Yuxuma girən lalə talası
Elə bu günlər idi. Bir neçə yoldaş istirahət
və bayram günlərində harasa getmək fikrinə düşdük. Seçim müxtəlif idi. Birimiz
Dərbəndə, o birimiz Təbrizə, digərimiz Tiflisə, başqa birimiz isə yaxına -
Lahıca getmək istədiyini söylədi. Həmrəylik üçün demokratik seçim elədik və məlum
oldu ki, yolumuz qədim Tiflisədir. Gürcülərin sözü ilə desək, Tbilisiyə.
Daha kimsənin "mıkk" eyləyəcək
fürsəti qalmadı.
Cibimizi qurdaladıq, hərə imkanı olanını qoydu
ortaya. Əlinin nuh əyyamından qalan "Mersedes"ni "kirayə"
elədik. Onu da deyim ki, avtomobil barədə söhbət düşəndə o, deyir ki, dünyada
ikicə maşın var, biri "Mersedes"dir, o biri də yerdə qalanlar.
Xatirələrə
bulaşmış narın yağış yağırdı...
Bakıdan
gecəyarı yola çıxdıq. Narın yağış yağırdı. Şəhərin küçə işıqları isə elə bil
mürgü vururdular. Arabir yanımızdan ötüb keçən avtomobillərin təkərləri
şırıltıya bənzər xoş bir səs çıxarır, arxa işıqları hərəkət edən lalələrə
bənzəyirdilər. Gündüzü arı pətəyinə bənzər bu şəhərin gecələri mənim çox xoşuma
gəlir. Yeniyetməliyimi və gəncliyimi yaşadığım Bakının təqribən qırx illik
görüntüləri ürəyimdə əski kino lenti kimi yaşayır. Bu barədə mən saatlarla
danışar, hər hansı məhəllənin bir vaxtlar necə olduğunu təsvir edə bilərəm.
Bakı paytaxtımız olmaqdan başqa, mənim tale şəhərimdi...
Birdən Əli dedi:
- Nə
olub, gəmilərin batıb, belə birtəhərsən ey...
Mən
həmişəki əda ilə:
- Yaxşı,
yenə başlama, - dedim.
Loğman
arxadan əlavə etdi:
- Sən
canın, onunla işin olmasın, qoy sakit otursun...
Yağış
bərkimişdi. Maşının siləcəkləri şüşəyə düşən çoxsaylı damcıları sıyırıb
kənarlara atırdı. Ancaq az keçmirdi ki, yenə damcılar o yerləri isladırdı...
Pəncərədən alaqaranlıqda gördüklərim məni daha uzaqlara çəkib aparırdı. Yadıma
səfər yoldaşım Loğmanın yağış şeiri düşdü. Nədənsə mən hər dəfə o şeiri
oxuyanda elə bilirəm ki, Loğmanla eyni kənddə, eyni məhəllədə böyümüşük, qonşu
kəndə məktəbə birgə getmişik, özü adından da gözəl müəllimənin şagirdi olmuşuq,
geniş Küdrü düzündə payız-yaz yağışlarında bu yerdə dəfələrlə o yan-bu yana
ayaqyalın qaçmışıq, yaşıdlarımızla çilingağac, dirədöymə, qayışgötürdü
oynamışıq. Amma belə deyil. Loğman Füzuli rayonunda doğulub, Quruçayın
ətraflarında boya-başa çatıb. O Quruçay ki, bəzən aylarla quruyur, deyirsən ki,
daha bir də bu yataqla su gəlməz. Amma yazağzı çay yatağına sığmır, böyük-böyük
ağacları ağzına alıb üzü aşağılara aparır. Bizim kəndin yaxınlığından ötən
Cəngi çayı kimi....
"Yağış” şeirinin sonu belədir:
Belə ki
başlayıb bu gurşad yağış,
İlıq
təsəllilər soyuyacaqdır.
Dərdini-odunu
unudub birdən,
Hardasa
gözünü yollara dikən,
Ümidli
bir xəstə uyuyacaqdır.
Belə ki
başlayıb bu gurşad yağış,
Kəndin
ayaqyalın uşaqları tək
Baş alıb
sinəmdən qaçacaq ürək.
Yolların
üstünə səriləcəkdir,
Yağışın
altında bir əlçim qar tək
əriyəcəkdir.
Belə ki
başlayıb bu gurşad yağış,
Çətin ki
uyuyam, çətin ki yatam...
