“Ağıllı şəhər”- rəqəmsal dünyanın şəhəri
"Ağıllı şəhər”, "Smart City”, "Gələcəyin şəhəri”
ifadələrini yəqin ki, eşitməyən az adam tapılar. "Ağıllı şəhər” (Smart City) -
yeni nəsil şəhərlərin konsepsiyası ilə üç il bundan əvvəl Aşqabadda keçirilən
Turizm sərgisində təkcə yaxından tanış olmadım, həm də əmin oldum ki, innovativ
texnologiyaların hesabına əhalinin xoşbəxt həyat tərzini təmin etmək, yüksək
idarəçilik sisteminə malik şəhərlər qurmaq, artıq günümüzün reallığıdır.
Türkmənlər böyük qürurla tədbir iştirakçılarını paytaxt yaxınlığındakı Çoqanlı
yaşayış massivində salınacaq "Ağıllı
şəhər” layihəsi ilə tanış edirdilər. Hər şey nağıl qədər sirli, əsrarəngiz
görünürdü: yüksək texnologiyalarla idarə olunan tam rəqəmsal şəhər, 30-35
mərtəbəli yaşayış binaları, insanların rahat, asanlaşan yaşayış tərzi, elektron
xidmətlər... Bizi müşayiət edən turizm nümayəndəsinin sözləri indi də qulağımda
səslənir: "Ağıllı şəhər” canlı orqanizm kimidir.
Rəqəmsal texnologiyalar bütün
səviyyələrdə insanların həyatını rahatlaşdırmağa xidmət edəcək. Daha tıxaclarda
vaxt itirməyə, uzun müddət avtomobilin parklanması üçün yer axtarmağa,
təhlükəsizliyiniz üçün narahat olmağa ehtiyac olmayacaq. Bir sözlə, smart
texnologiyalara minnətdar olaraq rahat və xoşbəxt yaşamaq olacaq”. 90-cı
illərdə "Smart City” konsepsiyası yarananda, buna əvvəlcə ətraf aləmi
insanların təsirindən qorumaq vasitəsi kimi baxırdılar. On illər keçəndən sonra
isə "ağıllı şəhər” trendə çevrildi.
Bir qisim insanlar "Smart City”-nin, ümumiyyətlə,
mövcudluğuna şübhə edir və yeni trendi reklam şəkilləri ilə bəzədilən, spektik
adlandırırlar. İstər-istəməz
insanlarda bu tip layihələrin mövcudluğu ilə bağlı
"Ağıllı şəhər” nə üçün lazımdır?”, ”"Ağıllı şəhər” başqa şəhərlərdən nə ilə
fərqlənir?”, "İntellektual texnologiyalar yerli idarəçilik sistemini necə
dəyişə bilir?”, "Rəqəmsal şəhərlərin sakinləri başqalarından nə üçün xoşbəxt
hesab olunurlar?” və s. kimi suallar yaradır.
Dünyada "ağıllı şəhərlər”
"Ağıllı
şəhər”lərin texnologiyası gündəlik həyatımıza intensiv nüfuz edir. Sakinlər
üçün bu, elektron hökumət xidmətləri, ictimai nəqliyyatın rəqəmsallaşdırılması,
onlayn tibb və
onlayn təhsil, vətəndaş əlaqəsi vasitələridir. Hökumət və bütövlükdə şəhər üçün
əsasən "ağıllı infrastruktur”dur: nəqliyyatın vəziyyətinin izlənməsi və
operativ idarə olunması, ictimai təhlükəsizlik sistemləri, avtomatlaşdırılmış
enerji uçotu, ekoloji təmiz tullantıların toplanması, "ağıllı işıqlandırma” və
s. rahat yaşayış üçün bütün imkanları yaradır.
Birləşmiş
Millətlər Təşkilatı (BMT) da açıqlayıb ki, dünya əhalisinin 60 faizdən çoxu
şəhərlərdə yaşayacaq: ”Urbanizasiyanın qarşısını almaq mümkün olmayacaq.
İnsanların şəhərə axını həmişə olduğu kimi davam edəcək. Belə vəziyyətlərdə
çıxış yolu "ağıllı şəhərlər” ola bilər”.
