Bir-birinin motivasiya mənbəyi olan cütlük - Ailə
Hacıbəy Heydərli: "Qız atası olduğum üçün çox
xoşbəxtəm”
Ləman Heydərli: "Qarşı tərəfin sosial həyatını
məhdudlaşdırmaq, ona kiminləsə görüşməyə qadağa qoymaq düzgün deyil”
Deyillər
ki, həyatda ən gözəl duyğulardan biri də sevgidir. Sevmədən evlənmək Allaha
inanmadan məscidə girmək kimidir. Düşünürlər ki, həyat yoldaşı seçimində
diqqətli olmaq lazımdır. Hər kəs öz dünyagörüşünə, sosial vəziyyətlərinə uyğun
biri ilə ailə qurmalıdır. "Ailə” rubrikamızın budəfəki qonaqları "Azxəbər.com” saytının təsisçisi və baş
redaktoru Hacıbəy Heydərli və həyat yoldaşı Ləman Heydərlidir.
İlk olaraq
müsahiblərimiz haqqında qısa məlumat verək.
Hacıbəy
Heydərli Bakıda anadan olub. Bakı Dövlət Universitetinin jurnalistika fakültəsinin
məzunudur. Daha sonra Türkiyədə magistratura səviyyəsində təhsilini davam
etdirib. Tələbəlik illərindən media sahəsində keçirilən bir çox təlimlərin və
kursların fəal iştirakçısı olub. "Azxəbər.com” saytının təsisçisi və baş
redaktorudur. Xanımı Ləman Heydərli də Bakı şəhərində doğulub. Ali təhsilini
həm bakalavr, həm də magistratura səviyyəsində Azərbaycan Dövlət İqtisad
Universitetində alıb. Təhsilinin ilk illərindən müxtəlif şirkətlərdə, fərqli
vəzifələrdə işləyib. Evləndikdən sonra məzuniyyətə çıxıb. Hazırda isə özəl
sektorda öz işini qurub və marketinq sahəsində fəaliyyət göstərir.
"Sosial şəbəkədəki fəaliyyətini izlədim”
Cütlüyümüzün
ilk tanışlığı sosial mediada olub. Tanışlıqlarından danışan Hacıbəy bəy qeyd
edir ki, Ləman xanımın "facebook”dakı profilini görən kimi dostluq göndərsə də,
xanım bir müddət bu dostluğu qəbul etməyib: "Əslində, bu danılmaz faktdır ki,
sosial şəbəkələr işimizlə bağlı olaraq həyatımızın ayrılmaz parçasına çevrilib.
Mən də çox aktiv istifadəçiyəm. Hər kəsin bildiyi kimi, "facebook” ortaq
dostlarınızın çox olduğu şəxsləri sizə göstərir. Ləman xanımın da profilini
təsadüfən gördüm. Baxdım ki, kifayət qədər ortaq dostumuz var. Açığı,
şəkillərinə-filan baxdım və işgüzar, işini sevən xanım olduğunu gördüm. Dostluq
göndərdim, amma bir müddət qəbul etmədi. Mən də prinsipə düşdüm (gülür). Ortaq
dostumuz bir xanım vardı, məsələni ona danışdım və xahiş etdim ki, dostluğumu
qəbul etsin. Sosial şəbəkədə dost olduqdan sonra xanımın fəaliyyətini izləməyə
başladım. Zamanla məndə xanıma simpatiya yarandı və qərara gəldim ki, yazım. Bir
müddət virtual söhbətdən sonra görüşdük. Bir-birimizə uyğun olduğumuzu görüb,
münasibətimizi davam etdirdik və artıq, 2 ildir ki, evliyik”.
