Yenidən dirçəldilən ənənəvi sahə
2025-ci
ildə orta məhsuldarlıq 40,0 s/ha olmaqla çəltik əkini sahələri 10 min hektara,
istehsalın həcmi 40 min tona çatdırılacaq. Trend-in məlumatına görə, bu,
Prezidentin sərəncamı ilə təsdiq edilmiş çəltikçiliyin inkişafına dair
2018–2025-ci illər üçün Dövlət Proqramında nəzərdə tutulub. Proqramda qeyd
edilir ki, 2016-cı ildə 2,5 min hektarda çəltik əkilib və 5,6 min ton məhsul
yığılıb.
2017-ci
ildə isə çəltiyin əkin sahəsi əvvəlki illə müqayisədə 2 dəfədən çox artaraq 5,1
min hektara çatdırılıb, ölkə üzrə 15,9 min ton məhsul toplanıb və orta
məhsuldarlıq 31,1 s/ha olub: "Lakin ölkənin düyüyə illik tələbatı 40 min
tondan yuxarıdır və onun böyük bir hissəsi idxal hesabına təmin olunur. Bu
baxımdan Dövlət Proqramının çəltikçiliyin inkişafı istiqamətində həyata
keçirilən tədbirlərin daha da gücləndirilməsinə və bu sahənin inkişafına mühüm
təkan verəcəyi gözlənilir".
Astara Rayon İcra Hakimiyyətinin
başçısı Qəzənfər Ağayev ötən ilin
sentyabr ayında Lənkəranda keçirilən çay, çəltik və
sitrus meyvələri istehsalının inkişafı məsələlərinə dair respublika
müşavirəsində bildirib ki, son illər diqqətdən kənarda
qalan, kənd təsərrüfatının ən gəlirli sahələrindən biri də çəltikçilikdir:
"Aqrar sahəyə olan dövlət dəstəyi və aparılan maarifləndirmə işlərinin
nəticəsidir ki, son iki ildə çəltik əkini 7 dəfədən çox artırılaraq 450 hektara
çatdırılıb. Aqrotexniki qulluğun yaxşılaşdırılması, daha məhsuldar toxumun
əkilməsi ilə bu il 2 min tona yaxın çəltik istehsalı gözlənilir. Artıq çəltik
yığımına başlanıb, bu günə olan məlumata görə, sahələrdən 1750 ton məhsul
yığılıb və biçin davam edir. Bu il rayonumuzda çəltik əkini ilə məşğul
olanların sayı 1345 nəfər olub. Azərbaycan bazarlarında yerini tutmuş, ekoloji
cəhətdən təmiz və keyfiyyətli olan, ətirli Astara düyüsünün ixrac potensialı da
böyükdür. Aparılan təhlillər göstərir ki, rayonun suvarma şəbəkələrini
genişləndirməklə çəltik sahələrini bir neçə dəfə artırmaq mümkündür".
Q.Ağayev
əlavə edib ki, hazırda rayonumuzda 8 kiçik çəltik emalı sahəsi fəaliyyət
göstərir. Növbəti ildə müasir tələblərə cavab verən və saatda istehsal gücü 5
ton olan yeni çəltik emalı və qablaşdırılması zavodu inşa ediləcək: "Bu il
Astara rayonunda ümumi dəyəri 50 milyon manata yaxın çay, çəltik və sitrus
meyvələri tədarük ediləcək. Bu da ölkəmizin ərzaq təhlükəsizliyinə töhfə
olmaqla yanaşı, sakinlərimizin maddi rifah halının yaxşılaşmasına səbəb olacaq”.
Sözügedən müşavirədə Masallı Rayon İcra Hakimiyyətinin başçısı Rafil Hüseynov deyib ki, gələn
il çəltik əkinlərinin iki dəfə artırılaraq 400 hektara çatdırılması nəzərdə
tutulur. Bunun üçün vaxtilə rayonda mövcud olmuş və sonradan baxımsızlıq
nəticəsində və istifadə edilmədiyindən sıradan çıxmış 77 sututarın daxili
imkanlar və "Meliorasiya və Su Təsərrüfatı” Açıq Səhmdar Cəmiyyətinin
bilavasitə yaxından köməyi ilə bərpa olunmasına başlanıb. Bu sututarlar
istifadəyə verildikdən sonra əlavə yaranacaq 8-10 milyon kubmetr suvarma suyu
ilə ən azı 600-700 hektar tütün və çəltik sahələrini suvarmaq mümkün olacaq.
