Azərbaycan transmilli şirkətlərlə uğurlu əməkdaşlıq edir
Prezident İlham Əliyev: "Əsas strategiyamız yeni
texnologiyalar və müasir idarəçilik əsasında dayanıqlı inkişafa nail olmaqdır”
"Microsoft” Korporasiyası dünyada ən böyük
transmilli şirkətlərdəndir. Müxtəlif hesablama sistemləri üçünproqram
təminatlarınınistehsalı ilə məşğul olur. "Microsoft” şirkətinin sahibi Bill
Geyts dünyanın ən zəngin şəxslərindən biridir. Şirkətin məhsulları 45 dilə
çevrilərək, 80 ölkədə satılır. Fərdi kompüterlər,video oyunkonsolları,
cib kompüterləri,mobil telefonlar və başqa növ hesablayıcı texnika üçün
proqram təminatı istehsalı üzrə dünyanın ən iri şirkətlərindən biridir. "Microsoft”
ilk növbədə "Windows” əməliyyat sistemləri ailəsi, eləcə də sənədlərlə işləmək
üçün "Microsoft Office” proqramları ailəsi ilə məşhurlaşıb. Amma şirkətin başqa
proqram məhsulları da çox geniş istifadə olunur. Buna nümunə kimi "Microsoft Visual Studio”, "MSDN”, "MSN Messenger”, "Microsoft
Servers”in adlarını qeyd edə bilərik.Bu transmilli şirkətin Azərbaycandakı təmsilçiliyi 2005-ci ildən fəaliyyət göstərir. "Microsoft
- Azərbaycan”ın əsas məramı ölkəmizin tam potensialının həyata keçirilməsinə
dəstək göstərməkdir. Başlıca hədəf "Microsoft Korporasiyası”nın ən son məhsul
və həllərinin daha səmərəli tətbiqi vasitəsilə Azərbaycanın strateji inkişaf
məqsədlərinə çatmasına xidmət etməkdir. Transmilli şirkətin təklif etdiyi çeşidli
məhsul və həlləri elektron idarəetmə, biznes inkişafı və təhsil sahələrində
uğurla tətbiq olunur.
Kibertəhlükəsizlik
hər zaman gündəmdədir
İyunun 16-da "Microsoft” şirkətinin təşəbbüsü sayəsində Prezident İlham Əliyevlə şirkətin
vitse-prezidenti Filip Roq, Mərkəzi və Şərqi Avropa bölgəsinin korporativ
əlaqələr və hüquqi məsələlər üzrə rəhbəri Nanna-Luize Linde və "Microsoft” şirkətinin
digər nümayəndələri arasında videokonfrans keçirilib. Prezident İlham Əliyev
transmilli şirkətlə Azərbaycan arasında mövcud olan əməkdaşlıq əlaqələrini
yüksək qiymətləndirib. Bildirib ki, 15 ildən artıq Azərbaycanda fəaliyyət
göstərən "Microsoft”la tərəfdaşlığın böyük potensialı və gələcəyi var. O, qarşıdakı
uzun illərdə bu tərəfdaşlığın davam etdiriləcəyini vurğulayıb. Piratçılığa
qarşı birgə səylərdən, gələcək planlardan söhbət açan dövlət başçısı qeyd edib
ki, hazırda rəqəmsal transformasiya üzrə hökumət strategiyası üzərində iş
gedir. O, bu məsələdə "Microsoft”la yaxşı əməkdaşlıq edə biləcəyinə ümidvar
olduğunu dilə gətirib: "Bu proqram növbəti 5 il üçün planlaşdırılır. Eyni
zamanda, süni intellekt üzrə strategiyanın ətraflı işlənib hazırlanması ilə
bağlı məsələlər də bizim gündəliyimizdədir. Kibertəhlükəsizlik hər zaman
gündəlikdədir, çünki bu, bütün ölkələrin hazırlıqlı olmalı olduğu məsələdir.
