“Özümə pərəstiş edirəm”
Müğənni
Layma Vaykule dostlarını Yurmalada başına yığaraq ad gününü keçirib. Amma o, ad
gününü təqvimə uyğun olaraq - doğulduğu gün qeyd etməyib. Bu, qonaqları bir qədər
çaşbaş salsa da, dəvəti məmnuniyyətlə qəbul ediblər. Sirri isə yalnız Laymanın
mətbuata müsahibəsindən sonra başa düşüblər.
Əzəmətli Layma
- Layma, siz adətən ad gününüzü qeyd etməyi
xoşlamırsınız?
- Ad
günlərimi 12-13 yaşına qədər qeyd etməyi sevirdim. O zaman hədiyyələr məni həyəcanlandırırdı.
Sonra bunlar mənə əhəmiyyətsiz göründü. Həmin vaxtdan qonaqları bir yerə
toplamaqdan vaz keçdim. Uzun müddət ad günümü qeyd eləmədim. Amma sonra kimsə
«Layma, bu, düzgün deyil» dedi. Razılaşdım və yenə də ad günümə dostlar və
qohumlar gəlməyə başladı. İndi siz mənim həmin gün keçiridyim hisslərimi təsəvvür
edə bilməzsiniz. Diqqət, güllər, hədiyyələr... az qalıram dəli olam. Bəzən hətta
ad günü bəhanəsi ilə hansı günlərdəsə bayram keçirməyi də düşünürəm. Artıq hədiyyələr,
güllər və diqqət əsas deyil. Əsas olan yaxın və doğma adamların bir yerə
toplaşmasıdır. Bayram sadəcə bəhanədir. Baxın, ingilis kraliçası aprelin 21-də
anadan olsa da, ad gününü iyunun ilk həftəsinin sonunda qeyd edir. Ona görə də
bu, o qədər qəbulolunmaz sayılmamalıdır.
- Siz ad günü tədbirinizdə dediniz ki, həmin gün təbrikləri
yox, başsağlıqları qəbul edirsiniz.
- Mən həmişə
belə deyirəm. Əlbəttə, bu, zarafatdır. Anamın dediyi kimi, mən yalnız güzgüyə
baxanda yaşımın nə qədər olduğunu başa düşürəm. Axı insan öz yaşını hiss eləmir.
Əgər həmişə cavan olmaq istəyirsinizsə, özünüzdən böyük adamlarla ünsiyyət
qurun. Onda həmişə özünüzü cavan hiss edəcəksiniz.
- Bəzən də əksinə deyirlər. Öz qarşınızda gənc adamları
saxlayın ki, onların enerjisini alasınız. Bu fikirlə razı deyilsiniz?
- Bəsdi
görüm, cavanları ətalət basıb. Yaş mənimçün heç də göstərici deyil. Əgər söhbət
enerjidən gedirsə, mən onu almıram, əksinə, öz enerjimi ötürürəm. Ona görə
sizin gənclik formulanız mənə uyğun deyil.
- Bəs gözəlliyin və cavanlığın sirri nədədir?
- Gözəlliyin
sirri – bu, sirrdir. Bu barədə düşünmürəm. Mən yuxudan oyanıram və bütün
lazımlı prosedurları edib özümü qaydaya salıram. Yarım saat itimlə gəzintiyə
çıxıram. Qayıdından sonra çay içirəm və gündəlik rejimimə riayət edirəm. Nə
vaxt məndən gözəlliyin sirri ilə bağlı soruşurlar, mənim özümdə bir sual
yaranır: "Gözəllik nə deməkdir?”. Biri "mənim sevgilim çox gözəldir” deyə
düşünür. Ancaq o heç də Afrodita deyil. Bununla belə onu sevirlər. Gözəllik və əxlaq
eyni tərzə malikdir. İstedad isə gözəllikdir. Əgər insanın içərisi boşdursa, o,
maraqlı deyil.
- Siz heç olmasa düşünürsünüz ki, gözəlsiniz?
- Yox...
