“Amazon”da menecer işləyən azərbaycanlı xanım - MÜSAHİBƏ
Günel
Ağazadə: "Maaş üçün işləyən xarakterə sahib insan deyiləm. İşlədiyim
yerdə öyrənməliyəm, kəşf etməliyəm, yeni insanlar tanımalıyam və s. Ona görə
tez-tez iş dəyişirdim.”
"İşlədiyim
yerdə öyrənməli, kəşf etməli, yeni insanlar tanımalıyam” deyir. Bildirir ki, əgər
çalışdığı iş yerində öyrənəcəyi nəsə qalmayıbsa, orda işə davam etməyə ehtiyac
görmür. Bu məqamlar tələbəlik illərindən bu günə qədər iş həyatında həmişə önəm
verdiyi məqamlar olub. Söhbət "Amazon” şirkətinin Polşa ofisində menecer vəzifəsində
çalışan, Azərbaycanda isə "Savadly” onlayn təhsil platformasının həmtəsisçisi
olan azərbaycanlı Günel Ağazadədən gedir.G.Ağazadə
həm də Polşanın WSB Universitetində beynəlxalq biznes üzrə magistr təhsili
alır.
-
Siz 8-ci sinifdə oxuyanda ailəniz İsveçə köçür. Orta məktəb illərinin sonuna doğru
məktəb, ölkə dəyişmək, fərqli təhsil sisteminə düşmək necə oldu?
- Birinci əsas məsələ dil öyrənmək idi. Onu da ətrafdakı
adamlardan, televiziyadan 3 aya öyrəndim. Xarici dilləri asanlıqla mənimsəyirəm. Təhsil cəhətdən isə çox fərqli mühitə
düşmüşdüm. Azərbaycan təhsil sistemi nəzəriyyə üzərində qurulmuşdu, o təcrübəni
görmüşdüm. İsveçdə isə təhsil sistemi təcrübə əsaslıdır. Mən Azərbaycanda elə
öyrənmişdim ki, riyaziyyatda məsələ-misallarda hesablamaları beynimdə həll
edirdim. Ancaq İsveçdə sinif yoldaşlarım hamısı kalkulyatordan istifadə edirdi.
Məntiq də belədir ki, texnika bu işi görürsə, bunun üçün özümüzü niyə
yormalıyıq? Evə tapşırıq verilməsi, məktəbə kitab aparıb-gətirmək, uşaqlar üzərində
basqı yaradan ciddi qaydalar yox idi. Sinifdə hər kəsin qarşısında laptop var
idi. Məktəb təmin edirdi. 2006-2007-ci illərdən söhbət gedir. Uşaqların
aktivliyinə səbəb olan fəaliyyətlər çox olurdu. Dərslərimi Azərbaycanda da
yaxşı oxumuşdum. İsveçdə də məktəbin ən yaxşı oxuyanlarından idim. Ancaq
ümumilikdə o mühitə adaptasiya bir-iki il vaxt apardı, asosiallaşdım.Biz İsveçə köçəndə 8-ci sinfin sonlarında idim.
Ancaq dil probleminə görə orda 8-ci sinfi yenidən oxumalı oldum. 8-9-cu sinfi
oxuduqdan sonra artıq gimnaziyaya keçdim. Avropada təhsil sistemi belədir ki, 9
il orta məktəbi bitirdikdən sonra gələcəkdə hansı sahə üzrə davam etmək istəyirsənsə,
o istiqamətdə gimnaziyada davam edirsən. Artıq gimnaziyada adaptasiya prosesim
sürətli getdi.
- Bakalavr təhsilini niyə İsveçdə yox, Latviyada aldınız?
