Ən böyük sərvət
Azərbaycan
Cümhuriyyət bayramını ilk dəfə qalib ölkə kimi
qeyd edir
Düz 103 il bundan öncə müsəlman Şərqində ilk
demokratik parlament respublikası – Azərbaycan Xalq Cümhuriyyəti (AXC) elan
edilib. 1918-ci il mayın 28-də qəbul olunan İstiqlaliyyət Bəyannaməsində qeyd
olunurdu ki, Azərbaycan xalqı suveren hüquqların daşıyıcısı, Azərbaycan
Cümhuriyyəti müstəqil dövlətdir. Dinindən, irqindən, cinsindən, milliyyətindən
asılı olmayaraq, yeni yaranmış dövlətin ərazisində yaşayan bütün vətəndaşlara
bərabər hüquqlar tanınırdı. AXC cəmi 23 ay mövcud olmasına baxmayaraq, milli
dövlətçilik tarixində silinməz izlər qoyub, xalqın qəlbində azadlıq və istiqlal
duyğularını gücləndirməklə respublikanın gələcək müstəqilliyi üçün etibarlı
zəmin hazırlayıb. Məhz həmin dövrdə demokratik təsisatlar yaradılıb, ordu
quruculuğu sahəsində böyük işlər görülüb, müsəlman Şərqində, ilk dəfə olaraq,
qadınlara səsvermə hüququ verilib. Təəssüflər olsun ki, cəmi 23 aydan sonra –
1920-ci il aprelin 28-də Azərbaycan Rusiya tərəfindən işğal olunub və bununla
da müstəqilliyə son qoyulub.
Milli
mahiyyət daşıyan Dövlət Bayrağı
Həmin vaxt endirilən ay-ulduzlu, üçrəngli
Azərbaycan bayrağı bir daha 70 il sonra Naxçıvan Muxtar Respublikasında
dalğalanıb. Naxçıvanda ağır və gərgin ictimai-siyasi proseslərin cərəyan etdiyi
dövrdə - 17 noyabr 1990-cı ildə muxtar respublika Ali Məclisinin I sessiyası
keçirilib. Sıravi xalq deputatı Heydər Əliyevin sədrliyi ilə keçən həmin
sessiyada ilk növbədə, "Naxçıvan Muxtar Sovet Sosialist Respublikası”nın
adından "Sovet” və "Sosialist” sözləri çıxarılıb, onun "Naxçıvan Muxtar
Respublikası” adlandırılması, həmçinin Naxçıvan MR Ali Sovetinin Ali Məclis
adlandırılması barədə qərarlar qəbul olunub. Bununla yanaşı, Azərbaycanın
dövlət rəmzi kimi Xalq Cümhuriyyəti dövründəki üçrəngli bayraq Naxçıvan MR-in
Dövlət Bayrağı kimi qəbul olunub. Birinci sessiyanın iclasına sədrlik edən
Heydər Əliyevin təşəbbüsü ilə həmin milli mahiyyət daşıyan Dövlət Bayrağı Ali
Məclisə gətirilib.
Dövlətçilik
ənənələri və suverenlik
Azərbaycan Respublikası Ali Sovetinin 1991-ci il
oktyabrın 18-də keçirilmiş sessiyasında isə "Azərbaycan Respublikasının dövlət
müstəqilliyi haqqında” Konstitusiya Aktı qəbul edilib. 6 fəsil, 32 maddədən
ibarət Konstitusiya Aktında qeyd olunub ki, müstəqil Azərbaycan dövləti
1918-1920-ci illərdə mövcud olmuş AXC-nin hüquqi varisidir. 1991-ci il dekabrın
29-da ümumxalq referendumunda Azərbaycan xalqı ölkənin müstəqilliyinə və
suverenliyinə səs verib. Beləliklə Azərbaycan XX əsrin sonlarında öz dövlət müstəqilliyini
bərpa edə bilib. Bununla yanaşı, həmin dövrdə ölkədə mövcud olan hərc-mərclik
və hakimiyyət böhranı, həmçinin Ermənistanın Azərbaycana qarşı hərbi təcavüzü
müstəqil dövlət quruculuğu prosesinə böyük zərbə vurub. Yalınız 1993-cü ildə
ümummilli lider Heydər Əliyev hakimiyyətə qayıtdıqdan sonra xalqın milli
müstəqillik ideyalarının reallaşdırılması istiqamətində məqsədyönlü addımlar
atılıb, Azərbaycanın dövlətçilik ənənələri və suverenliyi bərpa olunub.
