Ödənişsiz hüquqi xidmət - Fotolar
Bu xidmətə bütün kateqoriyalardan olan təbəqənin
çatımlılığı təmin edilir
XX əsrin
sonlarında yenidən müstəqilliyinə qovuşan Azərbaycanda vətəndaşların hüquq və
azadlıqları təmin edilir, qanun çərçivəsində ən yüksək səviyyədə müdafiə
olunur. Konstitusiyamızda insan hüquqlarının və azadlıqlarının təmin edilməsi dövlətin
ali məqsədi kimi bəyan edilir. Ana qanunumuzun üçdə bir hissəsinin insan hüquq
və azadlıqlarına, onların təminatına həsr olunması deyilənlərə əyani sübutdur. Konstitusiyanın
26-cı maddəsinə əsasən, hər kəsin qanunla qadağan olunmayan üsul və vasitələrlə
öz hüquq və azadlıqlarını müdafiə etmək hüququ vardır. Dövlət hər kəsin hüquq
və azadlıqlarının müdafiəsinə təminat verir. İstinasız olaraq hakimiyyətin
bütün qollarına şamil edilən bu öhdəlik insan və vətəndaş hüquq və
azadlıqlarına hörmət etmək, onları müdafiə etmək, dəstəkləmək, eləcə də həyata
keçirmək vəzifələrini ehtiva edir. Konstitusiyanın "Hüquqi yardım almaq hüququ”
adlı 61-ci Maddəsinə hər kəsin yüksək keyfiyyətli hüquqi yardım almaq hüququnun
olduğu da bəyan edilib. Qeyd olunub ki, qanunla nəzərdə tutulmuş hallarda
hüquqi yardım ödənişsiz, dövlət hesabına göstərilir.
Məhkəmə qərarı əsasında təminat
Elə bu məqamı
əsas tutaraq, Azərbaycanda hüquqi yardım üçün yaradılan imkanları, xüsusən də
dövlət hesabına vətəndaşlara göstərilən hüquqi yardım səviyyəsini araşdırdıq. Vəkillər
Kollegiyasına bununla bağlı ünvanladığımız sualları cavablandıran Kollegiya sədri Anar Bağırov bildirdi
ki, ölkəmizdə vətəndaşlara dövlət hesabına hüquqi yardım cinayət təqibi ilə
bağlı bütün mərhələlərdə, mülki və inzibati işlərdə isə aztəminatlı şəxslərə
kasasiya instansiyasında məhkəmə qərarı əsasında təmin edilir: "Azərbaycan Konstitusiyasında
insanların yüksək keyfiyyətli hüquqi yardıma çıxış hüquqları mövcuddur. Bu
hüquqa bütün kateqoriyalardan olan təbəqələrin çatımlılığını təmin etmək
məqsədilə Prezident İlham Əliyev tərəfindən "Azərbaycan ədliyyəsinin inkişafına
dair 2019–2023-cü illər üçün Dövlət Proqramı” təsdiq edilib. Bununla bağlı
imzalanan sərəncamda əhalinin aztəminatlı təbəqəsinə pulsuz hüquqi yardım
göstərilməsinin təkmilləşdirilməsi məqsədilə beynəlxalq ekspertlərinin iştirakı
ilə 2019-2023-cü illərdə "Pulsuz hüquqi yardım haqqında” Qanun layihəsinin
hazırlanması aidiyyəti dövlət qurumuna tapşırılıb”.
Aztəminatlı əhaliyə səyyar hüquqi xidmət
Kollegiya sədri
A.Bağırov qeyd edib ki, gələcək dövrdə qeyd olunan qanunun qəbulu ölkədə
insanların kompleks şəkildə hüquqi yardıma çatımlılığına şərait yaradacaq.