"Ağıllı şəhər” təkcə nəqliyyat infrastrukturunu,
pilotsuz texnologiyanın və digər
elektron xidmətlərin inkişafı deyil,
eyni zamanda şəxsi təhlükəsizliyin qorunduğu yerdir. "Necə etmək lazımdır ki,
meqapolislərdə cinayətkarlığın səviyyəsi aşağı düşsün, adi adamlar özləri və
doğmaları üçün heç nədən narahat olmasınlar?”- sualına "Süni intellektdən
istifadə etmək lazımdır. Ağıllı kameralar, videoanalitiklər vasitəsi ilə hər
şey nəzarət altında olacaq. Bu, artıq utopiya deyil, günümüzün reallığıdır. "Ağıllı şəhərlər” ona görə
lazımdır ki, şəhərlər öz cəmiyyətlərini öyrənməlidir. Məqsəd olmadan uğur
qazanmaq mümkün deyil. Buna görə də insanların və biznesin tələbatlarını,
maraqlarını, özünəməxsus xüsusiyyətlərini, düşüncə tərzini, təhsil səviyyəsini,
yaş quruluşunu və s. araşdırmaq lazımdır. "İnsanlar "ağıllı şəhərlər”ə niyə
ehtiyac duyur?”, "Ətraf mühitdə nəyi dəyişdirmək istəyirlər?” kimi suallara
cavab tapılmalıdır”- deyə Britaniyanın Standartlar İnstitutunun (British
Standard Institution) arxitektorları əmin edirlər.
IDC tədqiqat şirkətinin qiymətləndirməsinə görə, 2020-ci ildə "ağıllı şəhər” mühitinin inkişafı üzrə təşəbbüslərə qlobal xərclər 2019-cu illə müqayisədə təxminən 19% artaraq, 124 milyard dollara yaxınlaşacaq. Sinqapur "ağıllı şəhər” infrastrukturunun inkişafına xərclərin həcminə görə liderlik etməyə davam edəcək. Yaponiyanın paytaxtı Tokio bu göstərici üzrə ikinci yeri tutacaq. Üçüncü və dördüncü yerlərdə müvafiq olaraq Nyu-York və London şəhərləri qərarlaşacaq. IDC şirkətinin proqnozuna görə, yuxarıda adıçəkilən meqapolislərdən hər biri "ağıllı şəhər” proqramlarına 1 milyard dollardan çox vəsait xərcləyəcəklər.
Regional nöqteyi-nəzərdən təhlil onu göstərir ki, ilk üçlükdə ABŞ, Qərbi Avropa və Çin yerləşəcək. Bununla belə Latın Amerikası və Yaponiyada "ağıllı şəhər”lərə yatırılan investisiyanın həcmi daha sürətlə artacaq. Bu göstəricilər sonrakı illəri də əhatə edəcək.
Bizim "Smart City”miz
Azərbaycanda da
"Ağıllı şəhər” konsepsiyasının tətbiqi ilə bağlı təkliflər hazırlanır. Bu,
Prezident İlham Əliyevin Sərəncamı ilə imzalanmış "Açıq hökumətin təşviqinə
dair 2020-2022-ci illər üçün Milli Fəaliyyət Planı”nda da öz əksini tapıb. Belə
ki, sənəddə 2020-2021-ci illər ərzində "Ağıllı şəhər” konsepsiyasının tətbiqi
ilə bağlı araşdırma aparılaraq və pilot layihənin həyata keçirilməsi
imkanlarının müəyyən ediləcəyi qeyd edilib. Layihənin icrası Nəqliyyat, Rabitə
və Yüksək Texnologiyalar Nazirliyi, Azərbaycan Respublikasının Prezidenti
yanında Vətəndaşlara Xidmət və Sosial İnnovasiyalar üzrə Dövlət Agentliyi,
Dövlət Şəhərsalma və Arxitektura Komitəsinə həvalə edilib.