Xalqımıza
qalan miras
İstər ulu öndər Heydər Əliyevin müstəqil
Azərbaycana rəhbərlik etdiyi illərdə, istərsə də onun layiqli varisi İlham
Əliyevin Prezidentliyi müddətində AXC qurucuları həmişə böyük hörmətlə anılıb
və onların əziz xatirəsi daim uca tutulub. Azərbaycanın dövlət müstəqilliyinin
11-ci ildönümünə həsr olunmuş təntənəli mərasimdə çıxış edən ümummilli lider
Heydər Əliyev AXC-nin fəaliyyətinə xüsusi qiymət verərək deyib ki, o dövrdə
qısa zamanda çox böyük işlər görülüb. Onun sözlərinə görə, ilk dəfə olaraq
müsəlman Şərqində demokratik bir respublika yaradılıb, ilk dəfə olaraq
Azərbaycan xalqı müstəqil yaşamaq şəraitinin nə olduğunu hiss edib, görüb. Ulu
öndər AXC-ni ölkəmizin çoxəsrlik dövlətçilik salnaməsinin ən parlaq
səhifələrindən biri kimi qiymətləndirib. Vurğulayıb ki, AXC-nin yaranması ilə
milli dövlət quruculuğumuz bərqərar edilib. Onun fikrincə, AXC rəhbərləri öz
cəsarətli fəaliyyətləri ilə Azərbaycanda ilk müstəqil dövlətin qurulması üçün
güclü addımlar atdıb, xalqımıza müstəqillik ənənələri qoyub gediblər. Ulu öndər
Heydər Əliyev Azərbaycanda Demokratik Cümhuriyyətin yaranması gününün hər zaman
əziz tutulduğunu xatırladaraq, həmin tarixin Azərbaycanın dövlət müstəqilliyi
günü - Respublika Günü elan olunduğunu və milli bayramımız kimi qeyd edildiyini
vurğulayıb.
AXC-nin
100 illiyinə həsr olunmuş silsilə tədbirlər
Prezident İlham Əliyev də AXC-nin elan olunmasını,
bu prosesdə iştirakçı olan Azərbaycan ziyalılarının rolunu yüksək
qiymətləndirib. Dövlət başçısının imzaladığı sərəncamla Bakının mərkəzində
AXC-nin şərəfinə abidə ucaldılıb, Xalq Cümhuriyyəti qurucularının adları
əbədiləşdirilib. Hər il 28 May Respublika Günündə Prezident İlham Əliyev
tərəfindən bu abidə ziyarət olunur. Bununla yanaşı, Prezident İlham Əliyev 16
may 2017-ci il tarixdə AXC-nin 100 illik yubileyinin dövlət səviyyəsində geniş
qeyd edilməsi haqqında sərəncam imzalayıb. Prezidentin 10 yanvar 2018-ci il
tarixli sərəncamı ilə 2018-ci il ölkəmizdə "Azərbaycan Xalq Cümhuriyyəti ili”
elan olunub. Bu sərəncamlardan irəli gələrək Azərbaycanda və xarici ölkələrdə
Cümhuriyyətin 100 illiyinə həsr olunmuş silsilə tədbirlər keçirilib.
"Biz
haqlı olaraq fəxr edirik ki...”
100 illik yubiley münasibətilə təşkil olunan rəsmi
qəbulda çıxış edən Prezident İlham Əliyev AXC-nin yaradılmasını tarixi hadisə
kimi dəyərləndirib və Azərbaycan xalqının müsəlman Şərqində ilk demokratik
cümhuriyyət qurmasından fəxr hissi
keçirdiyini dilə gətirib: "İlk dəfə olaraq müsəlman aləmində demokratik
respublika yaradılmışdır. Biz haqlı olaraq fəxr edirik ki, bu respublikanı
Azərbaycan xalqı yaradıbdır. Bu, bir daha onu göstərir ki, Azərbaycan xalqı
böyük xalqdır, Azərbaycan xalqı azadlıqsevər, mütərəqqi xalqdır. Azərbaycan
dövləti Azərbaycan Xalq Cümhuriyyətinin qurucularının xatirəsinə böyük hörmətlə
yanaşır. ...Biz bu tarixi hadisə ilə haqlı olaraq fəxr edirik. Azərbaycan Xalq
Cümhuriyyəti 23 ay ərzində fəaliyyət göstərmişdir. Ancaq bu müddət ərzində
böyük işlər görə bilmişdir. ...Qısa müddət ərzində 200-dən çox qanun qəbul
edilmişdir. Əlbəttə ki, onların arasında qadınlara səsvermə hüququnun verilməsi
qanunu xüsusi yer tutur. Bakı Dövlət Universiteti yaradılmışdır və bu, onu
göstərir ki, Azərbaycan Xalq Cümhuriyyəti kadrların yetişdirilməsi işində,
təhsilin inkişafında böyük işlər görmək əzmində idi. Azərbaycan dili - ana dili
bütün təhsil müəssisələrində qəbul edilmişdir. ...Bir sözlə, görülmüş işlər çox
idi. Xalq Cümhuriyyətinin niyyəti ondan ibarət idi ki, güclü dövlət yaratsınlar
və Azərbaycan xalqı azadlıq, əmin-amanlıq şəraitində yaşaya
bilsin....Əfsuslar olsun ki, Azərbaycan Xalq Cümhuriyyətinin ömrü uzun
olmadı, 23 aydan sonra respublika süqut etdi. Bu, bizim böyük faciəmizdir. Mən
tam əminəm ki, əgər 1920-ci ildə müstəqillik əldən verilməsəydi, bu gün
Azərbaycan dünyanın ən zəngin və ən inkişaf etmiş ölkələrinin sırasında ola
bilərdi”.
