Xarici gözəllik gəldi-gedərdi, ağıl və istedad isə daimidir - Fotolar
Səhnə teatr, kino gözəllik tələb edir. Tamaşaçı
teatra səhnədəki gözəlliyi seyr etməyə gəlir - deyə düşünsək də, Gənc Tamaşaçılar
Teatrının aktrisası, teatrımızın sarışını Günel Məmmədova bu fikirlərlə heç də
razı deyil. Qəzetimizin "Məşhurların gözəllik sirləri” rubrikası üçün danışan
aktrisa deyir ki, səhnə gözəllik deyil, istedad tələb edir. Bəzən insanlar bunu
səhv salırlar. Tamaşaçını səhnədə baş verənlərə inandıra bilmədikdən sonra o
gözəllik heç bir işə yaramır."Sarı gəlin” tamaşasındakı obrazı ilə səhnəmizin
sarışını, zaman-zaman sarı gəlini də adlandırılan aktrisa bizimlə söhbətində
onu fit və hər zaman formada saxlayan səbəblərdən danışdı. Deyir ki, formada
qalmaq üçün heç bir dietadan istifadə etmir:
- Formada qalmaq üçün dietanın tamamilə əleyhinəyəm.
Çünki özünü yeməkdən nə qədər kənarlaşdırsan da, dietan bitdikdən sonra həmin çəkini
yenidən alırsan. Mən öz formamı idman və rəqslə qoruyub saxlayıram. Uşaqlıqdan bu
günə qədər rəqslə məşğulam. Elə vaxtlar olub ki, çəkilişlərim çox olduğu üçün idmana
gedə bilməmişəm və yaxud həmin gün rəqslə məşğul olmağa zaman tapmamışam. Günün
sonunda idmanımı gec də olsa evdə etmişəm. Ən sağlam arıqlamaq idman və rəqslə arıqlamaqdır.
Ancaq hazırda xanımlarımız üstünlük verdikləri dieta ilə arıqlaya bilsələr də, bu
üsulla öz formalarını itirirlər. İdmanla məşğul olduqda isə fit, mükəmməl bədən
quruluşuna sahib olmuş olurlar. Məhz bu səbəbdən hər zaman formada qalıram və
heç bir piylənmə, kökəlmə ilə rastlaşmıram.
- Səhnə gözəllik
tələb edir. Bu gözəlliyi qorumaqsa heç də asan məsələ deyil.
- "Səhnə gözəllik tələb edir” - deyirlər, ancaq mənə
görə, səhnə ilk növbədə istedad tələb edir. Gözəllik isə gəldi-gedərdi. Gözəllik
qalıcı bir şey deyil ki, onu hər nüansda göz önünə gətirsinlər. Müəyyən yaşdan sonra
xarici görünüş xanımlarımızı tərk edir. Ancaq ağıl, istedad heç vaxt insanı tərk
etmir. Bunun üçün bacardıqca çalışmaq, öyrənmək, öyrəndikcə də bunu təcrübəyə
çevirib, öz üzərilərində sınamalıdırlar. Allahın işidir, sabahın nə
gətirəcəyini və gözəlliyin əlində olub-olmayacağını demək çətindir. Bunun üçün
daxili gözəlliyin və istedadın olması daha münasibdir.
- Səhnəyə
çıxan aktrisalar bəzi zamanlarda üzlərinin və saçlarının parıldaması üçün
müxtəlif maskalardan və parıldadıcı
vasitələrdən istifadə edirlər.
