Əngəlləri çiyin-çiyinə aşan qardaşlar - Portret
Nurlan Babacanov:
"Çətinliyin üzərinə getdikcə, görürsən ki, heç nə mümkünsüz deyil. Sadəcə,
inanmaq lazımdır".
Əli Babacanov:
"Ölkəmizin bayrağını dalğalandırıb, himnini səsləndiririk. Bizə
"əngəlli" sözü yaraşmır".
Flora Babacanova (ana):
"Onların əlilliklərinə görə heç vaxt sıxılmamışam. Çalışmışam ki, aktiv
həyat tərzi keçirsinlər, heç kimdən geri qalmasınlar. Həmişə hiss etmişəm ki,
övladlarım həyatda öz yerlərini tapacaqlar. Hər keçən gün əminliyim daha da
artır. Çox ağıllı, məqsədli uşaqlardır. Sağlam, ya da fiziki məhdudiyyətli,
fərq etməz, inanıram ki, bizim hekayəni oxuyan bütün insanlar özü üçün faydalı
nəsə götürəcəklər".
Uşaq serebral iflicindən əziyyət çəkən Nurlan və Əli Babacanovları
bir-birinə yaxınlaşdıran səbəblər, fiziki məhdudiyyət və ailə bağları ilə
yekunlaşmır. Onlar həm də komanda yoldaşıdırlar. Uşaqlıqdan idmana meyillənən
qardaşlar, qısa müddətdə xeyli yol qət edərək, Azərbaycan para-pauerliftinq
yığmasına cəlb olunublar. Son Avropa çempionatının üçüncüsü, 27 yaşlı Nurlan
millimizin aparıcı üzvlərindən birinə çevrilibsə, ondan dörd yaş kiçik olan
Əli, Avropa rekordunu yeniləyib, dünya kubokunun gümüş mükafatını qazanıb.
Hədəfləri də birdir - olimpiya zirvəsi!
Öncədən vurğulayaq ki, Nurlan 2020-ci ildə Tokioda təşkil olunacaq
XVI Yay Paralimpiya Oyunlarına lisenziya qazanmağa çox yaxındır. Dünya
reytinqində 13-cü pillədə qərarlaşan Avropa mükafatçısı, bunun üçün
"səkkizliy"ə düşməlidir.
İki ay bəs edir
Gəncədə, çilingər Sahib Babacanovun ailəsində doğulub, boya-başa
çatan qəhrəmanlarımız, orta təhsillərini ev rejimində olmaqla, şəhər 18 saylı
məktəbdə alıblar. Dərslərini orta qiymətlərlə oxuyan qardaşlar, əsas
diqqətlərini idmana yönəldiblər. Lakin bu, uzun müddət sadəcə, reabilitasiya
əhəmiyyəti kəsb edib. Belə ki, onlar 2004-cü ildə Azərbaycana Birgə Yardım
Təşkilatının (UAFA) nəzdində fəaliyyət göstərən Gəncə İcma Əsaslı Reabilitasiya
Mərkəzinə üz tutaraq, altı il idman dərslərində iştirak ediblər.
2010-cu ildə isə Babacanovlar, müəllimləri, həm də ağır atletika üzrə
mütəxəssis olan Natiq Əliyevin təşəbbüsü ilə pauerliftinqin sıralarına
qoşulublar. Valideynlərinin də xeyir-duasını alan, hər an onların böyük
dəstəyini hiss edən qardaşlar, tezliklə yarışlara qatılaraq, nəticələr
göstərməyə başlayıblar. Çox maraqlıdır ki, Nurlan sağlam idmançılar arasında
Azərbaycan çempionatında üçüncü yeri tutarkən, cəmi iki aylıq məşq təcrübəsinə
malik olub.
