Böyük siyasətçi, xalqın xilaskarı, qüdrətli rəhbər - Fotolar
Azərbaycanın otuz ildən
artıq bir dövrünü əhatə edən tarixi taleyi ulu öndər Heydər Əliyevin adı ilə
qırılmaz tellərlə bağlıdır. Bu illər ərzində xalqın ictimai-siyasi, iqtisadi və
mədəni həyatının bütün sahələrində dirçəliş məhz onun adı ilə əlaqədardır. O,
zəngin mədəniyyəti, böyük tarixi keçmişi ilə həmişə qürur duyduğu doğma yurdunun
daim tərəqqisi naminə çalışıb, gələcək nəsillərinin taleyini düşünüb. Ulu öndər
H.Əliyevin ölkəyə rəhbərlik etdiyi dövr ərzində Azərbaycanı bir dövlət kimi
zamanın ağır və sərt sınaqlarından çıxarıb. Məhz bu kimi xidmətlərinə görə H.Əliyev
böyük siyasi və dövlət xadimi, xalqın şəksiz lideri olaraq hələ sağlığında
canlı əfsanəyə, dünya azərbaycanlılarının ümummilli liderinə çevrilə bilib. Ulu
öndər H.Əliyev fenomeni dünya dövlətlərinin və liderlərinin də diqqətini daim
özünə cəlb edib, onun siyasi fəaliyyəti beynəlxalq mediada geniş
işıqlandırılıb.
Məlumat üçün qeyd edək ki,
Heydər Əlirza oğlu Əliyev 1923-cü il mayın 10-da Naxçıvan şəhərində anadan
olub. 1939-cu ildə Naxçıvan Pedaqoji Texnikumunu bitirdikdən sonra Azərbaycan
Sənaye İnstitutunun (indiki Azərbaycan Dövlət Neft və Sənaye Universiteti)
memarlıq fakültəsinə daxil olub. H.Əliyev 1941-1944-cü illərdə əvvəlcə Naxçıvan
Muxtar Respublikası Xalq Daxili İşlər Komissarlığında arxiv şöbəsinin məxfi
hissəsinin müdiri, sonra isə Naxçıvan MSSR Xalq Komissarları Sovetində ümumi
şöbənin müdiri vəzifələrində işləyib. 1944-cü ilin may ayında dövlət
təhlükəsizliyi orqanlarında işə göndərilib. 1949-1950-ci illərdə SSRİ Dövlət
Təhlükəsizliyi Komitəsinin Leninqraddakı (indiki Sankt-Peterburq) Rəhbər
Kadrların Hazırlığı Məktəbində təhsil aldıqdan sonra, 1950-ci ildə Azərbaycan
SSR Dövlət Təhlükəsizliyi Komitəsində bölmə rəisi təyin edilib. 1957-ci ildə
Azərbaycan Dövlət Universitetinin (indiki Bakı Dövlət Universiteti) tarix
fakültəsinin qiyabi şöbəsini bitirib.
1958-ci ildə Azərbaycan SSR
Dövlət Təhlükəsizliyi Komitəsinin əks-kəşfiyyat şöbəsinin rəisi, 1964-cü ildə
DTK-nın sədr müavini təyin edilib. 1966-cı ildə Moskvada DTK-nın F.E.Dzerjinski
adına Ali Məktəbinin rəhbər heyətin təkmilləşdirilməsi kurslarını müvəffəqiyyətlə
bitirib. 1967-ci ildə Azərbaycan SSR Nazirlər Soveti yanında Dövlət
Təhlükəsizliyi Komitəsinin sədri vəzifəsinə təyin edilib və həmin ildə də ona
general-mayor rütbəsi verilib. Azərbaycan Kommunist Partiyası Mərkəzi
Komitəsinin 1969-cu il iyulun 14-də keçirilmiş plenumunda H.Əliyev Azərbaycan
Kommunist Partiyası Mərkəzi Komitəsinin birinci katibi seçilib.
