Yeni yolun “köhnə dərdi” - Foto
Azərbaycanda həyata keçirilən
sosialyönümlü siyasətin mərkəzində ölkə vətəndaşları, insan amili dayanır. Bu
barədə Prezident İlham Əliyev öz çıxışlarında dəfələrlə qeyd edib. Məhz bu
siyasətdən irəli gələrək, regional inkişaf proqramları, çoxsaylı sosial
layihələr uğurla icra edilib və edilməkdədir. Bu çərçivədə şəhərlər, qəsəbələr,
kəndlər, məhəllələrarası yollar da yenidən qurulur, genişləndirilir, ən müasir
standartlar səviyyəsinə çatdırılır. Coğrafiyası hər il daha da genişlənən belə
layihələr hər bir Azərbaycan insanının daha rahat yaşamasına xidmət edir. Ötən
ildən təmirinə başlanılan Binəqədi şosesi, həmçinin buradan Abşeron rayonunun
Mehdiabad, Fatmayı, Pirşağı, Digah və digər qəsəbələrinə qədər uzanan yolların
təmiri də bu amala xidmət edir.Aylarla təmirə bağlanan həmin yollar 2017-ci il
dekabrın 29-da dövlət başçısının iştirakı ilə istifadəyə verilib. Beləliklə də Abşeron
rayonunda on minlərlə sakinin yaşadığı məntəqələri birləşdirən Binəqədi-Mehdiabad-Digah-Məmmədli
avtomobil yolunda hərəkət rahatlaşıb. Lakin insanların bu sevinci uzun
sürməyib. İstifadəyə veriləndən cəmi bir həftə sonra həmin yolun
Binəqədi-Balaxanı-Mehdiabad kəsişməsindəki "Abşeron Petrol”
yanacaqdoldurma məntəqəsinin qarşısından, üzü Mehdiabad qəsəbəsi istiqamətində
qazıntı işlərinə başlanılıb. Beləliklə də, ötən il dekabrın 29-da təhvil
verilən və ən müasir standartlara cavab verən avtomobil yolunda asfalt örtüyün
1 metr, hətta bəzi yerlərdə 2 metr eni qazılıb.
Sözügedən ərazidə yaşayan
bir sakin kimi bu mənzərəyə seyrçi qala bilmədim və qazıntı işlərinin nə üçün
aparılması ilə maraqlandım. İş icraçıları bildirdilər ki, qazıntı işləri yeni
kanalizasiya xəttinin çəkilişi ilə əlaqədardır. Onlarla söhbət zamanı bu
işlərin nə üçün yol təmirə aylarla bağlı olarkən aparılmadığını soruşdum. Təbii
ki, heç biri sualımı cavablandırmadı. Belə qərara gəldim ki, məsələni aidiyyəti
qurumların diqqətinə çatdırım. Maraqlıdır, nə üçün aidiyyəti dövlət qurumları
bu yolda təmir-bərpa işləri apararkən, prosesi koordinasiyalı şəkildə
qurmayıblar? Olmazdı ki, su, kanalizasiya və digər xətlər istismara veriləndən
sonra asfalt örtük çəkiləydi?
Məsələ ilə bağlı "Kaspi”yə
açıqlama verən Azərbaycan Avtomobil
Yolları Dövlət Agentliyinin mətbuat xidmətinin rəhbəri Anar Nəcəfli bildirdi
ki, hazırda Xırdalan-Binəqədi-Balaxanı avtomobil yolu yenidən qurulur. Həmin
yolun yenidən qurulması layihəsi çərçivəsində yol boyu Digah, Mehdiabad,
Binəqədi qəsəbələrinə, həmçinin sözügedən əraziyə də su və kanalizasiya xətləri
çəkilir, yaxud yenidən qurulur. Agentlik rəsmisinin sözlərinə görə, öncədən bu
işlərin aparılması ilə bağlı aidiyyəti qurumlara müraciət edilib ki, layihə
çərçivəsində yolun yenidən qurulması işləri bitməmiş yeraltı kommunikasiya
xətləri çəkilsin: "Xırdalan-Binəqədi-Balaxanı avtomobil yolunun Mehdiabad
qəsəbəsinin giriş yolu ilə kəsişməsində bu işlərin aparılması başqa istiqamətdə
mümkün olmadığı üçün məcburiyyət qarşısında yeni təmir edilmiş yolun kənarı ilə
aparılır. Məhz bu səbəbdən yeraltı kommunikasiya xətlərinin çəkilişi ilə məşğul
olan qurum tərəfindən orda kiçik bir hissədə qazıntı işləri aparılır. Sonradan
həmin ərazinin bərpası sözügedən qurumun öz hesabına əsaslı şəkildə bərpa
olunacaq”.
"Azərsu”
ASC-nin mətbuat xidmətinin rəhbəri Anar Cəbrayıllı qeyd edilən
ərazidə kanalizasiya xəttinin çəkilişini 2018-ci ilin layihəsi kimi qələmə
verdi. Bildirdi ki, həmin ünvanda kiçik bir ərazidə kanalizasiya xətti çəkilir
və bu, açıq kanala birləşdiriləcək: "Fikir versəniz, görərsiniz ki, orada
qazıntı işləri yolun yataq hissəsinə düşmür. Əsasən yolun kənarı ilə kiçik bir
hissədə qazıntı işləri aparılır. Çünki, həmin nöqtədə birləşdirici hissə var və
bu hissə də asfaltın qazıntı aparılan kiçik hissəsindədir. Qalan bütün işlər
yolun kənar hissəsi ilə aparılacaq. Bu xəttin çəkilişi layihəsi elə tərtib
olunub ki, heç bir yerdə yolu kəsib keçmir. Yolun qazılan kiçik bir hissəsi isə
işlər yekunlaşdıqdan sonra bərpa olunacaq. Əgər bu layihə 2017-ci ilin layihəsi
olsaydı, o zaman oradakı işlər asfalt örtük yenilənənə qədər
yekunlaşdırılacaqdı. Çünki həmin ərazidəki digər layihələrimizdə bu, belə olub.
Ancaq bu kanalizasiya xəttinin çəkilişi 2018-ci ilin layihəsidir və dövlət
büdcəsindən ayrılan vəsait hesabına mərhələlərlə həyata keçirilir”.
Ekspert Azər Allahverənovun da hadisəyə
münasibətini öyrəndik. O, bizimlə söhbətində bu kimi halların hələ də baş
verməsinə təəssüf etdiyini bildirdi: "Yol infrastrukturuna cavabdeh olan qurum,
yaxud orada iş görən digər bir qurum adətən bəyan edirlər ki, hər hansı işə
başlamazdan əvvəl məlumat verilir, koordinasiya qurulur. Lakin qeyd etdiyiniz
ünvanda baş verən növbəti hadisə reallığın fərqli olduğunu nümayiş etdirir. Əgər
dövlət qurumları arasında əlaqələndirmə lazımi səviyyədə olsaydı, qeyd edilən
mənzərə üzə çıxmazdı. Nə görə yeni çəkilən yol, əsaslı şəkildə yenidən
qurulmasına dövlət büdcəsindən külli miqdarda vəsait xərclənən asfalt örtük bir
həftə sonra yenidən qazılmalıdır? Lap bir metr ərazi olsa belə, yeni çəkilən
asfalt örtüyün qazılması, təmirinə əlavə vəsaitin xərclənməsi yaxşı hal deyil”.
Rufik İSMAYILOV