Loğman
Bakı Dövlət Universitetinin riyaziyyat fakültəsini bitirdikdən sonra öz
kəndlərində müəllim işləyib, ailə qurub, öz əlləri ilə Quruçayın daşları ilə
ikimərtəbəli ev tikib, gözəl bağ salıb. Həyətində hər cür rahatlıq yaradıb.
Lakin...
O çağlar
haqqında danışanda Loğman kimi mən də heç vaxt görmədiyim o həyət-baca, o bağ
üçün çox vaysınıram...
Lalə dənizində qəhvəaltı
Səhər
yeməyi üçün şirniyyat, pendir, yağ və sair almışdıq. İki termos da dolu idi.
Əvvəlcə istədik Gəncədə çayxanada oturub qəhvəaltı edək. Sonra bu istəkdən vaz
keçdik. Sübh çağı Gəncəçayın sahilindəki yeni bazara girdik, qəttəzə Gəncə
qaymağı, isti təndir çörəyi alıb yola düzəldik. Hava buludlu olsa da xoş idi.
Ötən gecə buralara yağış düşməmişdi. Xeyli getmişdik ki, yolun kənarında
qıpqırmızı lalə talası gördük. Allah, necə də gözəl mənzərə idi! Günəş
gülümsəsəydi, yəqin ki, daha gözəl görünərdi. Dayandıq. Yeyib-içəcəklərimizi
götürüb girdik lalə dənizinə. Məni bağışlayın, o gözəlliyi təsvir eləmək həddim
deyil... Gərəkdir ki öz gözlərinizlə
görəsiniz. O anlarda ürəyimdən keçdi ki, qayıdanda bir neçə saatlığa Gəncəni
gəzib-dolaşmaq yaxşı olar. Qohumlara, dostlara salam verər, Xan bağında bir çay
içərik...
Lalə
dənizindən ayrılmaq bizim üçün asan olmadı. Axırda Əziz dedi ki, çıxın, bizi
Tiflis gözləyir...
O lalə
talası indi də ürəyimdə bir təbiətin şah əsəri kimi yaşayır. Harda lalə gülü və
Lalə adlı qız görsəm, o çiçək dənizini xatırlayıram. Rəhmətlik şair, filosof
Aslan Aslanov yəqin ki, haçansa bu yerdən keçəndən sonra belə yazıb:
Yazın ortasında Gəncə çölündə,
Çıxıblar dərəyə, düzə lalələr...
Bostanşəhər
indi Rustavidir
Hələ də
tipik sovet şəhərinə bənzəyən, Gürcüstanın iri ağır sənaye mərkəzi sayılan və
bir vaxtlar Daşkəsənin dəmir filizi emal olunan Rustavinin çala-çuxur küçələri
yağış suları ilə gölməçəyə dönmüşdü. Adını unutduğum mehmanxanada sakitlik
vardı. Birinci mərtəbədə oturub müştəriləri qeydə alan gürcü xanımları Bakıdan
gəldiyimizi eşidəndə gülümsədilər. Mənə elə gəldi ki, bu təbəssümün arxasında
nəsə var. Ancaq onlar gürcü dilində danışdıqlarından bir şey anlamadım.
Səliqə-səhman baxımından daha çox əyalət mehmanxanalarına oxşayan binanın
yuxarı mərtəbəsində məskunlaşmağımız ürəyimcə idi. Buradan baxanda şəhərin çox
yeri aydın görünürdü. O qədər də uca olmayan dağların əhatə etdiyi Rustavinin
dükan-bazarı, marketləri də o qədər böyük və zəngin deyildi. Sumqayıtla
müqayisə etsək, başımın üstündə Allah var, Rustavidə səliqə-sahman, yeni
tikililər, abadlıq işləri də ürəkaçan deyil.
Məlumata
görə, Rustavi Gürcüstannın Aşağı Kartli diyarının (tarixi adı Borçalı
mahalıdır) mərkəzi şəhəridir. Bu yerin adı 1948-ci ilə kimi Bostanşəhər olub.
Şəhər Qarayazı düzündə, Kür çayının sahilində, paytaxt Tiflisdən 25 kilometr
aralı yerləşir.
Nahara
münasib yer axtardıq. Tez olsun deyə, yaxınlıqdakı restorana girdik. Qiymətlər
münasib idi.
Gürcülər
xəngəli çox sevirlər. Xəngəl evlərinə nə vaxt getsən bu xəmir xörəyi yeyə
bilərsən. Onlar hətta gecələr də xəngəl yeyirlər. Biz isə kabab xəstəsiyik.
Buna görə də restorana girən kimi bizə müxtəlif kabablar təklif olundu...
