Xocalı soyqırımı ilə bağlı qanun Azərbaycana nə verəcək?
Xocalısoyqırımına hüquqi qiymət verilməsi ilə bağlı yeni qanun
layihəsi hazırlanır. Bu barədə Milli Məclisdə keçirilən "Soyqırımı və etnik
təmizləmə cinayətlərinin dünya səviyyəsində tanınmasının hüquqi aspektlərinin
öyrənilməsi” layihəsinin təqdimatında Milli Məclisin vitse-spikeriBahar
Muradovabildirib. Onun sözlərinə görə, Qarabağda bəzi cinayətlər törədən
şəxslərin məsuliyyətə cəlb olunmasında məhdudiyyətlər mövcuddur və bu, aradan
qalxmalıdır: "Qanun layihəsiXocalısoyqırımının 25 illiyi
ərəfəsində açıqlanacaq. LayihəXocalısoyqırımına məruz qalanların
hüquqlarının tapdalanmasına, bu cinayəti törədənlərin əməllərinə hüquqi qiymətin
verilməsinə şərait yaradacaq”.
B.Muradovanın sözlərinə görə, "Soyqırımı və etnik təmizləmə
cinayətlərinin dünya səviyyəsində tanınmasına hüquqi aspektlərinin öyrənilməsi”
layihəsi hərbi tribunala müraciətlə bağlı araşdırma
aparacaq,Xocalıilə bağlı hazırlanacaq yeni qanun layihəsi isə buna
hüquqi şərait yaradacaq.
Mövzu haqda fikirlərini "Kaspi” ilə bölüşən millət vəkili Aydın Mirzəzadə dedi ki, bu yolla erməni işğalını
dəstəkləyənlərə məsuliyyət nəzərdə tutulur: "Milli Məclisdə Xocalı faciəsinin nəticələri,
onun dünyada tanıdılması ilə bağlı böyük bir tədbir keçirildi. Həmin tədbirdə işğal
olunmuş torpaqlar haqda danışıldı, Xocalı faciəsinin günahkarlarının cəzalandırılması,
qanun layihəsinin hazırlanması təklifi irəli sürüldü. Qeyd edim ki, belə bir praktika
dünyanın müxtəlif ölkələrində var. Azərbaycan ilk növbədə, işğal edilmiş torpaqlarının
sahibi olduğunu və onu heç zaman düşmənə güzəştə getməyəcəyini, belə bir fikirdə
olmadığını qanunvericilik səviyyəsində dünyaya elan edir. İkincisi, məsuliyyət məsələsi
önə çəkilir”.
A.Mirzəzadə qeyd etdi ki, Xocalı faciəsi ilə bağlı erməniləri müdafiə
edəcək şəxslərə çox ciddi xəbərdarlıq ola bilər: "Xocalı faciəsi ilə bağlı illərdir,
işlər görülür, təbliğat aparılır. Azərbaycanın torpaqlarını işğaldan azad etməsi
üçün hüquqi sahədə bir çox vacib sənədlər var. Ulu öndər Heydər Əliyev tərəfindən
94-98-ci illər sərəncamların imzalanması, Xocalı faciəsinin 10 və 20 illik ildönümü
ilə bağlı parlamentdə dinləmələrin keçirilməsi, qəbul olunan ayrı-ayrı qərarlarda
ərazi bütövlüyünün önə çəkilməsi və s. Yəni bu məsələ həmişə diqqətdə olub. Ancaq
bunların təkmilləşdirilməsi və dünyada real qiymətini alması üçün zaman yetişib”.
Millət vəkili Elman Nəsirov isə fərqli
düşünür və bu cür qanunun qəbul edilməsi zamanının yetişmədiyi qənaətindədir: "Azərbaycan
parlamentində Xocalı faciəsi ilə bağlı 10-dan artıq qərar qəbul olunub. İndi söhbət
qərar deyil, konkret qanun layihəsinin hazırlanmasından gedir. Bu istiqamətdə işlər
görülməkdədir və o, Xocalı soyqırımının 25 illik ildönümünə təsadüf edir. Parlamentdə
bu haqda müzakirələr, dinləmələr keçirildi. Həm millət vəkilləri, həm QHT təmsilçiləri,
həm də media nümayəndələri tədbirdə iştirak edirdilər. Mən də orada mövqeyimi bildirdim.
Hesab edirəm ki, hazırda Xocalı faciəsi ilə bağlı beynəlxalq tribunalın yaradılması
ideyası bugünkü reallığa adekvat deyil. Ən azı ona görə ki, bu cür tribunal yaradılmasına
başlasaq, bu bəşəri cinayəti törədənlərin siyahısını təqdim edəndə ilk olaraq, Ermənistan
prezident Serj Sarkisyanın adını yazmalıyıq. Biz onun cinayətkar olduğu məsələsini
ortaya qoyanda onunla bütün danışıqları kəsməli olacağıq, Sarkisyanla heç bir danışıqdan
söhbət gedə bilməz. Amma hələ ki, Azərbaycan dövləti münaqişənin həlli ilə bağlı
danışıqlar prosesinə sadiqdir. Hesab edirik ki, münaqişənin dinc yolla həlli yolları
hələ tükənməyib”.
Millət vəkili qeyd etdi ki, doğrudan da, həll yolları tükənərsə, münaqişənin
həlli ilə bağlı bütün imkanlar səmərə verməzsə, ölkənin ali baş komandanı danışıqları
dayandırmaq qərarı alarsa, o zaman beynəlxalq tribunalın yaradılması daha böyük
aktuallıq kəsb edə bilər, vacib məsələyə çevrilər: "Bu gün bütün beynəlxalq təşkilatlar,
BMT-nin subyektləri olan ölkələr, ATƏT-in Minsk qrupunun həmsədrləri münaqişənin
yalnız dinc yolla həllini mümkün hesab edirlər və alternativ görmürlər. Bu baxımdan,
həmin o tribunalın yaradılmasına imkan verməyəcəklər. Nəzərə alsaq ki, BMT Təhlükəsizlik
Şurasının münaqişənin həlli ilə bağlı 4 qətnaməsi icra edilmir, belə olan vəziyyətdə,
beynəlxalq tribunalın yaradılması ideyasının reallaşmasına imkan verməyəcəklər.
Həm də beynəlxalq praktika göstərir ki, soyqırımı etmiş istənilən dövlət və siyasi
rejim yalnız hakimiyyətdən uzaqlaşdırıldıqdan sonra ona qarşı cinayət işi açılması,
müttəhim kürsüsünə əyləşdirilməsi baş verir. Bu həm Almaniya faşizmi ilə bağlı Nürnberq
prosesində belə olub, həm Bosniya prosesində, həm də digərlərində. Hakimiyyətdən
uzaqlaşdırılan siyasi rejimlə bağlı cinayət işi açılır. Hələ ki, Sarkisyan hakimiyyətdədir.
Bununla bağlı beynəlxalq qurumlar bu ideyanın reallaşmasına imkan verməyəcəklər.
Ona görə də indiki halda hüquqi bazamızı gücləndirib xarici ölkələrdə bu məsələyə,
soyqırımı cinayətinə hüquqi və siyasi qiymət verilməsinə çalışmalıyıq. Tribunalın
yaradılması bir qədər sonrakı perspektivin məsələsidir”.
Şəfa Tapdıq