Azərbaycan polisi ona tapşırılan vəzifənin öhdəsindən ləyaqətlə gəlir
Azərbaycan XX əsrdə ikinci dəfə müstəqilliyini bərpa
etdikdən sonra polis öz üzərinə düşən vəzifəni şərəflə yerinə yetirib. Qanuna
görə polis icra hakimiyyətinə mənsub olan vahid mərkəzləşdirilmiş,
hüquq-mühafizə orqanıdır. Həmin qanunla polisin təyinatı və əsas vəzifələri də
müəyyən olunub. Qanuna görə, Azərbaycanda polisin təyinatı insanların həyatını,
sağlamlığını, hüquq və azadlıqlarını, dövlətin, fiziki və hüquqi şəxslərin
qanuni mənafelərini və mülkiyyətini hüquqa zidd əməllərdən qorumaqdan ibarətdir.
Polisin əsas vəzifələri ictimai qaydanı qorumaq və ictimai təhlükəsizliyi təmin
etməkdən, cinayətlərin və digər xətaların qarşısının alınması üçün tədbirlər
görməkdən, yetkinlik yaşına çatmayanların hüquq pozuntularının qarşısının
alınması sahəsində fəaliyyət göstərməkdən, şəxsiyyəti, insan hüquq və
azadlıqlarını və mülkiyyəti hüquqa zidd əməllərdən qorumaqdan və sairdən ibarətdir.
Bu gün Azərbaycan polisi güclü maddi-texniki
bazası, ictimai asayişin, qanunçuluğun və hüquq qaydasının qorunması üzrə dəqiq
təşkil edilmiş sistemi və peşəkar kadr korpusu olan vahid mərkəzləşdirilmiş
hüquq-mühafizə orqanıdır. Prezident İlham Əliyevin diqqət və qayğısı sayəsində
davam edən bu inkişaf və modernləşmə vətəndaşlarımızın qanunla qorunan hüquq və
mənafelərini etibarlı müdafiə etməyə, cinayətkarlığa, onun transmilli mütəşəkkil
növlərinə qarşı mübarizədə adekvat cavab tədbirləri görməyə tam imkan verir.
Prezident İlham Əliyevin diqqət və qayğısı sayəsində davamlı inkişafda olan
daxili işlər orqanları ölkədə cinayətkarlığa, onun transmilli növlərinə qarşı
mübarizədə, asayişin və təhlükəsizliyin təmin olunmasında önəmli xidmətləri ilə
seçilir. Eyni zamanda, vətəndaşların qanuni mənafelərinin, hüquq və
azadlıqlarının müdafiəsi sahəsində üzərinə düşən funksiyaları peşəkarlıqla
yerinə yetirir və hər zaman vəzifə borcuna sadiq qalaraq ona bəslənən inam və
etimadı doğruldur.
Bir sözlə, bu gün ölkəmizdəki sabitliyin, əmin-amanlığın,
ictimai asayişin qorunub saxlanmasında Azərbaycan polisinin üzərinə böyük məsuliyyət
düşür. Sevindirici və qürurverici haldır ki, Azərbaycan polisi bu məsuliyyətin,
ona tapşırılan vəzifənin öhdəsindən ləyaqətlə gəlir. Məhz bunun sayəsində mühüm
coğrafi məkanda, böyük güclərinin maraqlarının toqquşduğu ərazidə yerləşən Azərbaycan
regionun sabitlik adasını xatırladır. Əlbəttə ki, bütün bunlar həm bizləri, həm
də dostlarımızı sevindirir. Lakin işğalçı Ermənistan, həmçinin dünyadakı erməni
diasporu, onların təsiri altında olan müxtəlif qüvvələr Azərbaycanın güclü,
qüdrətli dövlətə çevrilməsindən, ölkəmizin daxilində sabitliyin hökm sürməsindən,
hüquq-mühafizə orqanlarımızın, o cümlədən qanun keşikçilərinin yüksək peşəkarlığından
dərin narahatlıq keçirirlər.
