Yaşamaqdan və yazmaqdan öyrəndiklərim
Yeddi yaşlı nəvəmin otağı ilə mənim yataq otağım
eyni dəhlizə açılır. Bəzi səhərlər yuxudan duran kimi yanıma qaçır: "Bilirsən,
bəlkə də bu gün dünyanın ən yaxşı günüdür”. Bəzən isə, xüsusilə gecə yarısı
narahat, titrək səslə məni çağırıb, soruşur: "Nana, sən, doğurdan da, bir gün
xəstələnib, öləcəksən?”.
Mənə elə gəlir ki, bununla həm mənim üçün, həm də
yaxın ətrafımdakı bir çox insan üçün vacib bir şeyə işarə edir: hamımız xoşbəxt
gələcək gözləntisi ilə sonsuz nigaranlığın qarışığıyıq. 61 yaşımın
tamamlanmasına bir neçə gün qalmış bəşəri həqiqət olduğunu artıq birmənalı
şəkildə qəbul etdiyim şeyləri siyahılaşdırmağa qərar verdim. Populyarlığın dəb
olduğu çağdaş mədəniyyətdə yekdil formada doğru kimi qəbul edilən şeylər sayca
çox azdır. Düşündüm ki, bəzi şeylərin doğruluğundan tamamilə əmin olmaq hamı
üçün faydalıdır.
Məsələn, artıq 47 yaşım yoxdur. Halbuki, özümü 47
yaşımdakı kimi hiss edirəm. Və imkanım olsaydı, məhz 47 yaşıma qayıdardım. Pol adında
bir dostum var. 80-ə yaxın yaşı olsa da, özünü gənc, tərs, üsyankar dəliqanlı
kimi hiss edir, elə davranır. (Gülüş)
Görünən xarakterimiz zaman və məkandan asılı deyil,
tamamilə müstəqildir. Rəsmi sənədlərə baxanda görürəm ki, doğurdan da, 1954-cü
ildə anadan olmuşam. Amma daxili dünyam, təbiətim, duyğularım illərə, yaşadığım
yerin yaşıdlarıma qoyduğu tələblərə uyğun deyil, özbaşınadır. Onun müəyyən bir
yaşı yoxdur, öz zaman anlayışı var. Mən indiyə kimi bütün yaşlarımın, illərimin
cəmiyəm. Sizin kimi. Amma yenə də bir şeyi etiraf etməliyəm – kaş ki, bədənimi
ruhuma uyğunlaşdırmaq üçün 60 yaşlı xanımlara məsləhət görülən estetik
prosedurlardan keçməyəydim. Bir ara da bir trend var idi, min əziyyətlə bu
mərhələni icra edirdim – günəş mümkün olduqca çox yandırsın deyə, ən qızmar
saatlarda günəşlənmək və bu zaman çoxlu uşaq kremləri, yağları sürtmək, amma
reflektor xüsusiyyətinə görə, prosedurda mütləq alüminium folyodan da kimi
istifadə etmək. (Gülüş)
Sonra isə sakitləşdim. Artıq ömrün yarısından çox
keçdiyini qəbul etməyimin, doğru olduğunu bildiyim hər şeyi qələmə alaraq,
rahatlıq tapmağa qərar verməyimin mənə çox köməyi oldu. İndi elə bir dövrdə
yaşayırıq ki, insanlar səbəbli-səbəbsiz özlərini yorğun hiss edirlər, harda
görsələr, daha ağıllı, intellektual hesab etdikləriı adamlardan nəyin daha
doğru olduğunu soruşurlar, cavab axtarırlar. Ümid edirəm, mənim uzun illər
ələyə-ələyə ərsəyə gətirdiyim "doğruluğuna əmin olduqlarım” siyahısı bu bitkin,
yorğun, dörd bir yandan bədliklə çevrələnmiş kimi hiss edən insanlara bəzi
ibtidai həqiqətlər haqqında yol göstərə bilər.
1. İlk
və ən doğru şey – bütün həqiqətlər paradoksaldır. Həyat həm olduqca dəyərli,
heyrətamiz dərəcədə möhtəşəm bir hədiyədir, həm də bütün hekayələrin sonuna
nəzər saldıqda görürük ki, imkansızdır, mənasızdır. Dövranın indiki gərdişi,
xüsusilə də, təbiətən həssas olanlarımız üçün dözülməzdir, ağırdır. Bəzən isə o
qədər əzabverici və ağılasığmaz hala düşür ki, insan öz-özünə "yəqin ki, bu
gizli kamera zarafatıdır” – deyir. Həyat paralel zamanda baş verənlərin -
qəlbimizə toxunan gözəlliklərin, çarəsiz yoxsulluğun, təbii fəlakətlərin, körpə
sevincinin, dəri sızanaqlarının bir-birinin içinə keçib, gözümüz önündə təzahür
tapmasıdır. Doğruluğuna əmin olsam da, qətiyyən bunun ideal bir sistem olduğunu
düşünmürəm.
