Xəstə və anomal cəmiyyət
Ermənilər indi də ölkələrini faşist Almaniyası,
Paşinyanı isə Hitlerlə müqayisə edirlər
Bədnam
qonşularımızın işğalçı siyasətinə son qoyan 44 günlük müharibə başa çatsa da,
erməni cəmiyyəti hələ də prosesləri düzgün qiymətləndirə bilmir. Erməni
mediasına nəzər saldıqda ən sərsəm, ağlasığmaz, heç bir çərçivəyə sığmayan
fikirlərə rast gəlmək mümkündür. Onlardan bir neçəsinə nəzər saldıqda, həqiqətən
də bütöv bir xalqın xəstə durumda olduğunu görmək mümkün olur. 44 günlük
biabırçı məğlubiyyətdən dərs çıxarmaq əvəzinə, revanşist bəyanatlar səsləndirilir,
bugünkü Ermənistan faşist Almaniyası ilə eyniləşdirilir. Beləliklə, erməni
mediasında biabırçı məğlubiyyətin səbəbləri sırasında bir neçə məqama diqqət yetirək. Məğlubiyyətin, sözsüz ki, əsas
səbəbkarı hazırkı hakimiyyət, daha dəqiq desək Nikol Paşinyan göstərilir. Və
bir yerdə də olsun əsas səbəbin erməni xalqı, onun xəstə təfəkkürü, işğalçı siyasətinin
nəticəsi olduğu əks olunmur. Onlardan bəzilərinə diqqət yetirdikdə məğlubiyyətdən
dərs çıxarmadıqları bəlli olur.
Məsələn, "Erkramas” erməni saytı ki, 2020-ci ilin erməni xalqı üçün faciəsi tək ərazilərin
itirilməsi, ən azı 5 min insanın ölməsi, 10 minin yaralanması deyil, ötən il
biz dövlətçiliyi itirdik. Məqalədə maraq doğuran məqam indiki Ermənistanla
faşist Almaniyası arasında analogiya aparılmasıdır. Müəllif yazır ki, alman
xalqı da müharibədən məğlub çıxsa da, özündə güc tapıb qüvvətlənə bildi. Daha
sonra sovet hakimiyyəti faşistlərlə, Nikol da Hitlerlə eyniləşdirib. İki il
bundan əvvəl xilaskar kimi gördükləri lideri faşist liderə bənzədiblər. Məqalə
müəllifinin qənaətincə, müharibədən sonrakı Almaniyanın inkişafının lokomotivi
denafikasiya prosesi olub. Yəni müharibədən sonra almanlar öz səhvlərini etiraf
edib, Hitlerə aid bütün simvolları kənara atdılar. Bu gün də Almaniyada Hitler,
onun tərəfdarları, fəlsəfəsi barədə danışmaq qadağandır. Məhz onun sayəsində
almanların tarixi torpaqları Sileziya və Köniqsberqi birdəfəlik itirdikləri
vurğulanır. Və ardınca müəllif yazır ki, erməni xalqı bu gün həmin vəziyyətdədir.
Burada bənzərlik və fərqlər olduğu qeyd edilir: "Nikolu Hiltlerə bənzədərək,
onun özündə cəsarət tapıb intihar etməyə qürur və cəsarəti çatmadığı
vurğulanır. Formal cəhətdən məğlubiyyətdən
sonra baş nazir hakimiyyətdə qalmaqda davam edir. Hətta Ermənistanın gələcəyi
barədə belə danışmağa cürət edir. Aydındır ki, bu il onlar bir daha Ermənistanın
siyasi arenasında olmayacaqlar. Lakin baş verənlərdə tək Nikol günahkardırmı?
Əgər onu rədd ediriksə, Nikolizmi saxlayırıqsa, o zaman bizim erməni intibahı
olmayacaq. Biz qəlbimizdə "nikolizmi” və
onun əlamətlərini rədd etməliyik”.
Bəs görəsən
2021-ci il Ermənistana nə vəd edir? İqtisadi mənada götürdükdə, əgər 2019-cu
ildə Ermənistan 7.6% iqtisadi böyümə qeydə ala bilmişdisə, 2020-ci il iqtisadi
cəhətdən uğurlu olmadı, ötən ili 7% enişlə başa vurdu. 2019-cu ildən gələn
iqtisadi artım tendensiyasının ötən il mənfi hala gəlməsinin səbəbi nədir?