H.Əliyev 22 il
Azərbaycan SSR Ali Sovetinin və SSRİ Ali Sovetinin deputatı olub. 1974-1979-cu
illərdə SSRİ Ali Soveti İttifaq Sovetinin sədr müavini vəzifəsini tutub. 1976-cı
ildə Sovet İttifaqı Kommunist Partiyası Mərkəzi Komitəsinin Siyasi Bürosunun
üzvlüyünə namizəd, 1982-ci ilin dekabrında Siyasi Büronun üzvü seçilən H.Əliyev
SSRİ Nazirlər Soveti sədrinin birinci müavini vəzifəsinə təyin edilib. Bu
vəzifədə işləyərkən H.Əliyev SSRİ-nin iqtisadi, sosial və mədəni həyatının ən
mühüm sahələrinə rəhbərlik edib. H.Əliyev 1987-ci ilin oktyabrında Sovet
İttifaqı Kommunist Partiyası Mərkəzi Komitəsi Siyasi Bürosunun və şəxsən baş
katib Mixail Qorbaçovun yeritdiyi siyasi xəttə etiraz olaraq tutduğu
vəzifələrdən istefa verib.
H.Əliyev 1990-cı il
yanvarın 19-dan 20-nə keçən gecə sovet qoşunlarının Bakıda törətdiyi qanlı
faciə ilə əlaqədar, yanvarın 21-də Azərbaycanın Moskvadakı nümayəndəliyində
bəyanatla çıxış edərək, Azərbaycan xalqına qarşı törədilmiş cinayətin
təşkilatçıları və icraçılarının cəzalandırılmasını tələb edib. O, Dağlıq
Qarabağda yaranmış kəskin münaqişəli vəziyyətlə bağlı SSRİ rəhbərliyinin
ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı
Kommunist Partiyasının sıralarını tərk edib. 1990-cı il iyulun 20-də Bakıya
qayıdan H.Əliyev iki gün sonra Naxçıvana yola düşüb, həmin ildə də Azərbaycan
SSR xalq deputatı və Naxçıvan MSSR xalq deputatı seçilib. 1991-ci il sentyabrın
3-də H.Əliyev Naxçıvan MR Ali Sovetinin sədri seçilib və müvafiq
qanunvericiliyə əsasən həm də Azərbaycan Respublikası Ali Soveti sədrinin
müavini olub. Bu vəzifədə o, 1993-cü ilə kimi çalışıb.
H.Əliyev 1992-ci il
noyabrın 21-də Yeni Azərbaycan Partiyasının Naxçıvan şəhərində keçirilmiş təsis
konfransında partiyanın sədri seçilib. 1993-cü ilin may-iyun aylarında ölkədə
vətəndaş müharibəsi və müstəqilliyin itirilməsi təhlükəsi yarandığına görə,
Azərbaycan xalqı H.Əliyevin hakimiyyətə gətirilməsi tələbini irəli sürüb və
ölkənin o dövrkü rəhbərliyi onu Bakıya dəvət etməyə məcbur olub. H.Əliyev
1993-cü il iyunun 15-də Azərbaycan Ali Sovetinin sədri seçilib, iyunun 24-dən
isə Azərbaycan Prezidentinin səlahiyyətlərini həyata keçirməyə başlayıb.
1993-cü
il oktyabrın 3-də ümumxalq səsverməsi nəticəsində H.Əliyev Azərbaycan
Prezidenti seçilib. O, 1998-ci il oktyabrın 11-də xalqın yüksək fəallığı
şəraitində keçirilən seçkilərdə səslərin 76,1 faizini toplayaraq, yenidən
Azərbaycan Prezidenti seçilib. 2003-cü il oktyabrın 15-də keçirilən prezident
seçkilərində namizədliyinin irəli sürülməsinə razılıq vermiş H.Əliyev
səhhətində yaranmış problemlərlə əlaqədar namizədliyini İlham Əliyevin xeyrinə
geri götürüb. 2003-cü il dekabrın 12-də Azərbaycan xalqının ümummilli lideri H.Əliyev
Amerika Birləşmiş Ştatlarının Klivlend Klinikasında vəfat edib və dekabrın
15-də Bakıda, Fəxri xiyabanda dəfn olunub. H.Əliyev beş dəfə keçmiş SSRİ-nin
Lenin ordeni ilə, Qırmızı Ulduz ordeni və çoxsaylı medallarla təltif edilib,
iki dəfə Sosialist Əməyi Qəhrəmanı adına, həmçinin müxtəlif ölkələrin ali
mükafatlarına, nüfuzlu ali məktəblərin fəxri adlarına layiq görülüb.Azərbaycan xalqı ulu öndər
H.Əliyevin xidmətlərini daim yüksək qiymətləndirib, onun xatirəsini hər zaman
hörmətlə anıb.
