Bakı Şopinq Festivalı böyük imkanlar təqdim edir
Bir neçə gündür Bakıda
İkinci Şopinq Festivalına start verilib. Məlumat üçün qeyd edək ki, Prezident
İlham Əliyevin 2016-cı il 1 sentyabr tarixli "Azərbaycan Respublikasında
turizmin inkişafı ilə bağlı əlavə tədbirlər haqqında” sərəncamına əsasən
keçirilən festivalın təşkili Mədəniyyət və Turizm Nazirliyinin nəzdində
fəaliyyət göstərən Azərbaycan Konqreslər Bürosuna həvalə edilib.
Noyabrın 15-dək davam
edəcək İkinci Şopinq Festivalında 111 müəssisə tərəfdaş qismində çıxış edəcək.
Festivala ümumilikdə 578 müəssisə qatılıb. İkinci Bakı Şopinq Festivalı xüsusi
turist paketləri hazırlayaraq turizm agentliklərinə təklif edəcək. Bu paketlərə
aviabilet, transfer, sığorta, oteldə qalma, festival mağazalarına şopinq
turların təşkili daxildir. Alıcılar festival boyunca xüsusi hədiyyə kartları
qazanacaq, eləcə də xüsusi uduşlu lotereyalar və endirim kuponları əldə edəcəklər.
Turistləri və yerli alıcıları
həvəsləndirmək üçün ticarət mərkəzlərində interaktiv oyunlar təşkil olunacaq.
Festival boyunca Fəvvarələr meydanında "Fan” zonası fəaliyyət göstərəcək.
Qeyd edək ki, budəfəki
festivalda 467 müəssisənin əlavə dəyər vergisini qaytarması nəzərdə tutulur.
"Baku Shopping Festival – Tax Free” nişanı olan mağazalardan 100 AZN-dən çox
alış-veriş edən həm yerli, həm də xarici vətəndaşlar aldıqları məhsulların
əlavə dəyər vergisinin (ƏDV) müəyyən qismini geri ala biləcəklər. Həmin məbləğ
nağd və bank hesabına/karta köçürmə yolu ilə əldə edilə bilər. Beləliklə, Bakı
Şopinq Festivalı zamanı alıcılar bəyəndikləri malları digər dövrlərdən daha
sərfəli qiymətlə ala bilərlər. Xatırladaq ki, ƏDV qaytarılması yalnız "Baku
Shopping Festival – Tax Free” nişanı olan mağazalarda mümkündür. Nişan olmayan
mağazalarda Tax Free sistemi tətbiq olunmur. Bundan başqa, festival çərçivəsində xüsusi mükafatlar təsis
ediləcək. Bir ay müddətində müştərilər dünya brendlərinə məxsus geyim,
elektronika, məişət texnikası, mebel, ətriyyat və kosmetika, eləcə də digər
məhsulları Bakıda yerləşən 400-dən çox mağazadan xüsusi kampaniya və
endirimlərlə əldə edə biləcəklər. Üstəlik, həmin mallara "Tax Free” imkanı təqdim
olunacaq. Bundan başqa, festival zamanı moda nümayişləri və digər müxtəlif
əyləncə xarakterli tədbirlərin təşkili də nəzərdə tutulur.
Bakı Şopinq
Festivalının rəsmi saytına (www.bakushopfest.com) festival barədə fikirlərini
bölüşən ATƏT-in Minsk qrupunun Amerika Birləşmiş Ştatlarından olan keçmiş həmsədri
Ceyms Uorlik FestivalıN çox möhtəşəm bir tədbir
olduğunu vurğulayıb. Bakıda olmadığı üçün festivala qatıla bilmədiyindən
təəssüflənən diplomat növbəti festivallarda mütləq iştirak edəcəyini, maraqlı
sürpriz və sərfəli endirimlərdən yararlanacağını bildirib.
