Azərbaycan Premyer Liqasında son 10 ildə ən çox cəzalanan futbolçular bəlli olub

Azərbaycan Premyer Liqasında son 10 ildə ən çox cəzalanan futbolçular bəlli olub

İdman
06 Yanvar 2020, 10:05 318
Azərbaycan Premyer Liqasında son 10 ildə ən çox vərəqə alan futbolçular müəyyənləşib.
Apasport.az saytı onilliyin klubları, bombardirləri, "qvardiyaçıları”nın ardından intizamsızların da siyahısını tərtib edib.
2010-19-cu illərdə ən çox vərəqə alan oyunçu İlkin Qırtımovdur. Bu müddətdə müxtəlif klubların şərəfini qoruyan müdafiəçi 8-i qırmızı, 71-i sarı olmaqla 79 vərəqə ilə cəzalanıb. O, həm ümumi, həm sarı, həm qırmızıların sayında "liderdir”.

50 və daha çox vərəqə alanların siyahısında 11 futbolçu yer alıb. 2-ci olan Şəhriyar Rəhimov 71, 3-cü olan Tural Axundov 64 dəfə cəzalanıb. Lakin onların hesabında olan qırmızı vərəqələrin sayı yetərincə azdır.
Meydandan kənarlaşdırılma sayında 2-ci yerdə isə Vurğun Hüseynovdur. O, 7 dəfə komandasını natamam heyətdə qoyub. Adrian Skarlatake qırmızı vərəqə sayında 3-cüdür. O, həm də legionerlər arasında 1-cidir.
Ümumi vərəqə sayında isə Viktor İbekoyi  əcnəbilər arasında "liderdir”.
5 və daha çox qırmızı vərəqə alanların sayı 6-dır. Onlar arasında milliləşən legioner Tagim Novruzov diqqət çəkir. Ən çox vərəqə alanlar 200 və daha çox görüşdə bu qədər cəzalanıbsa, yığmamızın rusiyalısı cəmi 101 görüşdə 5-i qırmızı olmaqla 46 vərəqə görüb. O, ən azı 25 vərəqə alanlar arasında orta göstəricilərdə hamıdan intizamsızdır.
Emin Mehdiyev isə vərəqələrin dəqiqəyə nisbəti baxımından 1-cidir. Hesabında 4-ü qırmızı olmaqla 33 vərəqə olan futbolçu hər 112 dəqiqədən bir cəzalanıb.