Aztəminatlı ailələrin mənzil şəraitini yaxşılaşdıracaq layihə
Ekspertlər deyir ki, "Güzəştli mənzil” sistemi işə
düşdükdən sonra mənzil bazarında aktivlik artacaq, tikinti sektorunda
hərəkətlilik yaranacaq
Dekabrın
ikinci yarısından kirayə mənzillərə müraciət başlayacaq. Bu haqda İpoteka və
Kredit Zəmanət Fondu açıqlama yayıb. Mexanizmə əsasən, vətəndaşlar mənzili kirayə götürdükdən sonra ona sahib
də ola biləcəklər. Mənzili kirayə edən vətəndaşımızın aylıq ödənişləri evin
xərcindən çıxılacaq. Müqavilə bağlanandan 3 il sonra isə kirayəçi, mənzilin
sahibinə çevrilmək imkanı qazanacaq. Bu zaman o, daha çox ödəniş etməklə
müqaviləyə vaxtından əvvəl xitam verib mənzilə sahib ola bilər və ya ödənişi davam etdirib 25 il ərzində ona sahib
ola bilər.
Müraciət edən şəxs elektron və Asan imzaya malik olmaqla, özünə
elektron kabinet yaratmalıdır. Kabinet yaradan zaman o, özü ilə bağlı
məlumatları elektron daxil edə biləcək. Bu prosesi keçən və müsbət cavab alan
vətəndaş, fonda şəxsiyyət vəsiqəsinin surəti (onunla birgə kirayə götürüləcək
yaşayış sahəsində yaşayacaq ailə üzvləri varsa, həmçinin onların şəxsiyyət
vəsiqələrinin surətləri) və gəlirlərini təsdiq edən sənədləri təqdim etməlidir.
Qaydalara əsasən, rəsmi əmək müqaviləsi olmayan, amma fərdi sahibkarlıqla məşğul
olan vətəndaşlar da müraciət edə biləcəklər. Bu zaman onlar sahibkarın vergi
orqanlarında qeydiyyatdan keçdiyi barədə şəhadətnamənin surətini və vergi
orqanları tərəfindən qəbul olunmuş gəlir vergisi və ya sadələşdirilmiş vergi
bəyannaməsini təqdim etməlidirlər. Fond müraciətə müsbət cavab verdikdən sonra
sonuncu mərhələ müqavilənin bağlanmasıdır.
İqtisadçı-alim Vüqar
Bayramov məsələni şərh
edərkən bəzi vacib məqamlara toxunub. O bildirib ki, kirayə evlərə ASAN
xidmət və ya elektron ipoteka portalı vasitəsi ilə müraciət etmək mümkün olacaq: "Mənzilə sahib
olanların Azərbaycan vətəndaşı olması şərtdir. Həmçinin, kirayə mənzil üçün müraciət edənin vaxtı
keçmiş öhdəlikləri (bank kreditləri və digər məcburi ödənişlər üzrə)
olmamalıdır.
Təsdiq olunmuş qaydalara görə, müraciətlər elektron
sistemlə həyata keçiriləcək və növbəlilik əsasında qeydiyyata alınıb baxılacaq.
Fond beş iş günü müddətində kirayə müqaviləsinin bağlanmasına dair razılıq və
ya əsaslandırılmış imtina barədə qərar qəbul edəcək, 10 iş günü müddətində isə
kirayə müqaviləsinin rəsmiləşdirilməsi yekunlaşacaq. Bundan sonra 3 iş günü
müddətində kirayəçi aylıq ödənişin ən azı 12 mislini əvvəlcədən Fondun hesabına
ödəməli olacaq. Bu məbləğ Fondun hesabına ödəndiyi andan kirayə müqaviləsi
qüvvəyə minəcək. Kirayə müqaviləsi 3 ildən 25 ilədək müddətə bağlanmalı və
notariat qaydasında təsdiqlənməlidir.
Şərtlər siyahısında müraciət edən şəxsin
məhkumluğunun olmaması da qeyd olunub. Fondun elan etdiyi şərtlərdə ailəli olmaq şərt
kimi qeyd olunmur. Bu isə o deməkdir ki, ailəli olmayan vətəndaşlarımız da
müraciət edə biləcəklər.
Qeyd edim ki, aylıq ödənişlər 60 gün və daha çox
müddətdə ödənilmədikdə, kirayə müddətində kirayəçi vəfat etdikdə və kirayə
müqaviləsi üzrə hüquq və vəzifələr kirayəçinin vərəsələrinə keçmədikdə, yaşayış
sahəsi məhv olduqda və ya zədələnmə nəticəsində yaşayış sahəsi öz birbaşa
təyinatı üzrə istifadə edilə bilməyəcək dərəcədə dəyişdikdə ev kirayəçidən geri
alınır. Həmçinin, kirayəçi yaşayış sahəsini üçüncü şəxsin qeyri-hüquqi
istifadəsinə verdikdə, həmçinin kirayə müqaviləsi üzrə üzərinə götürdüyü digər
vəzifələri icra etmədikdə də, ev kirayəçidən geri alınır”.