Krinisa şəhərində
keçirilən Krinisa İqtisadi Forumunun Proqram Şurasının sədri, forumun ilk
təsisçilərindən biri Ziqmunt Berdıçovski əmindir ki, Bakı Şopinq Festival
birmənalı olaraq, Azərbaycana turist səfərlərinin artmasına səbəb olacaq. bakushopfest.com
saytına müsahibəsində Berdıçovski qeyd edib ki, bu festival sayəsində turist
artımı təkcə Azərbaycanda yox, qonşu Gürcüstanda da hiss olunacaq. Z.Berdıçovski
festivalın kiçik və orta sahibkarlığın da inkişafına müsbət təsir göstərəcəyini
qeyd edib: "Məhz bu sahələr ölkədəki iqtisadi artımın əsasını təşkil etməli və
ümummilli gəlirin formalaşmasında vacib rol oynamalıdırlar”.
Cənab Berdıçovski
etiraf edir ki, bu layihənin tam effektli olması üçün zamana ehtiyac var. Misal
olaraq, o, hazırda rəhbərlik etdiyi Krinisa İqtisadi Forumunun tarixini
göstərib: "1991-ci ildə mən Krinisa İqtisadi Forumunu yaradanda, forum cəmi 100
nəfəri toplaya bilirdi. İndi isə forumu dünyanın ən müxtəlif
bölgələrindən 4500-ə yaxın iştirakçı ziyarət edir". Amma o əmindir ki,
Bakı Şopinq Festivalının inkişaf etməsi üçün Krinisa forumundan daha az vaxt
tələb olunur. İndiyədək Bakıda "Avroviziya” və "Formula-1” kimi mötəbər yarışların
yüksək səviyyədə təşkil edildiyini deyən Z.Berdıçovski Azərbaycanı regionda
sürətlə inkişaf edən ölkə adlandırıb: "Bununla yanaşı, Azərbaycan başqa
mədəniyyətlər, xalqlar, konfessiyalar üçün də açıq, tolerant ölkədir. Bu ölkədə
istənilən şəxs özünü təhlükəsizlikdə hiss edir”.
Azərbaycan
Turizm və Menecment Universitetinin Turizm və qonaqpərvərlik fakültəsinin
dekanı Rəhman Səfərov"Kaspi”yə
açıqlamasında bildirdi ki, budəfəki festivalda ötən dəfəkinə nisbətən daha çox
aktivlik müşahidə edilir: "Festivalın keçirilməsində əsas məqsədlərdən biri də
kütləvi turizm axınını gücləndirməkdir. Ona görə də ölkəmizdə belə festivalların
keçirilməsi çox müsbət haldır. Bu,
turizm potensialının inkişafında çox böyük rol oynayır. Festival çərçivəsində
ölkəyə gələn turistlərdə Azərbaycan haqqında müsbət rəy formalaşır. Düzdür, son illər ərzində ölkəmiz müxtəlif beynəlxalq tədbirlərə ev
sahibliyi edir. Böyük tədbirlərə görə artıq Azərbaycan dünyanın bir çox
ölkələrində kifayət qədər tanınır. Festivala qatılan turistlər ölkəyə gələn
ümumi turist sayında da özünü göstərir. Bu ilin ilk səkkiz ayının hesabatına
əsasən, Azərbaycana iki milyona yaxın turist gəlib. Bu isə keçən illə
müqayisədə iyirmi faiz artım deməkdir. Qeyd etdiyim kimi, festivalın təşkilində
də əsas məqsəd ölkəyə gələn turistlərin sayının daha da artırılmasıdır. Birinci
şopinq festivaldan fərqli olaraq, bu dəfə tədbirin reklam işi daha da
keyfiyyətli aparılır. Həmçinin ikinci festival birinciyə nisbətən daha
mütəşəkkil formada təşkil edilib. Reklamın daha çox olması isə turist sayının
yüzdə otuz beş faiz artımına səbəb olub. Bu ərəfədə bu rəqəmin artacağı da
gözlənilir. Bütün bunlar isə o deməkdir ki, görülən işlər öz bəhrəsini
verməkdədir”.
Şəbnəm