Biznesdisə, qoy incəsənət olsun - Fotolar
Elə bir məkan düşünün ki, musiqi, rəqs, əyləncə,
teatr, səhnə, rəsm, piano, dizayner, moda, aktyorluq, ifaçılıq, xoreoqrafiya,
zumba, plates kursları, ümumiyyətlə incəsənət deyiləndə göz önünə gətirdiyiniz
hər nə varsa, hamısı orada cəmlənsin. Artıq belə bir məkan var. Özü də yaş
məhdudiyyəti 7-dən 77-yə deyil, 3-dən 77-yə qədər hər kəs buraya təşrif buyura
və tədris olunan istiqamətlərdən yararlana bilər.
Məkanın adı Sharifzade ART centr-dir. Bura iki
fərqli yaradıcılıq dünyasının - tanınmış modelyer Elnarə Bəkirova və məşhur
aktrisa, aparıcı Zümrüd Qasımovanın birlikdə yaratdıqları bir mərkəzdir. Məkanın
adının məhz Sharifzade Art centr olması da heç də təsadüfi deyil. Belə ki, mərkəz
Abbas Mirzə Şərifzadə küçəsində yerləşir. Məşhur Azərbaycan teatraktyoru,teatrvəkinorejissoru, Azərbaycan
SSR xalq artistinin adını daşıyan bu
məkan elə adına layiq şəkildə fəaliyyət göstərir.
Uşaqların əyləncə dünyası
Məkana daxil olduqda, bizi Zümrüd Qasımova qarşıladı
və mərkəzlə daha yaxından tanış etdi. Dedi ki, belə bir mərkəzin fəaliyyət
göstərməsi onun çoxdankı arzusu olub: "Dünyanın müxtəlif ölkələrində belə bir
mədəniyyət mərkəzinin olduğunu gördükdə, bizdə də bu tip mərkəzin olmasını arzulamışam.
Hər zaman düşünürdüm ki, bəs nə üçün bizdə belə bir məkan yoxdur? Və nəhayət, mənim
rəfiqəm, tanınmış modelyer Elnarə Bəkirovadan belə bir təklif gəldi və mən də məmnuniyyətlə
qəbul etdim. Bir il bu məkanın təmir olunmasını gözlədik. Nəhayət, istədiyimiz
nəticəni gördük. Bura həm uşaqların, həm də böyüklərin məkanıdır. İncəsənətin bütün
sahələrini burada əhatə etməyə çalışmışıq. Belə ki, məkanımızda vokal, rəsm, gitara,
piano, kanon, rəqs, balet dərsləri tədris olunur. Bu fənləri işlərinin peşəkarı
olan istedadlı, tanınmış sənətkarlar tədris edir. Misal üçün Opera və Balet Teatrının
baş solisti Anar Mikayılov, Xalq artist Vidadi Həsənov, məşhur rəqqas İlham
Kərimli, "Eurovision” qalibimiz Eldar Qasımov, Azərbaycan Dövlət Mədəniyyət və İncəsənət
Universitetinin müəllimi Ceyhun Dadaşov, aktyor Elnur Dadaşov, Rumiyə Ağayeva
və bir çox tanınmış sənət nümayəndələri, sözlərini demiş, istedadlı insanlar
burada dərs keçir. Elə bir mühit yaratmışıq ki, valideynlər gəlib övladları ilə
birlikdə həm əylənə, həm də istirahət edə bilərlər”.
Söhbət edə-edə mərkəzi gəzirik. Böyük bir binanın
ən aşağı mərtəbəsini əhatə edən mərkəz istirahət üçün də ideal məkandır. Belə
ki, çox geniş bir əraziyə malikdir. Məkanda geniş teatr səhnəsi, rəsm çəkmək
üçün ayrıca bir guşə, musiqi ilə məşğul olmaq üçün başqa bir otaq, idman, rəqs
etmək üçün isə ayrıca otaqlar yaradılıb.
Arzuların gerçəkləşdiyi məkan
Mərkəzin yaradıcısı Elnarə Bəkirova bu işi görməkdə
müxtəlif səbəblərinin olduğunu bildirdi: "Belə bir məkanı açmaq mənim çoxdankı
arzum idi. Arzu edirdim ki, bir gün böyük bir mərkəzim olsun və orada uşaqlara birlikdə
çalışım. İnsanın yaşının üzərinə yaş gəldikcə, daha təmkinli və səbirli olur. Vaxtını
enerjisi gözəl olan insanlarla keçirmək istəyir. Bu məkanda da məqsəd budur”.
