Az, amma keyfiyyətli auditoriya - MÜSAHİBƏ
"LinkedIn
influencer” Kamal Mahmudov: "Bu platformanın azərbaycanlı auditoriyasında eqo
çoxdur. Belə təəssürat yaradırlar ki, vəzifə adamıyam, mənə tez-tez yazmaq
olmaz, yazanda isə dərhal cavab gözləmə. Hər gün olmasa da, iki gündən bir
paylaşım etmək lazımdır”
"LinkedIn”
vasitəsilə işçi axtarılması qlobal aləmdə getdikcə daha da genişlənir. Ölkəmizdə
də bu şəbəkədən istifadə edənlərin sayı son vaxtlar sürətlə artır. Ancaq bir
çox şəxs orda aktiv yox, passiv istifadəçidir. Əslində, düzgün istifadə qaydası
necədir? Bu istiqamətdə suallarımızı "LinkedIn influencer” Kamal Mahmudov cavablandırdı.
- Ölkəmizdə
müəssisələr işə qəbul zamanı "LinkedIn” profilinə nə dərəcədə önəm verirlər,
yaxud oradan özləri işçi tapmağa nə qədər maraqlıdırlar?
- Ötən illərlə
müqayisə etsək, son vaxtlar bu platforma üzərindən işçi axtaranların sayı
çoxalıb. Hazırkı işimdə də məni "LinkedIn”dən tapıblar. "LinkedIn”
platformasının CV-də qeyd olunması, iş axtaran şəxs üçün üstünlükdür. Şirkətlər
də bunu istəyirlər. Bəzən CV-yə ehtiyac görmürlər, "LinkedIn” profilini göndərməyin
yetərli olduğunu bildirirlər. Çünki orda kadrla bağlı bütün məlumatlar qeyd
olunur.
- Siz bu
sosial şəbəkədə aktivsiniz, 23 mindən çox izləyiciniz var. İnsan Resursları
(İR) mütəxəssislərinin diqqətini çəkmək üçün aktiv olmalıyıq? Bağlantı, izlənmə
sayının çox olmasına fikir verilir?
- Sahəsi
ilə bağlı paylaşımlar, kadrın öz sahəsindən məlumatlı olduğunu göstərir. İR mütəxəssisləri
aktivliyə bu cəhətdən baxa bilərlər. İzləyici sayının çox olması yaxşı təəssürat
yarada bilər, amma şərt deyil.
- Ölkənin
miqyasına görə "LinkedIn”də istifadəçi sayımız necədir?
-
"Facebook” və "Instagram”da ölkə üzrə istifadəçi sayı 3 milyondan çoxdur. "LinkedIn”də
isə bu rəqəm 500 minə yaxındır. Amma "Linkedin”in bir bağlantısı "Facebook”un,
bəlkə də 20-30 dostuna bərabərdir. Say çoxluğu deyil, auditoriyanın keyfiyyəti
olması şərtdir. Az olsa da, "LinkedIn”də çox keyfiyyətli auditoriya var.
- Bir çox
kadrın orda profili olsa da, nadir hallarda daxil olurlar. "Mən də burda varam”
tipli istifadəçi nə qədərdir?
- 95 faiz
bu cür istifadə edir. Çünki qlobal olaraq bu platformadan istifadə edənlərin
sayı 800 milyona yaxındır və onların cəmi 3 faizi aktiv istifadəçidir.
- "LinkedIn”də
aktivlik deyəndə, nə nəzərdə tutulur? Gündəlik nə qədər vaxt keçiriləcək
yerdir?
- Mən hər
gün paylaşım edən insanam. Məsələn, kontenti bu günün sonunda hazırlayıram, sabah
paylaşıram. Günün müəyyən saatında da, yazılan rəylərə cavab verirəm. Bir
saatdan da az vaxt gedir. Az vaxt sərf etməklə, aktivliyi saxlamaq mümkündür.
Ancaq bir adam satış sahəsindədir, məhsulunu satmaq istədiyi auditoriya "LinkedIn”dədirsə,
o, 3 saat da vaxt sərf edə bilər. Çünki işi odur.
- Düzgün
profil formalaşdırıb ara-sıra paylaşımlarla kifayətlənməli, yoxsa gündəlik
aktiv qalmalı, paylaşım etməliyik?
- Ara-sıra
paylaşımlar bizi bir yerə aparmayacaq. Hər birimiz sosial statusumuzdan asılı
olmayaraq fərd olaraq öz brendimizi formalaşdırmalıyıq. Məsələn, Kamal kimdir?
Bunun üçün orda aktiv olmaq məsləhətdir. Hər gün olmasa da, iki gündən bir
paylaşım etmək lazımdır. Ən önəmlilərdən biri də odur ki, başqalarının
statuslarına şərh yazaraq, bəyənərək insanları öz varlığımızdan xəbərdar etməli,
"mən də varam” deməliyik.
- Profilə daxil
olanda, paylaşımlarımızla yanaşı, bəyəndiyimiz, rəy yazdığımız paylaşımları da
görə bilərlər. Burda hansı statusu bəyəndiyimizə, hansı rəyi yazdığımıza da
diqqət etməliyik?
- Bu
sosial şəbəkədə atdığımız hər bir addıma diqqət etməliyik. "LinkedIn”də yazdığı
şərhə görə işə qəbul edilməyən kadr tanıyıram. İR mütəxəssisi baxıb ki, kadrın
profili yaxşıdır, paylaşımları normaldır, amma kiminsə paylaşımına aqressiv rəy
yazıb. İşəgötürən hər şeyi bəyənir, amma deyir ki, mənə aqressiv işçi lazım
deyil. "Bəyənmə” və rəylərimizi diqqətdə saxlamalıyıq. Çünki əleyhimizə işləyə
bilər.