Bundan əlavə, dövlət başçısı İlham Əliyevin "Azərbaycanda vəkilliyin inkişafı
ilə bağlı əlavə tədbirlər haqqında” sərəncamına görə, hüquqi məsləhətə ehtiyacı
olan aztəminatlı şəxslər üçün Vəkillər Kollegiyası tərəfindən pulsuz hüquqi
xidmətlər göstərilməsinin təşkil edilməsi tövsiyə olunub: "Ölkəmizdə peşəkar və
yüksək keyfiyyətli hüquqi yardım xidmətlərini göstərən təşkilat olaraq Vəkillər
Kollegiyası qeyd olunan tövsiyənin icrası çərçivəsində mütəmadi olaraq həm
paytaxtda, həm də regionlarda aztəminatlı əhaliyə səyyar hüquqi yardım
xidmətlərinin göstərilməsini təşkil etməkdədir. Həmçinin Vəkillər Kollegiyası
Avropa İttifaqı, BMT-nin ixtisaslaşmış qurumları ilə birgə hüquqi yardım
xidmətləri üzrə layihə və təşəbbüslər həyata keçirilməkdədir. Hal-hazırda
Masallı, Bərdə, Qəbələ və İmişli ASAN xidmət mərkəzlərində fəaliyyət göstərən
vəkil büroları tərəfindən aztəminatlı region əhalisinə ödənişsiz hüquqi yardım
xidmətləri göstərilməkdədir”.
Hüquq xidmətlərinin keyfiyyəti
Xidmətlərin
səviyyəsi, vətəndaşların bu imkanlardan yararlanma göstəricisinə gəlincə,
A.Bağırov deyib ki, Vəkillər Kollegiyası vəkillər tərəfindən vətəndaşlara
göstərilən hüquqi yardım xidmətlərinin keyfiyyət məsələsini hər zaman diqqət
mərkəzində saxlayır. Onun sözlərinə görə, bunun üçün Kollegiya həm özü, həm də
ixtisaslaşmış beynəlxalq təşkilatlar ilə birgə vəkillərin davamlı tədrisi
çərçivəsində onların peşə hazırlıqlarının yüksəldilməsi istiqamətində çoxsaylı
təlimlər təşkil edir: "Vəkillər Kollegiyasının rəhbərliyi tərəfindən region və
paytaxt vəkilləri ilə görüşlər təşkil edilir, həmin görüşlərdə dövrün
tələbləri, vəkillərin göstərdikləri hüquqi yardım xidmətlərinin keyfiyyətinin
əhəmiyyəti barədə söhbətlər aparılır. İctimai stabilliyin təmin edilməsində
vəkillərin müstəsna rola malik olmaları onların nəzərlərinə çatdırılır”.
İctimai sektorun dəstəyi
Hüquq və İnkişaf İctimai Birliyinin sədri, hüquqşünas
Hafiz Həsənov mövzu ilə bağlı bildirib ki, vətəndaşlara pulsuz hüquqi yardım
göstərilməsi missiyası əsasən dövlətin üzərindədir. O vurğulayıb ki, dövlətdən kənar
hüquqi yardım istiqamətində vətəndaş cəmiyyəti tərəfindən indiyə qədər çoxsaylı
layihələr həyata keçirilib: "Müəyyən donorların tender elanlarına uyğun olaraq
bizim təşkilat hələ 10 il bundan öncədən bu proseslə məşğul olmağa başlayıb.
Hüquq maarifçiliyi, hüquqi yardım sahəsində fəaliyyət göstərən QHT-lər müxtəlif
layihələrlə bu prosesə dəstək olublar. Proseslər mərkəzlərdə, daha çox isə
regionlarda olub. Bu hüquqi yardımlar şifahi və yazılı hüquq məsləhətlərinin
verilməsini əhatə edib. İnsanlar hansısa hüququnu həyata keçirmək, yaxud
pozulmuş hüququnu bərpa etmək üçün hüquqi məsləhət alıblar. Eyni zamanda
vətəndaşlara qanunvericiliyin ayrı-ayrı normaları şərh edilib, qanunlar izah
olunub. Dövlət orqanlarına ərizə və şikayətlərin hazırlanıb təqdim edilməsi
üzrə də məsləhətlər verilib. Konkret Məhkəmələrə iddia ərizələrinin
hazırlanması, birinci Məhkəmə instansiyasının qərarından Apellyasiyaya, buradan
isə Ali Məhkəməyə şikayətlərin verilməsi qaydası izah olunub. Bundan başqa, QHT
təmsilçiləri tərəfindən vətəndaşlara göstərilən hüquqi yardımlardan biri də
ərizəçilərin hüquqlarının məhkəmələrdə müdafiə olunması məsələsidir. Bu məsələ
ilə sırf peşəkar vəkillər məşğul olublar”.
