Azərbaycanda sosial müdafiə sisteminin inkişafı: dünən, bu gün, sabah
İnsanların sosial rifah halının yaxşılaşdırılması
yönündə qəbul edilmiş qanunlar, fərman və sərəncamlar, əhalinin sosial müdafiəsi
sahəsində əsaslı islahatlar uğurla həyata keçirilir. Sosial müdafiə sistemi bu
sahədə mühüm yer tutur və insanların həyat şəraitinin yaxşılaşdırılmasına xidmət
edir. Bunun üçün isə düzgün sosial siyasətin olması vacib şərtdir. Lakin
iqtisadiyyatda uğur qazanmadan, yüksək maliyyə imkanlarına malik olmadan sosial
siyasətin inkişafından danışmaq yersizdir. Hal-hazırda aparılan sosial siyasət
cəmiyyətin hər bir fərdini əhatə edir. Yəni aztəminatlı ailələrə, müharibə veteranlarına
və əlillərinə mənzillərin, avtomobillərin verilməsi, ailə, qadın və uşaq
problemlərinə qayğı və diqqət sosial siyasətin başlıca məqsədlərindən biridir.
Bundan başqa, əhalinin məşğulluğunun təmin edilməsi, uğurlu gənclər siyasəti də
ön plandadır. Həmçinin yoxsulluğun aradan qaldırılması üçün mühüm işlər
görülür. Eyni zamanda, əhalinin imkansız təbəqələrinə ünvanlı sosial yardımlar
verilir. Bu da minlərlə ailənin sosial vəziyyətinin yaxşılaşması yolunda bir təkandır.
Əhalinin sosial təminat sisteminin daha da təkmilləşdirilməsi məqsədi ilə
2015-ci ilin 25 fevral tarixində "Ünvanlı dövlət sosial yardımı sisteminin
təkmilləşdirilməsi haqqında" Azərbaycan Respublikası Prezidenti tərəfindən
Fərman imzalandı. Sosial müavinətlərin artırılması məqsədi ilə müvafiq tədbirlər
görüldü. Belə ki, hər bir ailə üzvünə verilən ünvanlı sosial yardımın həcmi
artdı. Aztəminatlı ailələrin sosial yardıma olan ehtiyacının müəyyənləşdirilməsi
qaydalarının təkmilləşdirilməsi məqsədi ilə Nazirlər Kabinetinin 11.02.2016-cı
il tarixli qərarı ilə "Ünvanlı dövlət sosial yardımın alınması üçün müraciət
edilməsi, onun təyin olunması, verilməsi və verilməsindən imtina edilməsi
Qaydaları"na da dəyişikliklər edildi. Nəticədə müraciət zamanı tələb
olunan sənədlərin sayı 15-dən 3-ə endirildi. Bundan başqa, sosial yardımın
verilmə müddəti 1 ildən 2 ilə artırıldı.
Əhalinin
məşğulluğunun təmin edilməsi vacibdir
İşsiz vətəndaşlara işsizlik müavinətinin verilməsi
də əhalinin sosial müdafiəsinin gücləndirilməsi yönündə atılan müsbət addımlardan
biridir. Lakin əhalinin işlə təmin
olunması məsələsi də vacib amillərdən biri olub, sosial siyasətin tərkib hissəsinə
daxildir. Yəni məşğulluq əhalinin əksər hissəsinin sosial problemlərini öz əməyi
hesabına həll etməsinə imkan verir. Eyni zamanda, əhalinin məşğulluğunun təmin
edilməsi həm də əhalinin kəndlərdən şəhərə axınının, həmçinin iş dalınca xarici
ölkələrə üz tutmasının qarşısının alınması istiqamətində də mühüm addımdır. Şəhid
hərbi qulluqçuların ailələrinə, onların vərəsələrinə birdəfəlik ödəmələrin
verilməsi də əhalinin sosial müdafiəsinin yaxşılaşdırılması sahəsində görülən tədbirlərdən
biridir.
Beynəlxalq
təşkilatlarla əməkdaşlıq
Bir çox beynəlxalq təşkilatlarla əməkdaşlıq edən Azərbaycan
Respublikası 1992-ci ilin may ayından Beynəlxalq Əmək Təşkilatının (BƏT) tam
hüquqlu üzvüdür. Bu beynəlxalq təşkilatla fəal əməkdaşlıq, əmək, məşğulluq, əməyin
təhlükəsizliyi və mühafizəsi, qanunvericiliyin təkmilləşdirilməsi sahələrində
müsbət nəticələrini verir. Belə bir əməkdaşlığın nəticəsi olaraq Azərbaycanda
da BƏT-in nümayəndəliyi açılıb. Bütün bunlar xalqın sosial rifahının yüksəldilməsinə
xidmət edir. Ümumiyyətlə, ötən 17 il ərzində Azərbaycan Respublikasında əhalinin
sosial müdafiəsi sahəsində əsaslı islahatlar aparılıb, insanların sosial müdafiəsini
təmin edən bir sıra qanunlar, fərman və sərəncamlar qəbul edilib. Ölkəmiz uyğun
beynəlxalq konvensiyalara qoşulub. Bütün bunlar isə əhalinin sosial müdafiəsinə
yeni yanaşma üsulları və ənənəvi metodların təkmilləşdirilməsi kimi tələblər
qoyur. Respublikada həyata keçirilən pensiya-sığorta siyasəti də aparılan fəal
sosial siyasətin mühüm tərkib hissəsidir.