AMEA-nın
vitse-prezidenti, Milli Məclisin Elm və təhsil komitəsinin sədri, akademik İsa
Həbibbəyli bildirib ki, Azərbaycan xalqının ümummilli lideri, görkəmli
dövlət xadimi H.Əliyev dünya miqyaslı böyük siyasətçi, mənsub olduğu xalqın
xilaskarı və qüdrətli rəhbəri kimi böyük şöhrət qazanıb. Millət vəkilinin
sözlərinə görə, dünyanın görkəmli dövlət xadimləri və böyük siyasətçiləri ulu
öndər Heydər Əliyevin çoxillik və çoxcəhətli tarixi xidmətlərini yüksək
qiymətləndirib, ondan beynəlxalq miqyasda qəbul olunan liderlərdən biri kimi
söz açıblar: "XX əsr ərzində bütün tarixi mərhələlərdə görkəmli dövlət xadimi
Heydər Əliyevin şərəfli tarixə çevrilmiş dövlətçilik fəaliyyəti və mübarizəsi
böyük siyasətçilərin, elm xadimlərinin də həmişə diqqət mərkəzində olub. Bu
cəhətdən Heydər Əliyev qədər haqqında dünya miqyasında yüksək sözlər deyilən,
şəxsiyyətinə və xidmətlərinə böyük qiymət verilən dövlət xadimləri çox
deyildir. Heydər Əliyev dünya xəritəsində kiçik yer tutan bir ölkənin böyük
rəhbəri olub, dünya liderləri səviyyəsində qiymətləndirilən görkəmli dövlət
xadimidir. Yer kürəsinin ən görkəmli dövlət və siyasi xadimlərinin, o cümlədən Corc
Buş, Bill Klinton, Barak Obama, Vladimir Putin, Hi Tszintao, Kraliça II
Yelizaveta, Jak Şirak, Toni Bleyr, Süleyman Dəmirəl, Nursultan Nazarbayev,
Eduard Şevarnadze, Leonid Kuçma, Henri Kisincer, Zbiqnev Bjezinski kimi məşhur
simaların Heydər Əliyevə verdikləri yüksək qiymət geniş mənada şəxsiyyət və
zaman, lider və xalq, siyasət və cəmiyyət kimi aktual məsələlərin
dəyərləndirilməsinə dair ciddi və əhəmiyyətli mülahizələr olub, Azərbaycan
xalqının ümummilli liderinin beynəlxalq aləmdəki yerini və miqyasını təsəvvür etməyə
imkan yaradır”.