"Hacıbəy
məndə lazım olan güvəni formalaşdırmışdı”
Ləman
xanım deyir ki, tanımadığı şəxslərin dostluğunu qəbul etmədiyi üçün qarşı
tərəfin virtual dostluq təklifinə cavab verməyib: "Həmin dövrdə tanımadığım
şəxsləri qəbul etmirdim. Amma Hacıbəyin qərarlı olduğunu gördükdən, həmçinin
ortaq tanışımızla da mənə mesaj göndərməyindən sonra qəbul etdim. Zamanla
danışmağa başladıq və söhbətimizin tutduğunu gördüm. Daha sonra görüşmək
qərarına gəldik. Təbii ki, Hacıbəy danışmağa başladığımız ilk günlərdən "görüşək”
demədi. Bir müddət yazışdıq, bir-birimizi müəyyən qədər də olsa tanıdıq. Yəni
görüş təklif etdiyi zaman Hacıbəy məndə lazım olan güvəni formalaşdırmışdı.
Əlbəttə, insan güvənmədiyi, tanımadığı biri ilə görüşə getməz”.
İlk görüş yeri
"Məndə bir
az özünəinam var idi deyə, ilk mesajı sanki 50 ildir tanıdığım bir yaxınıma
yazırmış kimi yazdım” deyən Hacıbəy bildirir ki, ilk görüşləri Heydər Əliyev
adına Respublika Sarayının qarşısında olub: "Mesajlarda elə hal-əhval tutub
danışırdım ki, elə bil çoxdan tanıdığım biri ilə yazışıram. Bilirdim ki, qarşı
tərəf bu səmimiyyətin haradan gəldiyini düşünür. Amma özümü elə aparırdım ki,
sanki belə də olmalıdır. İlk görüş yerimizi ikimizin də iş yerinə yaxın olan
Respublika Sarayının qarşısına təyin etdik. Həyəcandan da təyin etdiyimiz
vaxtdan yarım saat tez gedib Ləman xanımı gözlədim (gülür). Ləman xanım
güvəndən danışdı. Əlbəttə, tanışlığımızın ilk dönəmindən görüş təklif edə
bilməzdim. Bunu özüm də yaxşı bilirdim ki, ilk olaraq onun inamını qazanmalı,
özümü ona tanıtmalıyam. Beləcə, vədə yetişəndə görüşdük”.
Park Bulvarda romantik bir görüş
"Sevgi
etirafını birinci kişi eləməlidir” deyən Hacıbəy bəy ilk dəfə sevgisini dilə
gətirməyindən də danışdı: ”Bu, reallıqdır ki, bizim cəmiyyətdə sevgi etirafını
kişi edir. Mən də qarşımdakı xanımı bəyənmişdim, onun xarakteri, ali təhsilli
olması, söhbətimizin tutması və zamanla hislərimdən əmin olmağım sevgimi etiraf
etməyimə səbəb oldu. Yadımdadır, ilk dəfə Park Bulvarda romantik bir görüş
təşkil edib hislərimi olduğu kimi etiraf etdim. Nə yalan deyim, alacağım cavabı
bilirdim. Çünki uzun müddət idi ki, danışırdıq və qarşı tərəfin də hislərini
təxmini bilirdim”.
"Evlənəcəkləri insanla daha çox zaman keçirsinlər”
Biri ilə
ailə qurmaq, həyatını birləşdirmək üçün onu tanımaq əsas şərtlərdən biridir.
Maraqlıdır, cütlüyümüz necə düşünür, bir insanı nə qədər müddət və necə tanımaq
olar? Ləman xanım deyir ki, gənclər tanışlıq dönəmində bir-birini hərtərəfli
tanımalıdırlar: "Mən birini görəndə, onunla bir müddətlik söhbətdən sonra necə
biri olduğunu anlayıram. Ona görə də, Hacıbəylə biri-birimizi tanıma dönəmimiz
uzun çəkmədi. Yəni bu, fərddən asılıdır. Yaxşı olar ki, evlənəcəkləri insanla
daha çox zaman keçirsinlər, bir-birlərini hərtərəfli tanımağa çalışsınlar”.