Yağmurdan
çıxdıq, leysana düşdük
Qoca
Tiflis bizi leysanla qarşıladı. Özünəməxsus arxitekturası olan bu şəhərdə
köhnəliklə müasirliyin qovuşması tam aydınlığı ilə hiss olunur. Şəhərin
Rustaveli prospektini gəzdikcə avanqard gürcü memarlığının da şahidi olduq.
Burada göydələn binalar Bakı ilə müqayisədə çox azdı və bir qədər mərkəzdən
aralıdır. Rustaveli prospekti Tiflisin mərkəzi və ən uzun yoludur. Azadlıq
meydanı, Parlament binası, Gürcüstan Elmlər Akademiyası, Akademik Milli Dram
Teatrı və digər mühüm ünvanlar burada yerləşir. Kür çayı üzərindəki şüşə və
metal konstruksiyadan qurulmuş orijinal formalı Dostluq körpüsü də müasir
memarlıq nümunəsidir.
Yağış
olsa da şəhərdə turist dəstələrinə tez-tez rast gəlirdik. Gürcülər qonağa öz
tarixləri və mədəniyyətləri barədə həvəslə
danışmağı xoşlayırlar. Çox çılğındırlar, toplantı, mitinqi çox
sevirlər.
Maşından
düşən kimi cülümbür olurduq. Yaxşı ki, dəyişiyə paltar götürmüşdük... Leysana
görə Tiflisi Kür çayı boyu maşınla gəzməli olduq. Əli yol hərəkəti qaydalarına
o qədər də əməl etmirdi, ancaq, nədənsə, bizi saxlayıb cərimələyən olmadı. Diqqətimi bir də o cəlb elədi ki,
deyəsən Tiflisdə tıxac olmur.
Tiflisin
mərkəzi meydanından kanat yolun uzandığı Dağüstü parka baxanda yaşıllıqlar
qoynunda diqqəti daha çox çariça Tamaranın çağırış səpgili əzəmətli heykəli
çəkir. O dağın müxtəlif yerlərində inşa edilmiş uca kilsələrin üstündəki xaçlı
qüllələri adama elə bil nəyisə çatdırmaq istəyir.
Tiflis
təzadlar şəhəridir
Bu
fikrin təsdiqini Tiflisdə görüb bir az əvvəl sizlərə söylədiklərimiz və müxtəlif
mənbələrdən oxuduqlarımız da sübut edir. Özü də bu təzadlıq təkcə şəhərin
rəngarəng küçə vitrinləri, çoxbiçimli binalar, ötən əsrləri andıran qala
divarları, heykəllər deyil. Buraya gürcülərin çoxunun dindar, eyni zamanda
müasir olmaları, öz mənəvi dəyərlərinə, belə demək olarsa, ikiəlli sahib
çıxmaları və sair də aiddir.
Danışırlar
ki, Tiflisin yaranması gürcü çarı İ Vaxtanq Qorqasalın adı ilə bağlıdır. VI
əsrdə gürcü çarlığının paytaxtı Kartli olub. VII əsrin ortalarında ərəblər, XIV
əsrdə Əmir Teymurun ordusu, XV-XVII əsrlərdə Osmanlı və Səfəvi qoşunları bu
şəhərə yürüşlər edib, xeyli hissəsini dağıdıblar. I Şah Abbasın Tiflisə hücumu
isə daha dağıdıcı olub. 1801-ci ildə Gürcüstanın şərq hissəsi ruslar tərəfindən
işğal olunduqdan sonra Tiflis Gürcüstan quberniyasının inzibatı mərkəzi olub.
"İsti
bulaqlar” mənasını verən Tbilisi ( "tbili" gürcücə "isti"
deməkdir) 1936-cı ilə qədər Tiflis adlanıb. Yazılanlara görə, bu şəhərdə
soydaşlarımızın məskunlaşması V-VII əsrlərə təsadüf edir. Şəhərdə bir vaxtlar
geniş istifadə olunan bir çox yer adları "gürcü"ləşdirilsə də, xalq
arasında elə əvvəlki adı ilə çağırılır.
Qafqaz
Rusiya tərəfindən işğal edildikdən sonra bölgəni idarə edən Qafqaz
canişinliyinin Tiflisdə yerləşdirilməsi bu şəhərin inkişafına, genişlənməsinə
və ictimai-siyasi, mədəni mühitin canlanmasına xeyli təkan verib, bölgədə bir
mədəniyyət mərkəzinə çevrilib. Şəhərdə çoxlu tarixi binalar, müxtəlif səpgili
muzeylər var.