İstəyirsiniz inanın, istəyirsiniz yox. Amma az da olsa istedadlıyam.
- Bəs istedadın bitmə müddəti varmı? Bilirsinizmi,
səhnədən hansı yaşda getmək lazımdır?
- Yaşın
buna nə dəxli? Bəzən hərdən gənc artistlərə demək istəyirsən ki, çıx get,
insanların zövqünü korlama. Raymond Pauls həmişə deyirdi: «Vaxtında getmək
lazımdır». Ancaq mən belə düşünmürəm. Artist səhnədən getmir, ancaq publika
ondan uzaqlaşır. Zaman gəlir ki, səni daha istəmirlər. Məncə, artist yaşla
yalnız məzmunlu olur. Məsələn, siz həkimə gedəndə gənc, yoxsa təcrübəlisini
seçirsiniz? Mən təcrübəliyə üstünlük verirəm.
- Tamaşaçı nə vaxt Laymanı seçirsə, o bilir ki,
peşman olmayacaq, elə deyil?
- Əsas
odur ki, səhnəyə çıxasan və onları peşman etməyəsən. Nüfuzu itirmək olmaz. Bu,
artistlərə xüsusən vacibdir. Mən özüm haqqında bilirəm ki, səhnəyə necə
çıxmalı, necə oxumalı, necə hərəkət etməli, necə təzim etməlisən. Üstəlik, mənə
«Ən stilli», «Əzəmətli» damğalarını da yapışdırıblar. Ona görə hər dəfə mən səhnəyə
çıxanda düşünürəm: İlahi, mən ki əzəmətli Laymayam. Səhnəyə çıxıram və özümü
lazımlı hiss edirəm.
- Bu, həmişə belə olub?
- Həmişə.
Baxmayaraq ki mən 20 yaşında da belə düşünürdüm. Mən o vaxt Variyetdə işləyirdim
və təkcə bədənimin hansısa hissəsini çılpaqlaşdırmırdım. Siz ki bilirsiniz,
qadınların həmişə göstərməyə nəyisə var. Sonra mən bu janrdan ayrıldım və istəyirdim
ki, insanlar mənim ancaq gözlərimə baxsınlar. Səhnəyə tamamilə örtülü çıxmağa
başladım. «Mən Pikadilliyə çıxıram» nömrəsinin təqdimatını keçirəndə çıxışda mənə
Alla Siqalova yaxınlaşdı. O, paltomun yaxasını açdı. Əynimdə yalnız kombinasiya
vardı. "Belə get” dedi. Mənə səhnədə istilik gəldi, qızardım. Çünki zalda mənim
xaç atam oturmuşdu. Onun indicə çıxıb gedəcəyini düşündüm. Amma o qaldı,
konsert onun xoşuna gəlmişdi. Mən bundan sonra yeni stil yaratdım: Yalançı
retro.
- Siz nə vaxtsa utanmısınız?
-
Xatırlamıram. Bəlkə mən arsızam...
Həyatla mübarizə
- Siz Amerikaya getmişdiniz. Nə üçün orada
qalmadınız?
- İş belə
gətirdi. Əgər mənim xəstəliyim olmasaydı, hər şey başqa cür olardı (Amerikada
ona xərçəng diaqnozu qoymuşdular). Həyatımda başqa mənanı tapdım. Tamaşaçılar,
konsertlər, arzuladığım hər şey əhəmiyyətsiz olmağa başladı. Mənə Brodvey
muzikldə, «Mata-Xari»də baş rolu təklif etdilər. Bu, bir il qabaq mənimçün əlçatmaz
idi. Çünki muzikldə çıxış etmək ən böyük istəyim idi. Mən heç nəyə başlamaq istəmirdim.
Həyatımda yenidənqiymətləndirmə baş verdi. Başa düşdüm ki, hər şey belə
qeyri-müəyyən, tez baş verir və mən valideynlərimin qocalığını belə, görməyə
bilərəm. Nəticədə, atam rəhmətə gedəndə mən Amerikada idim və onun dəfninə belə
gələ bilmədim. Çoxları bunu başa düşmədi. Haqqımda "karyera onun üçün daha önəmlidir”
deyiblər. Amma mən həyat üçün mübarizə aparırdım.