"Evliliyin təməlində birlik, sədaqət dayanır”
Hacıbəy
isə tanışlıq dövründə insanların səmimi olmasının əsas olduğunu vurğulayır:
"Biri ilə münasibət qurmaq, həyatını birləşdirmək istəyirlərsə, səmimi olsunlar.
Özlərini bütün mənfi və müsbət xasiyyətləri ilə tanıtsınlar. Bu gün
boşanmaların ən böyük səbəbi insanların özünü olduğu kimi tanıtmamaqlarıdır.
Yəni sevgililik dönəmi başqa, bir evdə yaşamaq tamam başqadır. Sevgili olarkən
hər şey yaxşı olur. Gəzirsiniz, söhbət edirsiniz sonra hər kəs fərqli evlərə
gedir. Amma evlilik elə deyil, bütün günü həmin şəxslə bir evin içərisində
keçirirsən. Evliliyin təməlində birlik, sədaqət dayanır”.
"İş həyatımda mənə çox böyük dəstək olur”
Həmsöhbətimiz
mənfi və müsbət xasiyyətlərlə, özünü olduğu kimi tanıtmaqdan danışdı. Bəs
cütlüyümüz bir-birində hansı müsbət və mənfiliklər kəşf ediblər? Ləman xanım
həyat yoldaşının sosial mediada çox vaxt keçirməsindən şikayətlənir: "Əslində,
elə də ciddi mənfi xasiyyəti yoxdur. Amma sosial şəbəkələrdə çox vaxt keçirir.
İlk dövrlər bu, məni daha çox narahat edirdi. Lakin zamanla anladım ki, bu,
onun işidir. Gündəmi izləməli, xəbərləri oxumalıdır. Müsbət cəhətləri isə daha
çoxdur (gülür). Məsələn, çox anlayışlıdır. İş həyatımda mənə çox böyük dəstək
olur. Nələrəsə qadağalar qoymur. Ən əsası isə çox yaxşı atadır”.
"Həyat yoldaşına qadağa qoymamalıdır”
Sosial
şəbəkələrdən danışmışkən, evliliyin, şəxsin sosial həyatına necə təsir etdiyini
soruşduq. Ləman xanım düşünür ki, ailə qurduğumuz insanı olduğu kimi qəbul
etməli, onu və əvvəlki həyat tərzini dəyişdirməyə cəhd etməməlidir: "Evlənən
şəxslər bir-birinə nələrəsə məhdudiyyət qoymamalıdır. Məsələn, xanım həyat
yoldaşına qadağa qoymamalıdır ki, qarşı cinsdən olan dostlarınla
görüşməməlisən. Eyni ilə də kişi qadına bu cür yanaşmalıdır. Yəni qarşı tərəfin
sosial həyatını məhdudlaşdırmaq, ona kiminləsə görüşməyə qadağa qoymaq düzgün
deyil və bu, ailədə müəyyən söz-söhbətlərə şərait yarada bilər. Təbii ki,
evlilikdən sonra bəzi nüanslara diqqət etmək lazımdır, amma seçimlərinə
qarışmaq, onun dostlarına və ya işinə qarışmaq olmaz”.
"Subay biri ilə evli şəxsin sosial həyatı eyni ola
bilməz”
Hacıbəy də
xanımı ilə eyni düşüncədədir: "Bu, insanın özündən, evliliyə yanaşmasından da
asılıdır. Təbii ki, kiminsə sosial həyatını məhdudlaşdırmaq, onun seçimlərinə
qarışmaq düzgün deyil. Amma bir məsələ də var ki, onsuz da xanımlar elə sosial
həyat yaşamırlar ki, onu məhdudlaşdıraq. Lakin kişilərin dostlarla vaxt
keçirməsi, əylənməsi təbii ki, subaylıq dövründə olduğu kimi olmamalıdır. Subay
biri ilə evli şəxsin sosial həyatı eyni ola bilməz. Məsələn, əvvəllər
dostlarımla hər gün görüşüb haradasa otururduqsa, evləndikdən sonra bunu hər
gün etmirəm. Yəni bunu qarşı tərəf belə istəyir deyə yox, könüllü şəkildə
edirəm. Düşünürəm ki, evliyəm və məni evdə gözləyən xanımım, övladım var.