- Mən nə üzümə, nə də saçıma maska qoyuram. Hazırda
saçlarım dəhşətli dərəcədə tökülür. Seriallarda və filmlərdə saçlarımı müxtəlif
formalara saldıqları üçün isti fenlər onu qurudur və cansız hala salır. Bu da
elə bir məsələdir ki, ondan qaçış yoxdur. O ki qaldı maskalara, bu məsələlərdə çox tənbələm. İndi-indi başlamışam
maskalardan istifadə etməyə. Ola bilsin 35 yaşdan sonra hansısa maskalardan istifadə
etdim. Dəri quruluşum uşaq dərisinə bənzədiyi üçün üzüm kosmetika qəbul etmir. Bəzən
səhnəyə çıxanda belə kosmetikadan istifadə etmirəm. Çünki dərim çox həssasdır
və bir çox kosmetikaların tərkibindəki maddələri qəbul etməyib allergiya verir.
Eləcə də maskalar. Ola bilər ki, 35 yaşdan sonra hansısa kosmetoloqun yanına gedib,
məsləhət ala bilərəm. Amma indi üzümə heç bir maska vurmuram. Çalışıram ki, makiyajdan
az istifadə edim. Adi günlərdə makiyajdan istifadə etmirəm. Bunun görə də hələ ki
maskalara ehtiyacım yoxdur. 35 yaşdan sonra baxarıq. Eləcə də botoksun, sifətdə
nəyisə doldurmağın tamamilə əleyhinəyəm.
- "35-dən sonra” sözünü
çox işlədirsiniz. Yoxsa qocalmaqdan qorxursunuz?
- Əsla. Qorxmuram, hər bir yaşın öz gözəlliyi var. Çox
istəyərdim ki, o yaşda təbii üsulla da normal görünüm. Qırışları aradan
qaldıran və qocalmaq əleyhinə olan yeni çıxan proseduralardan istifadə etmək istəmərəm.
Nə qədər istəməsək də, ömür gedir, qocalırıq. Yaşlandıqdan sonra gedib özümü cavanlaşdırmağım
təbii ki, gülünc görünər. Bilmirəm, bəlkə indi belə danışıram, yaşım ötdükdən sonra
başqa hərəkətlər edəcəm. Xanımlar çalışırlar ki, cavanlıqlarını qoruyub saxlasınlar
və bunun üçün kosmetoloqlara müraciət edirlər. Ancaq indiki fikrimlə düşünürəm ki,
mən çox təbii qocalmaq istərdim, olduğum kimi. Yaşlandıqda isə, əgər hansısa bir
proseduradan istifadə etsəm, o zaman əvvəlki Günel olmayacam və bu da
tamaşaçılara maraqsız olacaq.
- İndiyə qədər hansısa
bir estetik əməliyyat etdirmisinizmi?
- Özümlə bağlı heç bir kompleksim yoxdur ki,
bəyənməyib bıçaq altına gedim. Burnum əməliyyat olunub. Bir dəfə səhnədə "Rəvayəti
Şahzadeyi Xəzər” tamaşasının məşq prosesində burnum qırıldı və əyildi. Elə həmin
an məni xəstəxanaya apardılar və burnuma müdaxilə edildi. Çox az müdaxilə olundu.
Ancaq başqa heç bir estetik əməliyyatım olmayıb. Həmin an tez-tələsik burnumu tikdilər
deyə, indi hiss edirəm ki, nəfəs almaqda problem yaşayıram. Bu hadisənin üzərindən
artıq 7-8 il keçib. Hərdən düşünürəm ki, nəfəs problemimi ortadan qaldırmaq
üçün burnumu düzəltdirim. Ancaq şəkillərimdə də var, mənim bundan əvvəlki
burnum daha gözəl idi.
- İncəsənət qurban
tələb edir deyirlər. Siz nələri qurban vermisiniz?
