Böhranı imkana çevirmək fürsəti
Marketoloqun fikrincə, koronavirusun
iqtisadiyyata mənfi təsirlərini azaltmaq üçün şirkətlər marketinq
investisiyalarını artırmalıdırlar
Son bir neçə aydır ki, dünyanı lərzəyə gətirən koronavirusun yayılma
arealını və surətini, həmçinin vaksinin hələ də tapılmadığını nəzərə alaraq,
Ümumdünya Səhiyyə Təşkilatı (ÜST) mart ayının 11-dən etibarən bu virusu
pandemiya kimi qiymətləndirib. Bu baxımdan demək olar ki, dünyanın bir çox
ölkəsində fövqəladə vəziyyət elan olunub, bu istiqamətdə ciddi işlər görülür.
Bununla əlaqədar bütün ölkələrdə bir ay müddətində kütləvi tədbirlərin təxirə
salınması qərarı alınıb. Həmçinin dövlət və özəl sektora aid qurumlardan,
vətəndaşlardan xüsusi qaydalara riayət etmələri tələb olunub.
Xüsusi rejimin tətbiqi
Qeyd edək ki, Azərbaycan Respublikası Nazirlər Kabineti yanında
Operativ Qərargaha istinadla 14 mart 2020-ci il saat 00:00-dan etibarən
ölkəmizdə də xüsusi rejim tətbiq olunub. Belə ki, ölkə üzrə bütün kütləvi
tədbirlər, o cümlədən mədəni-idman tədbirləri təxirə salınır, artıq təyin
olunmuş tədbirlərin tarixi dəyişdirilib, kinoteatrların, muzey və teatrların,
əyləncə mərkəzlərinin, idman zallarının fəaliyyəti dayandırılıb, bütün toy
məclislərinin, dəfn mərasimləri istisna olmaqla, mərasim zallarında, çadırlarda
və digər qapalı məkanlarda yas mərasimlərinin keçirilməsi qadağan olunub.
Həmçinin restoran və kafelərdə kütləvi şənliklərin, məclislərin təşkili
məhdudlaşdırılıb. Restoran və kafelərdə iş rejimi saat 21:00-dək müəyyən edilib
və müvafiq dövlət strukturları tərəfindən bu məkanlar üçün açıqlanacaq
qaydalara riayət olunması mütləqdir. Saat 21:00-dan sonra fəaliyyət göstərən
klublar və barların fəaliyyəti dayandırılıb.
Görülən tədbirlərin
iqtisadiyyata təsiri
Virusun yayılmasının qarşısını almaq üçün atılan bu addımlar təqdirəlayiq
haldır. Təbii ki, əgər ortada insan faktoru varsa, heç nəyə başdansovdu
yanaşmaq olmaz. Üstəlik, dünya miqyasında baş verən ölüm hadisələri məsələnin
nə dərəcədə ciddi olduğunu göstərir. Lakin bir məqamı da vurğulamalıyıq ki,
görülən bu tədbir digər tərəfdən də iqtisadiyyata böyük zərbə vurur. Hətta,
bəzi beynəlxalq ekspertlər bunun bütün dünya ölkələri üçün iqtisadi böhranla
nəticələnəcəyini bildiriblər. Qeyd edək ki, indiki vəziyyətdə də bir sıra
ölkələrdə ciddi şəkildə də olmasa, yüngülvarı böhran müşahidə edilir. Baş
verənlər bizim ölkəmizdən də yan keçmir. Maraqlıdır ki, hazırkı vəziyyətdə bəzi
qadağaların və xüsusi rejimin tətbiqi iqtisadiyyata, xüsusilə də özəl sektora
necə təsir edəcək, bu təsirləri azaltmaq üçün hansı addımlar atılmalıdır?
Şirkətlər daha az zərərlə çıxmaq üçün hansı marketinq strategiyası və
alətlərindən istifadə edə bilərlər?
Vergilərin kəskin şəkildə
azaldılması və ya...
İqtisadçı Pərviz Heydərov deyir ki,
hazırkı vəziyyətdə ən böyük zərbə iqtisadiyyata, xüsusilə də özəl sektora dəyir
və bu, təkcə Azərbaycanda yox, bütün dünyada belədir: "Görünən odur ki, özəl
sektorda ən çox ziyan çəkən xidmət sahəsidir. Burada turizmi xüsusi qeyd etmək
lazımdır. Koronavirus məsələsi ortaya çıxan gündən ilk zərbəni turizm aldı. Bir
ölkəyə turist axınının minimuma enməsi, yalnız onun üçün deyil, digər ölkələr
üçün də mənfi haldır. Konkret olaraq ölkəmizə gəlincə isə ilk olaraq indi hansı
dövrdə olduğumuzu nəzərinizə çatdırım. Mart ayı ölkəmiz üçün alış-verişin,
ticarət dövriyyəsinin ən yüksək həddə olduğu vaxtdır. Çünki mart həm bayramlar
ayıdır, həm də turist axının geniş olduğu bir zamandır. Biz hələ ki, dəyən
ziyanı konkret statistik rəqəmlə deyə bilmərik. Bunu birinci rübün yekunlarına
dair açıqlamalar veriləndə biləcəyik. Rəqəmlər açıqlandıqdan sonra vəziyyətin
pisləşməyə doğru getdiyi müşahidə edilərsə, fəsadların müəyyən qədər də olsa,
aradan qaldırılması üçün dövlət mütləq şəkildə vergi güzəştləri etməlidir.