İndiyədək bizdə belə böyük hallar olmayıb, lakin heç kim sığortalanmayıb. Ona
görə də bu da bizim gələcəyimiz üçün prioritetlər sırasında qalır. Əlbəttə, mən
icra olunmuş layihələrin siyahısına baxdım. Aramızdakı əməkdaşlıq çox
təsirləndiricidir və əminəm ki, bu, qarşıdakı illərdə tərəfdaşlığımızı
gücləndirəcək. ...Azərbaycan artıq sənaye inqilabı üzrə regional mərkəzə
çevrilir. ...Bizim əsas strategiyamız karbohidrogen ehtiyatlarından asılılığı
azaltmaq və innovasiyalar, yeni texnologiyalar və müasir idarəçilik əsasında
dayanıqlı inkişafa nail olmaqdır. Buna görə düşünürəm ki, bu məsələ üzərində birgə
çalışmağımız əməkdaşlığımızı gücləndirə bilər”.
Beynəlxalq
ictimaiyyətin etibarlı üzvü
Videokonfransda "Microsoft” şirkətinin vitse-prezidenti
Filip Roq Azərbaycanla əməkdaşlıq əlaqələrindən geniş bəhs edib, gələcək
planlardan söhbət açıb. Şirkətin rəhbərliyində təmsil olunan digər şəxslər də ölkəmiz
haqqında yüksək fikirlər bildirib, əməkdaşlığın perspektivlərindən danışıb, bir
sıra təkliflər səsləndiriblər. Baş tutan bu videokonfrans bir daha sübut edir
ki, Azərbaycan dünyanın aparıcı şirkətləri ilə uğurla əməkdaşlıq edir, yüksək
texnologiyaların, innovasiyaların tətbiqi sahəsinə xüsusi diqqət ayırır. Dünyanın
nüfuzlu şirkətləri də Azərbaycanla əməkdaşlığa yüksək maraq göstərirlər. Bunun başlıca
səbəbi ölkəmizdəki ictimai-siyasi sabitlik, qeyri-neft sektorunun, o cümlədən
sahibkarlığın inkişafı, Azərbaycanın sərmayə qoyulması üçün cəlbedici olması, özünü
beynəlxalq ictimaiyyətin etibarlı üzvü kimi tanıtmasıdır.
Öz dilini süni
intellektə tanıdan azsaylı ölkələrdən biri
Mövzu ilə bağlı iqtisadçı millət vəkili Azər Badamov bildirib ki, dünyanın aparıcı
texnoloji şirkətlərinin rəhbərlərinin təşəbbüsü ilə Prezident İlham Əliyevlə
videokonfransların keçirilməsi ölkə iqtisadiyyatının inkişafını müasir
çağırışlara uyğunlaşdırmaq istəklərimizdən irəli gəlir. Deputatın sözlərinə
görə, Prezident İlham Əliyev müasir inkişafın əsas lokomotivinin texnologiyalar
olduğunu qeyd edir və ona görə də son illər elektron hökumətin yaradılması,
rəqəmsal ticarət habının formalaşdırılması istiqamətində ölkəmizdə böyük
layihələr icra olunur: "Microsoft” şirkətinin rəhbərliyi ilə 16 iyunda
keçirilən videokonfransda bu məsələlər geniş müzakirə olundu. Şirkətin
vitse-prezidenti Filip Roq ölkəmizin qlobal pandemiya ilə mübarizədəki
uğurlarını və yeni texnologiyalara transformasiya niyyətlərimizi yüksək
dəyərləndirərək Azərbaycanla daha geniş spektrdə əməkdaşlıq etmək istədiklərini
bildirdi. "Microsoft” dünyanın ən böyük 10 şirkətindən biridir. Şirkətin
Azərbaycanla əməkdaşlıq potensialı çox genişdir. Bu gün ölkəmizdə rəqəmsal
transformasiya üzrə hökumət strategiyası üzərində işlənilir və bu strategiya 5
il ərzində həyata keçiriləcək. Rəqəmsal strategiya həyatımızın hər bir
sahəsinin elektronlaşdırılmasına imkan verəcək. Ölkəmiz süni intellektdən daha
geniş istifadə etmək istiqamətində layihələrin həyata keçirilməsi üçün yeni
strategiya üzərində işləyir. "Microsoft” şirkəti yaxın zamanda süni intellekt
platformasının Azərbaycan dilini dərk etməsi üzərində də işləyir. Bu da
Azərbaycanı öz dilini süni intellektə tanıdan dünyada çox az ölkələrdən birinə
çevirəcək”.