1993-2003-cü illər ərzində ölkədə əhalinin sosial
müdafiəsi ilə bağlı mühüm qərarların verilməsi, uğurlu tədbirlərin həyata
keçirilməsi bütünlüklə pensiya və müavinət təminatının yaxşılaşdırılması
istiqamətində mühüm irəliləyişlər yaradıb. Belə ki, 1990-cı ilin 20 Yanvar faciəsində
şəhid olanların ailə üzvləri dövlət qayğısı ilə əhatə olundu, Çernobıl AES-də
baş vermiş qəza nəticəsində zərər çəkmiş və həmin qəzanın ləğvində iştirak
etmiş vətəndaşların sosial müdafiəsi işlərinə başlanıldı. Bu sahədə müvafiq
qanunlar qəbul edildi. İkinci Dünya Müharibəsi veteranlarının sosial müdafiəsinin
gücləndirilməsi istiqamətində mühüm işlər görüldü. Vətənimizin azadlığı,
istiqlaliyyəti və ərazi bütövlüyü uğrunda canından keçənlərin ailələrinin,
milli qəhrəmanlarımızın ailə üzvlərinin sosial müdafiəsinin yaxşılaşdırılması
yönündə fərman və sərəncamlar verildi. Ümumiyyətlə, 1997-ci ildən bəri 6,1 min
nəfər əlil və şəhid ailəsi mənzillə təmin edilib. 6 mindən çox müharibə əlili və
onlara bərabər tutulan şəxslər isə minik avtomobili ilə təmin olunublar.
Müharibə əlillərinin, I və II qrup Çernobıl AES əlillərinin uşaqlarına da aylıq
sosial müavinət, radiasiya qəzası nəticəsində zərər çəkərək əlil olmuş şəxslərə
hər il müalicə üçün birdəfəlik müavinət ödənilir. 2,3 minə qədər əlilliyi
olan şəxs isə evində sosial xidmətlə təmin edilir. Bununla yanaşı, 2018-ci ildə
Əmək və Əhalinin Sosial Müdafiəsi Nazirliyi tərəfindən 1229 nəfər əlilliyi
olan şəxsin istirahəti təşkil edilib.Eləcə də, nazirliyin 14 bərpa-müalicə
müəssisəsində hər il 10 mindən çox əlilliyi olan şəxsə bərpa müalicəsi xidməti
göstərilir. Dövlət başçısının göstərişi ilə Respublika Əlillərin Bərpa Mərkəzində
və Uşaq Bərpa Mərkəzində yüksək səviyyəli reabilitasiya şəraiti yaradılıb.
Hazırda ölkəmizdə 620 minə yaxın əlilliyi olan şəxs
vardır. Onlar Əmək və Əhalinin Sosial Müdafiəsi Nazirliyi tərəfindən əlilliyə
görə əmək pensiyası və ya pensiya hüququ olmadıqda, aylıq sosial müavinətlə təmin
olunurlar. 2018-ci il 1 oktyabr tarixinə olan məlumata görə,
respublikamızda olan 1 milyon 309 min nəfər pensiyaçının 30 faizi əlilliyi olan
şəxslər, aylıq sosial müavinət ödənilənlərin isə 60 faizə qədəri əlilliyi
olan şəxslər və sağlamlıq imkanları məhdud uşaqlardır.Əlilliyə görə əmək
pensiyası və ya aylıq sosial müavinətlə yanaşı, müharibə əlilləri və onlara bərabər
tutulan şəxslər və yalnız aylıq müavinət alan, ümumi səbəblərdən I qrup əlilliyi
olanlar isə Azərbaycan Prezidentinin aylıq təqaüdü ilə təmin olunurlar.
Pensiya
və müavinətlərin artırılması
Ötən illər ərzində sosial müdafiə sisteminin bütün
sahələrində ciddi irəliləyişlər baş verib. Belə ki, dövlət büdcəsindən pensiya
və müavinətlər, digər sosial ödənişli vəsaitlərin davamlı olaraq artırılmasına
başlanılıb. Ardıcıl olaraq həyata keçirilən bu kimi irəliləyişlər 1997-ci ilin
avqust ayında pensiyaçıların yarıdan çoxunun pensiya məbləğinin 2,2 dəfə,
1998-ci ilin avqust ayında şəhid ailələrinin, müharibə əlillərinin, qaçqın və məcburi
köçkünlərin pensiyalarının məbləğinin 2 dəfədən çox artırılması ilə müşayiət
edilib. Eyni zamanda, 1997-ci ilin avqustundan əlilliyi olan şəxslərin, tənha
ahıl vətəndaşların, sosial pensiyaçıların pensiyalarına müavinətlər əlavə edilib.