Birincisi, koronavirus pandemiyası iqtisadiyyata ağır zərbə vurdu. Ermənistan rəsmiləri
epidemiyaya qarşı mübarizədə hər an uğur qazandıqları barədə PR və imitasiya ilə
gecə-gündüz məşğul idilər, əslində epidemiyaya qarşı mübarizədə təsirli
metodlar tətbiq edə bilmədilər. Buna görə, iqtisadi sahəyə rəhbərlik edənlər,
iqtisadiyyatı yeni reallıqlara uyğunlaşdıra, istehsalın stimullaşdırılması üçün
mümkün qədər stimullaşdırıcı tədbirlər görməyə nail ola bilmədilər. Səhiyyə
sistemi böyük iqtisadi mənbələri əldən almağa başladı və Paşinyanın elan etdiyi
"iqtisadi inqilab” şüarı havada qaldı. Qarabağdakı müharibənin məğlubiyyəti nəticəsində
iqtisadi vəziyyət daha da mürəkkəbləşdi. İndi Ermənistan işsizliyin və mühacirət
nisbətinin kəskin artması ilə təhdid olunan çox dərin iqtisadi böhran mərhələsinə
qədəm qoyur. Beləliklə, 2021-ci ildə iqtisadi böhrandan çıxmaq üçün çox səy və
peşəkar yanaşma tələb olunacaq.
Ermənistan
üçün sözsüz ki, ötən ilin ən böyük hadisəsi
27 sentyabrda başlayan müharibə oldu. Döyüş günlərində Ermənistan hakimiyyətinin
xalqı "qalib gələcəyik” şüarını mənimsəməsinə təhrik etdiyini, döyüş meydanında
baş verən hadisələri çəhrayı eynəklə təqdim etdiklərini söyləmək mümkündür.
Ancaq 9 noyabrda üçtərəfli atəşkəsin şərtlərini və erməni tərəfinin təslim
olmasını eşitdikdə, cəmiyyət ciddi stressə məruz qaldı. Bir qayda olaraq, bu
cür hadisələr baş verdikdə, məğlub olan hökumət istefa edir və gedir, lakin
Paşinyan oturacağından yapışıb səlahiyyət müddətini mümkün qədər uzatmaq istəyir.
Nəticədə, Ermənistan beynəlxalq ictimaiyyətin gözündə, onsuz da zəif olan
nüfuzuna xələl gətirir. Nəhayət, nəzərə alaq ki, bu müharibə həm də Ermənistan
üçün diplomatik məğlubiyyətin nəticəsidir. Paşinyan hökuməti nəinki Rusiya, Aİ,
ABŞ, İran və digər dövlətlərlə münasibətlərini inkişaf etdirə bilmədi, eyni
zamanda əlindəki resursları düzgün qiymətləndirməyi bacarmadı. Müharibənin
itkiləri çox ağırdır. Bu mənada, 2021-ci il mövcud hakimiyyətin cəmiyyətə rəhbərlik
edə bilmədiyi müharibənin nəticələrini aradan qaldırmaq üçün çətin bir dövr
olacaq. Bu səbəbdən müxalifət qüvvələri hökumətin istefası və müvəqqəti hökumət
yaratmaq gündəmi ətrafında birləşib. Ermənistanın "Beynəlxalq insan inkişafı mərkəzi”nin
rəhbəri Tevan Poqosyan qeyd edib ki, bu gün ermənilər tamamilə iflic dövlət
sisteminə, məğlubiyyətə, mənəvi-psixoloji problemlərə sahibdirlər. "Yanvarın
sonunda və ya fevralda iqtisadi kollapsa çatacağıq, növbədənkənar seçkiləri nə
zaman edəcəyik”, - deyə o bildirib. Tevan Poqosyanın sözlərinə görə, bugünkü vəziyyətə
əsasən, Ermənistana böhran əleyhinə komanda lazımdır və yalnız bu komanda ilə
böhranları aradan qaldırdıqdan sonra növbədənkənar seçkilər haqqında düşünmək
lazımdır. Bu, 6, 7 ay və ya 1 il çəkə bilər.
Azər NURİYEV