Xoşbəxtliyi mübarizədə tapan əsl qəhrəman - Portret
"Heç nədən narazılığım yoxdur. Hər anı sevə-sevə yaşayan
insanam. Həyatı maraqlı, dəyərli edən mübarizədir. Məsləhət görürəm ki, digər
fiziki məhdudiyyətli insanlar da "bacarmaram" deyib, özlərini
cəmiyyətə yararsız hesab etməsinlər. Yetər ki, cəhd etsinlər, usanmasınlar,
gec-tez, alınacaq".
Bu ibrətli sözlərin müəllifi Samir Nəbiyev atletika ilə məşğul olur.
Fiziki məhdudiyyətinə rəğmən, aktiv həyat tərzi keçirərək, özünü hərtərəfli
inkişaf etdirib. Dünya Oyunlarının çempionu, "Bakı-2017" IV İslam
Həmrəyliyi Oyunlarının ikiqat qalibi olan Samir, bu gün Azərbaycan paralimpiya
hərəkatının ən parlaq simalarındandır.
Karate, ciu-citsu,
kikboksinq
Nəbiyev Samir Zilfi oğlu 1986-cı ildə Şəmkir şəhərində dünyaya göz
açıb. Uşaq ikən vurulan iynənin təsirindən osteomielit (sümük iliyinin
iltihabı) xəstəliyinə tutulan Samir, bir neçə dəfə əməliyyat keçirsə də,
sağlamlığına qovuşa bilməyib. Bununla belə, ruh yüksəkliyi onu bir an da olsun,
tərk etməyib. Daim öyrənmək, özünü sübut etmək həvəsi ilə yaşayıb.
Paralimpiyaçıların bir çoxundan fərqli olaraq, idmana marağı uşaqlıqdan
mövcuddur. Həvəs onu öncə karateyə gətirib. Doğma şəhərində iki il yapon döyüş
təliminin sirlərinə yiyələnən qəhrəmanımız, sonradan ailəsi ilə Rusiyaya köçüb.
Burada o, bir müddət ciu-citsu ilə məşğul olub.
Nəbiyevlər uzun müddət davam edən qürbət həyatından sonra, 2001-ci
ildə vətənə dönüb. Qayıtdıqdan sonra ali məktəblərə qəbul imtahanına hazırlaşan
Samir, bu arada da boş oturmayıb. O, bir ilə yaxın kikboksinqdə özünü sınayıb.
Bir sözlə, döyüş növlərinə qarşı böyük sevgisi olub. "Kumirin kimdir"
sualına verdiyi "Mayk Tayson" cavabı da bu sevginin göstəricisidir.
Onu da qeyd edək ki, hər üç idman növü üzrə məşqlərə əkiz qardaşı ilə
birgə qatılıb. İdman ustası olan Seymur Nəbiyev, kikboksinq üzrə dəfələrlə qitə
və dünya miqyaslı yarışlarda fərqlənib.
Bir ilə icra olunan dördillik proqram
2004-cü ildə o, Azərbaycan Beynəlxalq Universitetinin tibb
fakültəsinə daxil olur. Ultrasəs müayinə ixtisasında təhsil alan Samir, bir gün
tələbə yoldaşları ilə şəhərdə gəzişərkən, para-atletika üzrə məşqçi Bəxtiyar
Zeynalovun diqqətini çəkir. Zeynalov, fiziki göstəricilərini nəzərə alaraq, bu
idman növü haqqında ona məlumat verir, paralimpiya hərəkatına qoşulmağa
çağırır. Samir tərəddüd etmədən, təklifi qəbul edir. Lakin bu, çox çəkmir.
Açıqlamaq istəmədiyi səbəblərə görə, cəmi üç aydan sonra məşqlərini
dayandırmalı olur. Bu hadisə 2006-cı ildə baş vermişdi. Sonrakı dörd ildə o,
fikrini təhsilinə yönəldir. 2010-cu ildə ali təhsilini başa vuran Nəbiyev,
Milli Paralimpiya Komitəsinə üz tutur. Niyyəti atletika olan qəhrəmanımız,
komitə rəsmisi tərəfindən əməkdar məşqçi Oktay Şahtaxtinskiyə yönləndirilir.
Beləcə, yeddi ildən artıq davam edən birgəliyin əsası qoyulur.
Tanışlıq 2010-cu ilin sonlarına təsadüf edir. London Yay Paralimpiya
Oyunları isə artıq qapıda idi. Lisenziya qazanmaq üçün cəmi bir ildən bir qədər
artıq vaxt qalırdı. Belədə, ilk baxışdan növbəti paralimpiada hədəf kimi
görünsə də, ikili, qarşısına inanılmazı gerçəkləşdirmək məqsədini qoyur. Dörd
ilin hazırlıq proqramının cəmi bir ilə reallaşdırılması, sirr deyil ki, min bir
əziyyət hesabına başa gəlir. Şahtaxtinski deyir ki, bu müddətdə Samirin
göstərdiyi xarakter, əlahiddə, dönə-dönə qeyd ediləsi bir hal idi.
Cəmi üç ay sonra ilk beynəlxalq yarışına çıxan Nəbiyev, lövhə atmada
bürünc medalı boynundan asır. Çexiyada keçirilən Qran-pri-nin ardından,
Birləşmiş Ərəb Əmirliklərində baş tutan Dünya Oyunlarında iştirak edərək, fəxri
kürsünün birinci pilləsinə yüksəlir. Bununla da, London-2012-yə lisenziya
qazanır.
Tək söz: Fantastika!