Azərbaycanın
görkəmli ziyalılarının böyük bir dəstəsi Tiflisdə doğulub, orada yaşayıb,
yaradıb. Bu gün də Tiflis arxivlərində həmin ziyalıların fəaliyyətləri ilə
bağlı çoxlu araşdırılmamış sənədlər yatır...
Bu
barədə sizlərə yeni nəsə söyləyə bilməyəcəyimizə görə uzunçuluq etmək
istəmirik.
Mən yarımçıq səfərdən məmnun idim
Tiflisdə
olduğumuz ikinci gün də yağış ara vermədi. Loğmanla marketdən mehmanxanaya
dönəndə tamam islanmışdıq. Çaydan başqa elə bir şey də almamışdıq. Axşamdan qərarlaşdıq ki, əgər sabah hava
günəşli olmasa, daha Tiflisə getməyək və Bakıya qayıdaq.
Səhər
tezdən aldığımız məlumat bizi lap dilxor elədi. Dağlardan baş alıb gələn sel
suları Kür çayını daşırmış, Tiflisin küçələrini palçığa, lillə bulamışdı...
Yığışdıq.
Tiflisi gözdolusu görə bilməməyimiz hər birimizdə təəssüf hissi oyatdı. Lakin
mən bu yarımçıq səfərdən məmnun idim. Çünki bu iki-üç gündə biz bir-birimizə
bir qədər də yaxından bələd olduq, yol boyu çox şey gördük, bəzi mətləblərdən
agah olduq, fikir və düşüncələrimiz qara-quradan təmizləndi. Yaddaşıma
hopanlardan biri lalə talası oldu. O lalə dənizi bütün fəsillərdə ürəyimdə
olduğu kimi yaşayır.
Bir məktub və sualdan gözləri dolan qız
Lahıca
gedərkən yolun üstündəki kənddən sumax, dağ nanəsi və meyvə almaq istədim.
Həyət qapılarının qarşısındakı yekə çay daşlarının üstünə yığdığı məhsulları
satan on-onbir yaşlı qız uşağı bizimlə bacarıqla alış-veriş elədi. Qızın
çöhrəsində xoş bir təbəssüm vardı. Yanaqları elə bil dağ laləsindən rəng
almışdı. Nəsə almaq istəyən qadınlardan biri soruşdu ki, qızım, böyüklərin
hardadır, niyə sənə kömək eləmilər? Qız o xanımın sualına cavab vermək istəmədi
və nədənsə gözləri doldu. Hannan-hana dedi ki, xala, mən nənəmlə yaşayıram...
Nəyə görəsə o dəqiqələrdə yadıma bir qızın "Tumurcuq" qəzetinə
yazdığı məktubu xatırladım. Qız yazırdı ki, atam bizi atıb gedib, neçə ildir
qayıtmır. İndi də harada olduğunu bilmirik. Mən atamı çox istəyirəm. Həmişə
Allaha dua edirəm ki, atam evimizə qayıtsın. Onun evimizdə bir cüt ayaqqabısı
qalıb. Tez-tez o ayaqqabıları silib qapımızın ağzına qoyuram ki, rəfiqələrim,
qonşular elə bilsinlər ki, atam qayıdıb...
Mən o
məktubun ağrısını aylarla yaşadım və indi də harada fikirli bir qız uşağı
görürəmsə, o məktubu xatırlayıram. Hərdən mənə elə gəlir ki, xatırlatdığım o
məktubu da bizə ünvanlayan Lahıc yolunda bir sualdan gözləri dolan, yanaqları
dağ laləsinə bənzəyən həmin o qız idi.
Ömrü boyu al geyinən, bağrı qara olan lalə...
Tələbəlik
illərimin dostu, şair İslam Türkay bu yaxınlarda bir şeirini oxucularına təqdim
etmişdi:
Dözəmmirsən
sən hicrana,
Ay
vədəsiz solan lalə.
Bir
qırmızı fəryad olub ,
Saçlarını
yolan lalə.
Kim
çəkibdir səni dara,
Nədir
köksündəki yara?!
Obaşdan
baxıb yollara,
Ay
gözləri dolan lalə.
Dərdimiz
bir: nə sən, nə mən-
Sıxır
səni bu cöl-çəmən.
Ömrü
boyu al geyinən,
Bağrı
qara olan lalə.
Şeiri oxuduqca Tiflisə səfər zamanı Gəncədən
bir az o yana gördüyüm lalə talası yenə yadıma düşdü. O laləlikdən çəkilmiş
fotolara bir də baxdım və gözüm, könlüm sevindi. Bu yazını da arabir yuxuma
girən o lalə talasına ithaf kimi yazdım.
Səməd
Məlikzadə