Dünyadakı erməni diasporu, lobbi təşkilatları,
onların maraqlarını qoruyan qüvvələr müxtəlif vasitələrlə Azərbaycan daxilindəki
sabitliyi, əmin-amanlığı pozmaq üçün planlar hazırlayır, onların həyata keçməsinə
çalışırlar. Belə məkrli planlardan biri də Azərbaycan polisinin ictimai
nüfuzuna xələl gətirmək, qanun keşikçilərini xalqın gözündən salmaqdır. Onlar
bu məqsədə çatmaq üçün internetin, xüsusən də sosial şəbəkələrin imkanlarından
gen-bol yararlanırlar. Əslində düşmənin düşmənliyi və məkri bizə aydındır. Təəssüf
doğuran məqam budur ki, erməni maraqlarına, Azərbaycanın uğurlarını həzm etməyən
qüvvələrin məqsədlərinə sapı özümüzdən olan baltalar ya bilərəkdən, ya da bilməyərəkdən
xidmət göstərirlər. Deyilənlərə misal olaraq, 2 iyul polis günü və ondan
sonrakı günlərdə sosial şəbəkələrdə bəzilərinin Azərbaycan polisi əleyhinə
başlatdıqları təbliğatı göstərmək olar. Arif Məmmədov, Xədicə İsmayıl, Qənimət
Zahid, Məhəmməd Mirzəli, Orduxan Teymurxan, İlkin Rüstəmzadə, Fuad Qəhrəmanlı,
Həbib Müntəzir, Tural Sadıqlı və qeyrilərinin ard-arda paylaşımlar etməsi cinayətkarlığa,
onun transmilli növlərinə qarşı mübarizədə, asayişin və təhlükəsizliyin təmin
olunmasında önəmli xidmətləri olan Azərbaycan polisinin nüfuzuna xələl gətirməyə
hesablanmışdı. Bununla onlar xaricdəki düşmənlərimizlə, Azərbaycanın 20 faiz ərazisini
işğal edən, 1 milyondan artıq vətəndaşımızı qaçqın və məcburi köçkünə çevirən
Ermənistanla ortaq mövqeyi bölüşmüş oldular.
Bu qəbildən adıçəkilən dairələr son vaxtlar Daxili
İşlər Nazirliyi sistemindəki yeni təyinatları da gücləri çatdıqca gözdən
salmağa çalışır, bu yöndə canfəşanlıq göstərirlər.
Yaxud başqa bir misal gətirək. İyul ayının əvvəlində
Xətai rayon 36-cı Polis Bölməsində şəhid ailəsinə təzyiq olunması ilə bağlı
sosial şəbəkələrdə videogörüntülər yayılmışdı. Həmin videogörüntüdə üzü-gözü
qan içində olan bir qadın həyat yoldaşının şəhid olduğunu, oğlunun əsassız
olaraq bölməyə aparıldığını, ona və ailə üzvlərinə qarşı polis tərəfindən təzyiq
və xəsarət yetirildiyini iddia edirdi. Qısa zamanda bu video sosial şəbəkələrdə
geniş yayıldı və hadisənin əsl mahiyyətinə varmayan şəxslər polisin ünvanına
müxtəlif fikirlər səsləndirdilər. Lakin Bakı Şəhər Baş Polis İdarəsi baş verənlərlə
bağlı videogörüntüləri yayandan sonra əsl həqiqət üzə çıxdı. Məlum oldu ki, qeyd
olunan tarixdə 36-cı bölməyə gəlmiş saxlanılan şəxs C.Cahangirovun anası,
1970-ci il təvəllüdlü, Xətai rayonunda yaşayan A.Əliyeva özünü şəhid ailəsi
kimi təqdim edərək oğlunun sərbəst buraxılmasını tələb edib, həmçinin polis əməkdaşlarının
ünvanlarına nalayiq ifadələr səsləndirməklə, bölmənin giriş qapısının şüşəsini
sındırmaqla əl-üz nahiyələrinə qəsdən xəsarət yetirib. Eləcə də bölmənin məsul
növbətçisinin göz nahiyəsinə yumruq zərbələri endirməklə xəsarət yetirib və qol
saatını sındırıb. Bütün bunlar hamısı kameralar vasitəsilə lentə alınıb.
Göründüyü kimi, məqsədli şəkildə Azərbaycan polisinin
əleyhinə təbliğat aparılır, onun fəaliyyətinə, ictimai nüfuzuna xələl gətirmək
cəhdləri edilir. Bu cəhdləri edənlər avtomatik olaraq Azərbaycanın xarici düşmənlərinin
məkrli planlarının bir hissəsinə çevriliblər. Çünki, bir qədər əvvəl
vurğuladığımız kimi, hərb və müharibə meydanında Azərbaycandan çəkinən işğalçı
Ermənistan xarici dairələrin vasitəsi ilə gücünü ölkəmizin daxilindəki
sabitliyi pozmağa yönəldib. İnsan haqları adı altında Azərbaycan polisi barəsində
dezinformasiyaların yayılması da bu qəbildəndir. Lakin bütün bunlara
baxmayaraq, Azərbaycan polisi ictimai asayişin, qanunçuluğun keşiyində
ayıq-sayıq dayanır, xarici dairələrin məkrli planlarının da qarşısının
alınmasında mühüm rol oynayır.
Alpər İSMAYIL