Özbəkistan Avropaya çıxışı necə əldə edəcək?
Özbəkistanın yeni rəhbərliyi ölkənin iqtisadi cəhətdən inkişafına
nail olmaq üçün hər cür addımlara əl atır. Əvvəlki rəhbərlikdən fərqli olaraq,
regional və beynəlxalq əməldaşlığa böyük önəm verən yeni administrasiya bu
sahədə ciddi addımlar atmaqdadır. Məsələn, əksəriyyət hesab edirdi ki, yeni
prezidenti Şövkət Mirzoyev ilk səfərini qonşu dövlətlərə deyil, Rusiyaya
edəcək. O isə bu proqnozları rədd edərək, prioriteti qonşu dövlətlərə, konkret
olaraq Türkmənistan və Qazaxıstana yönəltdi. Ardınca da Azərbaycan və
Gürcüstana özbək nümayəndə heyətləri göndərilib. Konkret olaraq, Tbilisidə
səfərdə olan Özbəkistan parlamenti spikerinin müavini Sadık Safayev Gürcüstanın
baş naziri Georgi Kvirikaşvili ilə görüşdə ticarət-iqtisadi, o cümlədən
regional infrastruktur layihələrini müzakirə ediblər. Özbəkistan üçün xüsusi
maraq doğuran hal Qafqaz nəqliyyat dəhlizidir. Bu dəhliz özbək yüklərinə Qara
dənizin limanlarına, eləcə də Türkiyənin Mersin limanına, oradan isə Avropaya
çıxış imkan verir. Tbilisiyə qədər isə Özbəkistan parlamentinin nümayəndə
heyəti Bakıda səfərdə olub. Məqsəd Özbəkistan, Azərbaycan və Gürcüstanla
nəqliyyat-kommunikasiya əməkdaşlığı qurmaqdır. Əvvəllər analoji razılaşma
Özbəkistan baş nazirinin birinci müavini Rüstəm Əzimovun bu ilin martın 1-də
Ankaraya səfəri zamanı əldə olunub. Özbəkistan öz mallarının Avropaya çıxarmaq
üçün istənilən imkanları nəzərdən keçirir. Bu məhsullar təbii qaz, pambıq,
uran, əlvan metallar, sement, avtomobillər və tərəvəz məhsullarıdır.
Məşhur özbək iqtisadçısı Bəxtiyar Erqaşevin qənaətinə görə, əsas
məsələ bütün Qafqaz marşrutu boyu vahid tarif sisteminin formalaşdırılması və
həyata keçirilməsidir. "Söhbət Özbəkistandan Türkmənistanın Türkmənbaşı
limanına kimi nəqliyyat-tranzit magistralının formalaşdırılmasından gedir. Ən
əsası, sonra bu xəttin Bakı, oradan isə Bakı-Tbilisi-Qars dəmir yolu ilə
Gürcüstana, oradan isə Türkiyənin Aralıq dənizi sahilindəki Mersin limanına
uzanmasına nail olmaqdır. Bu isə o deməkdir ki, Yaxın Şərq, Şimali Afrika,
Avropa, hətta Birləşmiş Ştatlara çıxış əldə ediləcək”, - deyə B. Erqaşev
bildirib. Ekspert xatırladıb ki, 2017-ci martın 18-də Daşkənddə Azərbaycan,
Gürcüstan, Özbəkistan dəmir yolları rəhbərlərinin birinci üçtərəfli görüşü
keçirilib. Görüş zamanı tərəflər yükdaşımalar sahəsində problemlərin operativ
həlli məqsədilə hər bir ölkənin ayrı-ayrılıqda dəmir yolu nümayəndəliklərinin
açılması barədə razılıq əldə ediblər. Üstündən bir həftə keçəndən sonra Bakı və
Tbilisidə artıq konkret danışıqlar start götürüb. Ötən gün də özbək
parlamentariləri Gürcüstanın Anakliya limanını nəzərdən keçiriblər. Bu liman
Gürcüstanın dəniz qapılarına və "Böyük İpək yolu” layihəsinin bir hissəsinə
çevrilməlidir. Bu da Qafqaz marşrutu ilə yüklərin daha bir daşınma variantıdır.