Demokratik
Cümhuriyyətin layiqli varisi
AXC-nin layiqli varisi kimi müstəqil və müasir
Azərbaycan ötən illər ərzində böyük inkişaf yolu keçib, beynəlxalq aləmin
nüfuzlu üzvünə çevrilib. Azərbaycan Prezidentinin rəhbərliyi altında həyata
keçirilən uzunmüddətli iqtisadi inkişaf strategiyası ölkənin regionlarının
davamlı və tarazlı inkişafını təmin edib. Bu strategiyanın həyata
keçirilməsində, o cümlədən ölkənin regionlarının sosial-iqtisadi inkişafının
yeni keyfiyyət mərhələsinə yüksəlməsində regionların sosial-iqtisadi inkişafı
ilə bağlı qəbul edilmiş dövlət proqramları (2004-2008, 2009-2013, 2014-2018 və
2019-2023-cü illər üzrə) xüsusilə qeyd olunmalıdır. 2004-cü ildən uğurla icra
olunan bu proqramlar regionlarda şəhər, qəsəbə və kəndlərin simasını köklü
şəkildə dəyişib, regionların potensialının artmasına, infrastruktur
təminatının, kommunal xidmətlərin keyfiyyətinin, biznes və investisiya
mühitinin yaxşılaşmasına və əhalinin rifahının yüksəlməsinə geniş imkanlar
açıb. Dövlət proqramlarının icra olunduğu 2004–2018-ci illər ərzində ümumi
daxili məhsul 3,3 dəfə, o cümlədən qeyri-neft sektoru üzrə 2,8 dəfə, sənaye
üzrə 2,6 dəfə, kənd təsərrüfatı üzrə 1,7 dəfə artıb. Bu müddətdə həyata
keçirilmiş məqsədyönlü tədbirlər nəticəsində ölkədə 1,5 milyonu daimi olmaqla 2
milyondan çox yeni iş yeri, 100 mindən çox müəssisə yaradılıb, işsizlik 5
faizə, yoxsulluq səviyyəsi 5,1 faizə enib. Dövlət proqramları çərçivəsində
görülmüş genişmiqyaslı işlər regionların qarşıdakı illərdə də inkişafı üçün
möhkəm zəmin yaradıb. Hazırda Azərbaycan Respublikası regionlarının 2019–2023-cü
illərdə sosial-iqtisadi inkişafı Dövlət Proqramı uğurla həyata keçirilir.
Müzəffər
Ali Baş Komandan, qalib ölkə
Onu da xatırlatmaq yerinə düşər ki, bu il AXC-nin
103 illiyi ilə bərabər, Azərbaycanın müstəqilliyinin 30 ili tamam olur. Ötən 30
il ərzində Azərbaycan ilk dəfədir ki, həm Cümhuriyyət Bayramını, həm də
müstəqillik gününü qalib bir ölkə olaraq qeyd edəcək. Ötən il sentyabrın 27-də
başlayan və noyabrın 10-a qədər davam edən 44 günlük Vətən Müharibəsi
nəticəsində Azərbaycan özünün ən böyük problemini – Ermənistan-Azərbaycan,
Dağlıq Qarabağ münaqişəsini həll edə bilib. 30 ilə yaxındır davam edən bu
problem Müzəffər Ali Baş Komandan, Prezident İlham Əliyevin rəhbərliyi altında
Silahlı Qüvvələrimiz tərəfindən hərb yolu ilə həll olunub. Rəşadətli Ordumuz
Ermənistan silahlı birləşmələrini işğal etdikləri torpaqlarımızdan qovub,
düşmənin belini qırıb, ərazi bütövlüyümüzü təmin edib. Qısa zamanda İran və
Ermənistanla dövlət sərhədində sərhəd xidmətinin yeni hərbi hissələri
yaradılıb, sərhədlərin etibarlı mühafizəsi təşkil olunub. Bununla paralel
olaraq, işğaldan azad edilmiş ərazilərin bərpası ilə bağlı Strateji Fəaliyyət
Planı hazırlanıb. Hazırda bu ərazilərdə genişmiqyaslı quruculuq və abadlıq
tədbirləri həyata keçirilir, qaçqın və məcburi köçkünlərin öz evlərinə dönməsi
üçün Böyük Qayıdış layihəsi çərçivəsində mühüm işlər görülür. Müstəqilliyimizi
ən böyük sərvətimiz, nemətimiz, xoşbəxtliyimiz hesab edən Prezident İlham
Əliyevin rəhbərliyi altında Azərbaycanın bundan sonra da böyük uğurlara imza
atacağı, qarşısına qoyduğu hədəflərə çatacağı, xalqımızın daha xoşbəxt günlər
yaşayacağı şübhəsizdir.
Rufik
İSMAYILOV