Enerji resurslarından səmərəli istifadənin təmin edilməsinə yönələn addım
Bu günlərdə prezident İlham Əliyev kommunal xidmətləri bazar iqtisadiyyatının
tələblərinə uyğunlaşdırmaq, nəzarət mexanizmlərini daha da təkmilləşdirməklə,
bu sahənin davamlı inkişafına nail olmaq, enerji təchizatında şəffaflığı və
çevikliyi, habelə sözügedən xidmətlərin sahibkarlar üçün əlçatanlığını təmin
etmək məqsədi iləAzərbaycan Respublikası Energetika Nazirliyinin Dövlət
Enerji Nəzarəti İdarəsinin və Dövlət Qaz Nəzarəti İdarəsinin əsasında
Azərbaycan Respublikası Energetika Nazirliyinin tabeliyində publik hüquqi şəxs
statuslu Enerji Məsələlərini Tənzimləmə Agentliyinin yaradılması haqqında
fərman imzalayıb. Fərmanın nizamnaməsində qeyd olunur ki, Agentliyin
fəaliyyətinin məqsədi müvafiq sahənin səmərəli işini, dayanıqlı inkişafını və
şəffaflığını təmin etmək, nəzarət mexanizmlərini təkmilləşdirməklə, bu sahəni
inkişaf etdirmək, göstərilən xidmətləri bazar iqtisadiyyatının tələblərinə
uyğunlaşdırmaq, habelə sözügedən xidmətlərin sahibkarlar üçün əlçatanlığını
təmin etməkdir.
Ekspert Zəfər Vəliyev deyir ki,
qurumun fəaliyyəti bu sahədəki mövcud problemləri aradan qaldıracaq: "Energetika Nazirliyinin tabeliyində
fəaliyyət göstərən hər iki qurumun fəaliyyətində müəyyən boşluqlar var idi. Düşünürəm
ki, fərman bu problemləri aradan qaldırmaq üçün atılan bir addımdır. Çünki həm
energetika sahəsində, həm də qaz təsisatında kifayət qədər nöqsanlar var. Keçən
ilin statistik göstəricilərinə əsasən «Azəriqaz»ın aktivində olan qazpaylayıcı
şəbəkələrdə 700 milyon kubmetr qaz itkisi qeydə alınıb. Son illərdə Azərbaycan
müəyyən beynəlxalq layihələrdən irəli gələn öhdəlikləri yerinə yetirir. Ölkə
daxilində mövsümlə bağlı qaz həcmlərinə ehtiyac yaranır. Bu problemlər
«Azərenerji»də də mövcuddur. Hər iki – həm enerji, həm qaz nəzarəti
idarələrinin vahid strukturda birləşdirilməsi onların fəaliyyətində müəyyən
irəliləyişlərin əldə olması baxımından, sözügedən fərmanın çox böyük əhəmiyyəti
var. Bu strukturlar vahid mərkəzdə birləşdikdən sonra ilk növbədə istehsalçılar,
ötürücülər, paylayıcılar, təchizatçılar və istehlakçılar arasında vahid bir
əlaqənin qurulmasına diqqət yetirilməlidir. Eyni zamanda, bəlli sektora investisiya məsələsinin həll
edilməsində və investisiyanın təyinatı üzrə yönəldilməsi və xərclənməsi kimi
vacib məqamlara mütləq nəzarət
edilməlidir. Əks halda, həm enerji, həm də qaz təminatında müəyyən problemlər
yarana bilər. Düşünürəm ki, yeni
yaradılan strukturun qeyd olunan məsələlərlə bağlı uğurlu fəaliyyəti nəticəsində əhalinin davamlı olaraq enerji və qaz
təminatında olan mövcud problemlər
aradan qalxacaq. Çünki hazırda hər iki sektorda bəzi çatışmazlıqlar var ki, bu
da nəzarətin təşkil olunmasına ehtiyac yaradır”.
Millət vəkili Azər Badamov bildirdi ki,
bu fərmanla yeni və vahid struktur formalaşacaq: "Prezident İlham Əliyev qurumun
fəaliyyətinin daha da müasirləşdirilməsi və gücləndirilməsi, əhaliyə göstərilən
kommunal xidmətlərin yaxşılaşdırılması və bərpa olunan alternativ enerji
istifadə imkanlarının genişləndirilməsi məqsədilə belə bir fərman imzalayıb. Fərmanda enerji
məsələlərinin tənzimlənmə agentliyinin yaranması haqqında xüsusi maddə var.
Agentliyin vəzifəsi kommunal xidmətləri yaxşılaşdırmaq, mövcud mexanizmləri
daha da təkmilləşdirmək və sözügedən sahənin inkişafına nail olmaqdır.
Həmçinin, sahibkarlar üçün əlçatanlığın təmin edilməsi və şəffaflığın təmin
olunması da prioritetlər sırasındadır. Agentlik yaradıldıqdan sonra bu
istiqamətdə sahibkarlığa enerji resurslarının əlçatanlığının yaxşılaşdırılması
üçün sənədlərin hazırlanması və prezidentə təqdim olunması qeyd olunub. Ümumilikdə
əsas məqsəd əhaliyə göstərilən xidmətin daha da yaxşılaşdırılması və
sahibkarlar üçün bu infrastrukturun daha da şəffaf şəkildə istifadəsini təmin
etməkdir. Bu agentlik yarandıqdan sonra gələcəkdə müxtəlif beynəlxalq enerji
agentlikləri ilə də əlaqələr genişləndiriləcək. Enerji elə bir sahədir ki, həm
daxili təminat, həm də beynəlxalq əlaqələr çox vacibdir. Agentliyin əsas
məqsədlərindən biri də bərpa olunan alternativ enerji resurslarının istifadə
edilməsini təmin etməkdir. Bütün bunlar onu göstərir ki, enerji təminatı və
beynəlxalq əlaqələr daha da genişləndiriləcək”.
Milli Məclisin İqtisadi
Siyasət, Sənaye və Sahibkarlı komitəsinin üzvü, millət vəkili Vahid Əhmədov deyir ki,
əsas məqsəd müvafiq sahədə vahid dövlət siyasətinin formalaşdırılmasından
ibarətdir: "Belə bir agentliyin yaradılmasında əsas məqsəd enerji və qazla
əlaqədar olaraq müəyyən təcrübə mexanizmlərini həyata keçirmək və bu sahədə dövlət
siyasətini formalaşdırmaqdan ibarətdir. Fərmanla həm də ödənişlər məsələsinə baxılacaq və nəzarət daha da gücləndiriləcək.
Düşünürəm ki, itkilərin qarşısının alınması və enerji resurslarından səmərəli
istifadənin təmin edilməsinə belə bir agentliyin fəaliyyəti çox vacibdir. Həmçinin,
dayanıqlı inkişaf və şəffaflığı təmin etmək, nəzarət mexanizmlərini
təkmilləşdirməklə, bu sahəni inkişafına nail olunacaq ki, indiki şəraitdə çox
mühüm addımdır. Bundan başqa sözügedən xidmətlərin sahibkarlar üçün
əlçatanlığını təmin etmək də prioritetlər sırasındadır”.
Şəbnəm
Mehdizadə