Milli
Məclisin vitse-spikeri Bahar Muradova bildirib ki, ulu öndər H.Əliyev haqqında danışanda yalnız
həyatı və fəaliyyəti barədə deyil, dövlət idarəçiliyində təmsil olunduğu və
Azərbaycan xalqının mühüm tarixi dövrünü əhatə edən bütöv bir qərinədən bəhs
etmək lazım gəlir. Millət vəkili qeyd edib ki, ulu öndər H.Əliyev bütün ömrünü
mənsub olduğu xalqa, onun inkişafına, minilliklərin süzgəcindən keçib gələn
milli-mənəvi dəyərlərin qorunması, inkişaf etdirilməsi və gələcək nəsillərə
çatdırılmasına həsr edib: "Birmənalı şəkildə demək olar ki, ümummilli lider
Heydər Əliyev Azərbaycan dövləti və xalqı qarşısında misilsiz xidmətlər
göstərib. Onun xidmətləri tarixin yaddaşına qızıl hərflərlə yazılıb və bundan
sonra mövcud ola biləcək digər siyasi ideologiyalar və ya siyasətçilər bu
xidmətləri şübhə altına ala, onlara kölgə sala bilməyəcəklər. Buna cəhd
göstərsələr belə, uğursuzluğa düçar olacaqlar. Heydər Əliyev Azərbaycan
xalqının yetişdirdiyi ən böyük dühalardan biridir. O, öz fəaliyyəti ilə təkcə
böyük şəxsiyyət olduğunu nümayiş etdirməyib, həm də malik olduğu qətiyyət və
siyasi iradə sayəsində mənsub olduğu xalqı və qurduğu dövləti dünya miqyasında
tanıda bilib. Azərbaycan xalqı yaşadıqca onun şüurunda, təfəkküründə və
yaddaşında ulu öndərin özünəməxsus yeri olacaq. Onun xidmətləri zaman-zaman
müzakirə predmeti, araşdırma və tədqiqat obyekti olacaq. Gələcək nəsillər, o
cümlədən Heydər Əliyev irsinə müraciət edən şəxslər bu irsin zəngin çalarlarını
və bütün tərəflərini üzə çıxarmaqla yanaşı, bu şəxsiyyətin zəngin irsindən
bəhrələnəcəklər. Ən nəhayət, ümummilli lider Heydər Əliyevin xalqımız və
dövlətimiz qarşısındakı misilsiz xidmətləri hər zaman minnətdarlıqla
xatırlanacaq”.
Millət
vəkili, politoloq Hikmət Babaoğlu deyib ki, ulu öndər
H.Əliyev Azərbaycan xalqı üçün ümummilli lider, dünya üçün ümumbəşəri dəyərdir.
Onun sözlərinə görə, ulu öndər H.Əliyev həyata keçirdiyi böyük siyasətlə təkcə
Azərbaycan xalqının deyil, post-sovet məkanında olan bugünkü bir çox xalqların
həyatında çox mühüm rol oynayıb: "Heydər Əliyev Azərbaycan dövlətçiliyinin
əsaslarını yaradıb. Ümummilli lider Azərbaycan mədəniyyətini, mənəviyyatını,
dilini həmişə mühafizə edib. Onun hakimiyyətdə olması tarixin iki ziddiyyətli
mərhələsini əhatə etsə də ancaq Heydər Əliyevin amalı bir olub. Ulu öndər
həmişə Azərbaycan xalqının intibahı, onun inkişafı üçün çalışıb. Ulu
öndərimizin bizə qoyub getdiyi ən böyük miras müstəqil Azərbaycan dövlətidir və
Azərbaycançılıq ideologiyasıdır. Bu iki məsələ bir-biri ilə çox sıx bağlıdır.
Çünki ictimai həmrəyliyi təmin edəcək ümummilli ideologiya olmasa dövləti
qurmaq olmaz. Dövlət varsa mütləq onun ideologiyası olmalıdır və ideologiyasız
da dövlət yaşamaz. Bax, bu iki komponent hazırda Azərbaycanın inkişafını təmin
edən institusional və ideoloji əsaslardır. Təbii ki, Azərbaycan bu əsaslarda da
inkişaf edir. Bu gün Azərbaycan dünyanın ən inkişaf etmiş ölkələrindən birinə
çevrilib, ölkəmizin iqtisadiyyatı böyüyüb və beynəlxalq nüfuzu artır. Bu gün
Azərbaycan xalqının sayı 10 milyona çatıb. Bütün bunlar Azərbaycan xalqının
əldə etdiyi tarixi nailiyyətlərdir ki, bu nailiyyətlər məhz bundan sonrakı
tarixi mərhələdə də ölkəmizin inkişafını təmin edəcək. Ötən hər gün biz
ümummilli liderin böyüklüyünü bir daha görürük və onun şahidi oluruq. Onun ən
böyük əsəri olan Azərbaycanda yaşamaqdan qürur hissi keçiririk”.
Alpər
TURAN