- Kimlərlə
bağlantı qurmalıyıq?
- Məsələn,
sahənizlə bağlılığı olmayan bir kadr sizə bağlantı təklifi göndərir. O, bu
zaman tək sizə deyil, həm də bağlantınızda olan şəxslərə baxır. "LinkedIn”in
alqoritmi belədir ki, siz hansısa bir paylaşımı bəyənsəniz, bağlantınızda olan
adamlar onu görəcək. Sizin bir bəyənmənizlə paylaşımı hansısa şirkət rəhbərlərinə,
işə qəbul mütəxəssislərinə çatmış olacaq.Elə
insanlar var ki, bağlantılarında öz sahələrinin adamlarının olmasını istəyirlər.
Bu, kadrın seçimindən asılıdır. Brendini spesifik sahə üzrə qurmaq istəyirsə,
öz sahəsinin adamları ilə bağlantı qura bilər. Mənim kimi insanlara faydalı
olmağa çalışan, hər kəsə uyğun mövzularda paylaşımlar edən insanlar hər kəsin
bağlantısını qəbul edir.
- "LinkedIn”də
şəkil paylaşmaqdan danışaq. Burda yanaşma necə olmalıdır?
- Şəklin mətni
çox önəmlidir. Hansısa restoranda yemək yeyəndə şəkil çəkdirib paylaşmaq yaxşıdır,
amma "Instagram” üçün. Restorandan şəkil paylaşıb "Restoranda işləyirdim, indi
filan yerdəyəm” tipli hekayəmi paylaşsam, "LinkedIn” üçün uyğundur. Necə təqdim
etmək önəmlidir.
- Deyirlər
ki, "LinkedIn”də profil şəklimiz ciddi olmalıdır.
- Profil şəklimizin
necə olması hansı sahədə çalışmağımızdan da asılıdır. Məsələn, kimsə
proqramçıdırsa, onun qalstuk, pencəkdə şəkil yerləşdirməsinə ehtiyac yoxdur.
Qarşısında kompüter, normal geyimdə də şəkil olar. Amma kimsə hansısa şirkətdə
CEO-dursa, qalstuk, pencəkdə olmalıdır. Ümumilikdə, qismən ciddi şəkil kifayətdir.
-
"Linkedin” profilini daha çox iş axtaran zaman açırlar. Bəs məqbul zaman nə
vaxtdır?
- Nə qədər
tez açılsa, o qədər yaxşıdır. Birinci kursdan başlamaq lazımdır. İndiki dövrdə
şəbəkələşmə çox önəmlidir. Hazırda iş axtaranların əsas problemlərindən biri
tanışlarının az olmasıdır. 23 min bağlantını 2 ilə yığmışam. 1-ci kursdan
açsaydım, indi bağlantı sayım daha çox olardı. Bağlantı sayının çox olması həm
də ona görə vacibdir ki, iş axtarmaqla bağlı paylaşım etsəm, onu çox insan görəcək,
çox insan yardım etməyə çalışacaq.
- Hesabı "Premium”
etməyə ehtiyac varmı? Hansısa üstünlükləri qazandırır?
- "Premium”
üzvlüyün verdiyi özəlliklərin çoxunu adi hesabla da əldə edə bilərsiniz. Normal
hesablarda belədir ki, biz bağlantılarımız arasında olmayan adamlara mesaj yaza
bilmirik. Bağlantı təklifimizi qəbul etdikdən sonra yazmağımız mümkün olur. "Premium”
hesabda ay ərzində bağlantıların arasında olmayan 5 nəfərə mesaj yaza bilirsən.
Bir də hesabınıza baxan hər kəsi görə bilirsiniz. Adi hesablarda isə sonuncu 5
nəfərin adını görə bilərik.
- Bir
qisim azərbaycanlı istifadəçi paylaşımlarını ingilis dilində edir. Buna ehtiyac
olmadığını deyənlər olur.
- Bu, auditoriyanızdan
asılıdır. Azərbaycanlı auditoriyadırsa, öz dilimizdə paylaşmaq daha yaxşıdır.
Bununla bağlı bir dəfə test etmişəm. Eyni paylaşımı həm ingilis, həm də azərbaycanca
etdim. İkinciyə daha çox rəy gəldi. İngilis dilində gözəl şəkildə anlayan,
fikrini istədiyi kimi ifadə edənlər azdır. Fikirləşirlər ki, ingilis dilində rəy
yazsam, yanlış anlaşıla bilər. İki dildə paylaşım etməyə də ehtiyac yoxdur.
- Müəyyən
vəzifə sahibi olan "LinkedIn” istifadəçiləri, bəzən sanki əlçatmaz statusu
yaradırlar. Mesajlara ya baxmırlar, ya da çox gec cavab verirlər.
- Bu
platformanın azərbaycanlı auditoriyasında eqo çoxdur. Belə təəssürat yaradırlar
ki, vəzifə adamıyam, mənə tez-tez yazmaq olmaz, yazanda isə dərhal cavab gözləmə.
Ola bilər ki, oradan az istifadə edir, ona görə gec cavab verir. Ancaq bəzən
adama yazışdığımız anda sual verirəm, çıxır və sabah cavab yazır. Bu, yaxşı bir
şey deyil. Şirkət, əməkdaşlar barədə yaxşı təəssürat yaratmır.
Aygün
Asimqızı