Özbəkistan hazırda yeni tərəfdaş axtarışındadır. "Mənim qənaətimcə, hazırda ən
aktual məsələlərdən biri yaxın qonşularla münasibətlərin intensifikasiyasıdır”,
- deyə ekspert Sadık Safayev bildirib.
Təsadüfi deyil ki, Özbəkistan prezidenti Şövkət Mirzoyevin birinci
səfəri də məhz Türkmənistana olub. Aşqabadda nəqliyyat-tranzit sahəsində, o
cümlədən Türkmənistan və Özbəkistanın dəmir yolu idarələrinin əməkdaşlığı ilə
bağlı saziş imzalanıb. İki ölkənin liderləri Amudərya üzərindən yeni avtomobil
və dəmir yollarının açılışını həyata keçiriblər. "Beləliklə, Özbəkistan öz
mallarını Türkmənbaşıya çıxarmaq barədə imkan əldə edib”, - deyə Erqaşev
bildirib.
Yeri gəlmişkən, Aşqabad
nəqliyyat-kommunikasiya sahəsinin inkişafı ilə bağlı Türkmənbaşı limanının
yenidən qurulması ilə bağlı 2 milyard dollarlıq layihə həyata keçirir. Bu işlər
sahəsində limanının yükburaxma qabiliyyəti il ərzində 15 milyon tona çatacaq.
Onun sözlərinə görə, bu, yeni nəqliyyat layihəsi deyil, "Avropa-Qafqaz-Asiya
nəqliyyat dəhlizi” ideyası isə TRASEKA layihəsi çərçivəsində reallaşır.
"Türkiyə-Gürcüstan-Azərbaycan-Türkmənistan-Özbəkistan xətti bu yolun bir
hissəsidir. Çin-Qırğızıstan-Özbəkistan nəqliyyat dəhlizi ilə bağlı işlər
başlandıqdan sonra bu layihənin loqistik davamı olacaq.
Çin-Qırğızıstan-Özbəkistan nəqliyyat dəhlizi ilə bağlı təklif hələ 1996-cı ildə
səslənmişdi. O zamandan bəri də bu barədə çox danışılır. Hətta onun
texniki-iqtisadi əsaslandırılması həyata keçirilib. Lakin hələ də praktiki
cəhətdən reallaşmayıb”, - deyə Erqaşev vurğulayıb. Məsələ ondadır ki, Moskva
Çin-Qırğızıstan-Özbəkistan dəmir yolu xəttinin inşasına qarşı çıxır. Rusiyalı
ekspertlər bildirirdilər ki, əgər xətt inşa olunarsa, onda Rusiyanın
Qırğızıstanda hərbi, iqtisadi və mədəni iştirakına son qoyulacaq. Yol həm də
Rusiyanın təhlükəsizliyinə problem olacaq. "Nəqliyyat dəhlizləri arasında
rəqabət hər zaman olub və olacaq da. Hər bir ölkə nəqliyyat axınının məhz öz
ölkəsinin ərazisindən keçməsinə çalışır. Rusiya da hər zaman Çin və Avropa
arasında yüklərin öz ərazisindən daşınmasında maraqlı olub. Lakin bizim
barəsində danışdığımız layihə 20 illik tarixə malikdir. Artıq onun böyük bir
hissəsi inşa edilib, test rejimində ilk teplovozlar da keçib. Hazırda yüklərin
daşınması ilə bağlı prosedur məsələləri müzakirə olunur - tariflər, qiymət,
malların növləri, nomenklaturası və s. Bundan əlavə bu müddət ərzində vəziyyət
də dəyişib”, - deyə Bəxtiyar Erqaşev bildirib. Onun qənaətinə görə, Çin-Rusiya
yaxınlaşması çərçivəsində Rusiyanın Mərkəzi Asiyada və Çinin İpək yolu iqtisadi
qurşağı təşəbbüslərini sinxronlaşdırmaq gərəkdir. Belə olan halda, Çin və
Rusiya arasında razılaşma əldə oluna bilər və layihə tezliklə reallaşar:
"Çünki, bu olmadan, hazırda bizim bəhs etdiyimiz Avropa-Qafqaz-Asiya layihəsi
başa çatmayacaq”.
Azər NURİYEV