“Əsas məqsəd vətəndaşların sosial vəziyyətinin yaxşılaşdırılmasıdır” - Fotolar
Azərbaycanda reallaşan
sosial siyasətin üstün cəhətlərindən biri onun çoxşaxəliliyi, icra olunan
sosial proqramlarla müəyyənləşməsidir. Burada əhalinin həssas kateqoriyalı
təbəqələrinin, o cümlədən şəhid ailələrinin, müharibə əlillərinin sosial-rifah
halının, mənzil-məişət şəraitinin daha da yaxşılaşdırılması prioritet
məsələlərdəndir. Prezident İlham Əliyevin rəhbərliyi ilə son illər sözügedən
istiqamətdə mühüm tədbirlər həyata keçirilib, ciddi uğurlar qazanılıb. Misal
üçün, indiyə qədər ölkəmizdə şəhid ailələrinin və müharibə əlillərinin sosial
müdafiəsinin gücləndirilməsi istiqamətində mühüm addımlar atılıb. Ötən dövrdə
bu kateqoriyalardan olan vətəndaşlara 6654 mənzil təqdim edilib, o cümlədən,
2018-ci ildə şəhid ailələrinə və müharibə əlillərinə nəzərdə tutulduğundan 3
dəfə çox olmaqla 626 mənzil verilib. 2019-cu ildə isə həmin vətəndaşlara azı
800 mənzilin təqdim olunması nəzərdə tutulub. Eləcə də bu vaxta qədər müharibə
əlillərinə 6144 avtomobil verilib.
Bununla yanaşı, şəhid
ailələrinə və müharibə əlillərinə, Milli Qəhrəmanlara Azərbaycan Prezidentinin
aylıq təqaüdünün məbləği ötən dövrdə mütəmadi olaraq artırılmaqla Milli
Qəhrəmanlar üçün 1500 manata, şəhid ailələri üçün 242 manata, müharibə əlilləri
- I qrup əlillər üçün 182 manata, II
qrup əlillər üçün 158 manata, III qrup əlillər üçün 121 manata çatdırılıb.
Prezident təqaüdü ilə bərabər, müharibə əlillərindən böyük əksəriyyəti əlilliyə
görə əmək pensiyası, pensiya hüququ olmayan az bir qismi əlilliyə görə
müavinət alırlar. Əmək pensiyası almaq
hüququ olmayan şəhid ailəsi üzvlərinə və müharibə əlillərinin uşaqlarına isə
aylıq sosial müavinət verilir. Şəhid ailəsi və Milli Qəhrəman ailəsi üzvlərinə
əmək pensiyası təyin olunarkən əlavə də hesablanır, həmçinin şəhid ailələrinin
və müharibə əlillərinin uşaqları dövlət ali və orta ixtisas təhsili
müəssisələrində ödənişli təhsil aldıqda təhsil haqqı dövlət büdcəsi hesabına
ödənilir. Ölkəmizdə icra olunan özünüməşğulluq proqramına müraciət edənlər
arasında digər həssas qruplarla yanaşı, şəhid ailələri və müharibə əlillərinə
də üstünlük verilir. Təkcə ötən il 100-dək şəhid ailəsi, mindən çox əlilliyi
olan şəxs bu proqrama cəlb olunaraq aktivlərlə təmin olunub.
Bu kimi tədbirlərin davamı
olaraq, 2018-ci il 19 aprel tarixində dövlət başçısı İlham Əliyev "Azərbaycan
Respublikasının ərazi bütövlüyü uğrunda həlak olmuş, ölmüş və hərbi
əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi
qulluqçuların ailə üzvlərinin sosial müdafiəsinin yaxşılaşdırılması ilə bağlı
əlavə tədbirlər haqqında” fərman imzalayıb. Həmin fərman 1997-ci il avqustun
2-dək Azərbaycanın ərazi bütövlüyü uğrunda həlak olmuş, ölmüş və hərbi
əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi
qulluqçuların vərəsələrinə 11.000 manat ödəmə verilməsini nəzərdə tutub. Bu
qanunvericilik aktı dövlət başçısı İlham Əliyevin vətəndaşların sosial
müdafiəsinin gücləndirilməsi, Azərbaycanın ərazi bütövlüyünün qorunması üçün
canlarını qurban vermiş hərbçilərimizin ailələrinə, vərəsələrinə diqqət və
qayğısının daha bir bariz nümunəsidir. Hər kəsə bəllidir ki, indiyə qədər də
Azərbaycan dövləti ölkənin ərazi bütövlüyü uğrunda həlak olmuş və itkin düşmüş
hərbi qulluqçuların ailə üzvlərinin sosial müdafiəsinin yaxşılaşdırılması
məqsədi ilə ardıcıl tədbirlər həyata keçirib. 1997-ci ildə "Hərbi qulluqçuların
dövlət icbari şəxsi sığortası haqqında” qanun qüvvəyə mindikdən sonra hərbi
qulluqçulara sığorta ödənişlərinin verilməsinə dair normativ hüquqi baza
formalaşdırılıb. Adıçəkilən fərman isə Azərbaycan Prezidenti tərəfindən bəyan
olunmuş "Həyata keçirdiyimiz siyasətin mərkəzində Azərbaycan vətəndaşı dayanır”
şüarının təcrübədə yüksək səviyyədə reallaşdığının əyani sübutu sayılıb.