"Ağıllı Şəhər” layihəsini Bakıda Azərbaycanın
Nəqliyyat, Rabitə və Yüksək Texnologiyalar Nazirliyi ilə birgə reallaşdıran "Huawei”-nin
Orta Asiya və Qafqaz üzrə vitse-prezidenti Marko Hu Azərbaycanın paytaxtında
istifadəyə verilmiş İctimai Wi-Fi layihəsini "Ağıllı Şəhər”in tətbiqində
başlanğıc rolu oynadığını qeyd edib: "Huawei”-nin həyata keçirdiyi rol,
respublikanın Rabitə Nazirliyinə layihənin inkişafında kömək etməkdir. "Sonrakı
mərhələlərdə bu cür komponentlər "Ağıllı Nəqliyyat”, "Ağıllı Liman”, "Ağıllı
Ticarət” və s. kimi tətbiq ediləcək və
bunların hər biri üçün mərhələli şəkildə həyata keçiriləcək xüsusi həllər
mövcuddur”- deyə hələ 2017-ci ildə keçirdiyi mətbuat konfransında məlumat
verib.
Həmçinin,
ölkə başçısının sərəncamı ilə Sumqayıt
şəhərində ən müasir və qabaqcıl texnologiyaların imkanlarından istifadə etməklə
enerjiyə qənaətə imkan verən və enerji səmərəliliyini artıran, fasiləsiz işıqlandırmanı
təmin edən müasir işıqlandırma sistemləri quraşdırılıb. Bu da, "Ağıllı şəhər”
konsepsiyasının reallaşdırılması istiqamətində atılmış addım kimi
dəyərləndirilir.
Layihənin icrasının həvalə olunduğu Rabitə,
Nəqliyyat və Yüksək Texnologiyalar Nazirliyinə telefon açaraq layihənin
icrasının hazırkı vəziyyəti ilə bağlı maraqlandıq. Nazirlikdən sualımıza cavab
olaraq bildirdilər ki, hazırda layihə ətrafında iş gedir: "Hazırda layihənin
icrası ilə bağlı işlər həyata keçirilir. Yaxın zamanlarda layihənin icrası ilə
bağlı ictimaiyyətə açıqlama veriləcək”.
Heç şübhəsiz, COVİD-19
koronaviris pandemiyasının ölkəmizdə yaratdığı iqtisadi çətinliklər, o cümlədən
Ermənistan-Azərbaycan arasındakı müharibə bir çox əhəmiyyətli layihələr kimi
"Ağıllı şəhər”in də icrasına təsirsiz ötüşməyib.
Məşğulluğun təmin edilməsi
"Ağıllı şəhər”
layihəsinin reallaşmasının ölkəmiz üçün mühüm əhəmiyyəti olacağını qeyd edən millət vəkili, iqtisadçı ekspert Vüqar Bayramov sualımıza cavablandıraraq
səmərəli datalara və göstəricilərə əsaslanan qərarların verilməsi prosesini
layihənin əsas üstünlüyü kimi qeyd etdi” "Təbii ki, bu, şəhərin idarə edilməsi
ilə bağlı daha analitik strategiyanın yaradılmasına imkan verir. Bu, eyni
zamanda qərarların konkret olaraq şəhərin göstəricilərinə uyğun olaraq
verilməsi deməkdir”.
Ekspert hesab edir ki, layihə vətəndaş və hökumət arasında daha sıx
əməkdaşlığın formalaşmasına kömək edəcək. Belə ki, həmin şəhərdə yaşayan
sakinlər də fərqli alətlərdən, internet üzərindən və mobil tətbiqlərdən,
portallardan, onlayn platformalardan istifadə etməklə, şəhər idarəetməsi ilə
birbaşa əlaqə qururlar: "Ağıllı şəhər”in daha bir üstünlüyü təhlükəsiz
icmaların yaradılmasıdır. Ümumiyyətlə, dünya praktikasında daha təhlükəsiz
icmalar yaradılır. "Ağıllı şəhər” təhlükəsiz şəhərdir. Bu, birbaşa onunla
bağlıdır ki, burada texnologiyalardan ciddi şəkildə istifadə olunur. Bu,
texnoloji olaraq cinayətlərin üstünün daha tez və qısa zamanda açılmasına imkan
yaradır və şəhəri təhlükəsiz şəhərə çevirir. Ətraf mühitin qorunması baxımından,
alternativ enerji mənbələrinin imkanlarından "ağıllı şəhər”lərdə istifadə
olunur”. İqtisadçı qeyd edir ki, "Ağıllı şəhər” nəqliyyatın inkişaf etməsinə imkan verir. Belə ki, dünya
təcrübəsində "ağıllı şəhər”lər il ərzində təxminən nəqliyyat sektoruna
yönəltdikləri investisiya həcmini 25 faiz artırırlar. Bu, təbii ki, həm
nəqliyyatın tənzimlənməsi, həm də tıxacların aradan qaldırılması baxımından
vacibdir”. Eyni zamanda, rəqəmsal bərabərliyin inkişaf etdirilməsi, yeni
iqtisadi inkişaf üçün imkanların yaradılması, yerli və xarici investisiyaların
cəlb edilməsinə şəraitin yaranması da layihənin üstünlüklərindəndir. "Ağıllı
şəhər” ictimai xidmətlərdə, o cümlədən, kommunal xidmətlərdə daha çox
səmərəliliyin artırılmasına imkan yaradır.
