“Yeyəsən qaz ətini, görəsən ləzzətini”
Azərbaycan Respublikasının
Prezidenti yanında Bilik Fondunun "Mədəni maarifləndirmə” proqramı çərçivəsində
Azərbaycan Dövlət Pedaqoji Universitetinin nəzdindəki Dövlət Pedaqoji Kollecində
fəaliyyət göstərən "Mizan” Tələbə Dram Dərnəyi noyabrın 30-da Əbdürrəhim bəy
Haqverdiyevin "Yeyəsən qaz ətini, görəsən ləzzətini” əsəri əsasında hazırlanmış
tamaşasını təqdim edib.
Kollecdə keçirilən premyerada tədris
ocağının direktoru Qulu Novruzov Bilik Fondu ilə əməkdaşlığın müəllim və tələbələr
tərəfindən razılıqla qarşılandığını vurğulayaraq, həyata keçirilən birgə
maarifləndirici layihələrin səmərəsindən danışıb.
Bilik Fondunun icraçı direktoru
Oktay Səmədov dərnəyin
fəaliyyətini yüksək qiymətləndirərək qısa zaman ərzində tələbələrin klassiк
realist dramaturgiyamıza üz
tutmaqla belə səhnə əsərini ərsəyə gətirmələrini
təqdir edib. İcraçı direktor
bildirib ki, maarifləndirmə işində teatr sənətinin xüsusi yeri var.
Dərnəyin bədii rəhbəri, tamaşanın rejissoru, Əməkdar
artist Məmməd Səfa tələbə gənclərin teatr sənətinə marağından bəhs edib, dərnək
üzvlərinin məşqlərdə həvəslə iştirak etdiklərini bildirib. Tələbələrin ifasında
göstərilən tamaşa maraqla qarşılanıb.
Bu ilin martında Azərbaycan Dövlət Pedaqoji
Universitetinin nəzdindəki Dövlət Pedaqoji Kollecində yaradılan dərnəyin bədii
rəhbəri Azərbaycan Dövlət Mədəniyyət və İncəsənət Universitetinin dosenti, Əməkdar
artist Məmməd Səfa, layihənin koordinatoru Bilik Fondunun aparıcı məsləhətçisi
Ramilə Qurbanlıdır. Bilik Fondunun "Mədəni maarifləndirmə” proqramı çərçivəsində
Azərbaycanın mədəniyyəti, incəsənəti, ədəbiyyatının təbliği və tanıdılması ilə
bağlı silsilə layihələr, tədbirlər, görüşlər həyata keçirilir.