Əlinin "cavab"ı
Qardaşının uğurundan ilhamlanan Əlinin də nəticələri özünü çox
gözlətmir. Kiçik Babacanov 2011-ci ilin sonunda baş tutan ağır atletikanın
"bench press" növü üzrə respublika birinciliyində bürünc medalın
sahibi olur. Nurlan isə sözügedən yarışda "gümüş"ü boynundan asır.
Beləcə, onlar mütəmadi olaraq, həm sağlam, həm də fiziki məhdudiyyətli
ağırlıqqaldıranlar arasında təşkil edilən ölkədaxili yarışların qalib və
mükafatçıları olurlar. Bununla yanaşı, şəxsi göstəricilərini də durmadan
yaxşılaşdıran Babacanovlar, para-pauerliftinq üzrə yığmamızın baş məşqçisi
İlqar İbişovun da diqqətini çəkməyi bacarırlar. Lakin maraqlıdır ki, beynəlxalq
yarış təcrübəsini ilk dəfə Əli yaşayır. 2015-ci ildə Dubayda keçirilən dünya
kubokuna qatılan kiçik Babacanov, bir "güllə” ilə iki hədəfi vurur. Belə ki, o,
həm debütünü "gümüş"lə qeyd edir, həm də gənclər arasında yeni Avropa
rekordu müəyyənləşdirir.
Debüt ənənəsi
Nurlanın ilk belə sınağı isə 2017-ci ildə Macarıstanda baş tutan
dünya kubokuna təsadüf edir. Eger şəhərinin ev sahibliyi etdiyi mötəbər yarışda
88 kiloqram çəki dərəcəsində çıxış edən Babacanov, qardaşından geri qalmayaraq,
debütünü bürünc medalla əlamətdar edir. Bu nəticə ilə ilin sonunda Meksikada
keçirilən dünya çempionatına vəsiqə qazansa da, təcrübəsi, dünyanın ən
güclülərinin qatıldığı mundialda mükafatçılar sırasına düşmək üçün yetərli
olmur.
Fransada tarixi uğura töhfə
2018-ci ilin təqvimində mundial yer almadığından, ilin əsas yarışı
Fransada baş tutan açıq Avropa çempionatı idi. İki "qızıl dubl"la
tarixi uğura imza atdığımız sözügedən yarışda, yeganə digər əyyarlı medalımız
Nurlanın sayəsində qazanılır. 97 kiloqram çəki dərəcəsində mübarizə aparan
böyük Babacanov, 197 kiloqramı ram edib, fəxri kürsünün üçüncü pilləsinə
yüksəlir.
Bir neçə gün öncə isə o, Birləşmiş Ərəb Əmirliklərində növbəti dünya
kubokunda sınaqdan keçirilib. 190 kiloqram nəticə ilə 14 iştirakçı arasında
altıncı olan Nurlan, qarşıdakı yarışlarda göstəricisini bir qədər də
yaxşılaşdırmalıdır. Tokio paralimpiadasınadək isə pauerliftinqçiləri lisenziya
xarakterli üç yarış gözləyir. Bunlar apreldə Macarıstanda baş tutacaq dünya
kuboku, iyulda Qazaxıstanda təşkil ediləcək mundial və növbəti ilin
əvvəllərində BƏƏ-də keçiriləcək dünya kubokudur.
Göründüyü kimi, Əli cari tsikldə beynəlxalq arenaya çıxmayıb. Buna
yaşının azlığını əsas gətirən məşqçilər, onunla bağlı planlarını
"Paris-2024" üzərində qurub. Onlar kiçik Babacanovun potensialının
növbəti tsikldə tam açılacağını düşünür, qələbələri sıralayacağına şübhə
etmədiklərini söyləyirlər.
