“Yüksəklikdə olmaq naminə hər şeyi qurban vermərəm”
Artıq
3 ildir ki, ailəmizin "Xəzər”ində "Evdəkilərə salam” verilişini izləyirik.
Veriliş vasitəsilə sevdiyimiz ifaçıların, sənət adamlarının evlərinə səyahət
etmiş oluruq. Bu veriliş paytaxt tamaşaçıları ilə yanaşı, bəlkə də daha çox
bölgələrimizdə izlənilir və sevilir. Biz də sevimli verilişin sevilən aparıcısı
Aytəkin Mərdanova ilə görüşdük. Öncə onun yaradıcılığına bir nəzər saldıq.Müsahibimiz
2006-cı ildə Bakı Dövlət Universitetinin Jurnalistika fakültəsini bitirib. Beynəlxalq
radio üzrə diplom işi yüksək qiymətləndirilib. Universiteti bitirəndən sonra
bir müddət yazılı mətbuatda müxbir kimi çalışıb. Deyir ki, jurnalistikada yüksəlişə
gedən yol müxbirlikdən başlayır. Daha sonra 5 il "Space” telekanalında, 3 il
ATV-də çalışıb. Artıq 4-cü ildir ki, "Xəzər” televiziyasında işləyir. "Space”
telekanalında "Şişman-şou”, "Azər star”, "Siqnal” və digər verilişlərin aparıcısı olub. Bundan
başqa, "Space”-in səhər verilişlərində müxbir, prodüser, daha sonra isə "Kiçik
qala”, "Hər bazar” verilişlərinin redaktoru olub. Bu gün isə "Xəzər”
televiziyasının ən çox baxılan verilişinin aparıcısıdır.
- "Evdəkilərə salam” verilişi Xəzər
televiziyasında ən çox baxılan proqramlardandır. Yəqin ki, bu nailiyyətə sahib
olmaq sizə heç də asan başa gəlməyib.
-
Elədir. Ümumiyyətlə, insanlara məşhurların şəxsi həyatı, gündəlik qayğıları
maraqlıdır. Görəsən, sevdiyi ifaçı qayınanası ilə necə yola gedir, neçə uşağı
var, evi necədir, hansı şəraitdə yaşayır - kimi suallar hər zaman olub. "Evdəkilərə
salam” verilişi də onların bu suallarına bir cavabdır. Aparıcısı olduğum
veriliş zamanın nəbzini tutur. Məndən olsaydı, tamam başqa səpkidə verilişlər
edərdim. Daha ciddi verilişlərlə tamaşaçıların qarşısında olardım.
Aparıcılıqdan əlavə, uzun müddət televiziyada redaktor vəzifəsində də işləmişəm.
Heç zaman özümü aparıcı kimi formalaşdırmağa çalışmamışam. Düşünmüşəm ki, bu
gün aparıcı da ola bilərəm, amma sənətim jurnalistika olduğu üçün jurnalist də
ola bilərəm. Düzdür, indiyə kimi şou layihələrdə işləmişəm. Onlar da müəyyən qədər
öz sözünü demiş verilişlərdir.
- Bu layihə necə ərsəyə gəldi?
-
Xəzər televiziyasında səhər verilişi olan "Hər şey daxil”-in redaktoru idim.
Verilişdə qısa bir rubrikamız var idi. Belə ki, bu rubrikada müğənnilərin evlərinə
qonaq gedirdik. Zaman keçdikcə, gördüm ki, rubrika tamaşaçılarda böyük maraq
doğurub. Bu layihəni daha da təkmilləşdirib "Evdəkilərə salam” şəklində təqdim
etməyə başladıq və gözləntilərimiz öz nəticəsini verdi, çox reytinqli veriliş
oldu. Biz televiziya işçiləri çalışırıq ki, insanların zövqünə uyğun verilişlər
hazırlayaq və onların sevdiyi insanları çəkib göstərək. Ola bilər, düşünərlər
ki, Aytəkin niyə başqa müğənnini yox, məhz bunu çəkdi? 11 ildir televiziyada
işləyirəm və bunun 6 ilini sırf redaktor vəzifəsində işləmişəm, məsuliyyət mənim
üzərimdədir. İndi sırf aparıcı kimi işləyirəm. İşimin daha mükəmməl olması üçün
tək aparıcılıqla məşğulam.
-
Şou əhli bir qədər kaprizli olur. Hansı
müğənnilərin kaprizi ilə oynamısınız?
