Əli Həsənovun radikal müxalifəti tənqid etməsinin səbəbi...
Prezident Administrasiyasının ictimai-siyasi məsələlər
şöbəsinin məsul əməkdaşı Bəhruz Həsənov "Facebook” səhifəsində status yazaraq,
Azərbaycan Prezidentinin İctimai-siyasi məsələlər üzrə köməkçisi, professor Əli
Həsənovun "İlham Əliyev dövlətçiliyin keşiyində, antimilli qruplar hakimiyyət
eşqində...” məqaləsində radikal müxalifəti tənqid etməsinin səbəblərinə
toxunub. O, əvvəlcə Azərbaycan
Prezidentinin İctimai-siyasi məsələlər üzrə köməkçisi Əli Həsənovun keçdiyimiz
günlərdə gündəmin aktual mövzuları ilə bağlı əhatəli bir yazı qələmə aldığını,
ictimai maraq doğuran bəzi məsələlərə aydınlıq gətirdiyini diqqətə çatdırıb.
Radikal
müxalifət növbəti dəfə ifşa olunub
B.Həsənov bildirib ki, sözügedən məqalədə müəllif tərəfindən
yaxın tariximizə ekskursiya olunub, dövlət quruculuğumuzun inkişaf mərhələləri əsaslı
şəkildə təhlil edilib, əldə edilən uğur və nailiyyətləri hər vəchlə qaralamağa
çalışan radikal müxalifət cəbhəsi təkzibedilməz faktlarla növbəti dəfə ifşa olunub:
"Əslində burda qeyri-adi heç nə yoxdur. Əli Həsənov dövlətin ideoloji kursu ilə
məşğul olan, informasiya siyasətini həyata keçirən şöbənin rəhbəridir və eyni
sahə üzrə Azərbaycan Respublikasının Prezidenti cənab İlham Əliyevin köməkçisidir.
Buna görə də Respublikanın ictimai-siyasi həyatından birbaşa məsul
olan dövlət rəsmisi kimi Əli Həsənovun zaman-zaman bu cür analitik və
konseptual yazılarla çıxış etməsi tamamilə normaldır, hətta vacibdir. Belə
aydın olur ki, məqalədə ifşa olunan radikal anti-milli ünsürlər və dövlətimiz
üçün ağır nəticələnən hərc-mərclik dövrünün tör-töküntülərinə məlum yazı
sarsıdıcı zərbə olub. Çünki, Prezidentin köməkçisi həmin məqaləsində yaxın
tariximizə bir daha işıq tutaraq, AXCP sədrinə çox da öyünüləsi olmayan siyasi
keçmişini xatırladıb, onun eşitmək istəmədiyi faktları sadalayıb və layiq
olduğu yeri göstərib”.
Ölkəni
xaosa və qarşıdurmaya sürükləmək cəhdləri
Professor Əli Həsənovun Kərimlinin timsalında radikal
müxalifət qanadına hücum etməsini müxtəlif yerlərə yozanlara səslənən B.Həsənov
tövsiyə edib ki, onlar "Keşikçidağ” məsələsində AXCP sədrinin anti-milli,
provakativ və qərəzli mövqeyinə nəzər yetirsinlər: "Əli Kərimli var gücü ilə
ictimai rəyi manipulyasiya edib hakimiyyəti təzyiq altına salmağa və ölkəmizi
yeni toqquşmaya sürükləməyə çalışırdı. Ehtimal etmək çətin deyil ki,
"Keşikçidağ” məsələsi Əli Kərimlinin rəhbər vəzifədə təmsil olunduğu
AXC-Müsavat cütlüyünün fərsiz hakimiyyəti dövründə baş versəydi, Azərbaycan yeni
bir böhrana yuvarlanacaqdı. Beləliklə, Əli Həsənovun
radikal müxalifəti tənqid etməsinin səbəbi onların hakimiyyətə qarşı destruktiv
və qərəzli mövqe tutmaları, ümumilli məsələlərdə dövlət maraqlarına zidd mövqe
sərgiləmələri, ölkəni xaosa və qarşıdurmaya sürükləmək cəhdləridir. Təəssüf
ki, Əli Kərimli və onun tərəfdaşları tənqiddən nəticə çıxarmaq, bir hissəsində
yer aldıqları məqaləni dərindən öyrənib, tezisləşdirib siyasi dünyagörüşlərində
köklü islahatlar aparmaq yerinə şər-böhtan maşınını işə salmağa üstünlük veriblər.
Adətən aciz insanların məğlub olduqları zaman əl atdıqları yeganə vasitə budur”.
Eyforiyaya
qapılan AXCP sədri
Administrasiya rəsmisi sonda vurğulayıb ki, Əli Həsənovun
öz məqaləsinin bir neçə abzasını Əli Kərimliyə həsr etməsi onu həyəcanlandırıb
və xoşbəxtlik bəxş edib: "Yazıda özü haqqında sərt ifadələrin yer almasına
baxmayaraq, AXCP sədri Prezidentin köməkçisi tərəfindən adının çəkilməsinin
eyforiyasına qapılır, özünü bəxtəvər hiss edir və bundan piar kimi istifadə etməyə
təşəbbüs göstərir. Bu da təbiidir. Hansı ki, illərdir dəridən-qabıqdan
çıxanlar bu uğura nail ola bilmirlər”.
Alpər TURAN