Ermənipərəst kiprli deputat Albaniyada da “qara siyahıya” düşdü
Avropa Parlamentinin (AP)
Kipr Respublikasından olan üzvü Eleni Teoxarus erməni diasporunun sifarişi
əsasında Azərbaycanın işğal olunmuş ərazilərinə qanunsuz səfərlər edib. Buna
görə onun adı Azərbaycan xarici işlər nazirliyi tərəfindən "ölkəmizə girişi
arzu olunmayan şəxslər siyahısına” daxil edilib. Eyni zamanda, E.Teoxarus
haqqında Cinayət Məcəlləsinin müvafiq maddələri ilə cinayət işi açılıb. Daim
qalmaqallı addımları ilə gündəmə gələn E.Teoxarusun beynəlxalq hüququn
prinsiplərinə, xüsusilə də ərazi bütövlüyü prinsipinə münasibətdə ekstremist
çağırışlarının növbəti hədəfi Azərbaycan və Ukraynadan sonra Albaniya olub.
Deputatın Albaniyanın cənub torpaqlarına qarşı ərazi iddialarını ehtiva edən
ekstremist millətçi çıxışı Albaniya tərəfindən ölkənin ərazi bütövlüyünə qəsd
və konstitusiyaya əsaslanan asayişi pozmaq cəhdi kimi qiymətləndirilib. Məhz
buna görə də, Albaniya Respublikasının Konstitusiyasına, təhlükəsizliyinə və
ölkədə asayişə təhlükə yaradan ekstremist və nifrət çıxışı səbəbindən E.Teoxarus
Albaniyanın Avropa və Xarici İşlər, Daxili İşlər Nazirliklərinin birgə qərarı
ilə ölkəyə girişi arzu olunmaz şəxs elan olunub. Əgər belə davam edərsə, kiprli
deputat daha bir neçə ölkənin müraciəti əsasında beynəlxalq axtarışa verilən
ilk AP üzvü "statusu”nu qazana biləcək.
Siyasi
İnnovasiya və Texnologiyalar Mərkəzinin direktoru, politoloq Mübariz Əhmədoğlu isə hesab
edir ki, qanlı separatçılıq və etnik təmizləməni təşviq edən əməllər şüurla,
beyinlə bağlı məsələlərdir. Onun fikrincə, əksər normal adamlar, yəni dünyanın
elitasının siyasəti ərazi bütövlüyü prinsipini dəstəkləməyə yönəlib. Siyasi
şərhçinin fikrincə, bu, sabitliyin bir əsasıdır: "Amma adam var ki, ruhi
xəstədir və onun müəyyən problemləri var. Bunlar əvvəldən axıra qədər də
separatçılığı dəstəkləyirlər. Eleni Teoxarusla bağlı vəziyyət isə fərqlidir. Onun
əsas məqsədi Qarabağ ermənilərinə müstəqillik əldə etməkdir. Çünki bilirsiniz
ki, Kipr özünü tarixən Osmanlı İmperiyasından əziyyət çəkmiş xalqlar sırasında
görür və ermənilərlə təxminən özlərini müttəfiq bilirlər. O baxımdan, onlar
özlərinə borc bilirlər ki, ən azı erməniləri də özləri kimi müdafiə etsinlər. Yunanıstanda,
Kiprdə belə adamlar var. Bu mənada Eleninin əsas məqsədi Dağlıq Qarabağ
ermənilərinə, separatçılarına dəstək verməkdir”.