-
Elə müğənni olub ki, evinə çəkilişə getmişik, saatlarla oturub onun hamamda duş
qəbul etməsini gözləmişik, hətta biz gəldikdən sonra evini səliqəyə salan, evə
gəlməyini gözlədiyimiz müsahiblərimiz də olub. Bezmirik, çünki bu, bizim işimizdir. Hətta kənardan kimsə deyinəndə,
deyirəm ki, məcburuq, işimizin bir parçasıdır. Layihə çərçivəsində bəzən bölgələrimizdə
qonaq oluruq. Deyirlər ki, gəlin, sizi filan yerlərə aparıb orada qonaq edək.
Deyirəm ki, biz sırf evi çəkməliyik. Məqsədimiz tamaşaçılara nümunəvi ailələri
təqdim etməkdir.
-
Evinə getdiyiniz və orada çəkiliş
apardığınız üçün peşman olduğunuz müsahibləriniz olubmu?
-
Qonaq gedərkən əvvəldən düşünüb məqsədli şəkildə gedirik. Getdiyimiz ev sahibi
ilə münasibətim olmaya da bilər. Amma o insan gündəmdədirsə, insanları
maraqlandırırsa, onun kim olmağının fərqinə varmıram. Onları sevənlərə,
tamaşaçılarına olduğu kimi təqdim etmişəm. Ola bilər ki, özlüyümdə peşman
olmuşam, amma efir üçün əsla.
- Sizin evinizdə necə, "Evdəkilərə
salam” deyən olub?
-
(Gülürük) Ötən il maqazin verilişlərinin biri qonağım olub. Onda gördüm ki, bu,
əslində çox çətin işdir. Sənətçilərimizi başa düşürəm. Əgər evinə kimsə qonaq gəlirsə,
mütləq evdə əskik olan nəyi varsa, onu həll etməlidir. Təmizlik aparmalı, gözəl
süfrə açmalı, əgər-əskikləri aradan qaldırmalısan. İmkanı zəif olan insanları məcbur
etmirəm. Deyirəm ki, çay süfrəsi açarsınız. Əgər mənim bir insanı çəkmək məqsədim
varsa, onun üçün özüm də şərait yaradıram ki, biz öz tortumuzu, şirniyyatımızı
gətirəcəyik, əsas odur ki, çəkilişimiz alınsın. Ötən həftə dəyərli sənətkarımız
Könül Xasıyevanı çəkdik. Cənab prezidentimizin ona verdiyi evdə bizi qonaq
etdi.Bəzi
sənətçilərin hətta ailələrini çox yaxından tanıyıram, problemlərini belə bilirəm.
Bilirəm ki, kimsə həyat yoldaşından ayrılıb, amma tamaşaçıların xatirinə bir
yerdədirlər. Heç vaxt çalışmıram ki, onu şou edim, qabardım. O insanı biabır,
rüsvay etmək mənim məqsədim deyil. Əksinə, deyirəm ki, sizi yaxşı baxımdan
tamaşaçılara göstərmək istəyirəm.
- "Evdəkilərə salam” verilişində
dəyişiklik etməyi düşünürsünüz?
-
Dəyişiklik etmək istəyərəm. O verilişi studiyada da edə bilərik.
- Studiyada edəndə verilişin
formatı dəyişməz?
-
Onu özümüzünküləşdirib camaata maraqlı bir tərəfdən təqdim edəcəyik.
-
Tamaşaçılara şou-biznes, məşhurların həyatı
həmişə maraqlı olub və baxılıb. Filan müğənni kiminlə evləndi, boşandı, evində
nə var, evi necədir? Gedib "lüstr” alırlar, deyirlər ki, Manafın evindəki çilçıraqdandır.
Bunun dəfələrlə şahidi olmuşam.
-
Elədir. Adətən səhnədə olan insanlar adi insanlardan fərqli geyinirlər. Amma
indi zəmanə elə gətirib ki, hamı eyni geyinir. Fikir vermişəm, tamaşaçılar o qədər
diqqətlidir ki, məşhurların süfrələrindəki
əşyalara belə diqqət yetirirlər. Hazırladıqları yeməklərə diqqət edirlər. Mənə
deyirlər ki, filankəs yaxşı süfrə hazırlamışdı, yaxud da filankəsin süfrəsi,
qabiliyyəti heç xoşuma gəlmədi.
-
Yəqin sizə bəxtəvərçilik də verirlər ki,
qonaq gedib yeyib-içirsiniz. Gününüz qonaqlıqlarda keçir.