2000-ci ilin noyabr ayından sosial pensiyalara əlavələrin edilməsi, 2001-ci
ilin yanvarın 1-dən isə 20 Yanvar əlillərinin və ölkəmizin ərazi bütövlüyü
uğrunda döyüşlərdə əlil olanların pensiyalarına hesablanan aylıq müavinətlərin
orta hesabla 1,5 dəfə artırılması da qeyd olunmalıdır. Aztəminatlı ailələrdə
uşaq doğularkən verilən birdəfəlik müavinətin 1,4 dəfə, dəfn üçün müavinətin
1,5 dəfə, üç uşağa qulluğa görə qismən ödənişli sosial məzuniyyətdə
olanlara verilən aylıq müavinətin orta hesabla 1,8 dəfə artırılması da təmin
olunub.
Əlillərin
cəmiyyətə inteqrasiyası
Ölkədə əlilliyi olan şəxslərin sosial müdafiəsi,
reabilitasiyası ilə yanaşı, onların cəmiyyətə inteqrasiyası sahəsində də tədbirlər
həyata keçirilir. Belə ki, fiziki məhdudiyyətli insanların istedad və qabiliyyətlərinin
aşkara çıxarılaraq cəmiyyətə tanıdılması məqsədilə müvafiq tədbirlər təşkil olunur. Həmin tədbirlərin davamı
olaraq, nazirliyin təşkilatçılığı ilə 3 dekabr - Beynəlxalq Əlilliyi olan şəxslər
günü ilə əlaqədar Bakıda fiziki məhdudiyyətli şəxslərin X Ümumrespublika
Yaradıcılıq Sərgi - müsabiqəsi (İçərişəhər Dövlət Tarix-Memarlıq Qoruğu, Qoşa
qala qapısı tərəfdən girişdə) təşkil edildi. Qeyd edək ki, 3 dekabr - Beynəlxalq
Əlilliyi olan şəxslər günü BMT Baş Məclisi tərəfindən təsis olunub. Bununla,
fiziki məhdudiyyətli insanlara cəmiyyətin diqqətinin artırılması və onların
ictimai həyatda fəal iştirakına şərait yaradılır. 2018-ci il dekabrın 3-də –
Beynəlxalq Əlilliyi olan şəxslər gününün mövzusu "Əlilliyi olan şəxslərin
imkanlarının genişləndirilməsi, inklüzivliyin və bərabərliyin təmin olunması”
idi.Üç gün davam edən sərgi-müsabiqədə ölkəmizin müxtəlif bölgələrindən
250 nəfərdən çox fiziki məhdudiyyətli şəxsin 1500-dən çox əl işi nümayiş
olundu. Bu zaman əlilliyi olan şəxslərin və sağlamlıq imkanları məhdud
uşaqların əl işlərinin satışına da şərait yaradılmışdı.
Əlilliyi olan şəxslərin əmək bazarına çıxışı, məşğulluğunun
dəstəklənməsi də onların cəmiyyətə inteqrasiyasında mühüm rol oynayır. Belə ki,
2018-ci ilin 11 ayı ərzində Dövlət Məşğulluq Xidməti vasitəsilə 500-dən
çox əlilliyi olan şəxs işlə, 60-dan çox əlilliyi olan şəxs ödənişli ictimai işlə
təmin edilib. Dövlət Məşğulluq Xidməti və ƏƏSMN yanında Dövlət Sosial
Müdafiə Fondunun 1 saylı Sağlamlıq İmkanları Məhdud Gənclərin Peşə
Reabilitasiya Mərkəzi tərəfindən ümumilikdə 320-dək əlilliyi olan şəxs peşə
hazırlığına cəlb edilib.
Ümumiyyətlə, xalqın sosial qayğılarının təmin
olunması ilkin şərtdir. Regionlarda yaradılan yeni müəssisələr, iş yerlərinin təşkil
olunması buna əyani misaldır. Sosial, mədəni, infrastruktur obyektlərinin
istifadəyə verilməsi, energetika və kommunal xidmətin səviyyəsinin əhəmiyyətli
dərəcədə yaxşılaşması, bütövlükdə, regionları 10-15 il əvvəlki simasından fərqləndirir.
Əhalinin güzəranının yaxşılaşması məsələsi daim diqqət mərkəzindədir. Ölkəmizdə
sosial problemlərin həlli yalnız paytaxtda deyil, eyni zamanda, ucqar
rayonlarda da həyata keçirilir. Ölkədə yerli istehsal müəssisələrinin
yaradılması işləri davam etdirilir. Və bu müəssisələr əsasən, bölgələrdə
yaradılır, bütün bunlar isə bölgə əhalisinin iş yerləri ilə təmin
olunmasında mühüm rol oynayır.
Zeynəb Əliqızı
Yazı Azərbaycan Respublikasının Əmək və
Əhalinin Sosial Müdafiəsi Nazirliyi və Azərbaycan Respublikasının Prezidenti
yanında Kütləvi İnformasiya Vasitələrinin İnkişafına Dövlət Dəstəyi Fondunun
keçirdiyi müsabiqəyə təqdim etmək üçün hazırlanıb