Bəs görəsən çəltikçiliyin inkişafına dair Dövlət
Proqramının qəbul edilməsinin əhəmiyyəti nədir? Proqramda qeyd edilən
məsələlərin həlli üçün kifayət qədər potensial varmı?
İqtisadçı millət
vəkili Aydın
Hüseynov deyir ki, regionların sosial-iqtisadi
inkişafına dair dövlət proqramı çərçivəsində böyük nailiyyətlər əldə olunub: "Regionlarda
infrastruktur problemi, fasiləsiz enerji təminatı və s. kimi ciddi problemlər
artıq öz həllini tapıb. Növbəti mərhələdə prioritet hədəf regionlarda aqrar
sahənin inkişaf etdirilməsidir. Bu baxımdan hər bir regionun xüsusiyyəti nəzərə
alınır. Vacib kənd təsərrüfatı məhsullarının becərilməsi ilə daxili bazar yerli
məhsul hesabına təmin ediləcək. Bu çox mühüm məsələdir. Eyni zamanda, rəqabət
qabiliyyətli məhsulların ixracı üçün geniş imkanlar var. Bu baxımdan cənub
bölgəsində çəltik ənənəvi sahələrdən biri hesab olunur. Çəltik əkinçiliyi ilə
bağlı ölkədə daxili tələbat var. Daxili tələbatın ödənilməsi üçün bu proqramın
qəbul edilməsi çox vacibdir. Proqramda göstərilən nəticələr əldə olunarsa, yerli
tələbatı ödəməklə yanaşı, xaricə də çəltik ixrac edə bilərik. Bu isə bizim kənd
təsərrüfatının inkişafına və ümumilikdə ölkə iqtisadiyyatına təkan verəcək”.
Kənd təsərrüfatı üzrə ekspert Qadir Bayramlı bildirdi ki, çəltik kənd təsərrüfatının önəmli sahələrindəndir: "Çəltik
dünya əhalisinin təqribən 40 faizinin qidasını təşkil edir. Uzun ömürlülər
ölkəsi kimi tanınan Yaponiyada ən çox istifadə edilən qida məhsulundan biri də
düyüdür. Bu baxımdan deyə bilərəm ki, qida təhlükəsizliyinin təmin edilməsində
də çəltiyin rolu böyükdür. Bu, Azərbaycanda da ənənəvi sahələrdən biri hesab
olunur. Bir zamanlar ölkədə onlarla keyfiyyətli məhsul sortu yetişdirilib.
60-cı illərin sonlarından etibarən bu sahəyə olan diqqət azaldı və nəticədə
unudulan bir sahəyə çevrildi. Amma bu sahədə təcrübə və ənənə var. Çəltik Azərbaycanda
əsasən cənub zonasında yetişdirilir. Əgər çəltikçilik sahəsi yenidən inkişaf
etdirilərsə, yerli istehsal özümüzü tam təmin edə bilər və satışda olan aşağı
keyfiyyətli xarici düyülər sıradan çıxar.
Düşünürəm ki, Türkiyə, Orta Asiya, Çin, Vyetnam, Hindistan kimi ölkələrlə
əməkdaşlıq edə bilərik. Bu əməkdaşlıq sayəsində həm təcrübə qazanar, həm də
çəltik yetişdirilməsinin yeni metodları ilə tanış ola bilərik. Qəbul olunmuş
dövlət proqramı yerlərdə düzgün icra edilərsə, biz çəltikçiliyi yenidən
dirçəldə bilərik. Bunun üçün bölgələrdə xüsusilə torpaq, su məsələləri dərindən
araşdırılmalı və təmin edilməlidir. Proqram imkan verəcək ki, yaxın müddət
ərzində Azərbaycan regionun ən çox çəltik yetişdirilən ölkələrindən birinə çevrilsin.
Bunun üçün təbii şərait və böyük potensial var. Amma yaxşı olardı ki, məsələyə
kompleks şəkildə yanaşılsın”.
Şəbnəm