- Mən həkim olmaq istəyirdim, buna görə təbiət elmləri
üzrə gimnaziyada oxudum. Burda universitetlərə qəbul belədir ki, 3 illik
gimnaziya qiymətləriniz hesablanır, ortalama nəticəni universitetlərə göndərirsiniz
və ballarınıza uyğun qəbul olunursunuz. O balı toplaya bilməyənlər universitetə
qəbul imtahanına gedirlər, toplayanlar üçün ehtiyac yoxdur. Mən bal
toplamışdım. Amma tiblə bağlı təhsildə qəbul yerləri azdır, ona görə nəticəsi
yüksək olan hər kəsi qəbul edə bilmirlər. Yer az olduğu üçün universitetlər qəbul
olanları püşkatma kimi proqramla seçirlər. Şansın varsa, adın çıxır, yoxdursa,
gələn ilə qalırsan. Sonra bir-iki illik Azərbaycana gəldim. İsveç məni xəyal
qırıqlığına uğratmışdı, niyə həkim ola bilmirəm? Avstraliyanın Macquarie Universitetinə
sənəd verdim və tibbə qəbul oldum. Biletlərimi alıb getmək qalmışdı. Elə oldu
ki həmin ərəfədə həyat yoldaşımla qarşılaşdım və bütün planlarım dəyişdi
(Gülür). Dedim ki, artıq Azərbaycanda qalacam. 2-3 ay içərisində nişanlandıq,
bir il içərisində evləndik. Həmin vaxt 21-22 yaşım var idi. Bir müddət sonra
artıq fərqli bir yerə getmək, təhsil almaq istəyi yarandı. Həyat yoldaşım da
xaricdə təhsil planlaşdırırdı. Araşdırdıq, Latviya ikimizə də maraqlı gəldi və
ona görə belə seçim etdik. Artıq tibdən küsmüşdüm. Bu dəfə tibb yox, iqtisadiyyat
və idarəetmə üzrə təhsili seçdim. Çünki bu da sevdiyim sahə idi. 2014-cü ilin
sentyabr ayında həm universitetə başladım, həm də universitetin ilk həftəsində
iş tapıb işə getdim.
- İlk işiniz nə ilə bağlı idi?
- Turizm tipli bir şirkət idi. Amerika, Kanada və
Avstraliya müştərilərinə bilet satışı idi.
- Bakalavr təhsili müddətində iş həyatınız necə
davam etdi?
- Xarakter olaraq tez sıxılan adamam, daim yenilik
axtarıram. Bir işi öyrəndim və artıq hər şey problemsiz davam edirsə, bu, mənə
görə maaş üçün işləmək olur. Mən də maaş üçün işləyən
xarakterə sahib insan deyiləm. İşlədiyim yerdə öyrənməliyəm,
kəşf etməliyəm, yeni insanlar tanımalıyam və s. Ona görə tez-tez iş dəyişirdim.
Birinci işdə işləyə-işləyə artıq başqa işləri araşdırırdım, müsahibələrə
gedirdim. 6 ay sonra Norveç Hava Yollarına keçdim. Burda isə Skandinaviya ölkələrindəki
sistemi, hava yolları işi ilə bağlı hər şeyi öyrəndim. 9 ay sonra artıq orda öyrənəcək
nəsə qalmamışdı, ona görə başqa işlərə baxmağa başladım. Bir şirkətə keçdim.
Orda işim telefonla əlaqə saxlayan müştərilərin texniki problemlərini həll etmək
idi. Bu iş mənə heç bir şey qatmırdı, ona görə oradan da tez ayrıldım.
Almaniyanın hədiyyə şirkəti olan "Picanova Group”a keçdim. Şirkətin istehsalı
Almaniya və Mayamidə idi. Ancaq onları idarə edən ofis Latviyada yerləşirdi.
Orda əvvəl sadə işçi kimi başladım, sonra Skandinaviya bölümü mənə verildi.
Getdikcə vəzifəm artırdı. Orda 2 il işləməyimin səbəbi var idi. Çünki şirkət elə
qurulmuşdu ki, işçiləri sıxılmağa qoymurdular, daim motivasiya edirdilər. Ya vəzifə
dəyişirdi, ya maaş artımı olurdu, ya da işçilərə performanslarına görə gözəl hədiyyələr
verilirdi. Yavaş-yavaş menecer vəzifəsinə gəldim. Bu şirkətdə işləmək mənə
böyük təcrübə qazandırdı. Sonra həyatımın dönüm nöqtəsi olan Amerikanın ən
böyük autsorsinq şirkəti olan "Genpact”la qarşılaşdım. "Genpact” Latviyada öz
ofisini açırdı. Sığorta və bank üzərində bir iş idi.
- Şirkət sizin həyatınızda dönüm nöqtəsinə necə səbəb
oldu?
- Autsorsinq şirkətlərinin işi çoxçeşidli olur.
Biznes proseslərin autsorsinqi (BPO) onlar içərisində ən yaxşı təcrübə
qazandıranıdır. Bu şirkət Avropanın karyera üzrə bütün qapılarını hər bir kəsə
aça biləcək BPO təcrübəsini qazandırdı. BPO təcrübəsi olan kadrlar həmişə
axtarılır. Onlar biznesin cərrahlarıdır. Onları işə götürəndə nəsə öyrətməyə
ehtiyac yoxdur, artıq bilirlər. Çox aktiv iş həyatım oldu, Skandinaviyanın ən
böyük sığorta şirkətinin rəhbərləri ilə tanışlıqlara və əməkdaşlıqlara
başladıq. Tez-tez ölkələrarası iş səyahətlərim olurdu.
- Aktiv iş həyatı ilə bərabər universitet təhsili
necə gedirdi?
