“Atatürk bütün əsgərlərinə bu kitabın oxunmasını əmr edib” - Kitab rəfi
Kitab insanın özünü inkişaf etdirməkdə əvəzsiz rola
malikdir. Ancaq müasir dövrdə vaxt az olduğu üçün insanlar daha faydalılarını
seçib oxumağa üstünlük verirlər. Ona görə, bu cəhətdən başqalarının məsləhətlərini
diqqətə alırlar. Bu dəfə IBM şirkətində
çalışan azərbaycanlı xanım Sevinc Ömərlinin məsləhət gördüyü 3 kitabı təqdim edirik.
Onun ilk
məsləhəti Stiven Uilyam Hokinqin "Zamanın qısa tarixi” kitabı oldu: "Elmi-kütləvi əsərlər sırasında seçilən və bestsellerə çevrilən bu kitab sevdiyim
kitabların ən başında gəlir. Bu əsəri sevərək oxuyacaqsınız. Çünki ən önəmli səbəbi
burada mürəkkəb riyazi-fiziki hesablamalardan istifadə edilməməsi və kainatin,
zamanın ən bəsit dillə oxucu kütləsinə çatdırılmasıdır. Bu əsər Aristoteldən
tutmuş günümüzə qədər kainat haqqında bütün çalışmaları ələ almış bir kitabdır.
İnsanın baxış bucağını dəyişdirir və kainatı dərk etməyimizə yardımçı olur”.
S.Ömərli deyir ki, Qriqori Petrovun "Bəyaz zanbaqlar ölkəsində” kitabı hər kəsin
oxuması vacib olan kitabların ən başında gəlməlidir: "Əsər, yazarın
Finlandiyaya səyahətləri zamanı yazdığı notlardan ibarətdir. 1800-cü illərin
sonlarında ölkənin bataqlıqdan necə zanbaqlar ölkəsinə çevrildiyini anladır.
Baş qəhrəman Snellman müəllimlər, əsgərlər, mühəndislər, həkimlər, din xadimləri
demədən, hər kəsi çiyin-çiyinə həmrəy olmağa səsləyir və Finlandiyanın
xilasının əsas yolunun təhsil olduğunu vurğulayır. Kitab hətta Atatürk tərəfindən
məktəblərin tədris planına salınıb. Bildiyimə görə, Atatürk bütün əsgərlərinə
bu kitabı oxumağı əmr edib. Əsərdə mənim beynimə həkk olunan "Təhsil alan
insanların hər biri milli düşüncəni inkişaf etdirməyə, milli ruhu oyatmağa və
milli iradəni gücləndirməyə məcburdurlar" cümləsidir”.
Corc
Oruellin "1984” kitabı onun üçüncü seçimi oldu: "Həyatımızın hər
dönəmində oxuya biləcəyiniz kitabların içərisində xüsusi yerə sahibdir.
Diktatorların, iqtidar sahiblərinin öz mənafeləri üçün nələri etdiyini izah edən
möhtəşəm bir kitabdır. Əsərdə göstərilənlər utopik bir dünyadan nümunələr olsa
da, insan oxuduqca, mövcud durumları göz önünə gətirir və müqayisələr aparır.
Bu kitabı oxuduqdan sonra şəxsən izlədiyim hər filmdə, oxuduğum hər xəbərdə,
qarşılaşdığım hər reklamda mənə hansı fikirlərin üstüörtülü şəkildə çatdırılmaq
istədiyini araşdırmağa başladım. Sizdə də elə olacaq, buna əminəm”.
Aygün