- Məşq proseslərində çox xoşagəlməz, ekstremal hallar
yaşamışam. Hətta bir dəfə "Oliver Twist” tamaşasında İlqar Cahangirlə məşq
edərkən səhnədən bilməyərək məni yerə atmışdı. Onurğam böyük zədə görmüşdü. Bu
kimi hadisələri tez-tez yaşayırıq. İndiki Günel Məmmədova olmağım üçün çox
qurbanlar vermişəm... Müəyyən layihələr olub ki, mənim həyatımı dəyişə
biləcəyinə rəğmən, onlardan teatra görə imtina etmişəm. Hər zaman teatrdakı
işimi digər fəaliyyətimdən üstün bilmişəm. Bəzən bu sənət sevgisi mənim
sağlamlığıma zərər də yetirib. Ancaq indi başa düşürəm ki, əgər sağlamlığım olmasa,
həyatda heç nə əldə edə bilmərəm. İndi öz sağlamlığımın qeydinə qalmağa başlamışam.
- Sizi Azərbaycan
teatrının sarı gəlini deyə çağırırlar və teatr, kino aləmində tək-tük təbii sarışınlardansınız.
Ancaq bəzən deyirlər ki, siz əslində qarayanız birisiniz və saçlarınızı boya ilə
saraldırsınız.
- Qətiyyən. Mən anadangəlmə sarışınam. Hətta mənim tələbəlik
illərimdə belə boyasız şəkillərim var. Bunların hamısını öz sosial şəbəkədəki
hesabımda paylaşıram. Əslində mənə baxanda bunu həmən anlamaq olar. Burda çətin
heç nə yoxdur.
- Xarici görünüşünüz
sizi azərbaycanlı xanıma bənzətmir. Bu, çətin anlarınızda köməyinizə çatıbmı?
- Çox olub. Simamım avropalı xanımlara bənzəməyindən
məmnunluq duyuram. Bir çox film və kinolarda xarici obraz kimi mənə tez-tez müraciət
edirlər. Görünüşümlə bağlı bir çox xarici filmlərdə də rol almışam. Bu baxımdan
qarşımda daha çox şanslar açılıb. Öz imicimdən və görünüşümdən çox razıyam. Bir
çox filmlərdə rus, italyan, gürcü xanımlarını canlandırmışam. Rejissorlar deyir
ki, səni hər bir xalqın nümayəndəsinə çevirmək mümkündür. Çünki üz cizgilərin buna
imkan verir. Bu da təbii ki, bir aktrisa olaraq məni məmnun edir. Xarici
görünüşümə görə heç kimə bənzəmirəm. Elə özüm kimiyəm. Bu görünüşüm məni
hamıdan fərqləndirir.
- Qidalanmağınıza fikir
verirsinizmi?
- Əslində qidalanmağıma o qədər də diqqət yetirmirəm.
Səhərlər ümumiyyətlə yemək yemirəm. Tək çay içib, evdən çıxıram. İş rejimim çox
gərgin olur. Hətta elə günlər olur ki, gün ərzində yemək imkanım olmur. Axşamlar
evə gələndə nə yedimsə odur. Sözün düzü, yeməklə heç vaxt dostluq etməmişəm. Sevdiyim
yeməklər də "fast-food”lardır, onlar isə ziyanlıdır. Amma rəqslə davamlı məşğul
olduğum üçün bu da özünü göstərə bilmir. Əslində iştaham olanda, oturub yaxşı yeyirəm.
Bununla yanaşı, yeməsəm, günlərlə qala bilərəm. Ancaq çaysız yaşaya bilmərəm.
- Bəzən gözəl qadın
görəndə deyirlər ki, o xanımın daxili gözəlliyi üzünə vurub.
- Hərdən nurani insanları görəndə hiss edirəm ki, o
insanın daxili də safdır. Mən insanları o qədər də yaxşı tanımıram. Ancaq real həyatı
səhnə hesab edib, gündəlik oynayan insanlar da var. İçi-çölü bir olan insanlar da
tanıyıram. İnsan nə yaşayırsa, onun simasında əks olunur. Ətrafımızda insanlar var
ki, birinə baxanda deyirlər, onun həyatı keşməkeşli olub. Üzdə mələk görünüb,
içəridən iblis olanlar da az deyil.
Xəyalə Rəis