- Bu haqda çox sərbəst danışırsınız. Taleyinizdən
şikayətlənmirsiniz?
- Yox...
İztirab insanı daha qüvvətli edir. Əvvəllər bunun mənasını başa düşmürdüm, indi
bilirəm ki, bu, həqiqətən belədir. Rəssam, artist həyat təcrübəsindən geri qala
bilməz. Hər halda mən həyatda hər şeyə asanlıqla nail olan artistlə
rastlaşmamışam. Həm də həmin çətin vaxtlarda yanında kimsə olmalıdır. Andrey mənə çox kömək etdi. Xəstəliyimi
təkcə ona dedim. Dərin sarsıntılarımı görüb dedi: "Nə olacaq? Uzağı, avtomobilə
minib divarın üzərinə çıxacağıq. Bununla da hər şey bir anda bitəcək”.
Hamımız güclü insanıq
- Sizi ciddi tərbiyə ediblər?
- Yox, məni
başlı-başına buraxmışdılar. Həmişə nə etdiyimi bilirdim. Bəlkə mənə belə gəlirdi.
Amma mən istədiyim kimi yaşayır, istədiyimi edirdim. İnadkar idim. Bununla belə
mənim ciddi anam var. Amma o mənimlə bacarmırdı. «Siz 15 yaşlı qızınızı necə
qastrollara buraxdınız» - deyə jurnalistlər ondan nə vaxtsa soruşanda, o,
«Laymanı?» - deyə təəccübləndi. "Kim ona qadağa qoya bilərdi ki?” – cavabını
vermişdi.
- Həyatda sizi kim öyrədirdi?
- Küçə...
istənilən anadan daha sərt şeylər öyrədirdi.
- Əsas öyrəndiyiniz hansı dərs oldu?
- Özünü
harda, nə vaxt və necə aparmaq lazım olduğunu öyrəndim. Həmçinin insanlarla
yola getməyi və haqq-hesab etməyi bildim.
- Siz həmişə gülümsəyirsiniz. Sizi nə əsəbləşdirə
bilər?
- Yalnız
səfehlik və qabiliyyətsizlik. Bu cür hallarla qarşılaşanda, əhvalım korlanır. Hətta
bu cür insanlarla münasibətim korlansa da, mənimçün əhəmiyyəti yoxdur. Yəqin
ki, düzlüyümə görə məni də kimlərsə sevmir.
- İnanmaq çətindir ki, sizi kimsə sevməsin. Sizin
bu qədər dostlarınız var.
- Bizə
yalnız elə gəlir ki, bizə heç kim lazım deyil. Həqiqətdə isə həyatımızın hər
anında kiminsə yanımızda olması vacibdir. Biri ağlamaq, biri gəzmək, üçüncüsü
ilə söhbətləşmək üçün. Gecə şənlikləri üçün isə dostlar lazımdır.
- Çox qadınlara ər və uşaq lazımdır. Andreylə uzun
illərdir bir yerdəsiniz. Bəs deyilmi?
-
Uşaqlar... Bu, gözəl hissdir. Əgər zamanı geri döndərsəydim, mənim çoxlu
uşaqlarım olardı. Əgər o qadınlardan danışırsınızsa ki, «yanımda olsaydı, xoş
olardı» - deyə kimsə onların haqqında düşünür, mən buna inanmıram. Mənə elə gəlir
ki, onlar özləri əlverişli mövqe seçiblər ki, öz üzərlərinə məsuliyyət götürməsinlər,
dostlarının və valideynlərinin, hətta özlərinin diqqətini çəkməsinlər. Düşünmürəm
ki kişilərə belə qadınlarla həqiqətən də maraqlıdır.
- Gecədə Alla Puqaçova sizin üçün oxudu. Siz onu rəğbətlə
dinlədiniz. Belə görünürdü ki, siz həqiqətən yaxşı dostsunuz və bir-birinizi ürəkdən
istəyirsiniz.