Ödənşli hüquq xidmətinin qiyməti
Tanınmış vəkil Akif Əlizadə qəzetimizə
açıqlamasında bildirib ki, Azərbaycanda hüquqi yardım əldə etmək hamı üçün
əlçatandır. O, Konstitusiyanın 61-ci Maddəsini nümunə gətirərək, hər kəsin hüquqi
yardım almaq hüququnun olduğunu diqqətə çatdırıb. Qeyd edib ki, belə bir maddə
əksər ölkələrin Konstitusiyasında yoxdur. Onun sözlərinə görə, Azərbaycanda hər
bir vətəndaş şəxsi vəsaiti, yaxud da dövlət hesabına hüquqi yardım ala bilər: "Əgər
2017-ci ilə qədər Vəkillər Kollegiyasının 600 nəfərə qədər üzvü var idisə,
hazırda üzvlərin sayı 2 mini keçib. Ölkəmizdə vətəndaşlara hüquqi yardım
göstərmək üçün çoxsaylı vəkil büroları var. Hər bir vətəndaş şəxsi hesabına bu
bürolara müstəqil şəkildə müraciət edə, hüquqi yardım əldə edə bilər.
Göstərilən xidmətin səviyyəsinə uyğun olaraq qiymətlər 50-1000 manat arasında
dəyişir. Bu, işin həcmindən, vətəndaşın maddi durumundan, tərəflərin
razılığından, imzalanan müqavilədən asılıdır”.
Avropa ölkələri ilə müqayisə
Vəkil
bildirib ki, Azərbaycanla müqayisədə Avropa ölkələrində, hətta qonşu Rusiyada,
Gürcüstanda vəkillik xidməti həddindən artıq bahadır. Onun fikrincə, belə
ölkələrdə heç də hər bir vətəndaş bu xidmətdən yararlana bilmir. Azərbaycan
vətəndaşlarının pulsuz hüquqi yardım almasına gəlincə, A.Əlizadə deyib ki, bu
məqama əsasən cinayət işlərində rast gəlinir: "Yəni, hansısa vətəndaş törətdiyi
əmələ görə tutulursa, ona qarşı ittiham irəli sürülürsə, həbsə alınırsa, şəxsi
tutan, ittiham irəli sürən tərəfdən maddi durumundan asılı olmayaraq ona vəkil
təklif olunur. Kimsə bu vəkili qəbul edir, bir başqası isə qəbul etmir, şəxsi
vəsaiti və ya ailəsinin hesabına vəkil tutur. Mülki işlərə gəldikdə, pulsuz
hüquqi yardım almaq üçün şəxs mütləq Məhkəməyə müvafiq sənəd təqdim etməlidir.
Şəxs sübut etməlidir ki, həqiqətən də onun maddi durumu aşağı səviyyədədir, öz
hesabına vəkil tutmaq imkanı yoxdur. Misal üçün, əlilliyi olan şəxs, təqaüdçü,
şəhid ailəsinin üzvü, müharibə veteranı, məcburi köçkün, heç bir yerdə
işləməyən, işləsə də maddi durumu çox aşağı olan vətəndaş Məhkəməyə müvafiq
sənəd təqdim etməklə, mülki işlərdə dövlət hesabına, ödənişsiz vəkil
xidmətindən yararlana bilər. Prosedur belədir ki, vətəndaşın təqdim etdiyi
sübutlar – sənədlər əsasında Məhkəmə dərhal qərardad çıxarır, göndərir Vəkillər
Kollegiyasına. Vəkillər Kollegiyası da vəkillər bürosu vasitəsilə həmin
vətəndaşı vəkillə təmin edir”.
