Özünü yaxşı hiss etməyəndə, səyahətə çıxan adam – Səyyah
Səkkiz
ildir ki, səyahət edir. Əvvəlcə işlə bağlı xarici ölkələrə səfər edirmiş. Daha
sonra bunu hobbiyə çevirib. Deyir ki, səyahət insanın ruhunu dincəldir. Bu
mənada həmsöhbətimin hobbisi, onun üçün həm də bir növ terapiyadır. Bundan
başqa, düşünür ki, fərqli mədəniyyətləri tanımaqla insan çox şey qazanır.
"Kitablarda, internetdə olmayan məlumatları insan yalnız səyahət edərək öyrənə
bilir” deyən müsahibimiz Vüqar Quliyevdir. Qeyd edək ki, V.Quliyev "Bahar”
enerji əməliyyatı şirkətində insan resursları üzrə mütəxəssis olaraq çalışır.
- Gəzməyi, səyahəti etməyi hamı sevir. Amma hər
adam bunu hobbiyə çevirə bilmir. Bəs sizdə səyyahlığa maraq necə yarandı?
- Qardaşım
Türkiyədə yaşayır, bir neçə dəfə onun yanına - İzmir şəhərinə getdim. Əslində,
sizin də qeyd etdiyiniz kimi, gəzməyi hamı sevir. İşə başlayandan sonra işimlə
bağlı müxtəlif ölkələrdə təlim və konfranslara qatılmağa başladım. Təlimlərə getdiyim
ölkələrdə bir neçə gün artıq qalırdım. Ümumiyyətlə, mənim gəzməyə, səyahətə
marağım həmişə olub. Sonradan əlimə belə bir imkan düşdü və bunu dəyərləndirmək
qərarına gəldim.
- İlk dəfə hansı ölkəyə səyahət etdiniz?
- İlk dəfə
getdiyim ölkə Misir olub. Qahirə şəhərinə səfər etmişdim. Hələ uşaq olarkən ən
çox görmək istədiyim yer Misir ehramları idi. Sfinks, Misir piramidalarını
canlı görmək çox möhtəşəmdir. İlk səfər təəssüratlarım çox xoş oldu, hətta
ondan sonra bir neçə dəfə təkrar Misirə getdim. Məncə , dünyanın yeddi
möcüzəsindən birini hər kəs görməlidir.
- Bəs nə qədər müddətdir ki, səyahət edirsiniz?
- Təqribən
8 ilə yaxındır ki, səyahət edirəm. Bu günə kimi 56 ölkədə olmuşam. Bu
səfərlərin bəziləri turistik, bəziləri isə işlə bağlı olub. Səfərlərimi adətən,
əvvəlcədən planlaşdırmağı sevirəm. Bizə il ərzində 34 gün məzuniyyət verilir.
Mən bu günləri düzgün bölüşdürərək öz səyahət planımı tuturam. Məsələn, bu ilin
oktyabr ayında Filippin və İndoneziyaya səfər edəcəyəm. Orada bir konfransa
qatılmalıyam. İlin sonunda isə Hindistana və Şri-Lankaya turist kimi səfərim
olacaq. Bu səyahətlərin biri işlə bağlı olduqda, qalanları turistik olur. Artıq
gələn il hansı ölkələrə səyahət edəcəyimin planını indidən tutmuşam.
- Qeyd etdiniz ki, səyahətlərinizin heç də hamısı
turistik olmur. Bəs işlə bağlı səyahət edərkən, getdiyiniz şəhərləri gəzmək
imkanınız olurmu?
- Əslində,
hər şey insanın özündən və işlərini düzgün planlaşdırmasından asılıdır. Mən
adətən, getməzdən əvvəl bütün səyahət planımı hazırlayıram. Haraları
gəzəcəyimdən tutmuş, həmin şəhərin gəzməli-görməli yerləri haqqında əvvəldən
araşdırmalar edirəm. İşlə bağlı səyahət edərkən, gəzmək üçün əlavə vaxt təyin
edirəm. Bu müddət ərzində getdiyim şəhərləri gəzib-görmək imkanım olur.
