Yığışdılar, danışdılar, dağılışdılar
Dünyanın aparıcı dövlətlərinin rəhbərli qlobal problemlərin həlli
üçün müxtəlif adlar altında görüşərək onların həlli üçün fikir mübadiləsi
aparırlar. Fransanın kurort şəhəri Biarritzdə dünya güclərinin platforması olan
"böyük yeddilik" ölkələrinin sammiti baş tutub. Bu sammitdə bir sıra
maraqlı məqamlar diqqət mərkəzində olub. Belə ki, Rusiya bu sammitdən kənarda
saxlansa da, onun masa ətrafına qaytarılması müzakirə predmeti olub. Eyni
zamanda İranın xarici işlər naziri Cavad Zərifin sammitdə "peyda” olması ABŞ
nümayəndə heyəti üçün gözlənilməz olub. Dünya liderləri sammitin məhsuldar keçdiyini
vurğulayır. Bəs görəsən bu sammit dünyanın problemlərinin həlli istiqamətində
hansısa töhfələr verə bilərmi?
Mövzu ilə bağlı "Kaspi” qəzetinə açıqlamasında politoloq Tofiq Abbasov bildirdi ki, bütövlükdə son illər ərzində
keçirilən sammitlərin ab-havası dəyişib: "Yəni, 15-20 il bundan əvvəl lider
dövlətlərin rəhbərlərinin görüşlərində ən azından bütün iştirakçıların
hamısında bir qayə var idi ki, bir konsensus əldə olunsun. Söhbət dünyanın
qlobal siyasətinin gündəliyində duran məsələlərdən gedir. Fransada keçirilən
G7 sammitinin də gedişatı onu göstərdi ki, liderlərin arasında nəinki birlik
yoxdur, hətta onlar bir-birinin ziddinə hərəkət edirlər. Əlbəttə ki, burada
ticari, geosiyasi maraqlar hər şeyi üstələyir. Məsəl üçün, Donald Tramp ABŞ-a düşmən
dövlətlərlə bağlı barışmaz mövqe tutsa da, Rusiyanın bu sammitə qayıdışı və
səkkizliyin bərpa olunması məsələsini aktuallaşdırdı. Yaponiya və İtaliya bu
təşəbbüsü dəstəkləsələr də, digər ölkələr bunu qəbul etmədilər ki, hələlik
Rusiyanın bu sammitdə yeri yoxdur. Söhbət İranın nüvə proqramından, ticari
müharibələrin səngiməsindən gedirsə, bu mövzularda da heç kəs öz mövqeyini
zəiflətmək istəmir. Əksinə, bütün dövlət rəhbərləri hücum mövqeyindədirlər”.
T.Abbasov vurğuladı ki, dünya liderləri ən azından iki dünya
müharibələrinin tarixini yaddan çıxarmamalıdırlar: "Həmin o müharibələrə səbəb
təsir dairələrinin bölünməsi, müxtəlif qitələrdə ayrı-ayrı güc sahiblərinin
mövqelərinin güclənməsi, onların bir-birinə etinasız yanaşması və ondan irəli
gələn münaqişəli vəziyyətlərin kəskin surətdə dərinləşməsi oldu. İndinin özündə
də görürük ki, dünyada xeyli sayda lokal hərbi-siyasi münaqişələr mövcuddur və
bunların əsasında yenidən böyük qlobal müharibə başlaya bilər. Ən təhlükəli
məqam da ondan ibarətdir ki, dövlətlərin nüvə potensialı var və o işə düşərsə planetimiz
böyük fəlakətlə üz-üzə qalacaq. Hesab edirəm ki, hazırda dünya liderləri
problemlərin həllindən daha çox öz mövqelərinin möhkəmlənməsi haqqında
düşünürlər ki, bu da bəşəriyyət üçün ciddi təhlükədir”.
Bakı Politoloqlar Klubunun
sədri Zaur Məmmədov bildirdi ki, G-7 və G-20 kimi sammitlər dünyadakı
qlobal problemləri həll etməsə də, böyük dövlətlərin indiki halda münaqişələrə,
bütövlükdə problemlərə yanaşmasını göstərmiş olur: "Fransada keçirilən G-7
sammiti də çox maraqlı oldu. Bildiyimiz kimi, Fransa prezidenti Emmanuel Makron
tərəfindən Rusiyanın bu formata qaytarılması və əvvəlki kimi G-8-ə keçirilməsi
istənilib. Az sonra Makronun Avropa İttifaqının baş katibi və eyni zamanda
Avropadakı həmkarları ilə görüşərək fikrində dəyişiklik edib. Bunun əksinə
olaraq ABŞ prezidenti Tramp Rusiyanın formata qayıtmasının arzuolunan olduğunu
bildirib. O fikrini bununla əsaslandırıb ki, İran, Suriya, Şimali Koreya kimi
məsələləri Rusiyanın iştirakı olmadan müzakirə edə bilmirlər. Təbii ki, İtaliya
baş nazirindən başqa, Böyük Britaniya, Almaniya, Fransa və Avropa İttifaqı
Trampın bu fikirlərinə soyuq yanaşılıb. Onlar Ukrayna məsələsində hansısa addım
atılmayacağı halda Rusiyanın G-8-ə qayıdışını məqbul hesab etmədiklərini
bildiriblər”.
Z.Məmmədov qeyd etdi ki, G-7 sammitində İranla bağlı da fikir
ayrılığı olub: "Bildiyiniz kimi, Avropa İranla danışıqların davam etdirilməsinin
tərəfdarı olsa da, ABŞ prezidenti Tramp əks fikirdədir. İran xarici işlər
naziri Cavad Zərifin də sammitə gələrək nazirlərlə görüşü də olub. Hətta bəzi
mənbələrin yaydığı məlumata görə, Tramp görüş üçün Zərifi çağırsa da, sonradan onunla
görüşmək istəməyib. Ümumilikdə götürsək, G-7 toplantısı onu göstərdi ki, ABŞ
prezidenti Tramp ilə onun Avropadakı bütün həmkarları arasında fikir ayrılığı
var. Bu, demək olar ki, bütün məsələlərlə bağlıdır. Amma bu sammit eyni zamanda
göstərdi ki, Rusiyaya qarşı sanksiyalar tətbiq edilsə də, Moskvanın təcrid
edildiyi siyasi platformalara qayıdışı qəbulolunandır. Sadəcə olaraq, ayrı-ayrı
məsələlərdə imiclərinə xələl gəlməməsi və Ukraynanın da maraqları nəzərə
alınaraq belə bir addım atılmır. Amma ümumilikdə Rusiyaya qarşı yumşalmanın
şahidiyik”.
BƏXTİYAR