Xocalı soyqırımı qurbanlarının xatirəsi anılıb
Azərbaycan Respublikasının Dövlət Reklam
Agentliyində Xocalı soyqırımının 27-ci ildönümünə həsr olunan anım tədbiri
keçirilib. Tədbirdə əvvəlcə faciə qurbanlarının xatirəsi 1 dəqiqəlik sükutla
yad edilib. Anım mərasimində çıxış edən agentliyin direktoru Aydın İbadov
bildirib ki, Xocalı faciəsi erməni millətçilərinin və onların havadarlarının Azərbaycan
xalqına qarşı davam edən etnik təmizləmə və soyqırım siyasətinin daha bir dəhşətli
nümunəsidir. Xocalı faciəsi əsrlər boyu Azərbaycan xalqına qarşı törədilmiş
soyqırım siyasətinin ən qanlı səhifəsidir. Bu faciəyə ilk dəfə hüquqi-siyasi
qiymət Ümummilli lider Heydər Əliyev hakimiyyətə gəldikdən sonra verilib.
1994-cü ildə ulu öndərin təşəbbüsü ilə Azərbaycan parlamenti 26 fevralı Xocalı
soyqırımı günü kimi qəbul edib. Prezident cənab İlham Əliyev erməni millətçilərinin
xalqımıza qarşı törətdikləri cinayətlər, o cümlədən Xocalı faciəsi haqqında həqiqətlərin
dünya ictimaiyyətinə çatdırılması, onun soyqırımı kimi tanınması üçün məqsədyönlü
və ardıcıl fəaliyyət göstərir.
Daha sonra Dövlət Reklam Agentliyinin mətbuat
katibi Hüseyn Azəri çıxış edərək qeyd edib ki, bu cinayət təkcə Azərbaycan
xalqına qarşı deyil, bəşəriyyətə qarşı törədilib. Cinayət cəzasız qalmamalıdır.
Beynəlxalq təşkilatlar, dünya dövlətlərinin parlamentləri Ermənistanın Azərbaycan
torpaqlarında törətdiyi hərbi cinayətə - Xocalı soyqırımına əsl soyqırımı hadisəsi
kimi beynəlxalq siyasi-hüquqi qiymət verməlidir.
Tədbirdə çıxış
edən Dövlət Reklam Agentliyinin Monitorinq
və Nəzarət şöbəsinin Analitik təhlil sektorunun müdiri Soltan Məmmədov isə
vurğulayıb ki, Xocalı soyqırımı xüsusi beynəlxalq komissiya tərəfindən
araşdırılmalı, səlahiyyətli beynəlxalq qurumlar tərəfindən genosid aktı kimi
tanınmalı, cinayət törədənlərə qarşı zəruri cəza tədbirləri tətbiq edilməlidir.
Bu soyqırımı aktına beynəlxalq qurumlar tərəfindən
hüquqi-siyasi qiymət verilməli, Ermənistan münaqişə ilə bağlı qəbul olunmuş məlum
beynəlxalq sənədlərin qərarlarına, sülh və ədalət çağırışlarına riayət etməli,
Azərbaycanın ərazi bütövlüyü, qaçqın və məcburi köçkünlərin pozulmuş hüquqları
bərpa olunmalı, habelə günahsız, dinc insanları qətlə yetirən cinayətkarlar
tezliklə ədalət məhkəməsi qarşısında cavab verməli və cəzalandırılmalıdır.