Bakı 14°C
Azərbaycanın idman həyatı 2021-ci ildə
Avropa
çempionatının Bakıda keçirilən oyunları, paralimpiyaçıların Tokiodakı möhtəşəm
çıxışı və "Qarabağ”ın tarixi uğuru ilin ən yaddaqalan məqamlarıdır
Koronavirus
2021-ci ildə də dünyanın idman həyatına ciddi təsir göstərdi. Ancaq 2020-ci ilə
baxanda "buna da şükür” deməyə bilmərik. 2020-ci ildə təxirə salınan futbol üzrə
Avropa çempionatı və Olimpiada, nəhayət, 2021-ci ildə keçirildi.
Bakının təşkilatçılığına
kimsə irad tuta bilmədi
Düzdür, məhdudiyyətlər
oldu, azarkeşlər stadionlara qismən buraxıldı. Amma ən əsası o idi ki, böyük
turnirlər üçün "yaşıl işıq” yandı. Təbii ki, böyük turnirlərdə Azərbaycanın və
idmançılarının da izi vardı. Futbol üzrə Avropa çempionatının 4 qarşılaşması
Bakıda keçirildi. Koronavirusa görə gözlənilən ajiotaj olmadı. Sərhədlər bağlı
olduğu, ümumiyyətlə, insanlar koronovirus şokundan tam qurtulmadığı üçün
azarkeşlər oyunları televiziya qarşısında izləməyə üstünlük verdilər. Amma Bakının təşkilatçılığına kimsə irad tuta
bilmədi. Ölkəmiz çempionatın 4 oyununu (3 qrup mərhələsi, 1 1/4 final
qarşılaşması) yüksək səviyyədə təşkil etdi. Azarkeşləri üzən məqam isə qardaş
Türkiyə yığmasının uğursuz çıxışı oldu.
Paralimpiyaçıların
triumfu
Tokioda
keçirilən olimpiya oyunlarında stadionlara azarkeş buraxılmadı. Azərbaycan
idmançılarının Yaponiyadakı çıxışını isə uğurlu adlandıra bilmərik.
İdmançılarımız turniri 7 medalla bitirdilər. Amma qızıl medalsız. Karateçilər
İrina Zaretska (+61 kq) və Rafael Ağayev (75 kq), sərbəst güləşçi Hacı Əliyev
(65 kq) Azərbaycanın Olimpiya yığmasına 3 gümüş medal qazandırdılar. Qadın güləşçi
Mariya Stadnik (50 kq), Yunan-Roma güləşçisi Rafiq Hüseynov (77 kq), boksçu
Alfonso Dominquez (81 kq) və cüdoçu İrina Kindzerska (+78 kq) Azərbaycana 4
bürünc medal gətirdilər. Tokio Olimpiya Oyunlarında Azərbaycanı 44 idmançı təmsil
edib. Əvəzində isə paralimpiyaçılarımız möhtəşəm uğur əldə etdilər. Tokioda 19
medal qazandıq ki, onun da 14-ü qızıl idi. Bir idmançımız gümüş, 3 idmançımız
isə bürünc medalı boynundan asmalı oldu. Azərbaycan Tokio-2020 Paralimpiya
Oyunlarında komanda birinciliyində 19 medalla 10-cu yeri tutdu. Bu, Azərbaycan
millisinin Paralimpiya Oyunlarında göstərdiyi ən yüksək nailiyyətdir.
"Qarabağ”dan
tarixi nəticə
2021-ci il
Azərbaycanın futbol tarixində də qalacaq. İlk dəfə Azərbaycan klubu
avrokubokların qrup mərhələsini adlamağı bacardı. Təbii ki, bu uğuru "Qarabağ” reallaşdırdı.
"Köhlən atlar” "Bazel”, "Kayrat” və "Omoniya” kimi güclü rəqiblərin yer aldığı
qrupda 2-ci pilləni tutaraq 1/16 final mərhələsinə vəsiqə qazandı. Bu mərhələdə
isə "Qarabağ”ın rəqibi Fransa "Marsel”i olacaq. "Qarabağ”ın bu uğuruna Azərbaycan
Prezidenti İlham Əliyev də biganə qalmadı. Cənab Prezident qrup mərhələsinin
oyunları başa çatandan sonra "Qarabağ”ı qəbul etdi. Prezident "Qarabağ” futbol klubuna maliyyə dəstəyi göstərilməsi
haqqında sərəncam da imzaladı. Sərəncama əsasən, UEFA Konfrans Liqasının qrup mərhələsində
uğurla iştirak edərək növbəti mərhələyə vəsiqə qazanması ilə əlaqədar 2021-ci
il dövlət büdcəsində nəzərdə tutulmuş Azərbaycan Prezidentinin ehtiyat
fondundan "Qarabağ”a 5 milyon manat ayrıldı.
Yeni
nazir, yeni hədəflər
2021-ci
ildə Prezidentin sərəncamı ilə Fərid Qayıbov gənclər və idman naziri təyin
edildi. Cənab Prezident Fərid Qayıbovu gənclər və idman naziri təyin olunması
ilə əlaqədar videoformatda qəbul etdi və Azərbaycan idmanı ilə bağlı gələcək hədəfləri
müəyyənləşdirdi. İlham Əliyev olimpiadanın nəticələrini əsas götürərək idman
federasiyalarında olan çatışmazlıqları bir daha diqqətə çatdırdı və problemlərin
həlli istiqamətində ciddi addımlar atılması üçün göstərişlər verdi. Yeni
nazirin həll etməli olduğu problemlər var. Azərbaycan idmanının yeni inkişaf
yolu da məhz ayrı-ayrı federasiyalarda kök salmış bu problemlərin həllindən
sonra başlayacaq. İnanırıq ki, görülən tədbirlərin ilkin nəticələrini elə
2022-ci ildə hiss edəcəyik.
Muxtar