Elm məbədində hüquqi yardım
Qeyd edək ki,
Azərbaycanda Vəkillər Kollegiyasının dövlət hesabına vətəndaşlara
hüquqi yardım göstərilməsi işinə QHT sektoru ilə yanaşı, elm məbədi sayılan Azərbaycan
Milli Elmlər Akademiyası (AMEA) da öz töhfəsini verir. AMEA-nın Hüquq və İnsan
Haqları İnstitutunun beynəlxalq hüquq şöbəsi Dünya Bankı ilə birlikdə hüquqi
yardım xidmətlərinin göstərilməsi layihəsi icra olunur. Həmin layihəyə çərçivəsində
vətəndaşlara ödənişsiz hüquqi məsləhətlər verilir. İnstitutun direktoru, millət vəkili Aytən Mustafazadəqəzetimizə
açıqlamasında bildirib ki, hüquqi yardım xidmətlərinin göstərilməsi üzrə layihə
2018-ci ilin mart ayından etibarən həyata keçirilir. Onun sözlərinə görə, layihənin
məqsədi hüquqi yardıma ehtiyacı olan həssas qrup vətəndaşlara, xüsusilə
qadınlar, yetkinlik yaşına çatmayanlar, qaçqın və məcburi köçkünlər, milli
azlıqlar, aztəminatlı ailələr üçün ödənişsiz hüquqi yardım xidmətlərinin
göstərilməsi, habelə əhalinin maarifləndirilməsi üçün hüququn müxtəlif sahələri
üzrə məlumat xarakterli broşürlərin hazırlanmasından ibarətdir.
Həssas qrup vətəndaşlara ödənişsiz xidmət
Millət vəkili
A.Mustafayeva deyib ki, 2021-ci ilə qədər davam etdirilməsi nəzərdə tutulan layihənin
icrası müddətində vətəndaşlara ailə, inzibati, əmək, əmlak, borc, miras,
təqaüd, sosial yardım, istehlakçı hüquqları, cinayət və sair sahələrdə yaranan
problemlərə dair məsləhətlər verilir: "Təkcə 2019-cu ildə 5472 nəfər vətəndaş
hüquqi yardım almaq üçün müraciət edib. Ötən 11 ay ərzində həssaslıq qrupuna
görə istifadəçilərin xarakteristikası göstərir ki, onların 2649 nəfəri aztəminatlı
ailələr qrupuna mənsubdur. Ən çox müraciət edilən mövzuların bölgüsü göstərib
ki, əksər istifadəçilərin, yəni 1238 müraciət müəllifinin problemi əmlak hüquq
məsələləri ilə bağlı olub. Bu ardıcıllıq
nikahın pozulması, aliment, uşağın kimin himayəsində qalması kimi ailə hüquq
məsələləri ilə davam etdirilir. Həmçinin bir sıra sahələr, o cümlədən inzibati,
borc, vərəsəlik, pensiya, sosial yardım, istehlakçı hüquqları, nəqliyyat
məsələləri və sair üzrə hüquqi məsləhət
xidmətləri də göstərilib. Toplanılan məlumatlar göstərir ki, 2760 nəfər
"Facebook”, 1078 nəfər Hüquqi Yardım Mərkəzində konsultasiya vasitəsilə, 1552
nəfər telefon vasitəsilə, 36 istifadəçi onlayn müraciət forması vasitəsilə, 46
istifadəçi elektron poçt vasitəsilə hüquqi yardım alıb”.
Dövlət və ictimai maraqların təmini
Sonda qeyd
edək ki, hər bir insan hüququnu qorumaq üçün ilk növbədə öz hüququnun nədən
ibarət olduğunu, qanunlarımızın ona hansı hüquqlar tanıdığını yaxşı bilməlidir.
Yalnız bu məlumatlılıq hesabına o, hüququnu reallaşdıra bilər. Təbii ki, bütün
dünyada olduğu kimi, ölkəmizdə də bəzi vətəndaşlar bu sahədə yüksək
məlumatlılığa sahib deyil. Belə olan halda həmin şəxslərin hüquqi yardım almaq
zərurəti meydana çıxır. Məhz bu zərurətdən qaynaqlanaraq, Azərbaycanda dövlət
öz vətəndaşlarına qanunla nəzərdə tutulmuş şəkildə ödənişsiz hüquqi yardım
almaq imkanı yaradıb. Sevindirici haldır ki, bu prosesə qeyri-hökumət
təşkilatları, elm ocağı səviyyəsində də dəstək verilir. Bu isə ümumilikdə həm
dövlət, həm də ictimai maraqların təmin olunmasına xidmət edir.
Rufik İSMAYILOV
Yazı
Azərbaycan Respublikasının Prezidenti yanında Kütləvi İnformasiya Vasitələrinin
İnkişafına Dövlət Dəstəyi Fondunun 31 dekabr - Dünya Azərbaycanlılarının
Həmrəyliyi Günü və Yeni il münasibətilə keçirdiyi müsabiqəyə təqdim edilir