- Dediniz ki, bütün səyahətlərinizi əvvəlcədən
planlayırsınız. Heç olubmu ki, harasa planlaşdırılmamış səyahət edəsiniz?
- Bir neçə
dəfə belə səyahətlərim olub. Amma planlaşdırılmamış şəkildə harasa gedəndə,
özümü yaxşı hiss etmirəm və sıxılmağa başlayıram. Belə olanda, nəyi necə
edəcəyimi bilmirəm. Çünki mən dəqiq insanam. Uzun müddət eyni yerlərə səyahət
etməyi sevmirəm. Məsələn, demək olar ki, Azərbaycanın bütün rayon və
şəhərlərində olmuşam. Amma eyni yerlərə getməyin məncə, mənası yoxdur. İnsan
daima yeni şeylər öyrənməli, yeni yerlər kəşf etməlidir. Müxtəlif tarixi
yerlər, fərqli mədəniyyətləri öyrənmək üçün fərqli yerlərə səyahət etmək
lazımdır. Mən məzuniyyətdə olduğum müddətdə heç vaxt evdə oturmuram. Bu mənada
mənim bəxtim gətirib. Çünki işdən istədiyim vaxt məzuniyyət götürə bilirəm. Özümü yaxşı hiss etməyən kimi, harasa
səyahət edirəm. Amma hətta belə olan təqdirdə də, boş-boşuna harasa getmirəm.
- Getdiyiniz ölkələrdən ən çox diqqətinizi çəkən hansı
ölkə olub?
- Bu günə
kimi bəyəndiyim və diqqətimi çəkən ölkələr İsveçrə və Sinqapur olub. Bu ölkələrdə
şəhərlər təmiz, insanlar gülərüzlüdür. İsveçrənin ekoloji təmizliyi mənim diqqətimi xüsusilə
çəkmişdi. Sinqapurda isə ümumiyyətlə, qış fəsli olmadığına görə, hər yer
yamyaşıldır. Orada olan ekzotik bitkilər və
canlılar aləmi mənim marağıma səbəb olmuşdu. Bir şəhərdən ibarət
olmasına baxmayaraq, Sinqapur çox gözəldir. İtaliyanın Florensiya və İspaniyanın
Barselona şəhərləri isə indiyə qədər
şəhərlər arasında ən çox bəyəndiklərimdir.
-
Səfər xərclərinizi necə qarşılayırsınız?
- Bu,
sənin hansı ölkəyə səyahət etməyindən asılı olan məsələdir. Bu barədə məndən
sosial şəbəkələrdə də dəfələrlə soruşublar. Ən böyük xərc nəqliyyatla bağlı
olur. Getdiyiniz şəhərdə metro və digər ictimai nəqliyyatlar varsa, sizin səyahət
xərcləriniz daha ucuza başa gəlir. Mən iyul ayında Budapeştdə olarkən, maraqlı
bir faktla qarşılaşdım. Orada ictimai nəqliyyatdan 3 gün istifadə etmək üçün 8
avro ödəyib kart alırsan. Bu kart vasitəsilə metro, tramvay, avtobusdan rahat
istifadə edə bilirsən. Ümumiyyətlə, səyahət zamanı nəqliyyat xərcləri daha çox olur.
Qaldığım otellər isə həmişə "ekonom” olub. Mən bunu dəfələrlə söyləmişəm, gəzdiyin
ölkədə 5 ulduzlu oteldə qalmaq lazımsızdır. Əgər insan gəzməyə gedirsə, beş
ulduzlu oteldə qalmağa ehtiyac yoxdur. Mən adətən, səhər 8-də oteldən çıxıb
axşam 12-də qayıdıram. Bu da o deməkdir ki, mən oteldən yalnız yatmaq üçün
istifadə edirəm. Gecə yatmaq üçün isə 5 ulduzlu otelə pul ödəmək artıq xərcdir.
