Dövlət vətəndaşının yanındadır
Millət vəkilləri Tovuz rayonunda mülki əhaliyə,
dövlət əmlakına dəymiş ziyanın aradan qaldırılması ilə bağlı verilmiş sərəncamın mühüm əhəmiyyət kəsb etdiyini
vurğulayırlar
2020-ci il iyulun 12-də günorta saatlarından
başlayaraq Ermənistanın silahlı qüvvələrinin bölmələri Azərbaycan-Ermənistan
dövlət sərhədinin Tovuz rayonu istiqamətində mövqeləri ələ keçirmək məqsədi ilə
atəşkəs rejimini kobud şəkildə pozub. Düşmən gərginliyi artırmaq məqsədilə növbəti
hərbi təxribat törətməklə iriçaplı pulemyotlardan, qumbaraatanlardan, snayper
tüfənglərindən, minaatanlardan və digər artilleriya qurğularından istifadə etməklə
mövqelərimizi atəşə tutmaqla hücuma keçmək cəhdi ediblər. Beləliklə, Ermənistan
özünün təcavüzkar və terrorçu mahiyyətini növbəti dəfə nümayiş etdirməklə milli
ədavət və düşmənçilik niyyəti ilə dinc əhalinin sıx yaşadığı əraziləri
artilleriya atəşinə tutub, nəticədə Azərbaycan Ordusunun bir neçə hərbi
qulluqçusu şəhid olub, digərləri müxtəlif dərəcəli bədən xəsarətləri alıb, o
cümlədən cəbhə bölgəsindəki yaşayış məntəqələrinə, mülki əhaliyə də mühüm ziyan
dəyib, Tovuz rayonunun Ağdam kənd sakini, 1944-cü il təvəllüdlü Əzizov Əziz İzzət
oğlu həlak olub.
Mülki əhali hədəfdə
Dondar Quşçu kənd ərazisinə mərmilərin düşməsi nəticəsində
kənd sakini, 1948-ci il təvəllüdlü Əliyeva Telarə Əhməd qızına məxsus fərdi
yaşayış evinə, 1981-ci il təvəllüdlü Əliyeva Samirə Nurəddin qızına, 1973-cü il
təvəllüdlü Hüseynov Aydın Məhəmməd oğluna və 1986-cı il təvəllüdlü Rüstəmov
Zeynal Əli oğluna məxsus həyətyanı torpaq sahələrinə ciddi ziyan dəyib. Qazax
rayonu Bala Cəfərli kəndi ilə üzbəüz mövqedə yerləşən Ermənistan silahlı qüvvələrinin
bölmələrinə məxsus reaktiv qurğudan buraxılmış mərminin atılaraq partlaması səbəbindən
həmin mərminin müxtəlif hissələri Xanlıqlar kənd sakinləri Səlminə Əliyeva, Məhbub
Orucova, Əziz Şirinov, İlham Mehtiyev, Razim Musayev və Kamil Cahanova məxsus
evlərin dam örtüklərinə, həmçinin həyətyanı sahələrinə səpələnib. Nəticədə zərərçəkmiş
şəxslərin əmlakları qəsdən zədələnməklə sonunculara xeyli miqdarda ziyan
vurulub.
Bərpa və təmir-tikinti
işlərinin sürətlə həyata keçirilməsi
Bütün bunları nəzərə alan Prezident İlham Əliyev
iyulun 20-də "Tovuz rayonunu Ermənistan silahlı qüvvələrinin intensiv atəşə
tutması nəticəsində mülki əhaliyə, dövlət əmlakına, o cümlədən infrastruktur
obyektlərinə dəymiş ziyanın aradan qaldırılması ilə bağlı tədbirlər haqqında” sərəncam
imzalayıb. Sənəddə Ermənistan silahlı qüvvələrinin iyulun 12-dən başlayaraq Ermənistan
və Azərbaycan dövlət sərhədinin Tovuz rayonu istiqamətində qəsdən və hədəflənmiş
şəkildə yaşayış məntəqələrini iriçaplı silahlardan və ağır artilleriya
qurğularından intensiv atəşə tutması nəticəsində mülki əhaliyə, dövlət əmlakına,
o cümlədən infrastruktur obyektlərinə ciddi ziyan dəydiyi bildirilib. Qeyd
olunub ki, Ermənistan silahlı qüvvələrinin Azərbaycanın Tovuz rayonunu intensiv
atəşə tutması nəticəsində mülki əhaliyə, dövlət əmlakına, o cümlədən
infrastruktur obyektlərinə dəymiş ziyanın qiymətləndirilməsini İqtisadiyyat
Nazirliyi Fövqəladə Hallar Nazirliyi ilə birlikdə qısa müddətdə təmin edib, bu
barədə məlumatları Nazirlər Kabinetinə təqdim etsin. Nazirlər Kabinetinə isə dəymiş
ziyanın aradan qaldırılması, zərər vurulmuş obyektlərin tam bərpası və təmir-tikinti
işlərinin sürətlə həyata keçirilməsi üçün tələb olunan maliyyə vəsaiti barədə təkliflərini
Azərbaycan Prezidentinə təqdim etmək tapşırılıb.
