox həssaslıqla
işləmişdik. Heyətimiz 7 nəfərdən ibarət idi. Yayda məzuniyyətdə olduğumuz üçün şəxsi
evlərimizdə hazırlaşmalı olurduq. Biz vətəndən
kənarda ölkəmizin adından çıxış edirdik və bilirdik ki, üzərimizə böyük yük
düşür. Möhtəşəm festival keçirildi və bizi orada gözəl qarşıladılar. Onlar
məndən münsif heyətinin üzvü olmağımı istədilər. Mən də etiraz etmədim. Festivalda
istedadlı vokalistlər var idi və biz məmnunluqla onların hamısını dinlədik.
Onların içərisində hətta 30 yaşı olanlar
var idi. Biz bu festivaldan zövq aldıq. Əslində belə festivallarının sayının
çox olmasını istəyirik. Çox festivallara
dəvət alsaq da, onların əksəriyyətindən imtina etməli oluruq. Çünki bütün
festivallara getmək, xərcləri ödəmək üçün maliyyəmiz yoxdur. Bəzən belə festivallara
uşaqların valideynlərinin maliyyəsi hesabına gedirik”.
Müsahibimiz deyir ki, festivalın ən ali - qran-pri mükafatına layiq
görüldükdə sevinclərinin həddi-hüdudu olmayıb: "Komandamızın 4 nəfəri yaxşı rol
ifalarına görə diplom aldılar. Çox qəribə
olmuşdum. Başa düşə bilmirdim ki, mənim içimi belə iftixar hissi ilə
dolduran nədir. Orada bizə olan
münasibət, gözəl yanaşma, yoxsa həmvətənlərimizin, səfirliyimizin, diasporumuzun bizə olan münasibəti idi bəlkə
də. Çox sevincli idik. Biz ora getmədən əvvəl oradakı Azərbaycan səfirliyinə
məktub yazdım ki, gəlirik, sizin himayənizə güvənə bilərikmi? Məktuba cavab
olaraq diaspor və Azərbaycan səfirliyinin nümayəndələri zəng edib bildirdilər
ki, biz burdayıq və sizi qarşılamağa hazırıq. Açığı, gözləmirdim ki, bizi
qarşılayarlar. Xaricdə olanda, qəribə də olsa, insan özünə qarşı diqqət
arzulayır”.
Larisa xanım Riqanı möcüzələr şəhəri adlandırır: "Şəhərin mərkəzində
köhnə Riqa şəhəri nağılı xatırladır. Bizim orda olmağımız bayram günlərinə
təsadüf etmişdi. Çoxlu qonaqlar küçələrdə gəzişir, musiqi təşkil edilir,
insanların üzündə gülüş, təbəssüm, xoşbəxtlik vardı. Biz bu səfərdə həm
ticarət, həm də ziyarət etmiş olduq”.
Qeyd edək ki, gənc aktyorlardan Əliyeva Leyla, Qədimli Leyla, Cəbrayılbəyov
Təyyar və Həmidli Tuncay ən yaxşı rola görə diplomla təltif olunublar.
Larisa xanım deyir ki, müsabiqə ərəfəsində - 17 avqust tarixində "Günay” studiyasının gənc artistləri Riqa
şəhərində tamaşa-konsert proqramı ilə çıxış ediblər: "Riqa şəhərində keçirilən
konsertdə iştirakımız müsbət qarşılandı. Azərbaycan səfirliyinin dəstəyi və
diaspor fəallarının təşkilatçılığı ilə Latviya Universitetinin Akademik
Kitabxanasında keçirilmiş tədbirə Azərbaycan icması və Latviya ictimaiyyətinin
üzvləri tərəfindən dəvət olunmuşduq. Konsertdə Azərbaycanın milli rəqs və
musiqi nümunələrini ifa etdik, şerlər səsləndirdik. Xüsusilə "Kitabi-Dədə
Qorqud” eposu motivləri əsasında səhnələşdirilmiş "Üç Tonqal” tamaşası və "Arşın
mal alan” operettasından qızların yaylıqla rəqsi tamaşaçıların böyük rəğbəti ilə qarşılandı. Tədbirin əsas təşkilatçısı, Baltikyanı
ölkələrdə yaşayan azərbaycanlıların Koordinasiya Şurasının Latviyadan olan üzvü
Elnur Rəhimov "Günay” studiyasının gənc istedadlarına öz təşəkkürünü bildirdi
və xalqımızın tarixi, milli və mənəvi dəyərlərinin təbliğində bütün soydaşlarımıza
uğurlar arzu etdi. Təbii ki, studiyamıza ünvanlanan təriflər, xoş sözlər bizi
məmnun edirdi. Mən bu səfərdən çox məmnun qaldım”.
Festivaldan sonra isə Azərbaycanın Riqadakı səfiri Cavanşir Axundov
"Günay" studiyasının kollektivini qəbul edib və uğura görə təbrik
edib, Bakı Uşaq Teatrının studiyasına təşəkkürnamə verib.
Xəyalə Rəis