Alpər TURAN
Bu şəxsin Avropa İttifaqına
üzvlüyə namizəd ölkə olan Albaniya tərəfindən də arzuolunmaz şəxslər siyahısına
daxil olunması, onun Azərbaycanın işğal olunmuş ərazilərinə qanunsuz səfərini
təşkil edən erməni lobbi dairələrinin, xüsusilə Brüsseldə fəaliyyət göstərən və
brilyant alveri ilə məşğul olan və əslən Yunanıstandan olan Kaspar
Karampetyanın da növbəti ifşasıdır. Çünki, Eleni Teoxarusun Kaspar
Karampetyanla əlaqələri var və onun işğal olunmuş ərazilərimizə səfərlərinin
təşkilatçısı odur. Bu yerdə onu da xatırlatmaq yerinə düşər ki, bu günlərdə
Almaniyada erməni mafiyasına qarşı aparılan əməliyyat çərçivəsində, Bundestaqın
deputatı və erməni lobbist təşkilatı olan Almaniya-Ermənistan Forumunun
təsisçisi Albert Vayler şübhə obyektinə çevrilib və bu ölkənin hüquq-mühafizə
orqanları tərəfindən dindirilib. Ermənistanın Almaniyadakı səfirinin adı
hallandığı bu cinayət işi göstərir ki, ermənilərin lobbist fəaliyyətinin
maliyyə təminatçısı və əlaqələndiricisi erməni mafiyasıdır. Albert Vayler də
işğal olunmuş ərazilərimizə qanunsuz səfərə görə, arzuolunmaz şəxslər
siyahısına salınıb və Almaniya kansleri Anjela Merkelin ölkəmizə səfəri zamanı
həmin şəxsin Azərbaycan ərazisinə daxil olmasına icazə verilməyib. Kiprli
deputat E.Teoxarusun Albaniyada ifşası, Almaniyada erməni mafiyası ilə əlaqədar
üzə çıxarılan faktlar Avropa ölkələrində, o cümlədən Avropa Parlamenti və
Avropa Şurası Parlament Assambleyasında Azərbaycana qarşı fəaliyyət aparan,
işğal olunmuş ərazilərimizə qanunsuz səfər edən qərəzli şəxslərin erməni
mütəşəkkil cinayət qruplaşmaları ilə əlaqələrinin araşdırılmasını labüd edir.
Milli
Məclisin Beynəlxalq münasibətlər və parlamentlərarası əlaqələr komitəsinin
üzvü, Demokratik islahatlar Partiyasının sədri Asim Mollazadə mövzu ilə
bağlı bildirib ki, Avropa siyasi mühitində siyasi korrupsiya araşdırılmalıdır.
Millət vəkilinin sözlərinə görə, E.Teoxarus və onun kimilərin fəaliyyəti
bilavasitə müvafiq korrupsiya əməlləri ilə bağlıdır: "Biz Avropa Parlamentində,
Avropa Şurasında belə şəxslərin fəaliyyətini birmənalı qiymətləndirməliyik və
ciddi araşdırmalar olmalıdır. Təəssüf doğuran amil odur ki, Avropa
siyasətçiləri hansısa şirkətlərdən, lobbi qruplardan vəsait alırlar və nəticədə
bu istiqamətdə erməni qrupları Avropa mühitində çox ciddi fəaliyyət
göstərirlər. Ona görə də biz bu araşdırmaları tələb etməliyik. Qanlı
separatçılıq və etnik təmizləməni təşviq edən Eleni Teoxarus kimilər öz
ölkələrinin, xalqlarının maraqlarından çıxış etmir, erməni lobbisinin,
diasporunun siyasətini həyata keçirirlər. Əslində Avropa Parlamentində erməni
diasporunun yaratdığı korrupsiyanın ciddi araşdırılmasının vaxtı çatıb. Buna,
həqiqətən böyük bir ehtiyac var. Çünki belə fəaliyyət əslində Avropa
İttifaqının siyasətinə ziddir. Tam aydındır ki, bu cür fəaliyyətlərin arxasında
məhz siyasi korrupsiya və erməni lobbisi durur. Eleni Teoxarusun hərəkətləri
Avropa Parlamentinin, bütövlükdə Avropa İttifaqının siyasətinə ziddir.
Bilavasitə, onun, erməni diasporu ilə əməkdaşlığı nəticəsində Azərbaycanın
işğal olunmuş ərazilərinə səfərləri baş tutur. Bu baxımdan ehtiyac var ki,
erməni lobbi qruplarının Avropada apardığı korrupsiya fəaliyyəti ciddi
araşdırılsın və ona hüquqi qiymət verilsin”.
Alpər TURAN