“Azərbaycana baxış: siyasi maraqlar media müstəvisində” - Fotolar
Mayın 21-də Beynəlxalq Mətbuat Mərkəzində Azərbaycan Mətbuat
Şurasının (MŞ) təşəbbüsü ilə "Azərbaycana baxış: siyasi maraqlar media müstəvisində”
mövzusunda dəyirmi masa keçirilib.Toplantını giriş sözü ilə açan MŞ
sədri, Milli Məclisin deputatı Əflatun Amaşov bildirib ki, bir qayda olaraq
Azərbaycandakı bütün mötəbər toplantılar, idman yarışları vaxtı ölkəmizə münasibətdə mənfi rəy yaratmaq yolu seçilir. O qeyd edib ki, eyni
xoşagəlməz tendensiya yenə nəzərə çarpmaqdadır. Millət vəkilinin sözlərinə görə,
bu, mayın 29-da UEFA Avropa liqasının finalının Bakıda keçirilməsi ilə əlaqədardır:
"Avropa Liqasınınfinal oyununun Bakıda keçirilməsi böyük hadisədir. Təbii
olaraq, finalçılar məlum olduqdan sonra xarici xəbər portallarında məlumatlar dərc
olunur. Lakin təəssüf doğuran hal budur ki, dünyanın bir sıra kütləvi
informasiya vasitələrindəki təqdimatlarda insanlarda ölkəmizlə bağlı bir növ,
qorxu yaradılır. Azərbaycanın imici barədə qeyri-obyektiv məlumatlar ictimailəşdirilir,
ölkəmiz haqqında mənfi rəy formalaşdırılır. Hətta Böyük Britaniya hökuməti də bəyanat
verib ki, Azərbaycana gedərkən ehtiyatlı olun. Bundan sonra bəzi mətbuat
orqanları Londonun Bakıdan uzaq və qiymətlərin baha olduğunu qeyd ediblər. Bu
kimi xəbərlər əksər KİV-lərdə və erməni mətbuatında yer alıb. Ən çox da erməni əsilli
futbolçunun ölkəyə buraxılıb-buraxılmaması ilə bağlı fikirlər səsləndirilib.
Bukimi fikirlər Azərbaycanda beynəlxalq tədbirlərin keçirilməsi ərəfəsində
daim səsləndirilir. Bir sıra siyasi qurumlar ölkəmizin uğurunu götürməyərək qara
niyyətlərini həyata keçirmək fikrinə düşürlər. Bu kimi hallar nəzərə alınaraq,
Azərbaycanın media ictimaiyyəti məsələyə adekvat münasibət bildirməlidir. Bu,
olduqca vacibdir. Elə Mətbuat Şurasının təşkil etdiyi toplantının məqsədi də
bundan ibarətdir. Biz bu tədbir vasitəsilə bəyan edirik ki, ölkədə dinindən,
irqindən asılı olmayaraq, hər kəsin təhlükəsizliyi yüksək səviyyədə qorunur”.
Millət vəkili,
"Yeni Azərbaycan” qəzetinin baş redaktoru Hikmət Babaoğlu beynəlxalq səviyyəli
idman və mədəniyyət tədbirlərinin siyasiləşdirilməsinin doğru hal olmadığını
diqqətə çatdırıb. Böyük Britaniyanın Xarici İşlər Nazirliyinin yaydığı bəyanata
diqqət çəkən deputat qeyd edib ki, Qərb də daxil olmaqla, bütün dünya ölkələri
ilə müqayisədə Azərbaycan kriminal vəziyyətə görə ən sabit ölkələrdən biridir:
"London və Bakıda baş verən kriminal hadisələri rəsmi statistikaya əsaslanaraq
müqayisə etməyə çalışsaq görəcəyik ki, vəziyyət heç də Britaniya XİN-in bəyanatında
olduğu kimi deyil, tam əksinədir. Bu ölkənin paytaxtında baş verən cinayətlər hər
min nəfərə düşən rəqəmlərə görə Bakıdan ən azı on dəfə çoxdur. Belə olduqda rəsmi
Londonun Bakını ittiham etməyə nə mənəvi, nə də hüquqi haqqı çatır. Londonda
2017-ci ildə 824 min 704 cinayət faktı qeydə alınıb ki, onların da 225 min
247-si oğurluqla bağlı cinayətlərdir. Bakıda isə bu göstərici 7898 təşkil edir.