Şəhid ailələrinə birdəfəlik
ödəmənin verilməsi ilə bağlı fərman həmin ailələrin sosial müdafiəsinin
yaxşılaşdırılmasının dövlət başçısının uğurlu siyasətinin başlıca
məqsədlərindən biri olduğunu bir daha təsdiq edib, ictimaiyyət tərəfindən böyük
rəğbət və məmnunluqla qarşılanıb. Ötən dövrdə 3100 şəhid hərbi qulluqçunun
4200-ə qədər vərəsəsinə birdəfəlik ödəmə həyata keçirilib, bu istiqamət üzrə 34
milyon manat vəsait ödənilib. Əmək və Əhalinin Sosial Müdafiəsi Nazirliyinin
yaydığı son məlumata görə, hazırda 6444 şəhidin vərəsələrinə ödənişlər davam
etməkdədir. Ümumilikdə bu fərman şəhid ailələrinin sosial müdafiəsinin
yaxşılaşdırılması istiqamətində mühüm addımlardan olmaqla, ölkə vətəndaşlarının
rifahının dirçəldilməsinə xidmət edən ən humanist addımlardan biri kimi qəbul
edilir. Bu siyasətin davamı olaraq, dövlət başçısı İlham Əliyev və birinci
xanım Mehriban Əliyeva bu gün Prezident Sarayında şəhid ailələri ilə
görüşüblər. Şəhid ailələrinin nümayəndələrinə dərin hörmətini ifadə edən
Prezident İlham Əliyev şəhidlərimizə Allahdan rəhmət diləyib, onların torpaq,
Vətən uğrunda həlak olaraq şəhidlik zirvəsinə yüksəldiyini dilə gətirib. Ölkə
başçısı şəhid ailələrinə Vətən üçün gözəl övladlar yetişdirdiklərinə görə
təşəkkür edib, xalqımızın şəhidlərlə fəxr etdiyini, onların bizim ürəyimizdə
əbədi yaşayacağını bildirib.
Prezident İlham Əliyev
şəhid ailələrinin ev və avtomobillərlə təmin edildiyini diqqətə çatdıraraq
vurğulayıb ki, ötən il prezident seçildikdən sonra imzaladığı ilk Fərman şəhid
ailələrinin sosial müdafiəsinin gücləndirilməsi ilə bağlı olub. Onun sözlərinə
görə, bu Fərmanla 10 minə yaxın şəhid ailəsinə 11 min manat məbləğində
birdəfəlik ödəmələrin verilməsi nəzərdə tutulub. Ölkə rəhbəri artıq bu prosesin
başlandığını və 3 mindən çox şəhid ailəsinin vəsaiti aldığını söyləyib.
Dövlətimizin başçısı vaxtilə müavinəti almış ailələrlə bağlı araşdırmaların
aparıldığını, onların aldığı vəsaitin bu günün məzənnəsi ilə uyğunsuzluq təşkil
etdiyini nəzərə alaraq, yeni fərman imzaladığını və bu fərmana əsasən 11 min
manat alacaq vətəndaşların sayının artdığını da bildirib. Sonra dövlətimizin
başçısı birdəfəlik ödəməni almaq üçün istifadə olunan plastik kartları şəhid
hərbi qulluqçularının vərəsələrinə təqdim edib. Xalqa xidmət etməyin onun üçün
böyük fərəh olduğunu diqqətə çatdıran Prezident İlham Əliyev hazırda ölkəmizin
sürətlə inkişaf etdiyini, uğurlu iqtisadi siyasət nəticəsində Azərbaycanda
böyük sosial layihələrin icra olunduğunu vurğulayıb. Bildirib ki, əsas məqsəd
vətəndaşların sosial vəziyyətinin yaxşılaşdırılmasıdır.
Qeyd edək ki, Prezident
İlham Əliyevin bu gün imzaladığı fərmanla birdəfəlik ödəmənin əhatə dairəsi
daha da genişlənib, Azərbaycanın ərazi bütövlüyü uğrunda 1997-ci ilin avqust
ayının 2-dək şəhid olmuş əlavə 2725 şəhidin (o cümlədən 11000 manatdan az
sığorta ödənişi almış 2264 şəhid hərbi qulluqçunun və 461 şəhid polisin)
vərəsələrinə də birdəfəlik ödəmənin verilməsi tapşırılıb. Yeni fərmanla
birdəfəlik ödəmənin verilməsi prosesi artıq 12268 şəhidin vərəsələrini əhatə
edir və bu məqsədlər üçün ümumilikdə 135 milyon manat vəsait nəzərdə tutulub.
Sonda vurğulayaq ki, ötən
illər ərzində Azərbaycanın iqtisadi qüdrətinin artması həm ölkənin müdafiə
potensialının gücləndirilməsi, həm də hərbi qulluqçuların etibarlı sosial
müdafiəsinin təmin edilməsi üçin şərait yaradıb. Müxtəlif vaxtlarda hərbçilərin
xidmət, mənzil-məişət şəraitinin yaxşılaşdırılması, onların sosial müdafiəsinin
gücləndirilməsi və digər istiqamətlər üzrə məqsədyönlü tədbirlər həyata
keçirilib. Bu çərçivədə şəhid ailələrinin sosial müdafiəsinin gücləndirilməsi
istiqamətində də mühüm işlər görülüb.
Şübhə yoxdur ki, Azərbaycan Prezidentinin
mühüm sosial əhəmiyyət kəsb edən və şəhid ailələrinə böyük diqqət və qayğının
növbəti təcəssümü olan 28 yanvar 2019-cu il tarixli fərmanı da yüksək səviyyədə
icra ediləcəkdir. Prezident İlham Əliyev bu kimi addımlarla bir daha təsdiq
edir ki, dövlətin həyata keçirdiyi ardıcıl sosial siyasət daim gücləndiriləcək. Bundan sonra da Azərbaycan dövləti hər bir vətəndaşın,
imtiyazlı təbəqənin, dövlət və xalq qarşısında xidmətləri olan şəxslərin sosial
məsələlərinin həllini prioritet vəzifə hesab edəcək.
Rufik
İSMAYILOV