Dörd paralimpiadaya iddialı
məşqçi
Gəncədə yaşayan Babacanovlar, hazırlıqlarını Natiq Əliyevin yanında
keçirlər. İdmanda addım atdığı ilk günlərdən qəhrəmanlarımızın yanında olan
sözügedən mütəxəssis hesab edir ki, onlar ən azından dörd paralimpiadada
ölkəmizi təmsil edə bilərlər: "İlk günlər mən bu uşaqlarla sırf sağlamlıq
proqramı əsasında məşq edirdim. Bir gün müşahidə etdim ki, fiziki güclərinə
görə digərlərindən çox fərqlənirlər. Onlarda fövqəladə gücü var idi, peşəkar
idmançıların qaldırdığı ağırlığın öhdəsindən rahatlıqla gəlirdilər.
Ümumiyyətlə, ikisi də fitri istedad, eyni zamanda zəhmətkeşdir.
Məncə, onlar sözlərini hələ çox deyəcəklər. Pauerliftinqdə uğurlar əsasən 30
yaşdan sonra başlayır. Odur ki, ən azından, dörd paralimpiadada biz Nurlan və
Əlini görə bilərik. Bu gün qarşımıza qoyduğumuz əsas məqsəd Nurlanın Tokioya
lisenziya qazanmasıdır. Ümid edirəm ki, o, bu vəzifənin öhdəsindən gələcək. Əks
halda, çox böyük təəssüf hissi keçirəcəyik".
Digər hədəf - ali təhsil
Onların maraq dairəsi idmanla çərçivələnməyib. Hər ikisi özünü həm də
zehni cəhətdən inkişaf etdirməyə meyillidir. Mütəmadi kitab oxuyur, film
izləyir, xarici dil biliklərini artırırlar. Filmlərlə arası daha yaxşı olan
Nurlan ingilis, detektiv əsərlər oxumağı xoşlayan Əli isə rus dilini orta
səviyyədə bilir. Ali təhsil almaq niyyətində olan qəhrəmanlarımız, vətənə
xidmətlərini idman arenalarından kənarda da davam etdirmək arzusundadırlar.
Çox xüsusiyyətlərinə görə bənzər olsalar da, kumirlə bağlı sualımıza
aldığımız cavablar fərqli oldu. Belə ki, Nurlan ağır atletikanın canlı əfsanəsi
Naim Süleymanoğlunu, kiçik Babacanov isə dahi boksçu Məhəmməd Əlini özünə örnək
seçib.
"Başqa növdə özümüzü
təsəvvür etmirik"
Yay Paralimpiya Oyunlarında indiyədək 40-dək mükafat qazansaq da,
pauerliftinqçilərimiz hələ ki, medal hesabını aça bilməyiblər. Azərbaycan
idmançılarının zirvə yarışında ən uğurlu olduğu növ isə atletikadır.
Qəhrəmanlarımızın məhdudiyyətləri atletika növlərindən olan atmalarda da çıxış
etməyə imkan verir. Bu amilləri nəzərə alıb, nə vaxtsa özlərini atmalarda
sınamaq niyyətinə düşüb-düşmədikləri, ümumiyyətlə, bu barədə onlara hər hansı
təklifin edilib-edilmədiyi ilə maraqlandıq. Məlum oldu ki, qardaşlar öz idman
növlərini həm də həyat tərzi hesab edirlər. Nurlanın bu sözlərinə Əli də
şərikdir: "Bu barədə heç bir təklif gəlməyib. Təklif olsa belə, biz
pauerliftinqdən uzaqlaşmarıq. Bu növə çox bağlanmışıq, başqa növdə özümüzü
təsəvvür etmirik".
Portret
Fiziki məhdudiyyət uğura gedən yolda əngəl deyil. Babacanovların
timsalında buna bir daha şahid oluruq. Heç bir maneə tanımadan, çiyin-çiyinə
zirvəyə doğru addımlayan qardaşlar, insan potensialının tükənməzliyini, istək,
iradə olandan sonra hamının hər şeyi bacara biləcəyini bir daha nümayiş
etdirirlər. Bizə isə onlardan öyrənmək, atdıqları addımın izini itirməmək
düşür.
Sahib