Bununla yanaşı, Londonda 175 min 348 dələduzluq, 103 min 918 yol-nəqliyyat
hadisəsi faktı qeydə alınıb. Bakıda isə həmin ildə 3856 dələduzluq, 1753 yol-nəqliyyat
hadisəsi cinayəti baş verib. Bu halda Böyük Britaniya Xarici İşlər Nazirliyi
hansı əsasla Azərbaycanı kriminal və dələduzluq hadisələrinin çox olması ilə
ittiham edə bilər? Statistikadan da gördüyümüz kimi, bizdə kriminal halların
sayı onlardan 10 dəfə azdır. Bütün bunlar sübut edir ki, xaricdəki bəzi maraqlı
dairələr Azərbaycanın dünyada nüfuzunun artmasını, onun yüksək səviyyəli
iqtisadi, siyasi, humanitar mərkəzə çevrilməsini qəbul edə bilmirlər”.
"Teleqraf
Holdinq”inbaş direktoru Aynur Camal bildirib ki, Azərbaycan əleyhinə
səsləndirilən fikirlər qərəzli və böhtan xarakterlidir: "Azərbaycanın paytaxtı
Bakı şəhəriCənubi Qafqazda ən sabit və sakit şəhərlərdən biridir. Bakıda
terror aktı baş vermir. Lakin xaricdə bu hala tez-tez rast gəlinir. Məhz belə bir
oyunun keçirilməsi ərəfəsində qərəzli fikirlərin səslənməsi ölkəmizi sevməyən
qüvvələrin işidir. Ölkəmiz hər zaman dünyaya özünü nümunəvi dövlət kimi göstərib”.
"İki sahil” qəzetinin
baş redaktoru Vüqar Rəhimzadə qeyd edib ki, Avropanın əksər ölkələri
kriminal hadisələr baxımından Azərbaycandan qat-qat üst sıralarda yer tutur:
"Azərbaycanda keçirilən tədbirlərdə hər zaman təhlükəsizlik yüksək səviyyədə təmin
olunub. Bütün tədbirlər yüksək səviyyədə təşkil edilib. Ona görə də anti-Azərbaycan
xarakterli çıxışlar yalnız və yalnız ölkəmizə qarşı təxribat və böhtan
xarakteri daşıyır. Hesab edirəm ki, mayın 29-da keçiriləcək final oyunu yüksək
səviyyədə baş tutacaq”.
Tədbirdə Azərbaycan Prezidenti yanında Kütləvi İnformasiya Vasitələrinin
İnkişafına Dövlət Dəstəyi Fondunun icraçı direktoru Vüqar Səfərli, "525-ci qəzet”in
baş redaktoru Rəşad Məcid, "Bakı xəbər” qəzetinin baş redaktoru Aydın Quliyev, Əməkdar
jurnalist Azər Həsrət, Jurnalistlərin Həmkarlar İttifaqının sədri Müşfiq Ələsgərli
də çıxış edərək, ölkəmizlə bağlı yaradılmış mənfi rəyi ümumən Azərbaycana qarşı
aparılan informasiya siyasətinin tərkib hissəsi kimi dəyərləndiriblər. Onlar
bildiriblər ki, ölkəmizdə aparıcı beynəlxalq şirkətlərin nümayəndəlikləri var və
bu nümayəndəliklərdə dünyanın dörd yanından əcnəbilər çalışmaqdadırlar. İndiyədək
bu şəxslərin heç biri ilə bağlı insidentin qeydə alınmadığı halda qərəzli
fikirlərin gündəmə gətirilməsi məkrli mahiyyət daşıyır. Buna münasibətdə
bütövlükdə Azərbaycan cəmiyyəti kimi, mediası da öz mövqeyini ortaya
qoymalıdır. Çıxış edənlər həmçinin bildiriblər ki, beynəlxalq tədbirlərin,
böyük idman yarışlarının təşkilində təcrübəyə malik Azərbaycan UEFA Avropa
liqasının final oyununa da evsahibliyini layəqətli şəkildə həyata keçirəcəkdir.
Rufik
İSMAYILOV