Elnarə Bəkirova bu məkanla ilkin tanışlığını belə
xatırlayır: "Bura ilə tanış olanda, hər yer qaranlıq idi. Obyekti gördüm və
hiss etdim ki, burada mədəniyyət mərkəzinə böyük ehtiyac var. Mən biznes-planımı
obyekt sahibinə təklif etdim, o da qəbul etdi. Bütün incəsənət növlərinin bir
məkanda cəmlənməsi uşaqlı analar üçün daha çox əlverişlidir. Çox az bir
müddətdə fəaliyyət göstərsək də, tələbatın çox olduğunu görürük. Belə bir
məkana tələbat var idi. Mərkəzi açanda məqsədimiz uşaqlara sevgi verə bilmək,
onları düzgün istiqamətləndirmək idi. Çünki bu detallar gələcəkdə onlara çox
lazım olacaq. Uşaqların inkişafı üçün burda əlimizdən gələn hər şeyi edirik”.
İstedadlara meydan verilir
10 ildən çoxdur ki, yaradıcılıqdan əlavə bizneslə də
məşğul olan Elnarə Bəkirova əlavə etdi ki,
bu mərkəzin filialları fəaliyyət göstərəcək: "Hər bir insanın öz məqsədi
olmalıdır. Belə ki, bir şeyi çox istədikdə, o istəyə nail olmaq mümkündür. Növbəti
filialları açarkən Zümrüd xanımla birlikdə bir imzamız olacaq. Bəzən görürük
ki, valideynlər öz övladlarının potensialından xəbərsiz olur. Biz bu məkanı
açmaqla həmin o istedadlı uşaqları üzə çıxaracağıq. Böyüyəndə onlar bizi
xatırlayacaqlar. Bundan gözəl nə ola bilər? Bəzən burada rəqs, gimnastika dərslərində
uşaqlarla birlikdə oluram və onlara kömək edirəm, onlarla birlikdə təmasda
olmaq möhtəşəm bir hissdir. Uşaqların gözəl dünyası var. Bu dünyanın bir
parçası olmaq həqiqətən möhtəşəmdir”.
Məkanda diqqətimizi çəkən ayrıca teatr səhnəsinin olması idi. Səhnə əsil teatr
ab-havası yaradır. Zümrüd Qasımova qeyd edir ki, burada tamaşa göstərmək üçün
ideal şərait var: "Yeri və məkanı olmayan istedadlı həvəskarlar burada tamaşa
hazırlaya bilər. Yaradıcı insanlar çoxdur. Bəzən görürük ki, onlar çalışmağa
yer tapa bilmirlər, düşünürlər ki, getdikləri məkanlarda icarə haqqı
ödəməlidirlər, ancaq buna imkanları çatmır. Biz deyirik ki, bura bizim
məkanımızdır, gəlin əl-ələ verək, siz istedadınızı göstərin, biz də sizə yardım
edək. Bu məkanda təkcə tamaşalar deyil, kino, klip təqdimatları da
keçiriləcək”.
Xanımlarla söhbət etdikdən sonra dərs keçilən
otaqların birinə daxil oluruq. Burada Rəssamlar İttifaqının üzvü Sadıq Sadıqovun
iş prosesi ilə yaxından tanış olduq. Uşaqlara rəsm dərsləri keçən rəssamla bir
neçə dəqiqə söhbət etmək imkanı əldə etdik. S.Sadıqov qeyd edir ki, mərkəzdə uşaqlar, yeniyetmələr, gənclər öz istedadlarını
üzə çıxarmaq üçün çalışırlar: "Bu mərkəzi çox bəyənirəm. Baxmayaraq ki çox qısa
zamandır fəaliyyət göstəririk, ancaq çox istedadlı uşaqlarımız rəssamlığın
sirlərini öyrənməyə çalışır. Hazırda 15 tələbəm var. Bizə müraciət edən
uşaqların ilk növbədə istedadlarını yoxlayıram. Çünki elə uşaqlar var ki, onların
rəssamlığa heç həvəsi yoxdur. Biz daha çox potensialı olan gənclər və uşaqlarla
çalışırıq. İlk olaraq isə onları boya ilə tanış edirəm. Uşaqlara göstərirəm və
daha çox onlar özləri çəkir. Bəzən olur ki, valideynlər övladlarının çəkdiyi
rəsmlərə təəccüblənirlər, inanmırlar ki, bu əsərləri onların övladları çəkib. Bizə
müxtəlif yaş kateqoriyasından olan insanlar müraciət edirlər. Hazırda ən kiçik
tələbəmin 3, ən böyük tələbəmin 16 yaşı var”.
Qeyd edək ki, mərkəzin rəsmi açılışı hələ həyata
keçməyib. Xanımlar düşünür ki, ilk olaraq məkanda yaradıcı proseslər yoluna
düşməlidir. Belə ki, tələbələr yığıldıqdan və məşq prosesi aparıldıqdan sonra -
oktyabrın sonlarına yaxın mərkəzin açılışı nəzərdə tutulub.
Açılışda görüşmək ümidi ilə.
Xəyalə Rəis