Yeni ilin bayram bazarlığı - Reportaj - Fotolar
Qarşıdan
Dünya Azərbaycanlılarının Həmrəylik Günü və Yeni il gəlir. Hər bayramın özünəməxsus
keçirilmə qaydası, adət-ənənləri var. Amma hər bayramda dəyişməyən və əsas diqqət
edilən məsələlərdən biri də süfrənin hazırlanmasıdır. Süfrənin hazırlanması
üçün ilk öncə bazarlıq etmək gərəkdir.
Biz də bazarlıq
üçün elə bazardakı qiymətlərlə maraqlanmaq istədik. Buna görə də Yasamal
bazarına baş çəkdik. Bazar əvvəlki qədər böyük olmasa da, bayram süfrəsi üçün
lazım olan çox şeyi burada tapmaq olar. Bazarda ilk müşahidəmiz bu oldu ki, alıcılar
elə də çox deyildi. Amma biz satıcılara "bazar olsun” deyib qiymətləri öyrənməyə
çalışdıq.
4 nəfərlik ailənin plov xərci
Bayram
süfrəsini bir çox adamlar plovsuz təsəvvür etmədikləri üçün elə biz də ilk
olaraq bu yemək üçün lazım olan ərzaqların qiymətlərini öyrəndik. Satıcı Qalib
Cəfərov deyir ki, 4 nəfərlik ailəyə plov dəmləmək üçün təxminən 300 qram kişmiş
alınmalıdır. Kişmişin kilosu 10 manat olduğu üçün bu edir 3 manat. Kilosu 14
manatdan başlayan ərik qurusunun 250 qramı isə bərabərdi 3,50 manat. Plovda
alça və ya gavalı qurusu istifadə etmək hər kəsin öz seçimindən asılıdır. 4 nəfərlik
plov dəmləyərkən bundan da 250 qram alınsa yetər. Qiymətləri isə 12 manatdan
başlayır. Bu o deməkdir ki, 3 manat da burada lazım olacaq. Bir çox insanlar
kimi, mən də düşünürəm ki, şabalıdsız plov olmaz. Q.Cəfərov deyir ki, 400 qram
şabalıd 7-8 manatdır.
Bazarda
plov üçün istifadə ediləcək soğanın qiymətini də öyrəndik. Soğan 40-50 qəpiyədir.
Sonra yaxınlıqdakı marketdən düyünün qiyməti ilə maraqlandıq. Adi uzun düyünün
900 qaramlıq paketlərdə qiyməti 1,35 qəpikdən başlayır. Amma son vaxtlar "plov
düyüsü” adı ilə müxtəlif firmaların xüsusi düyüləri var ki, onların 900 qramı
3,5 manatdır.
Nəhayət,
plovda ətdən istifadə olunduğu üçün onun da qiymətləri ilə maraqlandıq. Qəssab
Natiq Qurbanov dedi ki, quzu əti 11, mal əti isə 10 manatadır. O bildirdi ki,
qiymətlərdə son vaxtlar artım var, amma bayramla əlaqəli deyil. Bayram günlərində
ətin qiymətində hər hansı artım olması gözlənilmir.
Bayram
süfrələrində hinduşka əti də çox istifadə olunur. Satıcı Mais Məmmədov deyir
ki, kilosu 12 manata olan hinduşka ətinin daimi alıcıları var. Ona görə də
bayram oldu-olmadı, alıcıları var: "Düzdür, bayram ərəfəsində alıcıları
çoxalır. Amma hinduşkanı gəlib bizdən alan öz müştərilərimiz var. Qiymət
hazırda 12 manatdan başlayır. Hinduşkanın ən balacası isə 1,8 kilo olur”.
Deməli,
bayram süfrəsində hinduşka əti olmasını istəyənlərin ən azı əlavə 20 manatı
olmalıdır.
Meyvələrin bazar və market qiyməti...
Çərəzlərin
qiyməti ilə maraqlandıqda, satıcılar bildirdilər ki, alıcılar adətən hər çərəzdən
müəyyən qədər alırlar. Qoz və ya fındığın yarım kilosu 8,50 manatdan başlayır.