Samirin Oyunlarda göstərdiyi nəticə də kifayət qədər qənaətbəxş
alınır. İki ildən az təcrübəsinə rəğmən, o, bir neçə adlı-sanlı rəqiblərini geridə
qoymaqla, sonda beşinci nəticə göstərir. Əlilliyi daha yüngül olan F58
kateqoriyası ilə birgə baş tutan yarışda 906 xal toplayan Samir, öz
kateqoriyasında (F57) üçüncü olur.
Debütdəcə dünya
"gümüş"ü
Növbəti tsiklin ilk böyük yarışı Fransada təşkil olunan dünya
çempionatı idi. Bu, iştirak etdiyi ilk mundial olsa da, o, özünü debütant kimi
aparmır. Bir neçə titullu rəqibini, o cümlədən London Paralimpiya Oyunlarının
gümüş mükafatçısı, braziliyalı Klaudiney Santosu qabaqlayan Samir, yalnız
dördqat paralimpiya çempionu, rusiyalı Aleksey Aşapatovdan geri qalır. Gümüş
medal motivasiyasını birə beş gücləndirir, növbəti qələbələrə, ələlxüsus da Rio
paralimpiadasında zirvəyə kökləyir.
Lakin...
2014-cü il Dubay Qran-prisindəki qələbələrlə yadda qalır. Belə ki, o,
həm lövhə atmada, həm də nüvə itələmədə turnirin baş mükafatına sahib çıxır.
Növbəti il Qətərdə keçirilən dünya çempionatında lövhə atmada bürünc medal
qazanan Nəbiyev, Dubayda yenidən "qızıl dubl"a imza atır. Lakin bu
ərəfədə məlum olur ki, onun yer aldığı müvafiq kateqoriya üzrə lövhə atma növü
Rio Oyunlarının proqramında yer almayacaq, əvəzində, nüvə itələmə üzrə yarış
baş tutacaq. Belədə, diqqətini tamamilə nüvə itələməyə yönəldən Samir, qısa
müddətdə lisenziyanı təmin edir. Nəticəsi isə heç də pis alınmır. 13.67 metrlik
göstərici ilə o, yeddinci pilləni tutur. Dünya çempionatının ikiqat mükafatçısı
deyir ki, əgər lövhə atma proqramdan çıxarılmasaydı, onu bu gün paralimpiya
çempionu kimi də təqdim edə bilərdik.
Motivasiya
"vulkan"ı
Tükənməz əzmi ilə hamını özünə heyran qoyan Nəbiyev, cari tsikldə də
iddiasını ortaya qoyub. Ötən iki ildə o, İslamiadadakı "qızıl
dubl"dan başqa, dəfələrlə Qran-pri yarışlarında fərqlənib, lövhə atmada
hətta 46.67 metrlik göstərici ilə qitə rekordunu da yeniləyib. Bu arada o,
Avropa çempionatının gümüş medalına da sahib çıxıb. Nüvə itələmə üzrə getdikcə
artan təcrübəsi, nəticələrində əksini taparaq, onun Tokio Yay Paralimpiya
Oyunlarında arzulanan medala qovuşacağına böyük inam yaradır.
Atletika ölkəmizin Paralimpiya Oyunlarında uğurla təmsil olunduğu
idman növlərindəndir. Paralimpiadalarda qazandığımız medalların, az qala,
yarısı bu növün payına düşür. Ənənələrdən ilhamlanan Nəbiyev, ali yarışın
mükafatına qovuşmaq üçün lazım gəlsə, 2028-ci ilə qədər karyerasını davam
etdirməyi düşünür. Paralimpiya Oyunlarında əlli, hətta altmış yaşlarında medal
qazanmış həmkarlarının adlarını sadalayan qəhrəmanımız, stimul sarıdan qəti
korluq çəkmir.
Bunu da nəzərə çatdıraq ki, o, hazırda Pekin Paralimpiya Oyunlarının
gümüş medalçısı Vladimir Zayetsin rəhbərliyi altında hazırlıq keçir. Yığma
komandamızın baş məşqçisi isə ikiqat paralimpiya çempionu Oleq Panyutindir.
Doğma şəhərinin fəxri
Samirin qazandığı uğurlar, doğulub, boya-başa çatdığı Şəmkirdə böyük
maraq və sevgi ilə qarşılanır. İslamiadada əldə etdiyi nailiyyətdən sonra,
yerli Olimpiya İdman Kompleksinin önündə onun şərəfinə düzənlənən təntənəli
qarşılanma mərasimi bunun sübutu idi. Nəbiyev, Şəmkirdə yaşayan yeniyetmə və
gənc idmançıların kumirinə çevrilib desək, yanılmarıq.
Yeganə dostu və hobbisi
"Yeganə dostum atam, ən böyük dəstəkçim ailəmdir" deyir. Bu
günə qədər qazandığı uğurların təməli olaraq, valideynlərinin ona olan
qayğısını, inamını qeyd edir. Azərbaycan dövlətinin paralimpiyaçılara olan
nümunəvi qayğısını da dönə-dönə vurğulayan Samir, vətənin bayrağını ucaltmağı
özünə borc hesab edir.
Hobbisi kitab oxumaqdır. Bununla yanaşı, boş vaxtlarında tibbi
araşdırmalar aparır, psixologiya ilə bağlı yazılar oxuyur.
Portret
Gülərüz, obrazlı desək, nur saçan çöhrəsi xarakterinin aynasıdır.
Zərbələrdən sınmayan, əksinə, həyata möhkəm sığınan, onun mənasını
mübarizələrdə axtaran Samir, əsl qəhrəmandır. Bu gün o, xoşbəxtliyin düsturunu
tapıb desək, yanılmarıq. Qarşıda isə onu hələ çox mübarizə meydanı gözləyir.
"Təcrübəm artdıqca, hiss edirəm ki, böyük uğurlar uzaqda deyil" deyən
Nəbiyev, görünür, bizi hələ çox sevindirəcək.
Sahib