• çərşənbə axşamı, 19 mart, 07:36
  • Baku Bakı 8°C

Gələn il keçiriləcək Formula 1 mövsümü 24 yarışla yadda qalacaq

24.09.22 06:30 517
Gələn il keçiriləcək Formula 1 mövsümü 24 yarışla yadda qalacaq

Beynəlxalq Avtomobil Federasiyasının (FIA) Avtoidman üzrə Ümumdünya Şurası Formula 1 Dünya Çempionatının 2023-cü il təqvimini açıqlayıb.

Bakı Şəhər Halqası Əməliyyat Şirkətindən bildiriblər ki, 2023-cü ilin Formula 1 mövsümü növbəti ilkə imza ataraq, 24 yarışla yadda qalacaq. 7-ci Formula 1 Azərbaycan Qran-Prisi isə gələn il aprelin 28-30-na təsadüf edəcək.

Mövsümə martın 5-də Bəhreyndə start veriləcək, noyabrın 26-da isə ənənəyə sadiq qalaraq Əbu-Dabidə yekunlaşacaq.

Builki təqvimdə Mayami və Ostin ilə bərabər, ilk dəfə olaraq digər ABŞ şəhəri – Las-Veqas da yer alır. Qətər Qran-Prisi bir illik fasilədən sonra yenidən Formula 1 təqviminə qayıdır.

Qeyd edək ki, Beynəlxalq Avtomobil Federasiyası digər avtoidman yarışı 24 saat Le Man marafonunun digər F1 yarışları ilə eyni tarixə təsadüf etməməsi üçün iyun ayında yalnız iki yarışın keçirilməsinə qərar verib.

“2023-cü il FIA Formula 1 Dünya Çempionatında 24 yarışın yer alması bu avtoidmanın qlobal səviyyədə inkişafının və geniş auditoriya cəlb etməsinin sübutudur. Təqvimə yeni yarışların əlavə olunması və ənənəvi yarışların qorunub saxlanması federasiyanın bir daha bu avtoidmana xüsusi diqqətinin göstəricisidir. Məmnunluq hissi ilə bildirirəm ki, daha böyük həyəcanla Formula 1-in yeni erasına qədəm qoyuruq və Beynəlxalq Avtomobil Federasiyasının 2022-ci ildə qəbul etdiyi qaydalar bunun üçün geniş zəmin yarada biləcək. 2023-cü ilin təqviminin tərtibi zamanı F1 yarışlarının 24 saat Le Man marafonu ilə eyni tarixlərə təsadüf etməməsinə xüsusi diqqət yetirilib”, – deyə federasiyanın prezidenti Mohammad bin Sulayem qeyd edib.

banner

Oxşar Xəbərlər