2. Demək
olar ki, hər şeyin elektrik xəttini bir neçə dəqiqəliyinə çıxarıb, yerinə
taxsanız, işləməyə davam edəcək. (Gülüş. Alqış.) Siz də daxil.
3. Əgər
gözlədiyiniz şey orqan köçürülməsi deyilsə, bilin ki, xaricdən gələn hansısa dəstək,
müdaxilə sizə kömək etməyəcək. Rahatlığı, mənəvi sakitliyi satın ala, ya da
vaxtını müəyyənləşdirə bilməzsiniz. Bu kəşf etdiyim ən acı həqiqətdir və məni
çox kədərləndirir. Amma digər tərəfdən də birbaşa daxili dünyamızdan
qaynaqlanan bir məsələdir. Məhz buna görə də, dünyada ən çox sevdiyimiz,
qayğısına qaldığımız insanlar üçün də daimi rahatlıq, rifah təmin edə bilmirik.
Onlar öz yollarını, cavablarını özləri tapmalıdır. Övladlarınız yetkinləşəndə
öz hekayələrinin qəhrəmanına çevrilirlər, əlinizdə günəş kremi, günəş
qoruyucusu götürüb dallarınca qaça bilməzsiniz. Onlara sərbəstlik verməlisiniz.
Əks halda, onlara şəxsiyyət kimi hörmətsizlik etmiş olarsınız. Üstəlik, əgər
problem başqasına aiddirsə, cavabı onsuz da sizdə deyil. (Gülüş)
Köməyimiz çox vaxt elə də ciddi fayda
vermir. Hətta çox vaxt zəhərli kol olur. Hamını yaxşılığınızla,
yardımsevərliyinizlə utandırmayın.
4. Hamı
bezmiş, incik və qorxmuş vəziyyətdədir. Odur ki, daxili dünyanızın vəziyyətini,
başqalarının xarici görünüşü ilə müqayisə etməyin. Bu sizi lap pis vəziyyətə
salacaq. Bir də ki, siz kimisə sağalda, dəyişdirə, xilas edə və oyada
bilməzsiniz. Bundan 30 il əvvəl içkini və narkotiki birdəfəlik atdım. Əvvəl
dindar dostlardan kömək istədim, Tanrının bir başqa adı da "çarəsizliyin
hədiyəsi”dir. Sonra əvvəllər alkoqolik olmuş bir dostum dedi ki, onlardan kömək
istəmək özünü başqa bir gücə təslim etməkdir:Düzəliş
etmək, ya da xilas etməyə çalışmaq bihudə cəhd olmaqla yanaşı, yaxşı bir özünəqulluq
üsuludur – xoş niyyət nəfəs kimi sizdən ayrılar və atmosferə yayılar. Kainatın
ən çox ehtiyacı olan hədiyə...
İnsanlar sizə baxıb, "necə də
özünəməxsus” deyirsə, Mona Liza kimi gülümsəyin. İnsan o vaxt özünü evindəki
kimi hiss edir ki, gizlətdiyi səfeh, eqoist, dağınıq və bir çox dözülməz
keyfiyyətlərinə simpatiya nümayiş etdirə bilir. Elə bu böyük dünyada bəşəri
sülh də buradan başlayır.
5. Tərkibində
75% kakao olan şokoladlar, əslində, qida deyil. (Gülüş) Ən yaxşı halda ilanlar
üçün qurduğunuz tələlərdə yem kimi istifadə edə bilərsiniz. Yoxsa bu
şokoladları insanların istehlak etməsi üçün hazırlamazlar.
6. Yazmaq.
Tanıdığınız bütün yazarların üzə çıxarılmayası ilk əlyazması var. Amma bu zəif nümunəyə
məhəl qoymadan təmkinlə yazmağa davam edirlər. Həyatın sirri də elə budur.
Ehtimal ki, onlarla sizin aranızdakı ən böyük fərq də burdadır. Onlar səbirlə
bir işi mükəmmələ çatana kimi icra edirlər. Sonuna kimi yazmaq üçün özlərinə
söz verirlər. Bu onlar üçün şərəf məsələsidir. Ürəklərindəki hekayəni
danışırlar.