İqtisadçının fikrincə, "Ağıllı
şəhər” yollar, körpülərlə bağlı daha əsaslandırılmış və sistemli infrastruktur
qurulmasına, onların təmin edilməsi və gücləndirilməsinə diqqət ayırmağa imkan
verir: "Müasir texnologiyanı gətirməklə, bəzi şəhərlərin infrastrukturunu
inkişaf etdirmək mümkün olacaq. Layihə həmçinin ixtisaslı kadrların işlərlə
təmin olunması və onlar üçün daha çox iş yerlərinin yaradılmasına imkan verir.
Bu, ixtisaslı kadrların daha qısa zamanda işlə təmin olunması sistemidir.
"Ağıllı şəhər”in özündə məşğulluğun təmin edilməsi və kadrların işlə təminatına
imkan yaradılır”.
İqtisadçı ekspert Rəşad Hüseynov da layihənin
üstünlüyünü dəyərləndirərək qeyd edir ki, iqtisadi vəsaitlərin idarəsi, insan
faktorundan qaynaqlanan nöqsanların aradan qaldırılması, cinayət hadisələrinin
aşağı enməsi, insanların rahatlığı üçün rəqəmsallaşma şəhərin iqtisadi
platformasına çevriləcək: "Bununla birlikdə, sadəcə "ağıllı” həllərin tətbiqi
kifayət deyil: infrastruktur, texnologiya, kollektiv idarəetmə və mənbələrin
qənaətli istifadəsinə qoyulan investisiyalar şəhərin həyat keyfiyyətinin
yüksəlməsinə və davamlı iqtisadi inkişafına səbəb olmalıdır”.
Xoşbəxt insanların şəhəri?
Sosioloqlar və iqtisadçılar təxminən eyni fikirdədirlər: "Xoşbəxt insanlar ağıllı şəhərlərdə yaşayırlar. Maraqlıdır, bəs xoşbəxtlik indeksi necə ölçülür? İqtisadçı Rəşad Hüseynovun fikrincə, bu, ölçmənin necə aparılmasından asılıdır. Yəni real qiymətləndirmə və ölçmə aparılsa, kimsənin-kimsəyə problem yaratmadığı mühitdə insanlar özlərini daha xoşbəxt hesab edə bilər”. Bundan əlavə, sakinlərin öz hökumətlərinə inam səviyyəsi, qərar qəbul etmə prosesinə təsir etmə qabiliyyəti, təhlükəsizlik və təhlükəsizlik hissi, aşağı cinayət səviyyəsi və şəhər mühitindəki bütün iştirakçıların yüksək məsuliyyəti - bunlar ağıllı bir şəhərin gündəlik həyatını fərqləndirən detallardır. Müasir imkanlar, yüksək texnologiyaların sürətlə inkişafı isə istifadəçilərə demək olar ki, hər yerdə - "ağıllı şəhər”lərini müstəqil şəkildə qurmağa imkan verir.
Təranə Məhərrəmova
Məqalə "Innoweek-Innovasiya həftəsi- 2020” çərçivəsində jurnalistlər üçün müsabiqəyə təqdim olunur