Yeni neft şokunun yaşanma ehtimalı varmı?
ABŞ prezidentiDonald Trampneft
qiymətlərinin ucuzlaşmasına sevinib.Bunu Tramp özünün "Twitter” səhifəsində
yazıb: "Dünyada neftin qiymətləri ucuzlaşdı. Əla! Bu, ABŞ və bütün dünya üçün
vergi güzəştləri kimidir. Kef edin! 54 dollar bu yaxınlarda 82 dollar idi”, -
deyə o vurğulayıb.Qeyd edək ki, dünyada neftin qiymətləri 7 faiz
ucuzlaşıb. "Brent” markalı neftin bir barelinin qiyməti 62 dollardan aşağı
düşüb, WTI markalı neftin bir bareli isə 53,43 dollara satılır.Son günlər Trampın neftin
qiyməti ilə bağlı verdi açıqlamaların bazara necə təsir etdiyini və 2014-cü
ildəki vəziyyətin yenidən təkrarlanma ehtimalının olub-olmadığını öyrənməyə
çalışdıq.
Neft Araşdırmaları Mərkəzinin rəhbəri, enerji
məsələləri üzrə ekspert İlham Şaban qeyd edir ki, bunun qarşısını almaq üçün tədbirlər
görülməsə, 2014-cü ildəki vəziyyət yaşana bilər: "Hər ölkə və ya şirkət bazara istədiyi
qədər neft çıxarsa, elə bir vəziyyət yaşana bilər. Çünki müşahidələrimə əsasən
deyə bilərəm ki, səhər saat 9-da neftin qiyməti birjada 63,12, indi isə
(günorta saatları – red.) 62,54 dollardır. Yəni neftin qiyməti sürətlə
ucuzlaşmaqda davam edir. Təbii ki, bunun da obyektiv səbəbləri var. Ona görə
ki, neft alğı-satqısı ilə məşğul olanlar gələcəyə çox böyük risklərlə baxırlar.
Bu gün nefti istənilən qiymətə satmağa razıdırlar. Çünki hesab edirlər ki,
sabah və biri gün satacaqları qiymət daha ucuz olacaq. Yayılan informasiyalar
ona dəlalət edir ki, artıq bazarda kifayət qədər neft bolluğu var. İlin sonuna
və o cümlədən 2019-cu ilin birinci rübü üçün bazara təklif edilən neft tələbi
üstələyəcək. OPEC-in son açıqlamasında qeyd edilir ki, 2019-cu ilin əvvəlində
gündəlik bazara çıxarılacaq neft 290.000 barel daha çox olacaq, istehlak isə
210.000 barel azalacaq”.
Ekspert deyir ki, oktyabrın
əvvəlindən bu günə qədər, yəni ay yarımda neftin qiymətində artıq 27 faiz
ucuzlaşma qeydə alınıb: "Bu, kifayət qədər hiss olunacaq göstəricidir. Çünki
2018-ci ilin 9 ayında neftin qiyməti ötən ilin müvafiq dövrü ilə müqayisədə 39
faiz bahalaşmışdı. İndi təsəvvür edin ki, 9 aya 39 faiz bahalaşan neft, 45 günə
27 faiz ucuzlaşdı. Təbii ki, hər şey bazar iştirakçılarından asılıdır. Əgər
onlar gedişata reaksiya verməsələr, hər situasiyaya hazır olmalıyıq. Hesab
edirəm ki, dekabrın əvvəlində OPEC Vyanadakı cari ilin sonuncu konfransında bu
nüansları nəzərə alacaq və hansı addımları atması ilə bağlı nəinki kartel
daxilində, o cümlədən ona dəstək verən OPEC+ ölkələri ilə məsləhətləşib bəzi
qərarlar qəbul edəcək. Bu da bazara öz müsbət təsirini göstərə bilər, hətta
göstərməlidir. Artıq Səudiyyə Ərəbistan rəsmiləri elan ediblər ki, ilin sonunu
gözləmədən 500.000 barel hasilatı azaltmaq haqqında qərar veriblər. Hətta real
rəqəmlərə əsasən, 2019-cu ilin əvvəlinə bazarda 2 milyon barelədək izafi neft
olması gözlənilir. Təbii ki, bu 2 milyon barel bazardakı qiyməti aşağı
salacaq”.
İqtisadçı Vüqar Bayramov bildirir
ki, neftin bazardakı qiymətinin aşağı düşməsi gözlənilən idi: "Neftin
qiymətinin baha olduğu dövrdə mətbuata açıqlamalarımızda qiymətin yüksək
olmasına baxmayaraq, bunun dayanıqlı olmadığını bildirirdik. Çünki
qiymətlərdəki artım real bazaya malik deyildi. Məsələn, bazardakı qiymət 85
dollara qalxan zaman, əslində, real qiymət və ya bazar tarazlığı 60 dollar idi.
Digər tərəfdən də ABŞ-ın İrana tətbiq etdiyi sanksiyalar neft bazarına birbaşa
təsir göstərdi. Amma gözlənilənin əksi olaraq ABŞ İrandan neft idxal edən 8
ölkəyə idxalını davam etdirməsi ilə bağlı bir növ yaşıl işıq yandırdı.
Nəticədə, xüsusən də sanksiyalar fonunda bazar gözlədiyi təsiri almadı. Bu da təbii
ki, dünya bazarında neftin qiymətinə birbaşa təsir edən faktora çevrildi”.
V.Bayramov dünya
iqtisadiyyatında azalmaların olduğunu vurğuladı: "Çin birjalarında qiymətli
kağızların ucuzlaşması ilə neftin qiymətində azalma müşahidə edildi. Eyni
zamanda hazırda bazarda təklif çoxdur. Mövcud vəziyyəti təklifin tələbi
üstələməsi kimi qiymətləndirmək olar. Səudiyyə Ərəbistanı gözləniləndən daha
çox neft hasil etdi. ABŞ artıq neft hasilatına görə birincidir, həmçinin Rusiya
və digər ölkələr də hasilatı artırıb. Bu da nəticə etibarilə qiymətə təsir
etdi. Növbəti il, güman edilir ki, xüsusən də OPEC və ona üzv olmayan ölkələr
hasilatı azaltmasalar, o zaman ucuzlaşma qaçılmazdır. Hətta 2014-cü ilin
yenidən təkrarlanma ehtimalı var. Çünki qiymətlərdə azalmalar davam etdiyi üçün
neftin qiymətinin 60 dollardan aşağı düşməsi mümkündür. Bir müddət öncə BP-nin
rəhbərinin qeyd etdiyi kimi, bu gün neft istehsal edən ölkələr üçün uyğun
qiymət 60-65 dollardır. Güman edirəm ki, OPEC təklifi tarazlaşdırmaqla məhz
60-65 dollar intervalındakı qiyməti qoruyub saxlamağa çalışacaq. Əgər hasilat
artmaqda davam edərsə, bu, neft ölkələri üçün yeni neft şokunun yaşanmasına
gətirib çıxara bilər. Bu baxımdan 2014-cü ilin təkrarlanması riski var. Amma
bütün hallarda OPEC-in mövqeyi və qlobal iqtisadi artımla bağlı rəqəmlər çox
önəmli rol oynayır. Hələlik neft bazarındakı qiymətlər neft ölkələrinin
maraqlarına uyğun olaraq dəyişmir”.
Günel Azadə