Yol üstündə tikinti - Fotofakt
Bu günlərdə Suraxanı rayonu Yeni Günəşli qəsəbəsi V
massivindəki 12-ci binanın sakinlərinin istifadə etdiyi yolun hasara alınması haqlı narazılığa səbəb olub.
İşin qəribə tərəfi isə budur ki, hasara alınan ərazidə hansı şirkətin iş
aparacağı, hansı obyektin tikiləcəyinə dair heç bir göstəriş qeyd edilməyib.
Belə demək olarsa, yolun nə məqsədlə,
kim tərəfindən, hansı sifariş əsasında hasara alındığı haqda sakinlərə heç bir
məlumat verilmir. Biz də məsələnin ciddiyyətini və sakinlərin narazılığını nəzərə
alaraq mövzunu araşdırmaq qərarına gəldik.
Suraxanı
Rayon İcra Hakimiyyətinin Rayon Təsərrüfatı şöbəsinin müdiri Mehman Hüseynovla əlaqə saxladıq. O, hələlik hasara alınan ərazidə
tikinti işinə start verilmədiyini bildirdi: "Sözügedən ərazidə hələ ki, heç bir
tikinti işi aparılmır. Tikintinin
aparılması üçün sənədlər tam olaraq hazırdır. Lakin camaatın etirazı ilə əlaqədar
bəzi suallar yaranıb deyə, iş aparılmır. Tikinti şirkəti bu ərazinin yaşıllıq ərazisinə
düşmədiyini qeyd etsə də, sakinlər əksini deyir. Biz hələlik məsələ ilə bağlı layihələndirmə və
şəhərsalma əsaslandırılmasına baxırıq. Amma layihədən belə görünür ki, tikinti yaşıllıq ərazisinə düşür. Məhz buna
görə də hələlik orda iş aparılmır. Ölçü-biçi iş aparıldıqdan sonra yekun qərar
veriləcək. Qeyd edim ki, tikinti İBİMM inşaat şirkəti tərəfindən həyata keçirilməlidir.
Amma ümumilikdə Bakı şəhərində çoxmərtəbəli binaların tikintisinə BŞİH sərəncam
verir. Ona görə də biz sadəcə olaraq bu
tikintinin yaşıllıq ərazisinə düşüb düşmədiyin araşdırırıq. Onu da qeyd edim
ki, şirkətin tikinti sərəncamı var və şəhərsalma əsaslandırılmasını işləyiblər.
Sənədlər tam qaydasındadır”.
Yol təhlükəsizliyi üzrə
ekspert Azər Allahverənovbildirdi ki, bu, əslində
çox ciddi bir məsələdir: "İstənilən ərazidə
tikinti aparılan zaman orada bir sıra təhlükəsizlik, xüsusilə də əhalinin təhlükəsiz
hərəkəti məsələsinə mütləq nəzər yetirilməlidir. Dəfələrlə şahidi olmuşuq ki, bəzi
tikinti şirkətləri hansısa ərazidə tikinti işləri aparan zaman yolları kəsib
tikinti meydançasını bir növ həmin yolların üzərində aparılır. Nəticə etibarilə
bu da piyadaların hərəkətinə xeyli maneə törədir. Lakin istənilən halda
piyadalar öz yoluna davam etməlidir. Tikinti şirkəti piyadanın təhlükəsizliyini
təmin etməyə borcludurlar. Amma indi şirkət hasarlanmanı yolun üzərində aparır.
Təəssüflər olsun ki, qeyd olunan məsələlər üzərində müvafiq qurumların nəzarəti
zəifdir. Sakinlər belə məqamda müvafiq qaydada aidiyyəti qurumlara müraciət etməlidirlər.
İlk növbədə şirkətlə əlaqə saxlamalıdırlar. Şirkətin adı qeyd olunmayıbsa, vətəndaşlar
tikinti işlərinə cavabdeh olan hansısa quruma, yaxud yerli icra orqanlarına
müraciət edə bilərlər. Əgər yerli icra orqanlarının da məsələdən xəbəri
yoxdursa, bilavasitə digər icra qurumlarını bu prosesə cəlb etmək olar. Təhlükəni
yaradan və səbəb olanların kimliyi bəlli olmalıdır. Müvafiq qurumlar bu məsələni
çox tez bir zamanda yoluna qoya bilərlər”.
Mütəxəssis
Cahangir Qocayev qeyd
etdi ki, vəziyyətdən çıxış üçün sakinlər ilk növbədə bələdiyyə və yerli icra
qurumuna müraciət etməlidirlər: "Çünki həmin tikintiyə ərazinin ayrılması
haqqında yəqin ki, adını çəkdiyim qurumlar qərar qəbul ediblər. Sakinlər bələdiyyəyə
müraciət edərək yolun bağlı olduğunu bildirməlidirlər. Bələdiyyə də sakinlərə həmin
ərazidə nəyin tikiləcəyi, tikintinin hansı şəxs və ya şirkət tərəfindən həyata
keçirildiyinə dair məlumat verməyə borcludur. Bələdiyyədə bu haqda məlumat
yoxdursa, onlar bu haqda İcra Hakimiyyətinə sorğu göndərməlidir. Belə hallar
ümumilikdə qanun pozuntusu hesab olunur. Tikintinin hansı layihə əsasında həyata
keçirildiyinə dair məlumat verilməlidir. Əgər belə məlumat yoxdursa, bu,
birbaşa qanun pozuntusudur. Amma bu kimi neqativ halların qarşısını almaq üçün
bələdiyyə əvvəlcədən bu məsələni özü tənzimləməlidir və sakinlər bu haqda əvvəlcədən
məlumatlandırmalıdır. Çünki bu, onların işdir. Təəssüf ki, bəzən kimlərinsə məsuliyyətsizliyinə
görə belə neqativ hallara rast gəlinir”.
Sonda onu da qeyd edək ki, məsələ ilə bağlı Bakı Şəhər
İcra Hakimiyyətinin mövqeyini öyrənməyə çalışsaq da, iş gününün sonunadək zənglərimizə
cavab ala bilmədik.
Adıçəkilən şirkətin isə heç bir əlaqə vasitəsini
tapa bilmədik.
Şəbnəm
Mehdizadə