Yarım kilo yerfındığı 12, badam isə 12 manatdır.
Bazarda
açıq şəkildə satılan turşuların kilosu 2 manatadır. Kiloluq bankalarda
satılanların isə ölçüsünə və növünə görə qiyməti dəyişir. Marketlərdə isə 300
qramlıq qablarda 1 manata da almaq olar.
Meyvələrin
qiymətini həm bazardan, həm də marketdən maraqlandıq. Bazarda mandarin
1,50-2,50 arası satılırdı. Portağal isə ancaq xaricdən gələnlər idi. Qiyməti 3
manatdan başlayır. Almanın mövsümü olduğu üçün daha ucuz qiymətə də almaq olur.
Belə ki almanın qiyməti 30-40 qəpikdən başlayır. Amma 4 manata qədər satılan növləri
də var. Narın kilosu 2-4, bananınkı isə 1,8-2,5 manatadır. Kivi sevənlər bu
meyvənin kilosunu 2,5-3 manata ala bilərlər. Ananasın isə kiçiyi 6 manatadır.
Marketdə
narı 4 manata almaq olar. Mandarin isə 1,29-3,2 manat arası təklif edilir.
Armud 4, üzüm 5, ananas isə 7 manatdan bahadır. Almanın ən ucuzu marketdə 0,87
manata təklif olunurdu.
Əgər pomidor, xiyar almaq istəyirsinizsə...
Bu il öz
mövsümündə belə çox baha olan pomidoru bayram süfrəsində görmək istəyənlər üçün
qiymətini öyrəndik. Bazarda pomidorun kilosu 3-5 manata satılır. Xiyarın da
qiyməti belədir. Satıcılar bildirdilər ki, növünə görə fərqli qiymətə təklif
edilən xiyar tapmaq olar. 14 manata da qarşımıza çıxa bilər. Amma orta qiymət 3
manatdan başlayır.
Şokolad
və konfetlərin çeşidi çox olduğu üçün ümumi bir qiymət demək mümkün deyil. Amma
onu bildirim ki, konfetlərin qiyməti 4-5, şokoladlarınkı isə 6-7 manatdan
başlayır.
Limonad
və şirələrin də növləri çoxdur. Adi günlərdə istifadə edildiyi üçün qiymətlər
haqda danışmaq istəmirəm. Amma bayramla əlaqəli marketlərdə üstündə hədiyyə verilən
kampaniyalara da rast gəlmək mümkündür.
Göyərtinin
hər zaman alıcısı var. Satıcı xanım deyir ki, göyərtinin dəstəsi 20 qəpikdir.
Amma böyük marketlərdə 16-17 qəpiyə də tapmaq olar.
"Bazarlığı bayrama bir gün qalmışa saxlamışıq”
Satıcılardan
qiyməti öyrənəndən sonra alıcıların da fikrini öyrənməyə çalışdıq. Nübar xanım
deyir ki, bayramla əlaqəli qiymət artımı müşahidə etməyib: "Hələ ki elə bir
qiymət artımı görmədim. Çünki elə adi günlərdə də qiymətlər indiki kimidir.
Bizim ailə 6 nəfərlikdir. Qiymətlər ümumilikdə baha olduğu üçün alış-verişi
daha ucuz qiymətlər təklif edilən yerlərdən etməyi düşünürəm. Hələ ki
bazarlardakı ümumi qiymətlə tanış oluram”.
Elbrus Həmzəyev
isə nəvələri üçün alış-verişə çıxdığını deyir. Amma bayram bazarlığını hələ ki
etməyiblər: "Əvvəllər bayrama bir həftə qalmışdan çox şeyi alırdıq. Amma bu il
nəsə hələ ki bazarlıq etməmişik. Nəvələrin istəyinə uyğun yolka qurmuşuq, müəyyən
şeylər alıb aparıram. Amma bayram bazarlığını bayrama bir gün qalmışa
saxlamışıq deyəsən”.
Aygün
Asimqızı
Fotolar:
Şəbnəm Mehdizadə