- Təhsil arxa planda qalmamışdı (Gülür). Universitet
nəticələrim o qədər yüksək idi ki, iki dəfə "Erasmus” proqramına müraciət etdim
və biri Almaniya, biri
İsveçdə olan iki fərqli təcrübə proqramında iştirak etdim. Hər biri 6 aylıq
idi. Aldığım təhsili çox sevirdim. Universitetdə öyrənirdim, işdə tətbiq
edirdim.
- Tələbə vaxtı həm də ailəli idiniz. İş, təhsil, həm
də ailə. Bunların üçü birlikdə necə idi?
- Həyat yoldaşım da tələbə idi. Çox aktiv, zaman
tapa bilmədiyimiz, amma eyni zamanda əyləncəli tələbəlik illərimiz olub.
Universiteti bitirdikdən sonra övladımız dünyaya gəldi.
- Universiteti bitirdikdən sonra Polşaya köçmüsünüz.
Niyə Latviyada davam etmədiniz?
- Latviyada bir il çalışdıqdan sonra autsorsinq
şirkəti Polşaya köçdü. Yaxşı, şirkətə qazanc gətirən işçilərə transfer təklifi etdilər.
Avropada bir ölkədən başqa bir ölkəyə şirkətdaxili transfer alırsınızsa, bu,
sizin üçün qızıl qapıların açılması deməkdir. Təklif gələndə universiteti yeni
bitirmişdim. Və biz Krakova köçdük. Burda isə 15 nəfər polyak olan bir komandam
oldu.
- Haqqınızdakı məlumatlarda 5 dili akademik səviyyədə
bildiyiniz qeyd olunub. Hansı dillərdir?
- Azərbaycan, rus, ingilis, İsveç və Norveç dilləridir.
Fransız dilindən isə 3 il dərs almışam. İstifadə etmədiyim üçün mükəmməl səviyyədə
danışmıram, amma yazmaq, oxumaq, gündəlik kommunikasiya səviyyəsində bilirəm.
- Hazırda "Amazon”dasınız. Bu şirkət sizin üçün necə
bir iş yeridir?
- Özümü kəşf etdiyim yerdir. Hazırda İsveç və
Polşada idarə etdiyim 25-ə yaxın qrup var. İki fərqli bazar. Bu qrupların işi
ilə bağlı bütün proseslərin idarəsi və məsuliyyəti mənim üzərimdədir. Bunun həm
üstünlükləri, həm də çətinliklər var. Çətinliklərindən biri aldığın qərarların
məsuliyyətini daşımaqdır. Səhv etmək kimi lüksünüz yoxdur. İdarə etdiyiniz
layihələr 5-10 min dollarlıq yox, milyonluq işlərdir. Ediləcək ən kiçik səhv
şirkətin milyonlar itirməsinə səbəb ola bilər. Şirkət nəzarət etmir, amma üzərindəki
məsuliyyəti sənə hiss etdirir. Ona görə o layihədə sənin müvəffəqiyyət
qazanmamaq kimi bir seçimin olmur.
- "Amazon” kimi şirkətlərin işə qəbul prosesi də
uzun olur. Sizin işə qəbulunuz nə qədər müddət aldı?
- Vəzifələrə görə müsahibə sayı, müddəti dəyişir. Məsələn,
tələbələri işə götürürlərsə, onlar üçün iki müsahibə yetərli olur. Vəzifə
artdıqca müsahibə sayı və prosesin müddəti artır. Məndə menecer vəzifəsi idi,
ona görə 7 fərqli müsahibə, bir analitik testdən keçdim. Hər müsahibə 1 saat çəkdi.
İşə alınma prosesim 6 ay çəkib. "Amazon” idarə olunacaq yox, idarəetmə bacarığı
olan menecer axtarır. Müsahibələrdə sadə, qısa deyil, beyninin bütün
neyronlarını işlədəcək səviyyədə dərin suallar verilir.
- Azərbaycanda isə "Savadly” platformasının həmtəsisçilərindənsiniz.
Bu platformaya qoşulmağınız necə oldu?
- Avropadakı karyeramla bağlı "Savadly”nın canlı
yayımına dəvət olunmuşdum. O canlı yayımdan sonra layihə diqqətimi çəkdi.
Araşdırdım və investora ehtiyac olduğunu gördüm. Mən də fürsəti dəyərləndirdim.
Qoşulmağımın ən böyük səbəblərindən biri də Azərbaycanda yaranmasına baxmayaraq,
beynəlxalq layihə olmasıdır. Zamanla bütün dünyada tanınan bir platforma
olacağına şübhəm yoxdur.
Aygün Asimqızı