Hətta, deyərdim ki, vergilərin kəskin şəkildə azaldılması və ya bir müddətlik
ləğvi ilə bağlı da düşünməyə dəyər. Bununla özəl sektorda tam çökmənin
qarşısını almaq olar. Əks təqdirdə vəziyyət çox mürəkkəb olacaq”.
Bəzi bizneslərin
bağlanmasına yol aça bilər
Marketinq Peşəkarları Dərnəyinin idarə heyətinin sədri, "Yello Advertising” reklam şirkətinin
həmtəsisçisi Namiq Bayramov koronavirusun yayılmasına qarşı dövlətin
apardığı sərt qabaqlayıcı tədbirləri təqdir etdiyini, bu addımların ölkəmizi
qoruyacağına inandığını qeyd edir: "Amma burda başqa nüanslar da var. Bu
tədbirlər ölkə iqtisadiyyatında çox ciddi durğunluq yaradacaq və bu, artıq
başlayıb. Məlumdur ki, dövlətin qabaqlayıcı ehtiyat tədbirləri sırasında
toyların da təxirə salınması var. Bu məqam iqtisadi aktivliyə ciddi zərbə vuran
məqamdır. Çünki bizdə iqtisadi aktivliyin əsas qüvvəsi toylardır. Bir düşünün,
toyların hesabına hansı sahələrdə iş olur: cehizlik qab-qacaq, gəlinlik
kirayəsi, paltar tikilməsi, paltar və ayaqqabı satılması, bəyaz əşya,
parfümeriya, qənnadı, mebel, taksi, meyvə-tərəvəz, ət tədarükü, süd məhsulları,
kolbasa, konservləşdirilmiş qidalar, restoran, spirtli içki, "ayıq sürücü”,
mənzil satışı, ev təmiri xidməti, mənzil kirayəsi, inşaat malları satışı və s.
onlarla sahə. Bu sahələrdə aktivliyin azalması həmin sahələrdə bəzi bizneslərin
bağlanmasına yol aça bilər”.
Əsas fokusu gəliri
artırmağa yönəltmək lazımdır
N. Bayramovun sözlərinə görə, iqtisadiyyatdakı durğunluq ən böyük
zərbəni xidmət sektoruna vurur: "Çünki həm xidmət sektorunun maddi-texniki
bazası və maliyyə resursları istehsal sahələri ilə müqayisədə çox vaxt zəif
olur, həm də insanlar çox rahatlıqla ilk növbədə xidmət sektorunun xidmətindən
imtina hesabına qənaət etməyə çalışırlar. Bundan başqa bizim bizneslərin
çoxunda olan bir yanlış düşüncə var. Onlar iqtisadi aktivlik düşən kimi
xərcləri azaltmağa çalışırlar. Halbuki əsas fokusu gəliri artırmağa yönəltmək
lazımdır. Xərclərin azaldılması kiçilmək deməkdir. Bəzən bu, qaçılmaz olsa da,
heç də həmişə ən yaxşı çıxış yolu deyil. Bunu 2015-ci ildə yaşadıq. Böhran
başlayan kimi hamı marketinq xərcləmələrini azaltdı. Hansı ki, məhz onu
artırmaq hesabına bazarda güclənmək olardı. Bizim yerli müştərilərimiz də eyni
addım atdı. Lakin müştərimiz olan qlobal markalardan biri bazara daha aqressiv
girdi. Nəticədə məhz 2015-2016-cı illərdə həmin şirkət bazarda çox böyük pay
əldə etdi. Düşünürəm ki, bu dəfə 2015-ci ildəki kimi olmayacaq. Bunu bəzi yerli
müştərilərimizin aktivliyi artırmasından hiss edə bilirik və doğrusu da budur”.
Hazırkı situasiyanın mənfi təsirlərini azaltmaq üçün şirkətlərin
atmalı olduğu addımlardan danışan marketoloq çıxış yolunu marketinq
investisiyalarını artırmaqda görür: "Ağılla və marketinq işi bilən şəxslərlə
əməkdaşlıq etmək lazımdır. Dövlət isə sahibkarlığa, xüsusilə də xidmət
sektorunda olan kiçik sahibkarlığa dəstək həyata keçirməlidir. Məsələn, ABŞ-da
Tramp bəyan etdi ki, sərhədləri bağlayıram, amma 50 milyardlıq dəstək fondundan
istifadə edəcəyəm. FED isə faiz dərəcələrini 1 bənd azaldaraq 1.25-dən 0.25-ə
qədər salıb. Üstəlik, 700 milyard dollarlıq təşviq proqramı, yəni istiqraz
alışları açıqlayıb”.