Önəmli olan otelin təmizliyidir.
- Məsələn,
bir ölkəyə səyahət üçün minimum büdcə nə qədərdir?
- Bu da
getdiyin ölkədən asılı olaraq dəyişir. Məsələn, İngiltərəyə gedirsənsə, bir
həftə üçün sənə ən azı 2 min avro lazımdır. Budapeştdə isə 700-800 avro kifayət
edir. Adətən, minimum büdcə, getdiyin ölkənin iqtisadi vəziyyətindən asılı
olaraq dəyişir. İsveçrədə bir həftə üçün 2500 avro kifayət etmir. Çünki ora çox
bahalıqdır.
- İR mütəxəssisi olaraq fəaliyyət göstərirsiniz.
Hobbinizlə işinizin ortaq cəhəti varmı?
- Çalışıram
ki, getdiyim ölkələrdə yerli əhali ilə ünsiyyət qurum. Məsələn, Amerikaya
gedərkən yerli əhali olan hinduların yaşadığı yerlərə gedib onların həyat tərzi
ilə maraqlandım. İndoneziyada olarkən adalarda yaşayan qəbilələrlə ünsiyyətdə
olmuşam. Ümumiyyətlə, insanların həyat tərzi mənə hər zaman maraqlı gəlir.
İşimlə bağlı olaraq biz xeyli insanla danışırıq. İş müsahibələrində insanları tanımaq çox vacibdir. Bu mənada
daim insanlarla ünsiyyət qurmağın tərəfdarıyam.
- Çox gəzən çox bilər, başına çox hadisə gələr. Bəs
sizin başınıza gələn hansısa maraqlı hadisə varmı?
-
Səyahətlər zamanı istər-istəməz adamın başına müxtəlif hadisələr gəlir.
Məsələn, mən Misirə səfər edərkən ehramların içində qalmışdım. Bu, mənim Misirə
ikinci səyahətim zamanı oldu. Bizim getdiyimiz qrup sonuncu idi. Mühafizə
içəridə adam olmadığını düşünüb, qapıları bağlamışdı. 1 saat 20 dəqiqə
ehramların içində qaldıq. Bir dəfə isə Amsterdamdan Kopenhagenə səyahət edərkən,
yolda texniki problem baş verdi. Qatarda problem olduğuna görə, təyyarəyə
gecikdim. Gözətçidən soruşdum ki, mən təyyarəyə gecikmişəm, nə etməliyəm? O,
mənə vağzala gedib problemi bildirməyimi tövsiyə etdi. Onun dediyi kimi,
biletimi və qəbzimi vağzaldakı əməkdaşa təqdim etdim. Sən demə, bilet qəbzinin
olması çox vacibdir. Onlar mənə növbəti gün üçün təyyarə bileti aldılar. Hətta
mənim gecə qalmağım üçün dörd ulduzlu otel təşkil etmişdilər. Qalacağım otelə
isə məni taksi ilə göndərdilər. Belə bir hadisə mənim indiyə qədər heç vaxt
başıma gəlməmişdi.
- Necə düşünürsünüz, səyahət insanın həyata baxış
bucağına necə təsir edir?
- Bu,
səyyahın özündən asılıdır. Mən tarix fənnini çox sevirəm. Məktəbdə oxuyarkən
tarix kitablarında gördüyüm yerlər, abidələr
mənə maraqlı gəlirdi. Bu yerləri öz gözünlə görmək isə insanda fərqli
hislər yaşadır. Almaniyada olarkən İkinci Dünya Müharibəsinin izlərini
açıq-aşkar görmək olur. Polşada olarkən "Holokost” şahidləri ilə söhbət
etmişəm. İnsan gəzdikcə, mütləq yeni nələrsə öyrənir. Səyahət etməklə, kitablarda
və internetdə olanlardan daha qartıq məlumat əldə edə bilərsən.
Şəbnəm Mehdizadə