İşlərin gedişi dövlət
başçısının şəxsi nəzarətindədir
Sərəncamdan irəli gələrək ilkin qiymətləndirmə
aparılıb. Müəyyən edilib ki, erməni hərbi birləşmələrinin Azərbaycan-Ermənistan
dövlət sərhədində törətdikləri təxribat nəticəsində Tovuz rayonunun 6 kəndinə -
Ağdam, Əlibəyli, Dondar Quşçu, Vahidli, Yuxarı Öysüzlü və Aşağı Öysüzlü kəndlərinə
ciddi ziyan dəyib. Dinc əhaliyə məxsus 35 evin müxtəlif dərəcədə ziyan çəkdiyi
ortaya çıxıb. Bununla yanaşı, intensiv atəş nəticəsində dövlət əmlakına da zərər
dəyib – bu, əsasən, kəndlərə çəkilən qaz boruları, elektrik naqilləri, sosial və
rabitə infrastrukturudur. Qeyd edək ki, dəymiş ziyan tam həcmdə müəyyən
edildikdən və qiymətləndirmə aparıldıqdan sonra dinc əhaliyə, yaşayış ərazilərinə,
dövlət və bələdiyyə əmlakına, təsərrüfatlara, infrastruktura dəymiş ziyanın
aradan qaldırılması ilə bağlı hökumət tərəfindən Tədbirlər Planı hazırlanacaq,
zərər vurulmuş obyektlərin və yaşayış evlərinin tam bərpası işlərinin sürətlə həyata
keçirilməsi üçün təkliflər Azərbaycan Respublikasının Prezidentinə təqdim ediləcək.
Dəymiş zərərin müəyyənləşdirilməsi və qiymətləndirilməsinin qısa müddətdə başa
çatdırılması üçün mütəxəssislər qrupuna bütün zəruri dəstək göstərilir. İşlərin
gedişi dövlət başçısının şəxsi nəzarətindədir.
Mülki əhalinin
problemlərinin həlli
Milli Məclisin Müdafiə,
təhlükəsizlik və korrupsiya ilə mübarizə komitəsinin sədr müavini Hikmət
Babaoğlu bildirib ki, Azərbaycan
Ordusu işğalçı Ermənistanın ölkəmizlə dövlət sərhədinin Tovuz rayonu istiqamətində
atəşkəsi pozmaqla törətdiyi təxribatın qarşısını qətiyyətlə alıb. Millət vəkilinin
sözlərinə görə, təcavüzkar Ermənistan bu təxribatla əldə etmək istədiyi hədəflərin
heç birinə çata bilməyib: "Baş verən hadisələrin fonunda Azərbaycan xalqı öz
Prezidentinə, Ali Baş Komandanına və milli ordusuna böyük inam və etimadını, dəstəyini
qətiyyətlə nümayiş etdirdi. Bəhs olunan proseslər və hadisələr kontekstində Azərbaycan
dövləti güclü siyasi iradə ortaya qoyaraq istənilən şəraitdə öz vətəndaşlarının
yanında olduğunu göstərdi. Prezident İlham Əliyevin "Azərbaycan Respublikasının
Tovuz rayonunu Ermənistan Respublikası Silahlı Qüvvələrinin intensiv atəşə
tutması nəticəsində həmin kəndlərdə yaşayan mülki əhaliyə, dövlət əmlakına, o
cümlədən infrastruktur obyektlərinə dəymiş ziyanın aradan qaldırılması ilə
bağlı tədbirlər haqqında” Sərəncam imzalaması da bunun bariz nümunəsidir. Biz
2016-cı ildə də analoji yanaşmanı müşahidə etmişdik. Ermənistanın hərbi təxribatları
zamanı zərər yetirilmiş yaşayış məntəqələrində bərpa işləri görülmüş, mülki əhalinin
problemlərinin həlli istiqamətində ardıcıl addımlar atılmışdı”.