Açığı, dostlarımla oturanda belə, evə getmək üçün tələsirəm. Hətta, dostlarıma
da məsləhət görürəm ki, siz də evlənin (gülür).”
"Yumurta bişirməyi belə bilmirəm”
Həyat
müştərəkdir, ona görə, hər işdə həyat yoldaşları bir-birinə kömək etməli,
dəstək olmalıdırlar. Maraqlıdır, Hacıbəy ev işlərində necə, xanımına dəstək
olurmu? Sualı səsləndirən zaman hər ikisi gülür. Ləman xanım Hacıbəyin ev
işlərində kömək etmədiyini deyir: "Ev işlərində kömək etməyi yoxdur. Amma arada
uşağın yeməyini hazırlamağa kömək edir”.
Ləman
xanımla söhbətə müdaxilə edən Hacıbəy heç yumurta da bişirə bilmədiyini etiraf
edir: "Mən nəinki hər hansısa işi görmək, heç çaydanı qazın üzərinə qoyub
qaynatmağı, yumurta bişirməyi belə bilmirəm (gülür)”.
"Diqqət və nəvaziş göstərməsi motivasiya, enerji
verir”
Yemək
bişirməyi bacarmayan Hacıbəy, bəs, yeməyi necə xoşlayırmı? Yəni "kişinin
ürəyinə gedən yol mədəsindən keçir” məsələsi Hacıbəy üçün də keçərlidirmi?
Sualı Ləman xanıma ünvanlasaq da, həmkarımız gülərək özü danışmağa başlayır:
"Mən şəxsən bu məsələ ilə razı deyiləm. Kişinin ürəyinə gedən yol ona olan
diqqətdən, nəvazişdən, xoş sözdən keçir. Dostlarım da bilir ki, tənqidi
sevmirəm. Xoş sözlə ürəyimi ələ almaq daha asandır (gülür)”.
Ləman
xanım deyir ki, diqqət və nəvaziş məsələsində həmfikirdir: "Əslində, bəzən
xanımlar özəl günlərdə xüsusi hədiyyələr istəyirlər. Amma bu, mənim üçün elə də
önəmli deyil. Onun xoş sözü, diqqət göstərməsi ən böyük hədiyyədir. Mən gün
ərzində uşaqla, ev işləri ilə məşğul oluram. Hacıbəyin xoş bir söz deməsi,
diqqət və nəvaziş göstərməsi mənə motivasiya, enerji verir”.
"Nə yaxşı ki, qızım oldu”
Cütlüyümüzün
Nuraya adında şirin qızları var. Hacıbəy deyir ki, ən böyük arzusu qız atası
olmaq idi: "Çox təəssüf ki, günümüzdə bəzi valideynlər oğlan uşaqlarının
olmasını istəyirlər. Lakin mən həmişə qız övladımın olmasını arzulamışam və nə
yaxşı ki, qızım oldu. Məncə, bir kişi üçün qız atası olmaq tamam başqa
duyğudur. Bu hissi yaşadığım üçün çox xoşbəxtəm. Hətta, mən istəyərəm ki,
ikinci övladım da qız olsun”.
Son olaraq
cütlüyümüzdən ailə qurmaq istəyən gənclərə tövsiyələrini soruşduq. Lakin hələ
gənc olduqlarını, məsləhət verməyin onlar üçün tez olduğunu dedilər. Sadəcə
bildirdilər ki, həyatda ən gözəl duyğulardan biri hətta, birincisi sevgidir.
Sevmədən evlənmək Allaha inanmadan məscidə girmək kimidir. Çalışsınlar ki,
sevib, sevilsinlər. Ən əsası isə həyat yoldaşı seçimində diqqətli olsunlar. Öz
dünyagörüşlərinə, sosial vəziyyətlərinə uyğun biri ilə ailə qursunlar.
Günel
Azadə