Rusiyanın "Vestnik Kafkaza” saytı erməni vəhşiliyindən bəhs edən
qalmaqallı məqaləsində növbəti erməni vandalizmindən və bunun hələ də cəzasız
qalmasından bəhs edib. Müəllif vurğulayır ki, bir neçə gün bundan əvvəl sosial
şəbəkələrdə erməni jurnalist Narine
Kiarkosyan Ermənistanın Ararat vilayəti müsəlman qəbiristanlığında dağıntıları
əks etdirən qalmaqallı video yayıb. Erməni jurnalist vilayətə vəhşi təbiət və
mədəni dəyərlərin qorunması ilə bağlı çəkilişlər aparmaq üçün gəlibmiş. "Vestnik
Kafkaza” yazır ki, hətta erməni jurnalist belə gördüklərindən hiddətə gəlib.
Fond əməkdaşlarının köhnə qəbiristanlığı dağılmış vəziyyətdə saxladıqlarına
görə irad tutaraq onları tədbirlər görməyə çağırıb. "Əgər bu, mədəni irsin və
təbiətin qorunması fondudursa, onda hansı əsasla və hüquqla qəbiristanlıq məhv
edilir. Lap kürd və türk burada yaşamasa belə. Bu birmənalı olaraq barbarlıq,
vəhşilikdir. Kürdlər gedib, qəbiristanlıq dağıdılıb. Axı nədən qəbiristanlıq
dağıdılır”, - deyə jurnalist xanım fondun əməkdaşlarına müraciət edib. Lakin
fond əməkdaşları ondan çəkilişləri dayandırmağı tələb ediblər.
Beləliklə, Ermənistanda növbəti dəfə keçmişlə müharibə siyasətinin davam
etdirilməsinin, qeyri-erməni mədəniyyət abidələrinin məhv edilməsinin şahidi
olmaq mümkün olub. Formal olaraq ölkədə rejim dəyişib, Dağlıq Qarabağ
münaqişəsinə səbəb olan ultramillətçilərin klanı aradan qalxıb. Lakin rəsmi
Yerevan hələ də Ermənistan ərazisində və işğal altında olan Azərbaycan
torpaqlarında digər xalqların hər hansı bir izinin qalmasına imkan verməyərək
onları məhv etmək siyasətini davam etdirir.
Portala açıqlamasında "Milli müdafiə” jurnalının baş redaktoru İqor
Korotçenko bildirib ki, bu siyasət yalnız pislənməyə və irad tutulmaya
layiqdir. "Humanitar və insani nöqteyi-nəzərindən bu mənzərə nifrətə layiqdir.
Bu səbəbdən də istərdim ki, bu hadisəyə başda baş nazir Nikol Paşinyan olmaqla
Ermənistan hökuməti tərəfindən reaksiya verilsin. Ermənistan hər dəfə bəyan
edir ki, humanitar dəyərlərə sadiqdir, heç olmasa buna sözdə deyil, praktikada
əməl etməlidir”, - deyə o bildirib. "İşğal altında olan Azərbaycan
torpaqlarında mədəni, tarixi abidələr – məscidlər, şəhərlər dağıdılıb,
bütünlüklə qarət olunub. Dəhşətli xarabalıqlar yaradılıb. Biz hər bir şey
haqqında kompleks danışmalıyıq. Ermənistanın işğal etdiyi Azərbaycanın işğal
altında olan 7 rayonunda baş verənlərdən məlumatlı olmalıyıq. Mülkiyyət,
şəhərlər, mədəniyyət abidələri ilə bağlı vəziyyətin necə olduğu bəlli
olmalıdır. Bu məsələ mənim qənatimcə, beynəlxalq ekspert ictimaiyyətinin
reaksiyasına layiqdir”, - deyə İqor Korotçenko bildirib. Baş redaktor əlavə
edib ki, müsəlman abidə və qəbiristanlıqlarının qorunub saxlanması problemi
YUNESKO və BMT səviyyəsində həllini tapmalıdır. "YUNESKO-ya müraciət edilməsi
zəruridir. Təşkilatın xüsusi komissiyası gəlib obyektlərin və müsəlman
abidələrinin vəziyyətini araşdırmalıdır. Biz başa düşməliyik ki, hansısa bir
dinə sitayiş edənlərin nümayəndələrinə, məbəd xarakterli abidələrə qarşı belə
hallar yolverilməzdir. Kimin harada və necə etməsindən asılı olmayaraq, bu
hərəkətlərə son qoymaq gərəkdir, gələcəkdə münaqişələrin baş verməsinə zəmin
yarada biləcək belə hallara yol vermək olmaz”, - deyə baş redaktor fikrini
tamamlayıb.
Milli Məclisin deputatı Rasim Musabəyov isə ilk növbədə xatırladıb
ki, Ermənistan tərəfindən abidələrin məhv edilməsi çoxdan bəridir ki, mütəmadi
olaraq həyata keçirilir: "Ermənistanda digər xalqların mədəni irslərini, o
cümlədən toponimlərini məhv etməyə çalışılır. Əgər Rusiya ordusu Baş
Qərargahının 19-cu əsas xəritəsinə nəzər salsaq, orada çay, kənd, şəhər,
qəsəbələrin adlarının türk mənşəli olduğunu müşahidə edə bilərik. İndi o adlarının
hamısı dəyişilib. Müsəlman mədəni izlərinin əks etdirən abidələrin sistemli
məhv edilməsi aparılır. Məsələn, İrəvandakı Xan sarayı tamamilə məhv edilib, türklərin
burada olduğunu sübut edən hər şey dağıdılıb. Eyni qaydada Azərbaycan, kürd,
bütövlükdə müsəlman abidələri, o cümlədən qəbiristanlıqlar məhv edilir. Məqsəd
də müsəlman və türklərin bu torpaqlarda dominant mövqedə olduqlarını təsdiqləyən
izləri silməkdir. Bu dağıdılmış və kimsəsiz qalmış qəbiristanlıqda baş verənlər
də 100 ildən artıqdır ki, davam edən qlobal kampaniyanın kiçik bir epizodudur”.
Ekspert təəssüf hissi ilə bildirib ki, Ermənistanda tarixi abidələrin
məhv edilməsi elə bir həddə çatıb ki, onu bərpa etmək də mümkün deyil:
"İrəvanda Xan sarayından tutmuş 500, 800 yaşlı bütün tarixi abidələr məhv
edilib. Ermənistanda bu gün müsəlman qalmayıb. Onların hamısı ölkədən qovulub.
Bu səbəbdən də qəbiristanlıqlara baxan yoxdur. Yaranmış durumda yalnız
beynəlxalq reaksiyadan danışmaq olar. Bununla da dağıntıları həyata
keçirənlərdə vicdan hissini qaldırmaq olar”, - deyə fikrini tamamlayıb.
Bakı 15°C
