“Film insanın əsl gücünün nədə olduğunu göstərir” – Onun film seçimi
Filmlərlə bağlı hər kəsin öz maraq dairəsi var. Kimi dram sevir, kimi
fantastika, kimi komediya və s. Amma janrından asılı olmayaraq, çoxumuz
başqalarının məsləhət gördüyü filmlərə nəzər salırıq.Məsləhət görülürsə,
deməli, baxmağa dəyər. Bu dəfə sizə "Sat
Group”un həmtəsisçisi və rəhbəri, satış təmsilçisi Azad Qəhrəmanovun bəyəndiyi
və məsləhət gördüyü filmləri təqdim edəcəyik.
Müsahibimiz deyir ki, filmə çox baxan deyil, amma izləyəndə də seçim
edir: "Zaman
ayırıramsa, faydalı film olmasını istəyirəm. Ya motivasiya, ya həyata doğru bir
istiqamət versin, ya da örnək olsun. Faktlara əsaslanan, reallıq üzərində
qurulmuş filmləri sevirəm, bioqrafik kinoları da bəyənirəm. 5 film adı çəkəcəyəm,
onların hamısında maraqlı nümunə var. Mən motivasiya filmlərini sevirəm. İndiki
dövrdə bizə motivasiya lazımdır. Çünki motivasiyamızı aşağı salacaq o qədər məlumatlar
var ki. Ona görə, həyata inamımızı gücləndirəcək filmlərə ehtiyac var”.
Və müsahibimizin
ilk məsləhəti ABŞ istehsalı olan dram filmi "Şouşenkdən qaçış” oldu: "Möhtəşəm
bir filmdir. Baş qəhrəman maliyyəçi olur, onu günahsız yerə həbs edirlər. Sonda
o, həbsdən çıxa bilir. Kinonun gözəlliyi ondan ibarətdir ki, əslində, insanın əsl
gücünün nədə olduğunu göstərir. Əsl güc inadkarlıq, davamlılıqdadır. Orda sakit
inadkarlığı göstərir. Adam dava salmır, plan qurur və illərlə o plan üzrə hərəkət
edir. Nəticədə arzuladığına nail olur. Film peşəkarlıq və biliyin insana hansı
üstünlüklər verdiyini göstərir”.
A.Qəhrəmanovun
ikinci seçimi "Xoşbəxtlik axtarışında” oldu. ABŞ istehsalı olan filmdə baş rolu
Uill Smit canlandırır: "Baş qəhrəman satış meneceri olur, işinin əvvəli çox çətin
gedir. Hətta o qədər çətinliyi yaranır ki, həyat yoldaşı onu atıb gedir. Buna
baxmayaraq, o, qarşısına qoyduğu hədəfin arxasınca gedir, sonda böyük uğurlar
qazanır. O, filmdə həm də oğluna maraqlı nəsihətlər verir ki, bu da çox təsirlidir.
Əsl xoşbəxtliyin nədə olduğunu, inadkarlığın, öz ideyanın arxasınca getməyin nə
nəticə verdiyini göstərir”.
Üçüncü məsləhəti"Uoll Strit canavarı” filmi oldu: "Bu, son illərin məşhur kinolarındandır. Baş
rolu Leonardo Di Kaprio canlandırır. Bu da satışla bağlıdır. Film, inandırmaq
bacarığının bu gün nə qədər vacib olduğunu göstərir. Sən özünü inandırmaq
bacarığını inkişaf etdirməlisən ki, indiki dövrdə yaxşı qazana, inkişaf edə biləsən
və s. Həm satış işinə adamı həvəsləndirir, həm də satışda uğurun açarlarını
göstərir”.
"Növbəti
adama ödə” filmini də çox maraqlı hesab edir: "Bu film, kiçik bir uşağın
başlatdığı maraqlı sosial hərəkat haqqındadır. Bu uşağın ağlına yaxşı bir fikir
gəlir ki, əgər mən kiməsə yaxşılıq etsəm, o, təbii ki bunun qarşılığını mənə
vermək istəyəcək. Amma xahiş edəcəyəm ki, bu qarşılığı mənə yox, başqa kiməsə
etsin. Belə olsa, hamı bunu təkrarlasa, bütün insanlar bir-birinə yaxşılıq
etmiş olacaqlar. Bu hərəkat başlayır, insanları müsbət istiqamətə dəyişən
maraqlı bir tendensiya yaranır”.
Sonuncu
seçimi isə Tom Henksin ilk kinolarından olan "Forrest Qamp”dır: "Forrest Qampın
uşaqlıqda ayağında qüsurlar olur, ona görə, ona ayağını düzəltmək üçün bir
aparat qoşurlar. Digər uşaqlardan geri qalmamaq üçün çox inadkar olmalı olur.
Bu inadkarlıq həyatı boyu onda davam edir. Bu film onu göstərir ki, müsbət vərdişlər
qazanmaq istəyi, insanı haralara gətirib çıxara bilər".
Aygün Asimqızı