Qardaşım dördüncü sinifdə oxuyanda dedi
ki, səhərə rüblük tapşırığı təhvil verməlidir, amma heç başlamayıb – quşlar
haqqında yazmalı idi. Atam audubon kitabı (təbiət elmlərinə həsr olunmuş şəkil
kitabı – red.), vərəq, qələm və pozanı götürüb, qardaşımın yanında oturdu və
dedi: "Quşları bir-bir yaz, balası. Qutanlar haqqında oxu və sonra onlar
haqqında öz dilində yaz. Sonra çikadalar (Şimali Amerikaya məxsus başı qara
quşlar – red.) haqqında məlumat topla və sonra öz düşüncələrinlə onları şərh
et. Sonra qazları”.
Beləliklə, yazı prosesində iki vacib
məsələ var: quşları bir-bir yazmaq, və üzə çıxarılmayacaq qədər bərbad bir ilk
versiya. Əgər haradan başlamalı olduğunu bilmirsənsə, sənə təsir edən, həyatına
yön verən şeyləri bir-bir xatırla və elə bir-bir də danış. Çünki kimsə bilsə
ki, ondan yazırsan, başlayacaq davranışlarını düzəltməyə.
7. Nəşr
olunmaq və yaradıcılığınızın gətirdiyi müvəqqəti uğurların sərxoşu olmaq
problemi öhdəsindən gəlməli olduğunuz hadisələrdir. Bu uğurlar əvvəl güldürər,
sonra öldürər. Təsəvvür belə etməyəcəyiniz formada ruhunuzu yaralayar, sizə
zərər verər, sizi dəyişdirərlər. Həyatımda tanıdığım ən alçaq və ziyanlı
insanlar bestseller siyahısına düşmüş kişi yazarlardır. Kitabının nəşr
olunmasını, hekayələrinin oxunmasını, eşidilməsini möcüzə kimi qəbul et. Özünü
alicənab bir şəkildə mükafatlandır.
8. Ailələr.
Nə qədər sizə dəstək verib, köməkləri ilə təəccübləndirsələr də, ailə ilə
çətindir, çətindir, çətindir.
9. Qidalanmaq
– Çalış əlindən gələnin ən yaxşısını edəsən. Çox sözə ehtiyac yoxdur, siz
anladınız nə demək istəyirəm. (Gülüş. Alqış)
10. Rəhmət
ruhu paslardan təmizləyəndir. Bu bizi dəyişdirən, dünyamızı yaxşılığa doğru
aparan bir gücdür. Bu duyğu sizi harada olsanız tapar, amma əsla olduğunuz
yerdə buraxmaz. Dönə-dönə nəfəs almağımıza imkan verər, bizi özümüzə gətirər,
həyata və bir-birimizə olan inancımızı yeniləyər. Mərhəmət hər zaman gözünü ən
son bağlayandır.
11. Tanrı
sadəcə yaxşılıq deməkdir. Bunda qorxulası bir şey yoxdur. Tanrı müqəddəs,
qayğıkeş bir qeyri-adi beyindir. Emerson deyir ki, dünyadakı ən xoşbəxt insan
ibadəti təbiətdən öyrənəndir. Çölə çıxın və səmaya baxın. Həyatın sirri
ordadır.
12. Və
son olaraq, ölüm. 12-ci dərs. "Onsuz yaşaya bilmərəm” dediyiniz bir ovuc
adamlar var. Onların ölümünə dözmək çətindir. Çevrə nə tələb edirsə etsin, bu
itkinin ağırlığının altından çətin qalxacaqsınız. Biz xristianlar ölümü
ünvanını dəyişmək kimi qəbul edirik. Əgər qəlbiniz möhürlənməyibsə, o adamı
çinət unudacaqsınız. Leonard Kohenin dediyi kimi: "Hər şeyin üstündə çatlar
var, işıq içəri ancaq belə süzülür”. Bütün sevdiklərimizin işığını da ancaq
belə hiss edirik.
Bəzi insanlar səbəbsiz yerə qəhqəhələrə
səbəb olurlar, bu möhtəşəm duyğudur. Yas tutmaq, zaman və göz yaşı sizi ancaq
bir qədər sağalda bilər. Bir gün göz yaşlarınız üstündə durduğunuz yeri yuyub
aparar.
Tanrının Həzrəti Musaya dediyi ilk şeyi
xatırlayın: "Ayaqqabılarını soyun. Kim nə deyirsə desin, basdığın torpaq
müqəddəsdir”. Yaşlandıqca ölümün də torpaq kimi müqəddəs olduğu qənaətinə
varırsınız. Qorxmayın – yaşamağa davam edin. Bizi digər tərəfdə gözləyən hər
nədirsə, keçidə kömək edəcək...
Elə bu qədər.
İngilis dilindən tərcümə
edən: Elcan SALMANQIZI