Dövlət bu barədə də
düşünməlidir
"Dövlət hansı addımları atmalıdır” sualına isə N. Bayramov konkret öz
sektorlarından danışaraq, digər sektorların da bu cür analogiya aparmalarını
məsləhət gördü: "Fəaliyyət göstərdiyimiz reklam sektoru əsasən kiçik
bizneslərdən ibarətdir. Dövlət bu bizneslərə yönəlik fərqli vergi güzəştləri
tətbiq edə bilər. Eyni zamanda dövlətdən maliyyələşən qurumlara öz marketinq
işlərini xarici rezidentlərə verməyi qadağan edə, özəl şirkətlərə marketinq
işlərini yerli şirkətlərə verdiyi halda, xüsusi güzəştlər tətbiq edə bilər və
s. Həmçinin şirkətlərin çoxunda iş həcmi azaldığı bir şəraitdə, onların üzərinə
düşən çox ciddi DSMF yükünün də yüngülləşməsi lazımdır. Dövlət bu barədə də
düşünməlidir. Doğrudur, bu, ölkədəki xarici şirkətlərə qarşı xoş münasibət
sayılmaz, amma bu addımlar atılarsa, yerli şirkətlər qorunar. Xaricilər onsuz
da batmayacaq. Onların arxasında qlobal marka gücü var. Belə situasiyalarda
proteksionizm siyasətinə görə heç kim dövlətimizi qınaya bilməz”.
Düzgün hesablanmış
strategiya hazırlanmalıdır
Marketoloq Fərid Hacıyev bildirdi ki,
şirkətlər düzgün hesablanmış strategiyalar hazırlamalıdırlar, çünki indiki vəziyyət
sovuşduqdan sonra bazarın canlanması bir az vaxt apara bilər: "Böhranı imkana
çevirmək” deyə bir termin var. Amma təəssüf ki, hər böhran imkana çevrilə
bilməz, daha dəqiq desək, bu, bəzən hər şirkət üçün keçərli olmaya bilir. Çox
yaxşı, düzgün hesablanmış strategiya hazırlanmalıdır. Bütün işlər virus
sovuşduqdan sonra üçün hesablanmalıdır. Məsələn, turizm şirkətlərinin hazırda
marketinq fəaliyyəti həyata keçirib, lap 6 ay sonraya belə satış etməyə
çalışması faydasızdır. Çünki hazırda insanlar həm qorxur, həm də bunun nə vaxt
bitəcəyini bilmir. Epidemiya sovuşduqdan sonra ümumi bazarın canlanması bir az
vaxt apara bilər”.
Şirkətlərin sosial
məsuliyyəti
F. Hacıyev deyir ki, hazırda şirkətlər ilk olaraq insanların
həyatındakı rollarını bir daha gözdən keçirib, necə kömək edə biləcəklərini
düşünməlidirlər: "İndiki vəziyyətdə maliyyə böhranı qaçılmazdır, ancaq ən azı
insanlarla münasibətdə böhranın qarşısını almaq mümkündür. Şirkətlər istər
maarifləndirmə, istərsə də hər hansı bir şəkildə kömək etmək, insanlara dəstək
olmaq imkanlarını dəyərləndirməlidirlər. Burada əsas məsələ sosial
məsuliyyətdir. Sosial məsuliyyəti dərk etmək çox vacibdir. Digər tərəfdən
şirkətlər daxili kommunikasiyalarına diqqət etməlidirlər. İşçilərin
təhlükəsizliyi, sağlamlığı və psixoloji vəziyyətini nəzarətdə saxlamalıdırlar.
Ofisə gəlmədən, evdən işləmək qərarı alınsa belə, mütəmadi olaraq əməkdaşların
psixoloji vəziyyətinə diqqət etməlidirlər”.
Rəqəmsallaşma
Müsahibim baş verənlərin rəqəmsal keçidə ciddi dəstək olduğunu vurğulayır:
"Atılan addımlar sayəsində rəqəmsal keçid kifayət qədər sürətləndi. Uzaqdan
işləmək, onlayn konfranslar və s. daha geniş hal aldı. Eyni zamanda elektron
ticarət sahəsinə də təkan verdi. Məsələn, elektron ticarətə inteqrasiyasını
tamamlamamış şirkətlərin, yaxşı strategiya ilə bu prosesi sürətləndirmələri
onlar üçün faydalı ola bilər. Lakin əsas məsələ, yaxşı düşünülmüş addımlar
atmaq, düzgün strateji yol xəritəsi hazırlamaqdır”.
Günel Azadə