-
Deyirlər ki, necə formada qalmağı bacarırsan? Məndən soruşurlar ki, nə
hazırlayaq? Deyirəm ki, mənə xurma ilə çay da bəs edər. Təki, söhbətim alınsın,
maraqlı olsun. Əsas odur ki, ananı, atanı, həyat yoldaşını, övladlarını göstərim.
- Əvvəllər bəzi verilişlərdə
aparıcılar müğənnilərin evinə gedir, şkaflarını açır, ifaçıların alt
paltarlarına qədər göstərirdilər. Təbii ki, bu da haqlı qınaqlara səbəb olurdu.
Bəs sizin formatda belə şeylər varmı?
-
Mən elə şeyi sevmirəm. Adətən kişi müğənnilərin evinə gedirəmsə, onların yataq
otaqlarını belə göstərməyi özümə rəva bilmirəm. Qonaq otağı, mətbəx, ailə kifayət
edir. Bu yaxınlarda Aysel Əlizadənin qonağı oldum. Gənc müğənninin çox gözəl
qarderobu var idi. Asif Məhərrəmlinin evində olmuşuq. Onun da rəngarəng geyim,
ayaqqabı qarderobu var idi. Hansı ki, bunu tamaşaçıya göstərmək olar, nə gözəl,
zövqlüdür deyə. Əgər şərait varsa, ona zövqü təqdim etmək lazımdırsa, bunu edərəm.
Özü də bunu istəyirsə. Müğənnilər də var, açıb göstərirlər ki, bu mənim
hamamımdır. Bəziləri də var, özləri xahiş edirlər ki, lazım deyil.
- Sizi həm redaktor, həm də
aparıcı kimi yaxşı tanıyırıq. Hansı daha çətindir?
-
Redaktorluq. Heç vaxt düşünmürdüm ki, mən şou sahəsində çalışaram, həmişə xəbər
aparıcısı olaram deyə düşünürdüm.
- Xəbər aparıcısı olmaq sizə daha
yaxşı yaraşır.
-
Hərdən mənə deyirlər ki, simanda bir ciddilik var.
- Aytəkin xanım, ötən il sizin şəxsi
"İnstagram” səhifəniz oğurlanmışdı. Bunu kim etmişdi?
-
Bu hadisə yayda baş vermişdi. 150 min izləyicim var idi. Tamamilə şəkillərimi,
izləyicilərimi sildilər. Mənə maraqlı gəldi ki, bunu kim edə bilər. Bilmədim.
Ondan sonra yeni yaratdığım "İnstagram” səhifəmi də oğurlamağa cəhd etdilər. Amma
mən nə şou-biznesdə varam, nə də yoxam. Heç kimlə düşmənçiliyim də yoxdur.
- Niyə varsınız, niyə yoxsunuz?
-
Heç vaxt heç kəslə yaxın deyiləm. Əlavə vaxtımda kiminləsə oturum, kimləsə
harasa gedim - belə şeylər çox azdır. Ailə vəziyyətimlə əlaqəli olduğu üçün. Bəlkə
də övladlarım olduğu üçün mənə çətindir. ªou aləmi bir az baºqa aləmdir. Çox
sözlü-söhbətlidir. Gərək bir az çalışasan kənarda gəzəsən, hörmətlə
qarşılanasan. Amma hər kəsin gözəl, özəl günü, tədbiri varsa, orada Aytəkin
olmalıdır. Dəvət edirlər. Mən də dəvət olunan yerə hər zaman gedirəm. Hətta yas
yeri olsa belə, çalışdığım qədər gedərəm. Bizim aparıcılarda ulduz xəstəliyinə
tutulanlar var. Ay mən məclisə getmirəm, hər məclisdə iştirak etmirəm, özlərini
yuxarıdan aparırlar. Mənsə belə düşünürəm, mənim heç bir aparıcıdan əskiyim və ya
artıqlığım yoxdur.
- Siz hər nə qədər şou-biznes
nümayəndələri ilə çalışsanız da, öz üslubunuz və dəst-xəttiniz var. Bunu sizin
geyimlərinizdən də açıq görmək mümkündür. Açıq geyinməyə həyat yoldaşınız icazə
vermir?
-
Mənə qadağa yoxdur, istəsəm geyinərəm. Mən elə düşünürəm ki, tamaşaçılar belə
şeyləri sevmirlər. Birincisi, insan özünə, sonra da onu sevənlərə hörmət qoyur.