Avropanı Asiyaya
birləşdirəcək rəqəmsal hab
Kibertəhlükəsizliyin Azərbaycan üçün hər zaman mühüm
əhəmiyyət kəsb etdiyini xatırladan millət vəkili vurğulayıb ki, ölkəmiz
rəqəmsal iqtisadiyyata üstünlük verdiyindən dataların kiber hücumlardan
qorunması daha da aktuallaşır: "Azərbaycan dünyanın 2 milyarda yaxın insanını
internetlə təmin edəcək Xəzər dənizinin dibi ilə fiber-optik kabelin
çəkilməsini həyata keçirir. Bu layihə başa çatandan sonra Azərbaycanda böyük
Data mərkəzi yaradılacaq. Müzakirə olunan mövzulardan biri də süni intellekt
üzərində qurulmuş Silikon vadisi kimi Abşeron vadisinin yaradılması
məsələsidir. Düşünürəm ki, nəzərdə tutulmuş Avropanı Asiyaya birləşdirəcək yeni
rəqəmsal habın Azərbaycanda yaradılması Abşeron vadisinin yaradılması prosesini
sürətləndirəcək. Ona görə də kibertəhlükəsizlik məsələsində "Microsoft” şirkəti
ilə əməkdaşlıq perspektivlərimiz genişdir. Qeyd etdiyim bütün məqamlar müasir
dövrün çağırışlarıdır və bu çağırışlar Azərbaycanın "Microsoft”la əməkdaşlıq
imkanlarını genişləndirir”.
İnkişaf və tərəqqi
yeniliklərsiz mümkün deyil
Millət vəkili Eldəniz
Səlimov pandemiya şəraitində
yaşamağımıza rəğmən, Azərbaycanın beynəlxalq əlaqələrini, əməkdaşlıq
axtarışlarını daim davam etdirdiyini söyləyib. Bildirib ki, ötən bir neçə ay
ərzində yaşananlar bir daha bunu təsdiqləyir: "Türk Şurasının, Qoşulmama
Hərəkatının Zirvə görüşlərinin, Avropa Yenidənqurma və İnkişaf Bankının
rəhbərliyi, o cümlədən bir neçə dövlətin, nüfuzlu şirkətin rəhbər şəxsləri ilə
onlayn-videokonfranslar formatında görüşlərin keçirilməsi Azərbaycanın bu
yöndəki əzmindən, əməkdaşlıq, tərəfdaşlıq niyyətlərindən xəbər verir. Daha bir
görüş "Microsoft” şirkətinin təşəbbüsü ilə reallaşdı. Hesab edirəm ki, bu,
olduqca vacib və önəmli bir görüş idi. Dünyanın ən önəmli şirkətlərindən olan "Microsoft”
ilə əlaqələrin gücləndirilməsi və inkişaf etdirilməsi hər iki tərəfin
xeyrinədir. Azərbaycan daim yeniliklərə, yeni texnologiyaların tətbiqinə, onun
yayılmasına, inkişafına açıq olan bir ölkədir. Bunu ötən illər ərzində
keçdiyimiz yol, atılan addımlar nümayiş etdirir. Bu məqam iyunun 16-da
keçirilən videokonfransda bir daha diqqət çəkdi. Bu görüşdə verilən önəmli
mesajlar Azərbaycanın modernləşməkdə, yeniliklərin tətbiqində və yayılmasında,
səmimi tərəfdaşlıqda nə qədər israrlı və əzmli olduğunu hər kəsə göstərdi.
Hesab edirəm ki, inkişaf, tərəqqi yeniliklərsiz, yeni texnologiyalarsız və
səmimiyyət üzərində qurulan əməkdaşlıq olmadan mümkün deyil. Sevindirici haldır
ki, dövlət başçısı İlham Əliyevin iradəsi, yeniliklərə açıq olması sayəsində
Azərbaycan məhz bunlara nail olur, uğurlara imza atır”.
Rufik İSMAYILOV