Yaxşı rəhbər necə olmalıdır? - Gənclərə məsləhət
İş mühitində ən çox önəm verilən məsələlərdən biri
də münasibətlərdir. Xüsusilə də, işçi və rəhbər arasında olan münasibətlər işin
gedişinə təsir göstərir. Hərdən ətrafımızda rəhbərlə yola gedə bilmədiyi üçün
işdən ayrıldığını bildirən dostlarımız olur. Bəzən görürük ki, insanlar
rəhbərlərinin yaxşı olmadığından, işçilər arasında fərq qoymağından
şikayətlənirlər. Bu zaman sual yaranır ki, bəs yaxşı rəhbər necə olmalıdır?
İşçilərlə münasibətdə hansı nüanslara diqqət etməlidir?
Bu mövzuda həmsöhbətimiz "Mazarina” MMC-nin İnsan Resursları üzrə meneceri, Beynəlxalq Əmək
Təşkilatının təlimçisi Saleh Həsənovdur.
Saleh Həsənov deyir ki, rəhbər, işçilərə motivasiya
verərkən və tənqid edərkən balansı gözləməlidir: "Yaxşı müdir rəhbərlik etdiyi
sahə haqqında müfəssəl bilgilərə, insanlarla ünsiyyətdə xüsusi yanaşmaya sahib
olmalı və psixologiyanı bilməlidir. Çətin situasiyalarda sürətli, çevik qərar
vermə qabiliyyətinə malik olmaqla yanaşı, həmçinin, işçilərə motivasiya
verərkən və tənqid edərkən balansı gözləməlidir. Tapşırıq və ünsiyyət zamanı
işçilərlə empati (özünü başqasının yerində hiss etmə) hissini qorumalıdır. Ən
çətin anda pozitiv olmağı bacarmalı və ən əsası da, komandanı idarəetmə
prosesində ədalətlilik prinsipinə riayət etməlidir”.
Müsahibimiz qeyd edir ki, işçilərlə münasibətdə
rəhbər üçün öndə gedən məsələlərdən biri ədalət hissidir: "İşçilərə fərdi
yanaşma ilə bərabər, həm də ayrı-seçkiliyin qoyulmamağı əsas və çətin
məqamlardan biridir. Rəhbərlik mütləq şəkildə işçilərin inamını qazanmalı,
səmimiyyətini hiss etdirməlidir. Rəhbər həm də lider olaraq işçilərə
problemlərin həllində, onların inkişafında xüsusi qayğı və dəstəyini
göstərməlidir”.
Həmsöhbətimizdən rəhbərlərin işçilərlə münasibət
qurarkən etdikləri səhvlərin nələr olduğunu soruşduq: "Rəhbərlərin əsas
səhvləri səmimiyyət və subordinasiya qaydalarını düzgün və uyğun şəkildə idarə
edə bilməməkləridir. Zamanla problemlərin böyüməsi, konfliktləri tənzimlənə
bilməmək həddinə gətirib çıxarır. Bundan əlavə, işçi və rəhbər arasında
distansiyanın çox olması da bu qəbildən olan problemlərdən biridir. İşçilər arxayın
şəkildə rəhbərliklə münasibət qurmaq əminliyini özündə hiss etməlidir”.
S.Həsənovun sözlərinə görə, rəhbərlə işçi
arasındakı yaş fərqi nə işçi, nə də rəhbərlik tərəfdən biruzə verilməməlidir:
"Rəhbər bu mövzuda ədalətliliyi xüsusən diqqətdə saxlamalı, işçiləri yaş
həddinə görə deyil, işlərinə və müəssisəyə olan münasibətinə görə
dəyərləndirməlidir. Rəhbərin yaşının az və ya çox olması və ya hər hansı
işçinin yaşının rəhbərə nisbətdə az və ya çox olması ona hər hansı güzəşt
qazandırmamalı, digərlərindən əhəmiyyətli dərəcədə fərqliliyə səbəb
olmamalıdır. Müəssisədə iş təcrübəsi çox olan əməkdaşlara adətən, fərqli
yanaşmalar olur ki, bu da hörmət və loyallıq göstəricisi kimi tətbiq edilə
bilər. Lakin hər hansı qərarverici anda işçinin yaşına və ya sırf təcrübəsinə
görə fərqləndirilməsi yolverilməzdir”.
Rəhbərlə işçi dost ola bilərmi, əgər ola bilərsə,
bu hədd hara qədər olmalıdır” – sualımızı müsahibimiz belə cavablandırdı:
"Rəhbərlə işçinin şəxsi münasibətləri istənilən həddə ola bilər. Lakin bunun,
iş vaxtına və ya işlə bağlı məsələlərə heç bir aidiyyəti olmamalıdır. Rəhbərlə
işçinin dostluq, qohumluq və ya digər münasibətləri beynəlxalq və tanınmış
şirkətlərdə də rast gəlinən haldır. Lakin bu münasibətlərin idarə olunması əsas
məsələdir. Belə ki, dünyaca tanınmış bir çox şirkətlərdə müəssisənin zamanla
atadan övlada keçmə praktikası mövcuddur. Bu məsələ yalnız o zaman uğurlu olub
ki, müəssisədə ata və oğul deyil, işçi rəhbər münasibətləri hökm sürüb”.
Günel Azadə