Açıq-saçıq sevmirəm, geyinənlərə də pis baxmıram. Hər kəsin şəxsi işidir. Şəxsi
həyatımla gündəmdə olmağı sevmirəm. Nə yaxşı, Allah gözəl ailə qismət edib,
övladlarım, həyat yoldaşım, sevdiyim işim var. Bunlar mənə kifayət edər,
şan-şöhrəti sevmirəm. Yüksəklikdə olmaq üçün müəyyən şeyləri qurban vermərəm.
Allah nə qismət edib, o da olsun.
- Kaprizli insanlar olurmu ki, "filankəsin
evinə getmisən, mənim evimə gəlməmisən” deyirlər?
-
Bunu mənə edə bilmirlər, çünki bilirlər ki, bitərəfəm. Əgər mənim yaxın rəfiqəmin
kimdənsə xoşu gəlmirsə, mən də belə edim - bu məndə yoxdur. Qonaq gedirəm və
özlərindən soruşuram. Çünki hər adam ailəsinə, evinə hər kəsi yaxın buraxmır.
Soruşuram ki, kimlərin sizin qonağınız olmağını istərdiniz? Getdiyim yerdə
qalmaqal, söz-söhbət olmağını istəmirəm. Ailəni pis baxımdan tamaşaçılara təqdim
etməyi, hörmətdən salmağı istəmərəm. Əksinə, deyirəm ki, bizim belə gözəl ailələrimiz
var ki, tamaşaçılarımıza örnəkdir. Məncə, belə insanları göstərmək yaxşıdır. Həmişə
belə olub ki, adi insanlar efirlərə baxıb filankəsin nə gözəl geyim tərzi, ailəsi,
uşağı var deyiblər. Bu, tərbiyəvi bir şeydir. Qoy tamaşaçılar yaxşı şeyləri
götürsünlər. Qoy görsünlər ki, Könül Xasıyeva övladı üçün necə cəhd edir. Onun
üçün hər şeyi etmək istəyir. Yaxud Mələkxanımın, Tacirin nə gözəl ailəsi var. Məsələn,
bu yaxınlarda Abbas Bağırovun Gəncədə ata-anasının evində qonaq olduq. O,
valideynləri üçün nə gözəl şərait qurub. Rahat yaşasınlar deyə. Vasif Məhərrəmlinin
anası Qazaxda yaşayır. Onun üçün elə bir şərait qurub ki, elə bil ki, şəhərdə
yaşayır. Bax, belə şeyləri özlərinə ibrət götürsünlər.
- Bəzən şou müxbirlərini ciddi
jurnalist hesab etmirlər. Sizin buna münasibətiniz necədir?
-
Şou o qədər də asan sahə deyil. İndi insanları ağlatmaq daha asandır, nəinki əyləndirmək,
güldürmək. Bunu biz efirlərimizdən, gələn reytinqlərimizdən görürük ki, hər kəsin
verilişi baxılmır, tutmur. Hər aparıcıya maraq oyanmaz. Bilmirəm başqalarının
gözündə necə bir insanam, amma mənə elə gəlir ki, tamaşaçılar hansısa aparıcını
görəndə efiri çevirirlər. O qədər neqativ var, yaxud efirə çıxıb insanlara ağıl
verənlər var, amma tamaşaçı deyir ki, get əvvəl öz ailəni düzəlt, sonra gəlib
ağıl verərsən. Müəyyən sevilən aparıcılarımız da var. İnsanlar onları sevirlər.
İstər Xəzər olsun, istərsə də digər telekanallarda. Onlar insanlara mənfi
enerji, mənfi aura vermirlər. Bir də bilmirəm insanlar o sözü mənə necə deyə
bilərlər, çünki öz işimdə, öz sənətimdəyəm. Bu işə də öz ağlımla, sənətimlə, əziyyət
çəkməklə nail olmuşam, arxamda heç kimim olmayıb ki, mənə dəstək versin, irəli
çəksin. Ancaq öz ağlımla, qabiliyyətimlə hər zaman çalışıb irəli getmişəm. Olub
ki, aparıcı olmuşam, təzədən enib müxbir olmuşam. Sabah həyat elə gətirə bilər
ki, bu gün Aytəkin aparıcıdır, tanınır, amma sabah mən yenidən müxbir, prodüser
kimi işləyə bilərəm. Şükür Allaha ki, televiziyaya aid olan hər bir işi
bacarıram. Bunu hər aparıcı bacarmır. Gedib yazılı mətbuatda da çalışa bilərəm.
Əgər maddiyyata ehtiyacım varsa, öz halal zəhmətimlə, peşəmlə, sənətimlə niyə də
etməyim?
Xəyalə Rəis