- Mən nəyə görə onu sevməməliyəm?
- Bəs peşəkar qısqanclıq necə olsun?
- Kimə?
Kimsə mənim yermi tutar? Hələ beləsi yaranmayıb. Qısqanclıq - bu, enerjini
boşuna itirməkdir. Yoxsa mən nəyisə başa düşmürəm? Əgər insan yaxşı oxuya
bilirsə, mən onu sevirəm. Mən Allaya pərəstiş edirəm. Belə gecələrdə isə adi
vaxtlardan fərqli olaraq ona 20 dəfə artıq pərəstiş edirəm. Çünki onun istedadını
yaxından izləmək imkanı qazanıram. Bu, xüsusi xoşbəxtlikdir. Mən ona deyirəm:
"Çoxları, hətta bilmir ki, sən oxumağı necə bacarırsan”.
- Bəs nəvaxtsa kişilərə qısqanclıq etmisiniz?
-
Qısqanclıq rüsvayçı hissdir. Onunla mübarizə aparmaq lazımdır. 18 yaşında, hətta
30 yaşında qısqanclıq etmək olar. Amma 50 yaşında, bu, tamamilə ayıbdır. Yaş
sizi çərçivəyə salır. Bu, artıq qısqanclıq yox, hərəkət etmək deməkdir.
- Yayda Yurmalada hava isti və şən olur. Siz orada
qışda nə edirsiniz, darıxdırıcı deyil?
- Mənimçün
Yurmalada ən xoşbəxt vaxt yay mövsümünün bitdiyi vaxtdır. Mən çimərliyə çıxıram
və uzun, boş yolla piyada gedirəm. Dəniz, qum, üfiq, təmiz hava, sakitlik...
Bax, bu, hissdir – heç hara qaçmaq lazım deyil, telefon işləmir, bütün stress
keçib gedir. Yurmalanın qışı isə dayanacaqdır.
- Bəs həyatın ötüb keçməsi hissi yoxdur?
- Yox, nə
danışırsınız? Mən necə olmuşdusa, 6 il dalbadal Yurmalada yaşayıb işləmişdım.
Burada bütün fəsillərə uyğun qrafikim var. İnanın ki, Yurmalaya həmin vaxt gələn
insanlar bütün ili burada oturmaq istəyərlər.
Mühafizəkaram
- Layma, bəs sizin arzularınız varmı?
- Mən
mühafizəkaram. Dəyişikliyi sevmirəm. Hər şeyin adi vaxtlarda olduğu kimi
olmasını istəyirəm. Təki, pis xəbərlər eşitməyim. Kimsə xəstələnməsin,
ağlamasın, hər şey yaxşı olsun. Ona görə də mənim bu gün arzularım belədir: qoy
həyat öz axarı ilə getsin və hər şey yaxşı olacaq.
- Siz özünüz-özünüzü tərbiyə edirsiniz? Hansı
xarakteriniz var ki, ona qarşı mübarizə aparırsınız?
- Nə
danışırsınız, mən özümə pərəstiş edirəm. Ancaq təkcə çılğınlığım olmasaydı...
Çox illər bundan əvvəl bununla mübarizə aparmalı idim. Mən nadir hallarda səhv
edirəm. Ancaq haqsız olduğumu demək mənimçün çətin deyil. Başqalarının səhvlərini
özüm bağışlayıram.
- Yaxşı həyat üçün pul lazımdır. Bu, çox şey deməkdir?
- Pul
onları yığmaqdan ötrü, özünü ən varlı adam saymaqdan ötrü lazım deyil. Bu, məni
maraqlandırmır. Pulqabı azadlıq üçün lazımdır. Yəni sən dostunu gəzintiyə və ya
restorana dəvət etmək üçün düşünməyəsən.
- Siz güclüsünüz?
-
Hamımız güclü insanlarıq. Nə qədər ki bizim qarşımızda qapılar bağlı deyil və
öz-özümüzlə tək qalmamışıq...
Rus mətbuatından
çevirdi
Təranə Məhərrəmova