Dövlət başçısının vətəndaşlara xüsusi qayğısı
H.Babaoğlu deyib ki, bütün bu faktlar Azərbaycan
dövlətinin vətəndaşların təhlükəsizliyinin təmin olunmasını, rifahının yüksəldilməsini
daim diqqət mərkəzində saxladığını əyani surətdə nümayiş etdirir: "Prezident
İlham Əliyevin dəfələrlə bəyan etdiyi kimi, ölkəmizdə həyata keçirilən siyasətin
mərkəzində Azərbaycan vətəndaşlarının rifahı və mənafeyi dayanır. Son 17 ilin təcrübəsində
davamlı olaraq müşahidə etmişik ki, təbii fəlakət, düşmənin hərbi təxribatları
və digər bu kimi müxtəlif çətinliklərlə üzləşən vətəndaşların problemləri məhz
dövlət tərəfindən aradan qaldırılıb, bu məsələlər şəxsən Prezident İlham Əliyevin
və Birinci vitse-prezident Mehriban xanım Əliyevanın diqqət mərkəzində olub.
Görülən tədbirlər dövlətin sosial davranışından daha çox, dövlət başçısının vətəndaşlara
xüsusi qayğısı kimi qiymətləndirilməlidir”.
Sərhəd kəndlərdə
quruculuq işləri davam etdirilir
Millət vəkili Arzu
Nağıyev də Prezident İlham Əliyevin
"Azərbaycan Respublikasının Tovuz rayonunu Ermənistan Respublikası Silahlı
Qüvvələrinin intensiv atəşə tutması nəticəsində həmin kəndlərdə yaşayan mülki əhaliyə,
dövlət əmlakına, o cümlədən infrastruktur obyektlərinə dəymiş ziyanın aradan
qaldırılması ilə bağlı tədbirlər haqqında” Sərəncamının çox mühüm addım
olduğunu söyləyib. O qeyd edib ki, bu sərəncam Tovuz sakinlərini bir daha əmin
etdi ki, dövlət istənilən vaxt öz vətəndaşının yanındadır: "Tovuz bölgəsindən
olan bir millət vəkili, ən əsası, bir tovuzlu kimi cənab Prezidentə dərin təşəkkürümü
bildirirəm. Əsas məsələ ondan ibarətdir ki, bu gün hər bir vətəndaş hiss edir
ki, dövlət onun arxasındadır. Məlum məsələdir ki, ermənilərin təxribatı nəticəsində
Tovuzun 6 kəndində təxminən 35 evə və digər infrastruktura ciddi ziyan dəyib. Cənab
Prezident sərəncamında bütün bunların araşdırılması, eyni zamanda Fövqəladə
Hallar Nazirliyi və İqtisadiyyat Nazirliyi ilə birlikdə bu məlumatların təhlil
edilməsi və nəticələrin Nazirlər Kabinetinə təqdim edilməsini tapşırıb. Düşünürəm
ki, dəymiş zərərin aradan qaldırılması üçün bu sənəd çox vacibdir. Bunun əsas məramı
dövlətin hər bir vətəndaşının yanında olmasıdır. Bunu da hər bir sakin anlayır.
Bir məqamı da xüsusi vurğulayım ki, Birinci vitse-prezident Mehriban Əliyeva
Tovuz istiqamətində şəhid olan 12 hərbçi ilə bağlı Heydər Əliyev Fonduna
tapşırıq verib. Şəhid olan hərbçilərin ailə üzvlərinin bütün qayğıları daim
Fondun nəzarətində olacaq. Hazırda Tovuzda, xüsusən də döyüşlər olmuş ərazidə əhali
öz gündəlik işlərini davam etdirir, heç bir panika, gərginlik yoxdur. İnsanlar
Azərbaycan Ordusuna güvənir. Artıq ərazidə sakitlikdir. Azərbaycan Ordusu tam şəkildə
əraziyə nəzarət edir, Ağdam, Dondar Quşçu və digər sərhəd kəndlərdə dinc
quruculuq işləri davam etdirilir. Heç bir kənd sakini yaşayış yerini tərk etməyib”.
Rufik İSMAYILOV