İqtisadçı bildirib ki, müqavilə bağlandıqdan ən azı
3 il müddətdən sonra kirayəçi mənzilə sahib olmaq hüququna malikdir. 3 ildən
sonra isə növbəti 22 il müddətində, istənilən zaman evin xərcini ödəməklə
çıxarış (kupça) ala bilər. İlkin ödəniş nəzərdə tutulmasa da, kirayə mənzilə
sahib olmaq istəyən şəxs kirayə müqaviləsi bağlanıldıqdan sonra aylıq ödənişin
ən azı 12 mislini qabaqcadan ödəməlidir. Yəni 1 illik kirayə haqqı öncədən
ödənilməlidir. Fondun yazılı razılığı
ilə kirayəçi kirayə müqaviləsi üzrə öz hüquq və vəzifələrini başqa şəxsə ötürə
bilər. Sadəcə kirayəçi bunu kirayə müqaviləsi bağlanan gündən 3 il sonra edə
bilər. Məsələn, kirayə müqaviləsi bağlanandan 3 il sonra kirayəçi ödəniş
etməkdə çətinlik çəkirsə və ya evlə bağlı planları dəyişirsə, o zaman fondun
razılığı ilə müqaviləni başqasının adına keçirə bilər. Mənzilə mülkiyyət hüququ
kirayəyə verəndən başqa şəxsə keçdikdə, kirayənin qüvvədə qalması baş verir. Bu
hal kirayə müqaviləsində də qeyd olunacaq. Həmçinin, şərtlərə görə, müraciətə
baxıldığı zaman yalnız vergi qanunvericiliyi ilə nəzərdə tutulmuş qaydada
qeydiyyata alınmış şəxsi biznesinizdən gələn gəlirlər təhlil ediləcək. Bu isə o
deməkdir ki, gəlirin rəsmi olması vacibdir”.
"Kirayəçi həmin evdə qeydiyyata düşə bilərmi?”
sualına da iqtisadçı aydınlıq gətirib: "Satmaq öhdəliyi ilə kirayə
müqaviləsində nəzərdə tutulur ki, kirayəçi və onunla birgə yaşayan ailə üzvləri
(ər-arvad, ata-ana, övladlar) Fondun yazılı razılığı ilə kirayə ünvanı üzrə
pasport qeydiyyatına düşə bilərlər.
Əmlak məsələləri üzrə ekspert Nüsrət İbrahimov mexanizm
haqqında fikir söyləməyin hələlik tez olduğunu bildirdi: "Layihə işə düşdükdən
sonra ilkin qiymətləndirmə aparmaq olar. Çatışmayan cəhətlər yalnız bu halda
müəyyən ediləcək. Ümumilikdə götürdükdə bu layihə aztəminatlı ailələrin mənzil
probleminin həlli istiqamətində atılan addımlardan biridir. Məqsəd həmin
ailələrin mənzil şəraitini yaxşılaşdırmaqdır. Bu mənada atılan addımı müsbət
qiymətləndirirəm. Qeyd edim ki, layihə işə düşdükdən sonra mənzil bazarının
aktivliyi artacaq. Digər tərəfdən, tikinti şirkətlərinin məhsullarının satışına
dəstək olacaq. Həmçinin, tikinti sektorunda ümumi hərəkətlilik artacaq. Bu, həm
də məşğulluğun təmin olunması baxımından vacibdir”.
Əmlak məsələləri
üzrə ekspert Elnur Fərzəliyevsöylədi
ki, Azərbaycanda mənzilə olan tələbat həmişə yüksək
olub: "Layihə mexanizminə əsasən vətəndaş kirayə götürdüyü evi ala biləcək. Bu,
çox müsbət bir haldır. Həmçinin, layihə,
mənzillərin çıxarışla təminolunma prosesinə təkan verəcək. Əslində bu
addım çoxdan atılmalı idi. Amma müəyyən çatışmayan məqamlar da var. Bakıda
yaşayanların 20-30 faizi kirayə mənzillərdə yaşayır. Məsələ burasındadır ki,
onların böyük əksəriyyətinin rəsmi iş yeri yoxdur. Rəsmi iş yeri olmayan
şəxslər isə bunun üçün müraciət edə bilməz. Ona görə də, həmin insanlar üçün
belə bir şərait yaradılmalıdır. Çünki xeyli sayda insan var ki, aylıq bəlli
miqdarda gəliri olsa da, iş yeri rəsmi qeydiyyatda deyil. Onların aylıq, stabil
olaraq 400-500 manat kirayə haqqı ödəmək imkanı var. Amma bu adamlara şans
verilmir. Əsas çatışmayan cəhətlərdən biri məhz bu məqamdır. Bu gün kirayə
mənzillərdə qalanların 70-80 faizi vergidən yayınır. Kirayə verənlər əslində
vergi ödəməlidir. Amma tərəflər arasındakı müqavilə rəsmi olmadığına görə,
vergi ödənilmir. Bu kimi məsələlərə də aydınlıq gələcək. Düşünmürəm ki, mənzil
bazarında qiymətlər aşağı düşəcək. Yeni tikilən binalarda, əksinə olaraq,
qiymət artımı baş verə bilər. Torpağın qiyməti artdıqca, həmin ərazilərdə
tikilən mənzillərin də qiyməti bahalaşır. Çünki paytaxtda boş torpaq sahəsi ciddi problemə çevrilib”.
Şəbnəm